Gɔwɔ tɔɔi 29
29
Ɉakɔbə da Rasɛlə
1Ɉakɔbə ə hvilɛn bələ ɓa, yɛ li Kɛdɛmə lonnii di wɔ lɔi hu. 2Ə́ həli yɛɛ kɔ́wɔ ta hu yálɔwa ta ə ɓo laa, taatɛlɛɛ kpulu heei haaɓa ə ɓo laa, diɛ di hvii tɔɔ, mąąhɔlɔɓo, taatɛlɛɛ, kpələi li kɛ. Kwɛni kɛnɛ̨ ta ɓə kɛ laani ɲálɔwai tii la. 3Ɓɛlɔwai kɛ daatɛlɛɛɠaa kəlee da di ŋąąkpɔn na, Nąąlɔwai ɓə da tinɛ̨n na mą, di ɉəɠə la ɲálɔwa la, daatɛlɛɛɠaa da di kpələ, di pənə di naa laa.
4Ɉakɔbə ə daatɛlɛɛ mɛ̨i kaa nuą tii mąąnikɛ, yɛ diɛ: «Mɔ́lɔ́ni! Ka həɠə mį?»
Diɛ mą: «Ku həɠə Haran daai.»
5Ɉakɔbə yɛ diɛ: «Ka Nahɔrə lon ɉulɔnu Laban kɔ́lɔn?»
Diɛ mą: «Ku gɔlɔn.»
6Ɉakɔbə yɛ diɛ: «Gaa laa kpɛli?»
Diɛ mą: «Gaa laa kpɛli. Laban kpɔ, non nɛ̨ɛ̨nu Rasɛlə ka tii pai ɓɛlii, da nwɔ taatɛlɛɛɠaai.»
7Ɉakɔbə yɛ diɛ: «Hvóló kɛnɛ̨i ni, taatɛlɛɛ lɔi lɔwai hvəi, ka ya tɛɛ di pɔ, di di kpələ, ka pənə ka li a diɛ, di kala mį́i.»
8Diɛ mą: «Ku hva pɛli ku hvo mɛ̨nį ta kɛ, hvo kɛli ku ɓɛlaa kəlee ɲąą a kpɔn, Nąąlɔwai ɓə, kwa gwɛni həɠə la ɲálɔwa la, ku ya tɛɛ daatɛlɛɛɠaa pɔ, di di kpələ.»
9Ɉakɔbə da daatɛlɛɛ mɛ̨i kaa nuąi tii di lɛɛ lɔ mɛ̨nį ɓoi, Rasɛlə yɛ pa a nąn nwɔ taatɛlɛɛɠaai. Mąąhɔlɔɓo, Rasɛlə ə kɛ a taatɛlɛɛ mɛ̨i kaa mun. 10Ɓɛlɔwai Ɉakɔbə ə nee mąąhulɔnu Laban lon nɛ̨ɛ̨nu Rasɛlə kaa la, da Laban nwɔ taatɛlɛɛɠaa diɛ pa, Ɉakɔbə ə lɛɠɛ ɲálɔwa ɓa, ə gwɛni həɠə ɲálɔwa la, əgɛ, Laban nwɔ taatɛlɛɛɠaa tii di di kpələ. 11Ɉakɔbə ə Rasɛlə nɛ̨nɛ̨ɓo, yɛ wɔlɔ. 12Ɉakɔbə yɛ Rasɛlə ɓa: Ə́ nąn mąąhala Rebeka lon maa a ɲą́ą́. Rasɛlə ə gilɛ həɠə, ə li ə mo nąn ma. 13Yii lɔ Laban ə mąąhala Rebeka lon ɉulɔnu pa mɛ̨nį bələ mɛ̨n, ə gilɛ həɠə, ə li ə Ɉakɔbə laakwiɛn, da yaa di pa bɛlɛ́ laaləi. Ə mɛ̨nį kəlee hukulɔ Laban ɓa.
14Laban yɛ Ɉakɔbə ɓa: «Ə́ kaa a ɉúwu ta, gu ɲąmą kaa tɔ̨nɔ̨.»
Ɉakɔbə ə ɲąnin dɔ̨nɔ̨ kɛ Laban yəi bɛlɛ́n.
Ɉakɔbə nwɔ nɛ̨ą həɠə mɛ̨nį
15Hvóló ta kɛa, Laban yɛ Ɉakɔbə ɓa: «Ə́ kaa kpɔ a nwɔ́ nu tɛ̨ą li, kɛlaa, mąą hvo nɛ̨ɛ̨li hvó kɛ lɔ tíi mą́ą́ a mɛ̨inɛ̨ɛ̨. Gáá bɔ, ya kɛi tí mą́ą́, yii mąąnɛ̨ɛ̨ ŋį́ dɛɛ ə́ pɔ, ə́ vaa ɓo mą́ą́.»
16Yaan, Laban lonnii nɛ̨ąą di kɛ hveelɛ, nu pɔlɔlaamun nąą ɓaa: Lea, nəɠə laa ɓaa: Rasɛlə. 17Lea ɲɛ̨ilaa hvo kɛ lɛlɛ li, kɛlaa, Rasɛlə nwɛi, mąą kələn deɛi kɛ a nɛlɛɛ. 18Rasɛlə ɓə nwɛli ə too Ɉakɔbə ɓa. Ɉakɔbə yɛ Laban ɓa: «Gáá kóló kɛi yɛ́ kwɛlan mɛ̨ihveelɛ, ə́ ə́ lon nogololaamun Rasɛlə tɛɛ bɔ́ a nɛ̨́ą.»
19Laban ə hvaa mą, yɛ mą: «Nón nɛ̨ɛ̨nu tɛɛ ə́ pɔ hviɛlaɓoɔi ŋį́ dɛɛ nu takpɛli pɔ ɓa. Gu lɛɛ ɓɛ.»
20Ɉakɔbə ə Rasɛlə mąą kóló ɓo Laban pɔ, a kwɛlan mɛ̨ihveelɛ. Kɛlaa gwɛlan mɛ̨ihveelɛi tii ə kɛ Ɉakɔbə ɲɛ̨i ɓa a ɉu kpua, yɛ hvóló hveelɛ, mąąhɔlɔɓo, nɛ̨ɛ̨nu wɛli ə kɛ mą. 21Gwɛlan mɛ̨ihveelɛi tii tɛɛ pulu, Ɉakɔbə yɛ Laban ɓa: «Guui gu dɔɔi, ɲələ aa ɉəli, nɛ̨́ą tɛɛ kɛa bɔ́, kwa yaa ku kɛ kɛa ku yəi bɛlɛ́n.»
22Nɛ̨ɛ̨nu laalɛ yələ, Laban ə daa kalanɉonŋąą təli, da diɛni di heei ə kɛ tɔ̨nɔ̨, di nɛ̨ɛ̨nu laalɛ kwəinɛ̨ɛ̨ kulɔ. 23Yələ wulii, Laban ə Lea həɠə, də li di nąąlɛ Ɉakɔbə pɔ bɛlɛ́n, da yaa di yii laa. 24Laban ə nwɔ tí nɛ̨ɛ̨non Zilpa həɠə ə dɛɛ Lea pɔ a nwɔ tímun. 25Yələɓoɔ, Ɉakɔbə ə Lea kaa, gwəi ə pili mą; yɛ Laban ba: «Lə ɓə ŋɛ̨i ə́ gɛ a ɲą́ą́i? Rasɛlə ɓə ŋį́ mąą kóló ɓo, ya ɓə ə́ mówo, ə́ Lea həɠə ə́ dɛɛ bɔ́?»
26Laban yɛ Ɉakɔbə ɓa: «Ɓɛ nɔi, di hva nɛ̨ɛ̨non dɛɛ hilɛtai niɛ tɔwɔ. 27Ka nɔwɔ tɔ̨nɔ̨i ŋɛ̨i kɛ, ka nɛ̨ɛ̨nui! Yili pulu, yá kwɛlan mɛ̨ihveelɛ kóló kɛ mą́ą́, ŋį́ nəɠə tɛɛ ə́ pɔ.»
28Ɉakɔbə ə hvaa mą, da Lea di nɔwɔ tɔ̨nɔ̨i tii laa kulɔ, ɛlɛɛ Laban ə non Rasɛlə tɛɛ bɔ a nɛ̨ą. 29Yili pulu, Laban ə Rasɛlə tɛɛ Ɉakɔbə pɔ, ə bɛlɛ nwɔ tí nɛ̨ɛ̨nu Bilha ɓa. 30Ɉakɔbə da Rasɛlə di lɔ pɛlɛ́n, Rasɛlə wɛli ə too Ɉakɔbə ɓa ə tɛɛ la Lea ɓa. Ɉakɔbə ə pənə ə kwɛlan mɛ̨ihveelɛ kɛ Laban pɔɔli, yɛ Rasɛlə mąą kóló ɓo.
Ɉakɔbə lonnii
31Yii kɛa Yai-Laa ə gaa yɛ Ɉakɔbə aa Rasɛlə wɛli la kɛ aa dɛɛ Lea ɓa, ə Lea kwəi nwun, ə Rasɛlə kɛ a kpomąnɛ̨ą. 32Lea ə koo həɠə, ə lon ɉulɔnu kaa, ə naa hee a: Rubɛn. Lea yɛ mą: «Yai-Laa aa ɲɛ̨́i mąąwɛli kaa. Nwɛ́li kaa kɛa pai tooi ɉílɛ ɓa.» 33Lea ə pənə nwɔ̨nɔ̨ ə bulu ɓa koo həɠə, ə lon ɉulɔnu kaa, ə naa hee a Simeɔn. Lea yɛ nwɔ̨nɔ̨ mą: «Yai-Laa aa gaa yɛ nwɛ́li hvo too li ɉílɛ ɓa, ya ɓə gɛ yɛ gɔ́ a ɉulɔnu yii.» 34Lea ə pənə nwɔ̨nɔ̨ ə koo həɠə, ə lon ɉulɔnu kaa, ə naa hee a Levi. Yɛ mą: «Yii nwɛi, ɉílɛ kaa kɛa pai kanąn ɉii ɲə́i, mąąhɔlɔɓo, kwa yaa kwaa lon ɉinąą haaɓa hɔlɔɓo.» 35Lea ə pənə nwɔ̨nɔ̨ ə koo həɠə, ə lon ɉulɔnu kaa, ə naa hee a Ɉuda. Yɛ nwɔ̨nɔ̨ mą: «Yii ŋɛ̨i nwɛi, gáá Yai-Laa hɛɠɛɛɓoi, ŋį́ mąmąɓo.» Ɉuda hɔlɔɓoɔ pulu, Lea ə kpɛla lon gaa ɓa.
Currently Selected:
Gɔwɔ tɔɔi 29: BKPG
Highlight
Share
Copy
Want to have your highlights saved across all your devices? Sign up or sign in
