Rɔmnda 8

Yoomu kɔllo

1Yaala co lɛ le vanaa co o Yeesu Krista nin-nda le. 2Kani tɔŋ Kɔl-Diandaa yɔ̀ngu vana yoomoo o Yeesu Krista nin-ndo baŋa ya tɔŋ hakio a tɔŋ piɔ́mndo o ba. 3Tɔŋndo ndóò nɔla ken tosa le, kani ndóò nɔ mayoomu le, le falun ivanacieeyan. Kɛ mí Hala ndu tosa ken, mó cuu Po ndɔ ndu pilaa o velan dialun hakion nin le hakio faŋaa. O kon mó yaala hakio o falon nin. 4O tosa ken, haliko mi sɔɔn tɔŋndo n peelun naa nin. O kon, o co lɛ o yeemɛi ivanacieeya nin te naa n co kelaa le, kɛ o yeemɛi Kɔl-Diandaa nin. 5Kani vanaa co kelaa o falon nin-nda, dɛnnda n'falulan nda tosa ni, kɛ a co o Kɔl-Diandaa nin-nda, dɛnnda Kɔl-Diandaa nda tosa ni. 6Kani dɛnnda n'falulan la co piɔ́mndo ni. Kɛ dɛnnda Kɔl-Diandaa la co yoomoo a kɔlɲuloo ni. 7Kani dɛnnda n'falulan la co yaamɔɔ Hala-o ni. Bau la bii tɔŋ Hala-o le, la nɔla bɛɛ ndu biyɔɔ le. 8Nduyɛ vanaa co kelaa o falon nin-nda tiwba mà hɛnan Hala le.

9Kɛ niaa niaa, la co lɛ o n'falu nin te, kɛ o kɔllo nin niaa co ni, te o va pɛ maa Kɔl Hala-o co niaa nin. Te vanndo nɔ Kɔl Krista-o nin te, mɛɛ ndu co o ndɔ le. 10Te Krista co pɛ niaa nin, a toɲa, la co a vílɛ́iya o falon nin a ba hakio. Kɛ le mɛɛ Kɔl-Diandaa co niaa nin yɛ, la sɔla yoomoo le dɛnɛ sandaa. 11Te Kɔl vana tindi Yeesu fulaa vanvílɛ́iya tɛɛn-ndo co pɛ niaa nin, vana tindi Krista fulaa vanvílɛ́iya tɛɛn-ndo tosanin vɛlɛ mì dialun niaan vu-on muungu yoomu le Kɔl ndɔ co niaa nin-ndo.

12Lelan puapilɛa nia, kueo co naa, kɛ o co kuee n'falu le kelaa o dɛnnda n'falulan nin te. 13La kela pɛ o dɛnnda n'falulan nin, la co vu. Kɛ te Kɔl-Diandaa tosa pɛ mì la dii dɛnnda ivanaciea lan, mɛɛ la vanin yoomu. 14Kani vanaa-vanaa Kɔl Hala-o co simndan laci, nda co cuavaa Hala-a ni. 15O co kɔl siinguu niaa n'cɛ mì la cal vɛlɛ a isiòòn te niaa sɔla le, kɛ Kɔl siinguu niaa cuavaa Hala-a-o. Ndu koni tosa ni mì n veelu Hala aa: «Pua, Fuɲa naa». 16Kɔl-Diandaa pila co seilen solio o kɔlta naalan-ndo maa cuavaa Hala-a naa n co ni. 17Nduyɛ, te cuavaa ndɔa naa n co ni, mɛɛ vanaa cuaa kɛ-a naa n co ni, vanaa cua kɛ Hala-o-a pɛɛn. Naa Krista-aa n cuanin ndu latulu ni, te n sanga pɛ naa ndaa latulu, haliko mi n sɔla biiloo naa ndaa latulu.

Biilu co naa laci-o

18I ce maa vana tuu sangala co naa coo sisa lan a biilu hun fulanin ceen le naa-o le. 19Ɲɛm Hala cɔw-von kpede n co telen Hala hun cɔmnin biilu cuavaa ndɔa-o cumndo a yeemɛi bɛnduei. 20Kani ɲɛm Hala cɔw-von luɛi ɲɛ fondoo o ba bɛngu. O co hɛnan ɲɛm mun pila le luei mun te, kɛ Hala cɛl le ken tosanndo ni. Kɛ a kon kpow, tiindanndo co le ɲɛm mun. 21Ɲɛm mun bɛɛ n co hunɔɔ fula o cɛle len nin, n si lɛnin te. Mì mun bɛɛ n sɔla naŋɔɔ bɛndu cuavaa Hala-a sɔlanin-ndo. 22Nduyɛ n sinà maa háá sisa, ɲɛ-ɲɛ Hala cɔw co somisominndo a sangaa maa vanalanɔ pulei biŋin-ndo. 23O co ka ɲɛm mun daama le, kɛ naa n sɔla nin Kɔl-Diandaa o tasendɔ-a bɛɛ, naa pilaa n co somisominndo. N co cumndo le mɛɛ Hala siinguu naa cuavaa ndɔa kpeekpeiya yɛ, haliko mi dialun naan sɔla baŋaa. 24Kani o kɔlkɛsiaa nin naa n sɔla cindaa ni. Nduyɛ vanndo ce nin pɛ ɲɛ o kɛsi kɔllo coo-o, mɛɛ kon co lɛ kɔlkɛsiaa le. Vɛɛ vana kɛsi yɛ vɛlɛ ɲɛ n ce nin-ndo kɔllo coo? 25Kɛ te n kɛsi pɛ kɔllo ɲɛ naa n co cɔ loo coo, n cum ndu a biuvɔnndo.

26Lende koni Kɔl-Diandaa co naa malaa o kpaaya naa lepɛŋndo nin ni, kani n sinà ɲɛ naa n bɛnda le ɲunaa o piɛile naalen nin-ndo le. Kɛ Kɔl-Diandaa pila co piɛilen le naa a kuŋnda vanaciee nɔla tuula le lan. 27Hala ca o kɔltan nin di-o sinà yiyan Kɔl-Diandaa. Kani mɛɛ hɛnan Hala-o co yɛ Kɔl-Diandaa piɛi le vanaa diandaa ni.

28N sinà maa dɛnndan kpow la co tosanndo le dɛnɛ kɛndɛ vanaa kaola Hala-a, vanaa o veelu mɛɛ tuu ndɔɔ co yɛ-a. 29Kani vanaa Hala síná paandu pa-a, nda o toosiaa le siŋnɔnndo maa velan Po ndɔɔ ni, haliko mo va Po tasoo puapilɛa taw tɛɛn. 30Vanaa o toosiaa kan-nda, mó veelu vɛlɛ nda. A o veelu kan-nda, mó siinguu nda vanaa sandaa. A o siinguu kan vanaa sandaa-a, mó biilu vɛlɛ nda.

Kaola bɛndu Hala kaola vanndacieea-o

31Vɛɛ naa n dimi yɛnin vɛlɛ a ken o kɔɔ? Te Hala co pɛ le naa, nɛ̀ɛ́ cɔlɔba yɛnin naa? 32Ndu kuunan Po ndɔ ndu pila-o coo loo, kɛ mó faŋa ndu baa coo le naa kpow, baa mò kɛɛ naa ɲɔɔn kpow ke naa Po ndɔ kon-ngaa latulu? 33Nɛ̀ɛ́ lɔalu yɛnin vanaa Hala hɛli-a? Hala siinguu vana vana sandaa ni. 34Nɛ̀ɛ́ co yɛ vana yaala vana-o? Yeesu Krista vi, hiovɔɔ o kon coo, mó tendul, o co icali Hala o ba kɛndɔɔ coo mo va piɛilen le naa. 35Nɛ̀ɛ́ sɛi yɛnin naa a canyɛi Krista-e? Mo va maa dɛnɛ palaa ni? Buulan bɛndoo bàà? Yaamɔɔlen bàà? Yiaan bàà? Bala fondolan bàà? Kpundɛlan bàà? Mɔɛi cɔwve bàà? 36Maa mɛɛ o sɛvan yɛ aa:

«Lepalaa-lepala, a co naa diwvo le sɔɛi nɔmnde.

A co naa cɔu maa saa nda co kɔlan le diyɔɔ-a.»

37Kɛ o dɛnnda lan nin kpow, vana kaola naa-o tosa ni mí n va caanda tiwvo ba. 38Kani i laalan maa o va piɔ́mndo, o va yoomoo, o va mɛlɛkaa, o va kundala co o masalen nin coocoo lan, o va dɛnndan ndan sunsun, o va la co hunɔɔ lan, o va kpaayalan, 39o va ɲɛm co coocoo-on, o va ɲɛm co lebɛngu-on, o va ɲɛm celen Hala cɔw-von, ɲɛ-ɲɛ nɔlanin naa siɛi a kaola Hala kaola naa o Maalii naa Yeesu Krista nin-ndo le.

Currently Selected:

Rɔmnda 8: BKG

Highlight

Copy