Gɔwɔ tɔɔi 27
27
Isaakə ə lúwɔ́ too Ɉakɔbə ɓa
1Isaakə ə kɛ kɛa a hulɔgolo, hvo kɛa kɛi kɛɛ kaa. Ə non dɔlɔɔ Esau təli, yɛ mą: «Esau!»
Yili yɛ mą: «Ɲą́ą́ ga.»
2Isaakə yɛ mą: «Ə́ kaa gáái! Ŋą́ą́ pɔlɔ kɛa, və ɉáá yələ kɔ́lɔn. 3Ə́ wɔ kilɛn həɠə, ə́ bɛlɛ mɛ̨ikɔwɠaa diɛ, ə́ li ə́ huwɔ paa ə́ paa la. 4Ə́ ɲili kpɔ yɛ bələi gáá la bɔ, ə́ paa la, ŋį́ mį́i, ŋą lúwɔ́ too yɛ́, gɛɛ və́ pa kɛ haai.»
5Ɓɛlɔwai Isaakə ə kɛi mɛ̨nį tii ɓo la Esau ɓa, Rebeka ə kɛ tɔɔni nąą kwɛlɛ, yɛ mɛ̨n. Yii kɛa Esau ə li noɉo lɔwɔi, 6Rebeka ə mo non Ɉakɔbə ɓa, yɛ mą: «Ŋą́ą́ mɛ̨nį ta mɛ̨n, ə́ nąn yɛ mo Esau ɓa, pa ŋį́ mo yɛ́. 7Ka nąn ə kɛ Esau ɓa: ‹Li ə́ huwɔ paa, ə́ paa la, ə́ ɲili a nɛlɛɛ, ŋį́ mį́i, ŋį́ lúwɔ́ too yɛ́ Yái-Laa ɲɛ̨i ɓa, gɛɛ və́ pa kɛ haai.› 8Nón, nwooi ŋɛ̨i gáá pai moi yɛ́, gɛ kpɔlɔ yɛ pələi gáá pai moi la yɛ́. 9'Li daatɛlɛɛɠaa pulu, ə́ ɓolu gbɔn nɛlɛɛ hveelɛ hon ə́ paa la bɔ́, ŋį́ ɲili kpɔ a nɛlɛɛ yɛ bələi ə́ nąn gaa la bɔ. 10Ə́ ɉəɠə kɛa ə́ li la ə́ nąn bɔ, ə mį́i, ə́ lúwɔ́ too yɛ́, gɛɛ hvo pa kɛ haai.»
11Ɉakɔbə yɛ nee ɓa: «Esau kɔ́lɔ ɓa ləɠa kaa mą, ɲą́ą́n, da hvo mą́ą́. 12Akɛ ną́n a ɲee pɛlɛ gɔ́lɔ́ ɓa, a wala gɔ́lɔ́ ɓa ləɠa kaa mą́ą́, hvo pai lúwɔ́ too mą́ą́, gaa pai nɛ̨ŋɛ̨n naai.»
13Ɉakɔbə nee yɛ mą: «Nón, akɛ a ə́ nɛ̨ŋɛ̨n naa, a lɛɛ mą́ą́. Mɛ̨nį kəlee ə mą kɛ, yii ŋɛ̨i ŋį́ mo yɛ, 'li ə́ gɛ tii.»
14Ɉakɔbə ə li, ə molu gbɔn veelɛi tii hon, ə paa la nee pɔ, ə ɲili kpɔ a Isaakə lííɓa. 15Yili pulu, Rebeka ə non Esau nwɔ həɠəi tɔ̨nɔ̨ həɠə, yii kpɔ tii kɛ nɛlɛɛ, yɛ ɓo bɛlɛ́n, ə doo Ɉakɔbə kwaną. 16Ə molu kɔ́lɔi tii pɛlɛ non gəŋə hu da ɲee ɓa, da ɓɛɠaai nąą ə kɛ kpɔlɔɔ-kpɔlɔɔ 17Gɔ̨nɔ̨n tii ə bɛli, ə ɉəɠə ə dɛɛ Ɉakɔbə pɔ, yɛ mą: «'Li la.» 18Ɉakɔbə ə li la nąn bɔ, yɛ mą: «Ną́n!»
Yili yɛ mą: «Gbɛɛ ɓaa yɛ́?»
19Ɉakɔbə yɛ nąn ma: «Ɲą́ą́, ə́ lon dɔlɔɔ Esau li, mɛ̨nį ə́ kɛ mą́ą́ gɛ, ŋą́ą́ gɛ. Ŋą́ą́ pa a ə́ kɔ̨nɔ̨n, ə́ muhəɠə, ə́ mį́i, ə́ lúwɔ́ too mą́ą́.»
20Isaakə yɛ non ma: «Ə́ tɛɛ ləi yɛ́ ɉuwɔi ŋɛ̨i hɔlɔɓo kpɔlɔ tii ɉa?»
Ɉakɔbə yɛ nąn ma: «Yai-Laa ə́ wɔ Yálái, ə hvaa mą, ŋį́ kwiɛn a ɉuwɔi ŋɛ̨i, ŋį́ baa.»
21Isaakə yɛ non ma: «Lɛɠɛ ɓɛ ŋį́ ɲee pɛlɛ ə́ kɔ́lɔ ɓa, a kɛ Esau ɓaa yɛ́.»
22Ɉakɔbə ə mąąlɛɠɛ nąn Isaakə ɓa, yili ə ɲee pɛlɛ gɔlɔ ɓa, yɛ mą: «Nui ŋɛ̨i woo kaa a Ɉakɔbə woo, kɛlaa, ɲee yɛ ɓo a Esau yee.» 23Kɛlaa, Isaakə hvo pɛli Ɉakɔbə kɔ́lɔn ɉii, mąąhɔlɔɓo, ɲee nąą kəlee ləɠa ə kɛ mą yɛ Esau. Kɛlaa, gɛɛ hvo núwɔ́i tii too, 24ə pənə ə mąąnikɛ, yɛ mą: «Nón Esau kpɔ-kpɔɔ ɓaa yɛ́?»
Ɉakɔbə ə nwoo ŋąąpənə yɛ mą: «Ee! Esau ɓaa ɲą́ą́.»
25Isaakə yɛ mą: «Nón, gɔ́nɔ̨n naa ə́ və ŋą́ mį́i, ŋą́ lúwɔ́ too yɛ́.»
Ɉakɔbə ə nąn gɔ̨nɔ̨n nąą, nąn gɛɛ mį́i, ə lɔɔ pu ə dɛɛ nąn bɔ, yili yɛ gbələ. 26Yili pulu, Isaakə yɛ non ma: «Nón, lɛɠɛ ɓɛ, ə́ laa gə́ŋə la.»
27Ɉakɔbə ə lɛɠɛ nąn ma, ə laa gəŋə la, Isaakə ə ɉəɠə kun mɛ̨n, ə lúwɔ́ too mą, yɛ mą: «A tɛ̨ą, nón gɔlɔ kun gaa kpɔ yɛ lɔwɔi Yai-Laa aa lúwɔ́ too mą.
28«Gɛ́ Yálá ə luwuluwu tulɔ pu yɛ́.
Ə lɔi hɛn gɔw tɛɛ ə́ pɔ,
ə́ mɔ̨nun ɉɔlɔɓo kɛnɛ̨, da lɔɔ nįnɛ̨.
29Yɛnɛ̨ɛ̨ nąą kəlee ə kɛ ə́ yee mu,
hį́i kəlee di kwɛli hvilɛn yɛ́,
ə́ hee ə́ kaayɔwɔɠaa nwun na,
ə́ lee lonnii di kwɛli hvilɛn yɛ́.
Nui a ə́ nɛ̨ŋɛ̨n naa,
Yálá ə nɛ̨ŋɛ̨n naa.
Nui a lúwɔ́ too yɛ́,
Yálá ə lúwɔ́ too mą.»
30Isaakə ə kpɛɛ lɔ a núwɔ́ toɔ Ɉakɔbə ɓa, Ɉakɔbə ə lɛɛ lɔ kulɔi, niɛ Esau yɛ həɠə noɉo lɔwɔi pələ, yɛ pa. 31Yaa kpɛli ə nąn gɔ̨nɔ̨n ɲili kpɔ a nɛlɛɛ, yɛ paa la. Yɛ mą: «Ną́n, ŋą́ą́ pa a ə́ kɔ̨nɔ̨n, ə́ muhəɠə ə́ mį́i, ə́ lúwɔ́ too mą́ą́.»
32Isaakə yɛ mą: «Gbɛɛ ɓaa yɛ́?»
Esau yɛ mą: «Ə́ lon nu pɔlɔlaamun Esau li.»
33Isaakə kwəi ə pili mą kpɔ kɛnɛ̨, nąą kəlee yɛ kpɛlin, ə pənə ə mąąnikɛ, yɛ mą: «Kɛtii, gbɛɛ ɓə kan paa a gɔ́nɔ̨n, yai ŋį́ mįi kpɔlɔ yɛ́ lɔ? Núwɔ́i kɛ ná, ŋą́ą́ gbɛa doo mą, nwɔɔ li kɛa.»
34Esau ə nąn nwoo mɛ̨n nɔ, ə tómą kpɔ kɛnɛ̨, ə hvɔlɔɔ nąn ma, yɛ mą: «Ną́n, ɲą́ą́ gbɛli mąn 'lúwɔ́ too mą́ą́!»
35Isaakə ə nwoo ŋąąpənə, yɛ mą: «Ə́ ləɠə, gbąnąmun tii aa laa hilii, aa pa, lúwɔ́i mąąnɛ̨ɛ̨ kɛ ə́ ɉɔlɔɓo, aa mówó, ŋą́ą́ doo mą.»
36Esau yɛ mą: «Nə́ɠə laa kpɔ-kpɔɔ ɓaa: Ɉakɔbə. Mąąhɔlɔɓo, aa gbana túwɔ́ ɓo a ɲą́ą́ veelɛnąą ka. Dɔlɔɔ, ə nwɔ́ liɛlaa kulɔ ɲə́i, veelɛnąą ka aa gɛ yiihu, aa nwɔ́ lúwɔ́i nwuɔ̨.»
Esau yɛ nwɔ̨nɔ̨ nąn ma: «Lúwɔ́ takpɛli hvo laa, hvó doo mą́ą́?»
37Isaakə yɛ mą: «Ŋą́ą́ gbɛa gɛ a ə́ wɔ mɛ̨nį nąmu, ŋą́ą́ gaayɔwɔɠaa kəlee lɔ ɲee mu, mɔ̨nun da lɔɔ di kaa pai kɛi ɲəi kɛnɛ̨. Hɛn da hvo laa və́ gɛ yɛ́, nón.»
38Esau ə hvɔlɔɔ nąn ma, yɛ mą: «Ną́n, lúwɔ́ tɔ̨nɔ̨ lɔ ɓə kɛ ə́ la? 'Lúwɔ́ too mą́ą́ ɲą́ą́ gbɛli.»
Esau ə lɛɛ lɔ yili ɓoi, ə pola a wɔlɔ.
39Nąn yɛ mą:
«Hihɛn nɛlɛ lɔi pulu pələ kwɛa la ɓə, ə́ kaa pai kɛi laa,
ɓɛi luwuluwu kpɛli hva pu laa.
40Kulaalaa lɔ ɓə yá ə́ wɔ yɛnɛ̨ɛ̨ kɛ ɉu,
yá kɛ a ə́ ləɠə nwɔ tímun,
Kɛlaa yələ ta, ə́ kaa pai tɔi a ə́ nwąnąi ə́ kulɔ ɲee mu.»
Ɉakɔbə ə pu ə li Laban pɔ
41Ə həɠə ɲələ ɓa, Esau da Ɉakɔbə di hvo kɛ nɛ̨ɛ̨li, núwɔ́ nwuɔ̨ mɛ̨nįi tii ɓa. Esau ə gili tee gwəi pələ yɛ: «Ną́n a pa kulɔi taai, ɉaa mɛ̨i ɓə ŋą Ɉakɔbə paa laa.» 42Di Esau wooi tii kəlee hukulɔ Rebeka ɓa. Rebeka yaan ə Ɉakɔbə təli, ə nwoo hukulɔ mą, yɛ mą: «Ə́ liɛ Esau kaa bɔ ə nwąną kulɔ yɛ́, ə ə́ paa.» 43Yili ɓa, nón, ə́ wəli tɔɔ nwóó ɓa. 'Ə́ muhəɠə, 'li ə́ ə́ mąąkilɛ níɛ Laban pɔɔli Haran. 44Yá li, ə́ lɛɛ nąą, ə lɛɛ ɉu, ə́ liɛ lii ə laa mą. 45Ɓɛlɔwai, ə́ liɛ nwɔ liiholi kɔ́lɔ a haa la mą, mɛ̨nįi ŋɛ̨i ə́ gɛ la gili ə kpɛɛ ŋą, a ə́ wɛlɛɛ tɔɔ ə́ pa. Və́ pa hvɛɠɛ a ka nu hveelɛi hvóló tɔ̨nɔ̨ yee mu.
46Rebeka yɛ Isaakə ɓa: «Nón nɛ̨ąni hveelɛi ŋɛ̨i a Hɛtə nɛ̨ąą, daa yɛnɛ̨ɛ̨ hee ɉú. Ɉakɔbə yaa kpɛli a ɓɛ nɛ̨ɛ̨nu həɠə, nwɔ́ yɛnɛ̨ɛ̨ nwun və kɛa mą.»
Currently Selected:
Gɔwɔ tɔɔi 27: BKPG
Highlight
Share
Copy
Want to have your highlights saved across all your devices? Sign up or sign in
