Rɔmnda 7

Vana laalanndo vi a ba tɔŋndo o dialun Krista-on nin

1Puapilɛa nia, vɛ̀ɛ̀ la co sinà le maa o vanaa sinà tɔŋndo-a lo ya co sɔɛi nuaa ni? La sinà maa lɔ́ɔ́ vanacieo co vɔ yoomu-o kínɛí o co o tɔŋndo bɛngu ni. 2Kani vanalanɔ co o nɔu-vo, o tɔŋ pɔnɔ ndɔ-o bɛngu o co ni, te pɔnɔɔ co vɔ pɛ yoomu. Kɛ te pɔnɔ ndɔ vi pɛ, mɛɛ o fula o tɔŋ ndóò yii ndu kon a pɔnɔ ndɔ-o bɛngu. 3Lelan, te pɔnɔ ndɔ co vɔ pɛ yoomu, mò cal o nɔu vanapɔnɔ celen o ba, mɛɛ vana suundɛiyo o co ni. Kɛ te pɔnɔ ndɔ vi pɛ, mɛɛ o co lɛ o tɔŋ bɛngu le. Vanapɔnɔ celen yil nin bɛɛ ndu o nɔ̀u nin, o ve vana suundɛi le ken te. 4Puapilɛa nia, lende koni i co ni. Niaa bɛɛ la vi a ba tɔŋndo o dialun Krista-on nin, mí la muungu sumialii vana celen, o tendul fulaa vanvílɛ́iya tɛɛn-ndo, haliko mi n kom kɔmnde kɛndɛlen le Hala. 5Kani telen naa n va o falon nin-ndo, yeemɛi dɛnɛ vɔɔŋii tɔŋndo va kpeeŋiaa-e va vallo naa o n'falu, haliko mi náà n tosa dɛnnda yaa vana o piɔ́mndo nin-ndan. 6Kɛ sunsun, n sɔla baŋaa a ba tɔŋndo, kani n vi a ba ɲɛ ndóò bii naa o cɛlen nin-ndo. N nɔla nin mì n tosal Hala baalaa tosa sɛnɛi o hɛnan Kɔl-Diandaa bɛngu, kɛ o co lɛ maa paandu mɛɛ tɔŋndo sɛvan yɛ le.

Le kɔlɔ tɔŋndo co-o

7Vɛɛ naa n dimi yɛnin o kon? Mò va maa hakio tɔŋndo co ni? Kɛì-kɛì bɛɛ! Kɛ tɔŋndo tosá ni mí síná hakio. Kani yáà sinanin ɲɛ co ɲɛ pilaa hɔlten fulaa-o le, te tɔŋndo ndóò dimi le aa: «Fula ɲɛ pila lehɔl te.» 8O tɔŋndo nin hakio sɔla yoomuan ni, mó kui ya yeeman vɔɔŋun súú-súù ka o kɔl. Kani te tɔŋndo ndóò ve le, maa ɲɛ vílɛ́i hakio ndóò vanin ni. 9Paandu, i vannun yoomu, i ve o tɔŋ bɛngu le. Kɛ tɔŋndo hunɔɔ, mí hakio muungu yoomu, 10mí ya koni vu. O kon, mí tɔŋ yɔ̀ngu vana yoomoo-o yɔngu ya piɔ́mndo. 11Kani o tɔŋndo nin hakio sɔla kpaayaa ni, mó hui ya a tɔŋ kon, o kon mó dii ya a ndu.

12Nduyɛ tɔŋndo connun o diandaa, sɔɔn co lenin-ndon bɛɛ n co n diandaa, n sandu, n naŋ. 13Vɛ̀ɛ̀ mì ɲɛ naŋ-ndo ndu siŋnun piɔ́mndo le ya? Kɛì-kɛì bɛɛ! Kɛ le hakio sinanndo maa ndu co hakio ni, mó kei o ɲɛ naŋ-ndo nin haliko mo tosa mì vi. O nɛi kon coo tɔŋndo cɔm vana ni maa ɲɛ vɔɔn bɛndoo pila hakio co ni.

Hakio hiow vanacieo mayoomu

14N sinà ndi maa dɛnɛ kɔllo tɔŋndo co ni, kɛ ya, vanaciee n'faloo daama ya co ni, o pisia ya co hakio o ba ni, mì va cɛ ndɔɔ. 15A toɲa, dɛnnda ya co tosaa lan, i co lan bila biyɔɔ le. O ya yeema-o, i tiwba le kon tosaa le, kɛ dɛnɛ nɛinun ya-o, ndu ya tosa ni. 16Te i va pɛ dɛnɛ ya yeema loo tosaa, i cɛl dɔ́ɔ́ maa tɔŋndo naŋ. 17Mɛɛ o co ya pila le co dɛnnda lan tosaa le, haki co ya niŋ-ndo ni. 18Kani i sinà maa dɛnɛ kɛndɛ co ya nin te, o falun nin ivanacieeyan nin pɛɛn. Kani yeemɛi co ya le dɛnɛ kɛndɔɔ tosaa, kɛ i nɔla ndu tosaa le. 19I co dɛnɛ kɛndɛ ya yeema-o tosà le, kɛ mì muungu dɛnɛ vɔɔn ya yeema loo tosaa. 20Te i tosa pɛ dɛnɛ ya yeema loo, mɛɛ o co lɛ ya le co ndu tosaa le, kɛ haki co ya nin-ndo.

21Mɛɛ ya ce tɔŋndo yɛ co hoo ni: telen ya yeemà le dɛnɛ kɛndɔɔ tosaa-o, i cennun dɛnɛ vɔɔndo o hɔl. 22Kani o kɔl nuu nin, tɔŋ Hala-o hɛnan ya bɔɔ, 23kɛ mí saalun maa tɔŋ celen co o dialun nun nin, o co tɔŋ kɔlkalu nuu cɔlɔbaa-o. O bii ya o cɛle tɔŋ haki co o falun nun nin-ndo-o. 24Mbɔ̀ dɛnɛ pala ya fɔ́! Nɛ̀ɛ́ baŋa yɛnin ya dialun piɔ́mndon mun o ba? 25Balikaa co le Hala o diola Maalii naa Yeesu Krista lan! Kani i co bɛɛ o tɔŋ hakio bɛngu o dialun nun nin nuaa, kɛ i co tɔŋ Hala-o biyɔɔ o kɔl nuu nin.

Currently Selected:

Rɔmnda 7: BKG

Highlight

Copy