Rɔmnda 6

Vana sɔla pɛ yinɔɔ, a muungu yoomu o Krista nin

1Vɛ̀ɛ̀ naa n dimi yɛnin o kon? Vɛ̀ɛ̀ n lonnun o hakio nin o kon mì kɛndɛi kui? 2Kɛì-kɛì bɛɛ! Naa n vi nin a ba hakio-a, vɛ̀ɛ̀ naa n muungu yɛnin vɛlɛ mì va o hakio nin? 3La co macoaa sínà le maa naa kɛ́-kɛ̀ n sɔla yinɔɔ o Yeesu Krista nin, maa o piɔ́m ndɔɔ nin te naa n sɔla yinɔɔ lende le? 4Le yinɔɔ naa n sɔla o piɔ́m ndɔɔ nin-ndo, mí n sɔla kumbɔɔ a ndu latulu, haliko mɛɛ Krista tendul mó fula vanvílɛ́iya tɛɛn a biilu Fuɲa ndɔ-o yɛ, mì naa bɛɛ n kela kela sɛnɛi.

5Kani te n kumbun pɛ naa ndaa latulu o tuula piɔ́m ndɔɔ nin, mɛɛ n tendulnin vɛlɛ naa ndaa latulu o tuula ndɔɔ nin. 6N sínà maa vanacieeyɛi nɛi paanduei baŋnun o yɔm singafilaa coo a ndu latulu, haliko mi dialun hakion siŋnun ɲɛ fondoo fúú, yɔŋii naa n va vɛlɛ cɛa hakia. 7Kani vana vi-o, haki co lɛ ndu kuee le. 8Kɛ te n vi pɛ a Krista latulu, n laalan vɛlɛ maa n vanin yoomu a ndu latulu. 9Kani n sínà maa tendul Krista tendul hoo mó fula vanvílɛ́iya tɛɛn-ndo, o vi lɛnin te, piɔ́mndo nɔ lɛ kpaaya oo kpaaya ndu coo le. 10Kani vu o vi-o, le hakio o vi o lepilɔɔ ni kpow. Kɛ co o co yoomu sunsun-ndo, le Hala o co yoomu ni. 11Lende koni, niaa bɛɛ la cɔnnun maa la vi a ba hakio, mì la cennun maa la co yoomu le Hala o Yeesu Krista nin.

12Lelan, la cɛl mì hakio nɔ kpaayaa dialun niaan puulun n co vu-on coo le, la cɛl mò tundu niaa o yeemɛi ndɔɛi vɔɔnde bɛngu le. 13La yɔngu lɛ falun niaan le hakio tosaa maa ɲɛm valin dɛnɛ sandaa lepɛŋ-ndon te. Kɛ niaa pila yɔngun le Hala maa vanaa tendul fulaa vanvílɛ́iya tɛɛn-nda, mì falun niaan va maa ɲɛm valin dɛnɛ sandaan le Hala. 14Kani hakio nɔ lɛnin niaa kpaaya coo le, bau la co lɛ o tɔŋ bɛngu le, kɛ o kɛndɛi bɛngu niaa co nin ni.

La tosà baalaa le dɛnɛ sandaa

15Kpo! Bàà mì n tosa hakio le mɛɛ naa n co lɛ o tɔŋ bɛngu le yɛ, kɛ mì n va o kɛndɛi Hala-e bɛngu? Kɛì-kɛì bɛɛ! 16La sinà maa te la yɔngun pɛ vanndo le ndu baalaa tosallo mì la bii sɔɛi ndɔɛi, mɛɛ la siŋnun cɛa vana niaa bii kon sɔɛi ndɔɛi-yo. Te sɔɛi hakio niaa bii ni, la sɔla piɔ́mndo, te sɔɛi Hala-e ni, la siŋnun vanaa sandaa. 17Kɛ kɛɛmasɔlan Hala le, la va cɛa hakia, kɛ mí la bii sɔɛi a kɔlta niaalan kpow, sɔɛi pɛɛku niaa sɔla-o pɛɛn. 18Mɛɛ niaa hɛlun hakio, mí la siŋnun cɛa dɛnɛ sandaa. 19O vanacieeyɛi nin ya co sɔɛi ni, le tùú niaa nɔ mayoomu o falun niaan nin too. Maa mɛɛ niaa luei paandu dialun niaan o cɛle dɛnɛ nɔɔlɛilen a o cɛle dɛnɛ sandaa lepɛŋndo nin le dɛnɛ sandaa lepɛŋ kon tosaa yɛ, mɛɛ la luei niko dialun mun o cɛle dɛnɛ sandaa nin le dɛnɛ diandaa tosaa.

20Kani telen niaa va cɛa hakia-o, dɛnɛ sandaa ve niaa kuee le. 21Tɔnɔ yɛɛ niaa sɔla yɛ o dɛnnda lan nin telen kon, dɛnnda siɛmbulan la co niaa biyɔɔ sunsun-ndan pɛɛn? Kani mɛɛlula dɛnnda lan co piɔ́mndo ni. 22Kɛ sunsun, la hɛlun hakio, mì la siŋnun cɛa Hala-a. La tosà niko dɛnndan le dindinndo, o kon mì sɔla yoomu fɛɛn-fɛɛndo. 23Kani sala hakio co piɔ́mndo ni, kɛ ɲɛ Hala ke vana fondo fúú-o, ndu co yoomu fɛɛn-fɛɛndo o Yeesu Krista nin ni, Maalii naa.

Currently Selected:

Rɔmnda 6: BKG

Highlight

Copy