Gɔwɔ tɔɔi 26
26
Isaakə da Abimelɛkə di mąą mɛ̨nį
1Pulu kɛnɛ̨ ta ə too laa nɔi, kɛlaa, yii ŋɛ̨i wɔlɔ kɛ a Abrahamə nwɔ lɔwai, yili hvəi. Isaakə ə həɠə yɛ li Gerarə daai Filisti nuą di wɔ tɔɔmun Abimelɛkə pɔ. 2Yai-Laa ə gbɔwɔ lɛ Isaakə ɓa, yɛ mą:
«Və́ kɛ li yɛ́ li Eziptə lɔi hu, kɛlaa, ɓɛi ŋį́ nąą lɛ yɛ́, li ə́ hee laa. 3Hee laa, gáá pai kɛi ə́ pɔ, ɛlɛɛ, ŋį́ lúwɔ́ too yɛ́, mąąhɔlɔɓo, yɛ́ ka ə́ huwu ɓə gáá nɔi ŋɛ̨i tɛɛi ka pɔ. Bələ ɓə, ŋį́ gwɛ́la la ə́ nąn Abrahamə ɓa, gáá pai nwóó tii pɔ mɛ̨nį kɛi. 4Gáá pai ə́ huwuhu kɛnɛ̨i yɛ yələkɔlɔn ɉu pɛmɛ̨nɛ̨n gɔw. Gáá nɔi ŋɛ̨i kəlee tɛɛi ə́ huwu pɔ, diɛi tii di haalai ɓə gáá pai lúwɔ́ tooi la hį́i kəlee ɓa. 5Mąąhɔlɔɓo, Abrahamə ə nwóó mɛ̨n, ə nwɔ́ tɔ́nŋąąi hon, da bɔ liɛwooɠaa, ə́ nwɔ́ tiɓoɠaa kɛ.»
6Yili ɓə gɛ Isaakə yɛ hee Gerarə daai. 7Nɔi tii hu nuą, di Isaakə mąąnikɛ nɛ̨ą mąą mɛ̨nį hu, diɛ mą: «Ə́ wɔ gbɛɛ ɓəi?»
Ə di woo ŋąąpənə yɛ diɛ: «Mą́ą́hala li.»
Mąąhɔlɔɓo, ə kɛi ɲɔw kɛi diɛ: «Nɛ̨́ą li.» Ə gɛ, nɔi tii hu nuą di hvo pa kɛ baa, mąąhɔlɔɓo, Rebeka lɛlɛɛi kɛ.
8Yii kɛa di lɔwai tamąą kɛ nɔi tii hu, hvóló ta, Abimelɛkə Filisti nuą di wɔ tɔɔmun, ə ɲɛ̨i hee vinɛtɛlɛ la, ə Isaakə kaa da Rebeka diɛ pələ kɛ. 9Abimelɛkə ə Isaakə təli, yɛ mą: «A mɛ̨nįngɛ ə́ nɛ̨ą ɓəi! Ə́ tɛɛ ləi yɛ́ kɛ mą: ‹Mą́ą́hala li?›»
Isaakə ə nwoo ŋąąpənə, yɛ mą: «Ŋą́ mo tii, mąąhɔlɔɓo, ŋį́ kɛi ɲɔw, gɛ́ diɛ: ‹Di hvo pa báá mąą mɛ̨nį ɓa.›»
10Abimelɛkə ə pənə yɛ mą: «Lə ɓə ŋɛ̨i ə́ gɛ a kuɔi? Nąą wolo ə lɛɛ kpɔlɔ tiikpə, nu ta yɛ kɛ ə hvilɛn ə́ nɛ̨ą pulu. Yili a kɛ tii kɛa kɛ, yá ku kɛ a hɔn mąą nuą Yálá ɲɛ̨i ɓa.»
11Abimelɛkə ə nɛɛmą, ə nwɛlɛɛ tɔɔ nɔi nąą kəlee, yɛ diɛ: «Nui lɔpee a kpə́n ɲali ɉulɔnui ŋɛ̨i da nɛ̨ą diɛ, kwa mąą nu paa.»
12Mąą kwɛlan tii hu, Isaakə ə tíi kɛ nɔi tii hu, ɉi hɛnŋąą di lɛlɛ kpɔ kɛnɛ̨, yii ə ɉi, ə ɉeei nwun dɔ̨nɔ̨ hɔlɔɓo. Mąąhɔlɔɓo, Yai-Laa ə lúwɔ́ too mą. 13Nwɔ hɛn gɔw ta lɔ ɓə kɛi laa mɛ̨i, ə kɛ kpɔ nɔi tii hu a hɛn gɔw nąmu kɛnɛ̨. 14Ɓɛlaa kpulu kɛnɛ̨ ə kɛ ɲəi, da ɓolu kpulu, ə mą kɛ da nįŋɛ̨ kpulu kɛnɛ̨, bɛlɛɛ luwɔɠaa diɛ.
Isaakə ə nwoo kwɛlɛ Abimelɛkə ɓa
Filisti nuą di kɛi kɛa tolo kulɔ a Isaakə. 15Ɲá-lɔwaɠaa kpɔ tii Isaakə nąn Abrahamə nwɔ luwɔɠaai di dee ɓɛlɔwai ə kɛ la yɛnɛ̨ɛ̨, Filisti nuą di pɔ́lɔ́ pu gəlee hu, di nąąhvɛɛ. 16Abimelɛkə yɛ Isaakə ɓa: «Həɠə ɓɛ, ə́ li, mąąhɔlɔɓo, ə́ yee aa walawala, aa tɛɛ kuɔ.»
17Isaakə ə həɠə laa, ə li ə hee Gerarə ɲa-ɓoloon ɓɔ. 18Ɲálɔwai tii wɔlɔ Isaakə nąn Abrahamə ə dee ɓɛlɔwai ə kɛ la yɛnɛ̨ɛ̨, yai Filisti nuą di naahvɛɛ a pɔ́lɔ́, Isaakə ə gəlee hukulɔ, naaɠaai tii nąn Abrahamə ə ɉee diɛ, ə pənə ə ɉee diɛ.
19Isaakə nwɔ luwɔɠaai di yálɔwa tee ɓoloon ɉu, di həli ya ɓa, hva kpala. 20Gerarə daai ɓɛlaa mɛ̨i kaa nuą, di hvaa tee Isaakə nwɛiɠaa diɛ, diɛ kɛ yiliɠaai diɛ: «Ɲai ŋɛ̨i kaa a ku wɔɔ.» Yili ɓə gɛ, Isaakə ə nąą laa hee a: Esɛkə, mukulaa ɓaa: «hvaa». Mąąhɔlɔɓo, di hvaa tee laa diɛ. 21Isaakə nwɔ luwɔɠaai di pənə di yálɔwa takpɛli tee, hvaa ə tee nwɔ̨nɔ̨ yili mąą mɛ̨nį hu. Isaakə ə nąą laa hee a: Sitna, mukulaa ɓaa: «laa haa». 22Di həɠə nwɔ̨nɔ̨ laa, di li di ɲálɔwa ɉaaɓanąą tee, yili nwɛi, hvaa hvo tee ɉu. Isaakə ə nąą laa hee a: Rehovotə, mukulaa ɓaa a: «ɲee kɔ́nwɔ̨n ɉu kɛnɛ̨». Mąąhɔlɔɓo, Isaakə ə kɛ diɛ: «Yai-Laa aa ku ɲąąnɛ̨ɛ̨, ə gɛ, ku yee kɔ́nwɔ̨n ɉu ə kɛnɛ̨ ɓɛ nɔi.»
23Isaakə ə həɠə laa, yɛ li Beɛrə-Seva. 24Mąą kpinį tii hu, Yai-Laa ə gbɔwɔ lɛ mą, yɛ mą:
«Ɲą́ą́ ɓə gáá a ə́ nąn Abrahamə nwɔ Yálá,
hvó ɲɔw, gáá ə́ pɔ.
Gáá pai lúwɔ́ tooi yɛ́, ŋį́ ə́ huwuhu ɓɛlɛ,
nwɔ́ tímun Abrahamə mąą mɛ̨nį ɓa.»
25Isaakə ə haláá kulɔi pɛli laa, ə Yai-Laa hvɛli a naa. Ə taa pu laa. Nwɔ luwɔɠaai di yálɔwa tee laa.
26Nąąlɔwai, Abimelɛkə ə həɠə Gerarə, yaa, mɛlan Ahuzatə da nwɔ kɔlaɠa nwun nąmu Pikɔlə, di pa Isaakə pɔ. 27Isaakə yɛ diɛ: «Lə mɛ̨nį ɓa ka hvilɛn ŋąą búlu, ɲą́ą́n nwɛli hvo kaa, ɛlɛɛ, kaa gbɛ́ ka pɔɔli?»
28Diɛ mą: «Kwaa gaa, kuɔ: Yai-Laa kaa ə́ pɔ. Mɛ̨nį gɛi, ku kaa la bɔ mįnɛ̨ ə kɛ gwa kaa ni gu lɔwai, yaa li. 29Ə́ kwɛla, yɛ́ hvó pai mɛ̨nį ɲɔ̨n gɛi a kuɔ. Kuɔ kpɛli ku hvo pai mɔ̨nɔ̨ laai yɛ́. Mąąhɔlɔɓo, ku hvo kɛ mɔ̨nɔ̨ lɔ li ə́ pɔ; ku ə́ hon nɔ a ɓɛlɛlaa ə́ həɠə ku pɔɔli liilaa hu. Ə́ kaa a Yai-Laa nwɔ lúwɔ́ lon.» 30Isaakə ə di ɓɛlɛ hee, di di laamįi, di di kpələ. 31Mąą yələ laa ɓoɔ, yələ wala pɔ, di di woo kwɛlɛ di kee ɓa, di yələwala too, di taɠa di kee ɓa a nɛlɛɛ.
32Voló tɔ̨nɔ̨i tii yee mu, Isaakə nwɔ luwɔɠaai di pa di mɛ̨nį ta ɓo mą, yɛ hvilɛn na ɲálɔwa nįnɛ̨ ɓa, yii di kɛi dee, diɛ mą: «Kwaa həli ya ɓa.» 33Isaakə ə ɲálɔwai tii laa hee a: «Sivea.» Yili ɓə gɛ, háá ɓa háá, da kɛ daai tii laa ɓaa: Beɛrə-Seva, mukulaa ɓaa: «mįnɛ̨ həɠə yálɔwa.»
Esau nwɔ nɛ̨ą həɠə mɛ̨nį
34Esau kaa kwɛlan ə kɛ a kwɛlan bownąąn, ə nɛ̨ą hveelɛ həɠə. Dɔ̨nɔ̨ ɓaa: Yehuditə, yai kɛ a Hɛtə mun Beeri, non nɛ̨ɛ̨nu. Veelɛnąą ɓaa: Basmatə, Elɔn Hɛtə mun, non nɛ̨ɛ̨nu. 35Nɛ̨ąą hveelɛi tii di ɲɛ̨ikɔw kpɔlu hee Isaakə da nɛ̨ą Rebeka diɛ.
Currently Selected:
Gɔwɔ tɔɔi 26: BKPG
Highlight
Share
Copy
Want to have your highlights saved across all your devices? Sign up or sign in
