Matie 2
2
Vanaa kɔlkalua sina loeon kɔlɔ-a hin Yeesu yilɔɔ
1O paale Herɔde len#2.1 paale Herɔde len: Vana nɔla mì vana hivi fondaa ho aa: «telen Herɔde va masaa-o». Kani o masale ndu Herɔde len bɛngu Yeesu velun ni. Yeesu velun Bɛtlɛhɛm o tàndá Yuda-o nin ni. Mí vanaa kɔlkalua sina loeon kɔlɔɔ-a can a ba paalen le can-ndo, má tiiya Yerusalɛm, 2má ɲuna aa: «Kuɛɛ masa Yuifia co yɛ, o langa volun-ndo pɛɛn? Kani n lo a ba paalen le can-ndo, mí n ca loei ndɔɛi. Le ndu biiloo naa n hin ni.» 3Masaa Herɔde tueyɔɔ sɔɛi ken, mó voolu nda Yerusalɛmnda kpow. 4Mí masaa mɔɔsiaa bolii vanaa-solia-lasálàá kpow a vanaa pɛɛkaa latɔŋnda, mó ɲuna nda nɛɛ Krista ndóò bɛnda le volɔnndo-a. 5Má mulul ndu aa: «Bɛtlɛhɛm o tàndá Yuda-o nin. Kani ɲɛ vana-tɛɛngaa-diom Hala-o dimi-o co hoo ni aa:
6‹Nɔm Bɛtlɛhɛm yɛ, nɔm co hoo o tàndá Yuda-o nin-ndo,
a toɲa, o co nɔm te hiow dɔɔnanndo
o kobila co o tàndá Yuda-o nin-ndan tɛɛn te.
Kani o nɔm ndo masaa tosanin vanaa nia masalen coo-o
fulanin ni, Israɛlla pɛɛn›».
7O kon mí Herɔde veelu vanaa kɔlkalua sina kan loeon kɔlɔɔ-a o vionnɔnndo nin, mó ɲuna nda telen loei ndíì fula kpeekpei-yo. 8O kon kɔɔli, mó viam nda Bɛtlɛhɛm, mó dimul nda aa: «La kɔ ɲuuniaa sɔɛi poombɔ kalaa tɛɛ-tɛɛ. La saalun pɛ ndu, la tosa mì sina, haliko mi ya bɛɛ i kɔ biilu ndu».
9Masaa ciiyo vanaa kɔlkalua kan congɔnndo lende, má kɔa. Má cannun dɔ́ɔ́ loei ndáà ce ken a ba paalen le can-ndo-e kɔlan nda laci. Ndíì tiiyaa o fonda cɛlɛkpɔɔ va-o, mí i sim. 10Ndáà cɔu mí loei sim, má dɔawnun ɲaale taw. 11Má luɛi cɛinin, má ca cɛlɛkpɔɔ nda Mari kala ndɔ, má baŋ vulan, má biilu ndu. O kon kɔɔli, má kumbi volɔɔla ndalan, má ke ndu ɲɛm ndáà yoo ndu-on: sianion, ansan a mir. 12O kon kɔɔli, mí Hala dimul nda o lɔma sɔlaan nin maa a muungu lɛ Herɔde o ibuŋ te. Le hee, má keinun a nɛi celen, má muungun o lɛŋnde ndalen nin.
A kɔɛ vonnɔnndo a Yeesu o lɛŋnde Esipte len nin
13Vanaa kɔlkalua kɔnndan, mí mɛlɛkanɔ Hala-o cɔmnun Yosɛf o lɔma sɔlaan nin, mó dimul ndu aa: «Cɔn ma cua cɛlɛkpɔɔ nda kala ndɔ, mì la ɲaanun o lɛŋnde Esipte len nin. La kɔ lo lon háá telen ya dimulnin nɔm le muungoo-o, kani Herɔde nuwviaanin cɛlɛkpɔɔ ho le ndu diyɔɔ.» 14Mí Yosɛf can icɔllo, mó cua cɛlɛkpɔɔ nda kala ndɔ, mó kɔ viannun a nda Esipte. 15Mó kɔ lo lon háá mí Herɔde vu. Ken tosan haliko mi o Mɛlɛka ndóò dimi a sondo vana-tɛɛngaa-diom Hala-o-o ndóò peelun aa: «Mí veelu po nuu, mó faŋan Esipte.»
A diw cuaambɔa
16Herɔde cɔu maa vanaa kɔlkalua hui ndu, mó tuulu kɔllo taw-taw. Mó viam vannda le kɔlan cuaambɔa ndáà hiw-vɔ vɔsila tiɔn te-a kpede diwvo, kandɔɔ Bɛtlɛhɛm kɔlan a cieon balu ndu-on kpow, maa mɛɛ vɔsila vanaa kɔlkalua ndáà dimul ndu lan la va yɛ. 17O kon mí sɔɛi Yeremi vana-tɛɛngaa-diom Hala-o dimi-e i peelun aa:
18«Yéélan la co sɔɛi Rama,
Koŋullo a caŋnda fúkpàà-fùkpààlan la co sɔɛi lon,
Rasɛl co cuavaa ndɔa caŋndo ni,
o kɛɛ ɲɔɔlu nda co ndu-o,
kani cuavaa ndɔa cuu.»
Mɛlɛkanɔɔ dimul Yosɛf le faŋanndo Esipte le muungoo
19O piɔ́m Herɔde-o kɔɔli, mí mɛlɛkanɔ Hala-o fulal Yosɛf o lɔma sɔlaan nin Esipte, 20mó dimul ndu aa: «Cɔn ma cua poombɔɔ nda kala ndɔ, mà muungu o lɛŋnde Israɛl-ten nin, kani vanaa va poombɔɔ kɔɔli le ndu diyɔɔ-a vi.» 21Mí Yosɛf can, mó cua poombɔɔ a kala ndɔ, má muungu o lɛŋnde Israɛl-ten nin. 22Kɛ ndóò tueyɔɔ maa Arkelaus va masaa o tàndá Yuda-o coo, o fonda Herɔde fuɲa ndɔ-o ni, mí siòònde bii ndu le muungoo lon. Mí Hala soaa vɛlɛ o ndu lo o lɔma sɔlaan nin, mó kɔa o tàndá Kalile-o nin, 23mó kɔ cal o kobi nda veelu aa Nasarɛt-o nin, haliko mi sɔɛi vana-tɛɛngaa-diom Hala-o dimi-e ndíì peelun aa: «A veelunin ndu aa Nasarɛtenɔɔ.»
Currently Selected:
Matie 2: BKG
Highlight
Share
Copy
Want to have your highlights saved across all your devices? Sign up or sign in
© Alliance Biblique en Guinée
