Matie 3
3
Kaannde Nsaŋ Vana-yinaa tosa len
(Marke 1.1-8, Luke 3.1-18, Nsaŋ 1.19-28)
1O telen kon, mí Nsaŋ Vana-yinaa can, mó va kaannden tosaa o lɛŋnde veselɛilen nin o tàndá Yuda-o nin, 2mó va dimio aa: «La mal yɔŋ vɔɔndo mì la mangalan, kani masale halataala len le co le tiiyaa.» 3A ndu Nsaŋ o kɔɔ Esai vana-tɛɛngaa-diom Hala-o ndóò soo ni aa:
«Diomndo co sɔɛi o lɛŋnde veselɛilen nin aa:
‹La bɛɛndiaa nɛi Mɛlɛka-o,
la siɛɛnduu nɛila ndɔla pɔmbɔlan.›»
4Doma bɛndu yiiŋii ɲɔɔmɛɔ va Nsaŋ lekɔɔ, yáwlen le va ndu leyiinannden o caŋ. Sóónɔa a lɛan ma va balo ndɔɔ ni. 5Vanaa va Yerusalɛm ciee-a, vanaa va o tàndá Yuda-o nin-nda kpow a vanaa va o tàndá holnun peo Yurdɛn-ndo nin-nda kpow a va hunɔɔ o ndu lo, 6má va hakila ndalan sɔlɔlanndo. Mí Nsaŋ va nda yinɔɔ Yurdɛn o peelo.
7Nsaŋ ndóò cɔu maa Faliisia a Sadusea co hunɔɔ taw le yinɔɔ sɔlaa, mó dimul nda aa: «Niaa cuavaa hɔ̀ɔ̀lɔ́a ha! Nɛ̀ɛ́-nɛ̀ dimul-lɛ niaa le kɔltuw Hala co nin hoo kpɛɛlun-ndo ɲaanɔnndo? 8Mɛɛ la cɔm niko o dɛnnda niaalan nin maa la mangalan lekɛ́ndɛi dɛ! 9La yiyan te maa o tiw le diminndo o lakɔl te aa: ‹Abraham co fuɲa naa mamaa ni!› Kani, mì dimul niaa, hali o powtan-ndan, Hala nɔla mò solul Abraham cuawva. 10Cuei cuu nin cɛɛŋa le puundun yɔmnde kilio. Yɔm oo yɔm kum komɔɔ kɛndɛ le, ndu kialunnin, mò viownun o yin. 11Ya, i co niaa yinɔɔ o mɛnndan nin le cɔmndo maa la mál yɔŋ vɔɔndo mì la mangalan. Kɛ vana co hunɔɔ o ya kɔɔli-o, ndu yinnin niaa a Kɔl-Diandaa a á yinnden ni. Ndu hiow ya kpaayaa, i co bɛɛ o sɔvɛ le ndu samtalan timbio le. 12Fɛlɛ ndɔ hɛyaa co ndu o ba, o bɛɛsuunin kpele lɔaa n'mal ndɔɔ, mò vow malun ndɔn o konda, mò lom tɛ́fɛ́lan o yinnde ɲum te len nin.»
Yeesu sɔla yinɔɔ
(Marke 1.9-11, Luke 3.21-22)
13O kon, mí Yeesu can Kalile, mó hun Yurdɛn o peelo nɛɛ Nsaŋ va-a, haliko mi Nsaŋ ndóò yin ndu. 14Kɛ mí Nsaŋ va kaasiaa, mó va dimio aa: «Ya bɛnda le yinɔɔ sɔlaa nɔm o ba ni, mí nɔm muungu hunɔɔ o ya lo!» 15Mí Yeesu mulul ndu aa: «Cɛl pɔɔ mì i tosan lende, kani lende naa n bɛnda le dɛnɛ sandaa kpow peeloo ni.» O kon mí Nsaŋ cɛl. 16Yeesu sɔlaa yinɔɔ, mó fula o mɛnndan nin. Fɔ́ɔ́fɔ̀, mí halataalaa kumbin, mó ca Kɔl Hala-o tolɔɔ maa kangbo, mó cal ndu coo. 17Mí diomndo fula o halataala aa: «Po ni ya kaola taw-vo co hoo ni, o ya hɛli a kɔl nuu kpow-vo.»
Currently Selected:
Matie 3: BKG
Highlight
Share
Copy
Want to have your highlights saved across all your devices? Sign up or sign in
© Alliance Biblique en Guinée
