Matie 4
4
Yeesu sɔla tɔɔndanndo
(Marke 1.12-13, Luke 4.1-13)
1O kon kɔɔli, mí Kɔl Hala-o kɔa a Yeesu o lɛŋnde veselɛilen nin, haliko mi masa ɲinaa vɔɔnda ndóò dɛɛniaa ndu. 2Mí Yeesu cii palɛi belehiɔɔlu a ɲumndan belehiɔɔlu o sumndo nin. O kon mí yiaan ma nɛi ndu. 3Mí masa ɲinaa vɔɔnda, o tɔɔndàn vannda-o sɔɔnguu ndu ikɛi, mó dimul ndu aa: «Te po Hala-o n co ni, dimi vɔ mì powtan ndan la siŋnun ɲɛdiaa.» 4Mí Yeesu muli aa: «O co o sɛvaa aa: ‹O co ko ɲɛdiaa daama le tosa mì vanacieo va yoomu le, kɛ sɔɔn fula Hala o sondo-on kpow n tosa ni mì vanacieo va yoomu#4.4 Sɔɔn Yeesu dimi mun nanu-on dimin vɛlɛ o fondalan ndan: Tɔŋ miingua 8.3, Luke 4.4..›»
5Mí masa ɲinaa vɔɔnda kɔa a ndu o kobi diandaa Yerusalɛm nin, mó kɔ kɛsi ndu o Cɛi-Hala-o tullo, 6mó dimul ndu aa: «Te po Hala-o n co ni, huulu vɔ, mà tol, kani o co o sɛvaa aa:
‹Hala dimulnin mɛlɛkaa ndɔa sɔɛi nɔmnde,
mà saala nɔm o balan coo
yɔŋii n kposoŋa pelei o powvo.›»
7Mí Yeesu mulul ndu aa: «O co vɛlɛ o sɛvaa aa: ‹Tɔɔndan Mɛlɛka le, Hala nɔmndo pɛɛn.›»
8Mí masa ɲinaa vɔɔnda kɔa vɛlɛ a ndu o pembii bɛndu-bɛnduei pum tullo, mó cɔm ndu masɛi co o ceendo coo-e a biilu ndɔɔ kpow, 9mó dimul ndu aa: «Taa baŋ pɛ vulan ya o labɛngunin, mà biilu ya, i ke nɔm masɛi he kpow.» 10Mí Yeesu dimul ndu aa: «Faŋan ya kɔɔli, Setana! Kani o co o sɛvaa aa: ‹Mɛlɛka Hala nɔmndo n bɛnda le biiloo ni, ndu pilɛ kpé n bɛnda le baalaa tosallo ni.›»
11O kon mí masa ɲinaa vɔɔnda faŋan Yeesu kɔɔli. Mí mɛlɛkaa sɔɔnguu ndu ikɛi, má nɛŋi ndu makoo#4.11 má nɛŋi ndu makoo: Vannda pum a bii fonda ho bila maa ɲɛdiaa mɛlɛkaa yɔngu Yeesu ni, kani ndóò cii palɛi belehiɔɔlu a malɔ belehiɔɔlu o sumndo nin. Lelan má yiyan maa vana nɔla mì vana hivi fonda kalaa aa «Mí mɛlɛkaa sɔɔnguu ndu ikɛi, má ke ndu ɲɛdiaa»..
Yeesu kandu baala ndɔɔ o tàndá Kalile-o nin
(Marke 1.14-15, Luke 4.14-15)
12Yeesu ndóò tueyɔɔ maa a mal Nsaŋ o kaasoo, mó kɔannun o tàndá Kalile-o nin. 13Mó faŋan Nasarɛt, mó kɔ cal Kapɛrnaum, kobi co kon o mɛmma ihɛllan kɔngɔ o tàndá Sabulɔn-ndo a o tàndá Nɛftali-o nin-ndo. 14Ken tosan haliko mi sɔɛi Esai vana-tɛɛngaa-diom Hala-o ndóò dimi-e peelun aa:
15«Tàndá Sabulɔn-ndo a tàndá Nɛftali-o,
tàndàla co lan o mɛmma ihɛllan ikɛi Yurdɛn leeloo lan,
Kalile nɛɛ vanaa co N'Yuifi le-a co-a pɛɛn,
16vanaa co icali o ɲumndan nin-nda
ce ɲɛ-tengaa bɛndoo,
pangeloo tenga vanaa va icali
o lɛŋnde vunduma piɔ́mnden nin-nda coo!»
17Cɔn nin a telen kon, mí Yeesu kandu yondaa, mó va dimio aa: «La mal yɔŋ vɔɔndo mì la mangalan, kani masale halataala len le tiiyaa.»
Yeesu veelu vanaa yɔɔyaa nda hiɔɔlu
(Marke 1.16-20, Luke 5.1-11)
18Yeesu va kɔlan o mɛmma ihɛllan Kalile demullo, mó ca puapilɛa pum nda ŋiɔn, Simɔn, o ndáà veelu aa Piɛr-o a Andre pɔmbɔ ndɔ. A va yala yɔɔyaa vuuo o mɛmma ihɛllan nin, kani vanaa yɔɔyaa nda va ni. 19Mó dimul nda aa: «La del-la kɔɔli, mì siinguu niaa vanaa yɔɔyaa n'vanndacieea.» 20Fɔ́ɔ́fɔ̀, má mal yalala ndalan, má kɔa ndu kɔɔli. 21Mɛɛ nda kɔɛ lándán, mó ca puapilɛa celen nda ŋiɔn, Nsaki nda Nsaŋ, poaa Sebedee-a. A va o dɛ̀ndɔ̀ɔ́ nin nda Sebedee fuɲa nda-aa, a va yalala ndalan toosiaa. Mí Yeesu veelu nda. 22Fɔ́ɔ́fɔ̀, má mɛi fuɲa nda a dɛ̀ndɔ̀ɔ́, má kɔa Yeesu kɔɔli.
Yeesu co vannda pɛɛkoo a nda singio
23Yeesu va kelaa o tàndá Kalile-o kpow nin, o va keiyo vannda pɛɛkoo o cɛila lekaannda Yuifia nin, o va yondaa a masale Hala len o kɔɔ, o va vannda singio a nààla ndalan kpow a á namtale kɛ́-kɛ̀ ndáà nɔ. 24Mí tɔ́ɔ́ ndɔɔ tiw o lɛŋnde Siri len nin kpow. Má va ndu vanaa lanàà súú-súù ka, vanaa bolii hiŋnannda, vanaa ɲinaa vɔɔnda va kɔɔli-a a vanaa kikiɲaa cuuo. A va ndu vɛlɛ vanaa falun vílɛ́iya cuuo, mí Yeesu va nda singio. 25Mí sɛ́lɛ́ bɛndoo va ndu delɔɔ kɔɔli fulaa Kalile, o tàndá kobila tɔ́-o nin, Yerusalɛm, Yuda a o tàndá co o peo Yurdɛn leeloo-o nin.
Currently Selected:
Matie 4: BKG
Highlight
Share
Copy
Want to have your highlights saved across all your devices? Sign up or sign in
© Alliance Biblique en Guinée
