Gɔwɔ tɔɔi 28

1Isaakə ə Ɉakɔbə təli, ə lúwɔ́ too mą, da yaa di yələ wala too, yɛ mą: «Və́ kɛ li yɛ́ Kanaan nɔi ɓɛ nɛ̨ɛ̨nu ta həɠə a ə́ nɛ̨ą. 2Həɠə, ə́ li Aramə ə́ kalá Betuɛlə pɔɔli, ə́ ə́ lee mąąhulɔnu Laban lon nɛ̨ɛ̨nu ta həɠə a ə́ nɛ̨ą.

3«Gɛ́ Huwalawala Kəlee Nąmu Yálá ə lúwɔ́ too yɛ́,

Ə ə́ kwəi nwun, ə́ lon damąą kaa,

Ə ə́ kɛ a hį́i tamąą di nąn.

4Núwɔ́i Yálá ə doo Abrahamə ɓa, naa ə hon yɛ́ ka ə́ huwu kaa,

nɔi ŋɛ̨i ə́ kaa ɉu, ə́ ɉɔlɔɓo ka ə́ huwu kəlee; Yálá ə kɛ.»

5Yili pulu, Isaakə ə Ɉakɔbə tɔɔ bələi, yɛ li Aramə galá Laban pɔɔli, Aramə mun Betuɛlə lon, yai a Ɉakɔbə da Esau di lee Rebeka mąąhulɔnu.

6Esau ə bələ mɛ̨n, yɛ Isaakə aa lúwɔ́ too Ɉakɔbə ɓa, aa dɛɛ Aramə yɛ li nɛ̨ą həɠəi laa. Esau ə mɛ̨n nwɔ̨nɔ̨, diɛ mą: «Ɓɛlɔwai Isaakə da Ɉakɔbə di kɛi di hvɛli la, Isaakə ə tɔ́n dɔɔ Ɉakɔbə ɓa, yɛ mą: ‹'Hvo Kanaan nɛ̨ɛ̨nu ta həɠə a ə́ nɛ̨ą.›» 7Ɉakɔbə ə nee da nąn di woo hon, ə həɠə yɛ li Aramə. 8Esau ə gbaɠala kaa, yɛ Kanaan nɛ̨ąą wɛli hvo di nąn Isaakə ɓa. 9Esau ə nɛɛmą, ə li ə Abrahamə lon Ismaɛlə lon nɛ̨ɛ̨nu Mahalatə həɠə a nɛ̨ą. Mahalatə mąąhulɔnu ɓaa a Nebayotə.

Ɉakɔbə kɛɛ lii Laban pɔɔli

Ɉakɔbə ə heen mo

10Ɉakɔbə ə həɠə Beɛrə-Seva, ə li Haran. 11Kpini ə pɛlɛ mą bələi, ə naai pɛli, ə laa, ə kwɛni laa nwun mu, yɛ yii. 12Ə heen mo, ə goto ta kaa heen bələ, dɔɔ nɔi ɓa, gwɛa kpɔ, yɛ tɛ yələkɔlɔn ma. Ə Yálá nwɔ malakaɠaa kaa diɛ tɛ, diɛ yɛɛ gotoi tii ɓa. 13Nąąlɔwai, Yai-Laa ə kɛ tɔɔni gwɛlɛ, yɛ mą: «Ɲą́ą́ gáá a Yai-Laa, ə́ nąn Abrahamə nwɔ Yálá da Isaakə nwɔ Yálá. Nɔi ŋɛ̨i ə́ kaa laani mɛ̨i, gáá pai dɛɛi ə́ pɔ, ka ə́ huwu. 14Ə́ huwu kaa pai tamąi yɛ muluun gbala. Ə́ huwu a ɓɛlɛ yɛnɛ̨ɛ̨ nąą kəlee. Yɛ́ ka ə́ huwu ka haalai ɓə, gáá pai lúwɔ́ tooi la yɛnɛ̨ɛ̨ nuą kəlee diɛ. 15Gáá ə́ pɔ, gɛ́ ə́ mąąkpɛ, ɓɛi lɔpee yá li laa, ŋą́ pənə ŋą́ pa a yɛ́ ɓɛ nɔi. Və́ pai gíli kulɔi ə́ hu, mɛ̨nįɠaa kpɔ ŋą́ mo yɛ́, ŋą́ gəlee pɔ mɛ̨nį kɛ.»

16Ɉakɔbə ə ɲɛ̨ilaa ɓo, yɛ diɛ: «É! A mɛ̨nįgɛ ɓɛ ɓə Yai-Laa kaa laa, gíli hvo kɛ ɉu!» 17Ə ɲɔw kpɔ kɛnɛ̨, yɛ diɛ: «Gɛɛnąąi ŋɛ̨i mąą ɲɔwuɔi, Yálá nwɔ pɛlɛ́ kpɔkpɔɔ ka, ɓɛ kaa a yələkɔlɔn ɉu pɛlɛ laaləi.» 18Ɉakɔbə ə muhəɠə yələwala pinɛ̨ɛ̨, gwɛni ŋɛ̨i ə naa nwun mu, ə ɉaŋą ə dɔɔ, ə wulɔ pu nwuɔ̨, ə gɛ a nąą kɔ́lɔn ɉɛn. 19Ɉakɔbə ə gɛɛnąąi tii laa hee a Betɛlə. Mukulaa ɓaa: Yálá nwɔ pɛlɛ́. Tɔlɔɔ, gɛɛnąąi tii laa ɓaa kɛ Luzə. 20Ɉakɔbə ə nwoo kwɛlɛ Yálá ɓa, yɛ mą:

Yai-Laa a lɛɛ bɔ́ nwɔ́ hiɛ ŋɛ̨i hu, ə mą́ą́kpɛ, ə gɔ̨nɔ̨n gɛ, ə mąąhəɠə kɛ, 21ŋį́ búlu pənə ŋį́ pa ną́n ɲəi bɛlɛ́n, a gɔ́lɔi pɔ̨nɔ̨ɔ̨, Yai-Laa a kɛ a nwɔ́ Yálá. 22Gwɛni ŋɛ̨i ŋą́ dɔɔ ɓɛ, gaa pai kɛi a Yálá nwɔ pɛlɛ́, hɛn kpɔ Yálá a hvaa mą ŋą́ ɉɔlɔɓo, ŋą́ bow nąą tɛɛ bɔ.

Currently Selected:

Gɔwɔ tɔɔi 28: BKPG

Highlight

Copy