Nsaŋ 21
21
Yeesu cɔmnun kaandeŋaa ndɔa
1O kon kɔɔli, mí Yeesu cɔmnun vɛlɛ kaandeŋaa ndɔa, o dalaa Tiberiade kɔngɔ. Mɛɛ o cɔmnun nda yɛ co hoo ni: 2Simɔn Piɛr, Tomas, o ndáà veelu aa Didim-ndo, Natanaɛl fula Kana o tàndá Kalile-o nin-ndo, poaa Sebedee-a, a kaandeŋaa ŋiɔŋaa celen a va nɛɛ pilɛ. 3Mí Simɔn Piɛr dimul nda aa: «I co lan yɔɔyaa.» Má dimul ndu aa: «N kɔnnun naa niaa.» Má fula, má luɛi o dɛ̀ndɔ̀ɔ́ nin. Kɛ icɔl kon pii a bii ɲɛ-ɲɛ le. 4Paalen siɔu, Yeesu va o kɔngɔɔ coo, kɛ kaandennda ve sina maa Yeesu le. 5Mí Yeesu dimul nda aa: «Poaa la sɔla pá ɲɛ le dioo?» Má mulul ndu aa: «Ɛ-ɛ.» 6Mó dimul nda aa: «La vuu yalaa dɛ̀ndɔ̀ɔ́ o ba kɛndɔɔ coo, mì la soli.» O kon má vuu yalaa, mí suwva luɛi taw-taw, a ve le ndu nɔla solio le. 7O kon mí kaandennɔ Yeesu ndóò kaola-o dimul Piɛr aa: «Maalii ni se.» Simɔn Piɛr tueyɔɔ dɔ́ɔ́ maa Maalii ni, mó vownun volɔɔla ndɔlan, kani kɔɔle fondo o va ni, mó del o mɛnndan nin. 8Mí kaandeŋaa tɔ̀a nda va hunɔɔ o dɛ̀ndɔ̀ɔ́ nin a yalaa nanɔɔ a suwva lenin, kani a ve kɔngɔɔ levil te, sɔngɔ dunndo kɛmɛ lediin va nda tɛɛn a kɔngɔɔ ni. 9Ndáà tolɔɔ lɛŋ, má ca yinnde ladɛngulten, suwvo a buloo va lecoo. 10Mí Yeesu dimi aa: «La hun a suvaa niaa langa cua kan-nda.» 11Mí Simɔn Piɛr hel o dɛ̀ndɔ̀ɔ́ nin, mó nan yalaa lɛŋ, suvaa bɛndua kɛmɛ beleŋuɛɛnu a yaa va a piaa lenin ni, kɛ a sɛ́lɛ́ bɛndu nda va kon lenin-ndo kpow, yalaa sɛɛsa le. 12Mí Yeesu dimul nda aa: «La hun dio.» O kaandeŋaa ndɔa tɛɛn, vana-vana tɔɔndan mò ɲuna ndu vana o co-o le, kani a va sinaa maa Maalii ni. 13Mí Yeesu sɔɔnguu, mó cua buloo, mó ke nda ndu, mó ke nda vɛlɛ suwvo. 14Kabi Yeesu muungu yoomu fulaa vanvílɛ́iya tɛɛn, kon yɔŋnun bɛmbɛ yàándɔɔ le Yeesu kaandeŋaa ndɔa cɔmnɔnndo ni.
Yeesu nda Piɛr
15Ndáà ciiyo dioo, mí Yeesu ɲuna Simɔn Piɛr aa: «Simɔn po Yonas-o, vɛ̀ɛ̀ a kaola ya pá hiovɔɔ mɛɛ haa kaola ya yɛ?» Mó mulul ndu aa: «Oi Maalii, a sínà maa i kaola nɔm.» Mí Yeesu dimul ndu aa: «Landu hɔlla saa cuavaa nia coo!» 16Mó ɲuna ndu vɛlɛ ɲuna diinndɔɔ aa: «Simɔn po Yonas-o, vɛ̀ɛ̀ a kaola ya pá?» Mí Piɛr mulul ndu aa: «Oi Maalii, a sínà maa i kaola nɔm.» Mí Yeesu dimul ndu aa: «Va vana mandaa saa nia.» 17Mó ɲuna ndu o yàándɔɔ aa: «Simɔn po Yonas-o, vɛ̀ɛ̀ a kaola ya pá?» Mí kɔllo tambu Piɛr le peelu Yeesu peelu ndu sɔɛi ken ɲunaa bɛmbɛ leyáá-o. O kon mó mulul ndu aa: «Maalii, a sínà dɛnndan kpow, a sínà maa i kaola nɔm.» Mí Yeesu dimul ndu aa: «Landu hɔlla saa niaa coo. 18I co nɔm toɲaa dimul kpendekele, telen n va felengi-o, nɔm pila va yáwlen yiinɔnndo ni, mà va kɔlan nɛɛ nɔm óò yeema-a, kɛ telen n yuuvanin-ndo, a siɛndinin balan mì vana celen yii nɔm yáwlen, mò kɔɛ a nɔm nɛɛ n yeemanin te-a.» 19A mɛɛ Piɛr ndóò sɔlanin piɔ́mndo, mò ke Hala biiloo yɛ o kɔɔ Yeesu va sɔɛi lende ni. Yeesu ciiyo sɔɛi o ndu lo, mó dimul ndu aa: «Del-la kɔɔli!»
Yeesu nda kaandennɔ ndɔ ndóò kaola-o
20Piɛr mulinndo, mó cannun kaandennɔ Yeesu ndóò kaola-o nda kɔɔli, ó va o sɛɛŋan Yeesu o ibuŋ telen nda va ɲɛdiaa icɔllo dioo mi ndóò ɲuna Yeesu-o aa: «Maalii, nɛ̀ɛ́-nɛ̀ mal-lɛnin nɔm vannda o ba?» 21Mɛɛ o ce ndu, mí Piɛr dimul Yeesu aa: «Hoo yɛ Maalii, yɛɛ hun yɔŋnun yɛnin ndu?» 22Mí Yeesu mulul ndu aa: «Te i yeema pɛ mò lo yoomu háá mi hin, mò va maa mako nɔm co kon ni? Nɔm hun ya kɔɔli tuŋ!» 23O kon kɔɔli, mí sɔɛi ken tiw vanaa laalannda tɛɛn maa kaandennɔ kon ndu vinin te. Nduyɛ Yeesu ndóò dimul ndu maa o vinin te le, kɛ nuaa ndóò dimul ndu ni aa: «Te i yeema pɛ mò lo yoomu háá mi hin, mò va maa mako nɔm co kon ni?»
24Kaandennɔ co seilen timbio a dɛnnda lan o kɔɔ-o sɛva lan ni. N sinà yɛ maa toɲaa seile ndɔlen le co ni.
Sɔɛi liimɛi
25Yeesu tosa vɛlɛ dɛnnda celen taw, te vanáà tɛɛsiaa lan pɛ o sɛvaa nin, i sina le, te sɛbɛla sɔɔn kalan mun sɛvan nin-ndan láà sul o ceendo coo.
Currently Selected:
Nsaŋ 21: BKG
Highlight
Share
Copy
Want to have your highlights saved across all your devices? Sign up or sign in
© Alliance Biblique en Guinée
