Nsaŋ 20

Sɛi nda kumbu Yeesu nin-ndo connun fondo

(Matie 28.1-8, Marke 16.1-8, Luke 24.1-12)

1O paale tasele lɔ́ɔ́ coo, ɲɔɔ va vɔ yifidii, mí Mari fula Makdala-o kɔa o sɛiyo. O komal pow ndáà kinda sɛiyo-o o faŋaa. 2Mó ɲaanun, mó kɔ komal Simɔn Piɛr a kaandennɔɔ pilɔɔ, o Yeesu ndóò kaola taw-vo, mó dimul nda aa: «A cii Maalii soli o sɛiyo nin, n sínà nɛɛ nda kɛsi ndu le.» 3Mí Piɛr nda kaandennɔ kon a fula, má kɔa o sɛiyo. 4Nda ŋiɔn kpow a va kɔlan a kiltan, mí kaandennɔɔ pilɔɔ hiaw Piɛr kiltan, mó tiiya ndu tase o sɛiyo. 5Mó tundun le tofaa, mó ca kolala fengbɛlan la kɛsiaalan lɛŋ, kɛ o luei le. 6Mí Simɔn Piɛr bɛɛ tiiya, mó luɛi o sɛiyo nin, mó ca kolala fengbɛla lan lɛŋ, 7a kola ndáà handu Yeesu o bollen coo-o, o ve nɛɛ pilɛ a kolala n'pɛngɛla lan te, o va o tuituiyaa o kɛsiaa landɔ teengen. 8O kon mí kaandennɔɔ pilɔɔ, o tase keleŋa tiiya o sɛiyo-o bɛɛ luɛi. Mó ca, mó laalan. 9Kani háá o telen kon, kaandennda ndáà bii-yɔ ɲɛ Sɛbɛla Diandaalan láà dimi-o bila maa Yeesu ndóò tendulnin mò fula vanvílɛ́iya tɛɛn te. 10Mí kaandeŋaa ŋiɔŋaa kalaa muungun o la nda lo.

Yeesu cɔmnun Mari fula Makadala-o

(Matie 28.9-10, Marke 16.9-11)

11Mari va isisi caŋndo o sɛiyo sondoo. Mó tundun a caŋndo lende le tofaa o sɛiyo nin. 12Mó ca mɛlɛkaa nda ŋiɔn, volɔɔla humbulan la va nda lekɔɔ, a va icali o fonda ndáà kɛsi dialun Yeesu-on-ndo. O pilɛ o fonda bollen le va-o, o pilɔɔ o fonda pelon va-o. 13Mí mɛlɛkaa kan a ɲuna ndu aa: «Vuɛɛndo, le yɛɛ nɛ n co yɛ caŋndo?» Mó mulul nda aa: «A cii Maalii ni vi-o cua, i sínà nɛɛ nda kɛsi ndu le.» 14O mei bɛɛ sondo le, mó mulin, mó ca Yeesu isisi, kɛ o síná maa ndu le. 15Mí Yeesu ɲuna ndu aa: «Vuɛɛndo, le yɛɛ nɛ n co yɛ caŋndo? Nɛ̀ɛ́-nɛ̀ n co yɛ nuwviaa?» Mari ca ko bɛɛ aa vana baala nakɔɔ ni, mó dimul ndu aa: «Fallo, te nɔm faŋa dialun Yeesu-on ni, mɛɛ dimul-la nɛɛ n kɔ kɛsi mun-nda, mì kɔ cua.» 16Mí Yeesu dimul ndu aa: «Mari!» Mó síná ndu, mó veelu ndu aa: «Kɔɔfa!» 17Mí Yeesu dimul ndu aa: «Pilan ya le, kani i hel-lɔ o Pua lo le. Kɛ kɔ dimul puapilɛa nia aa i co helɔɔ o fuɲa nuu a fuɲa niaa lo, o Hala nuu a Hala niaa lo.» 18O kon mí Mari fula Makdala-o kɔa o kaandennda lo, mó kɔ dimul nda aa: «I ce Maalii!» O kon mó dimul nda sɔɔn o dimul ndu-on.

Yeesu cɔɔmun kaandeŋaa ndɔa

(Matie 28.16-20, Marke 16.14-18, Luke 24.36-49)

19Paale len le va paale taselen o lɔ́ɔ́ kon nin ni, diolan la va lakindaalan nɛɛ kaandennda va-a, kani siòònde va nda a Yuifia. Mí Yeesu hun, mó sim nda tɛɛn, mó dimul nda aa: «Màá la sɔla kɔlɲuloo!» 20Mɛɛ o dimi lende, mó cɔm nda bala ndɔlan a lumgbui ndɔɛi. Mí kaandennda dɔawnun ɲaale le Maalii cɔu. 21Mí Yeesu dimul nda vɛlɛ aa: «Màá la sɔla kɔlɲuloo! Maa mɛɛ Pua vem ya yɛ, ya bɛɛ i vem niaa.» 22Mɛɛ o cii sɔɔn mun dimi, mó hul nda, mó dimi aa: «La sɔla Hala Kɔl-Diandaa. 23Hakila vanaa niaa malnin haki-a la malnunnin haki, la vanaa niaa melnin haki le-a la lonin nda coo.»

Yeesu nda Tomas

24Tomas, o ndáà veelu aa Didim-ndo#20.24 Didim: Kon co dimio ni aa pɛndunɔɔ., vana pilɛ o kaandeŋaa tɔ́ a à ŋiɔnda tɛɛn, ndu ve lon lɔ́ɔ́ Yeesu hin-ndo le. 25O kon mí kaandeŋaa tɔ̀a dimul ndu aa: «N ce Maalii se!» Kɛ mí Tomas dimul nda aa: «Te i ci foofola n'pɔɔndɔlan ndu o laba, mì vow suei nɛɛ pɔɔndɔn n luɛi ya le, te i vow ndu baa o ilungbu le, i laalàn ndi le.»

26Palɛi ŋɔmaa o kon kɔɔli, kaandeŋaa Yeesu-a va vɛlɛ cɛinin, Tomas va latulu a nda. Mí Yeesu hun, diolan la va la kiindiaa lan, mó sim nda tɛɛn, mó dimul nda aa: «Màá la sɔla kɔlɲuloo!» 27O kon, mó dimul Tomas aa: «Siɛndi suei mà vow, tofa ya balan. Siɛndi vɛlɛ baa mà vow ya o ilungbu, pɛngi sikaa mà laalan!» 28Mí Tomas mulul ndu aa: «Maalii nuu a Hala nuu!» 29Mí Yeesu dimul ndu aa: «Le mɛɛ n ce ya yɛ n laalan ni baa? Dɛnɛ kɛndɔɔ co le vanaa ci ya le-a, kɛ má laalan!»

Le kɔlɔ sɛbɔɔ ho sɛvan-ndo

30Yeesu tosa vɛlɛ dɛnnda kaamaala bɔɔ-bɔɔ kaandeŋaa ndɔa o hɔl, la sɛvan o sɛbɔɔ ho nin te lan. 31Kɛ mun sɛvan haliko mi la laalan maa Yeesu co Krista ni, Po Hala-o pɛɛn. O kon la laalan pɛ, la sɔla yoomoo o diola ndɔlan.

Currently Selected:

Nsaŋ 20: BKG

Highlight

Copy