Nsaŋ 19

1O kon mí Pilate yɔngu Yeesu, má lɔaa ndu a kɔlulen. 2Mí vanaa cɔwva lɔa mɔsil lemasaa a yɔɔn, má vow Yeesu ndu o lebol. Má vow ndu doma siaŋa sɔɔtɔtɔɔ. 3O kon kɔɔli, má va ndu kɔlan o hɔl a ndu dimullo aa: «Masa Yuifia isɛ!» Má va ndu kpaŋndon lɔɔ.

4Mí Pilate fula vɛlɛ o dio, mó dimul Yuifia aa: «La yaŋ ndɔ nilan, i co niaa ndu solul o bɛ́ɛ̀ haliko mi la sina maa i ci ɲɛ-ɲɛ vɔɔn o tosa le.» 5O kon mí Yeesu fula. Mɔsil lemasa n'yɔɔ va ndu o lebol. Doma siaŋa sɔɔtɔtɔɔ bɛɛ va ndu lekɔɔ. Mí Pilate dimul nda aa: «Má cè langbanɔ kalaa se!»

6Kɛ bolii vanaa-solia-lasálàá a kpalilla cɔw ndu dɔ́ɔ́, má yonda aa: «Baŋ ndu o yɔm singafilaa coo! Baŋ ndu o yɔm singafilaa coo!» Mí Pilate dimul nda aa: «Niaa pila kɔ baŋ ndu o yɔm singafilaa coo. Kani ya ya, i ci tɛɛmbuu kɛ́-kɛ̀ vana yaala ndu le.» 7Mí Yuifia muli aa: «N nɔ tɔŋndo, o tɔŋ naa kon nin, o bɛnda mò sɔla piɔ́mndo, le siingɔn o siingun ndu pila Po Hala-o-o.» 8Pilate tueyɔɔ lende, mí siòònde cɔɔlu ndu biyɔɔ, 9mó muungu o cɛi lemasaa nin, mó kɔ ɲuna Yeesu aa: «Kuɛɛ nɛ n fula yɛ?» Kɛ Yeesu mulul ndu le. 10O kon mí Pilate dimul ndu aa: «A co ya mulul te! Vɛ̀ɛ̀ a sina le maa i nɔ dí mì mal nɔm, mà kɔɛnnun, te kon te mì baŋ nɔm o yɔm singafilaa coo le?» 11Mí Yeesu muli aa: «A nɔ kpaaya kɛ́-kɛ̀ ya coo le, te o co mò kennun nɔm fulaa o halataala le. Lelan, vana mal-la nɔm o ba-o hiow tɛɛmbuu a nɔm.»

12Kandɔɔ o telen kon, mí Pilate va nɛilan nuwviaa le Yeesu malɔɔ, kɛ mí Yuifia yonda o lepilɔɔ aa: «Taa mal pɛ langbanɔɔ ho kɔnndan, mɛɛ a co caaŋoo Sesar le. Vana-vana cennun pɛ ndu pila masaa, mɛɛ yaamɔɔ Sesar ndu co ni.» 13Pilate ciiyo sɔɔn mun tueyɔɔ, mó soli Yeesu o dio, mí ndu Pilate cal o fonda kialaa n'yama ndaa coo, o bɛ́ɛ̀ lapowvo. Fonda kon diolan o hebrei nin aa Kabata. 14Kafo-hiavaa-coo va o siɔdii-o, a telen paalen o pol kínɛí, mí Pilate dimul Yuifia aa: «Má cè masa niaa!» 15Kɛ má deŋi o lepilɔɔ aa: «Faŋa naa ndu o hɔl! Faŋa naa ndu o hɔl! Kɔ baŋ ndu o yɔm singafilaa coo.» Mí Pilate ɲuna nda aa: «Vɛ̀ɛ̀ mì baŋ masa niaa o yɔm singafilaa coo?» Mí bolii vanaa-solia-lasálàá muli aa: «Naa n nɔ masa celen o Sesar kɔɔli le.» 16O kon mó ke nda ndu le ndu baŋɔɔ o yɔm singafilaa coo.

A baŋ Yeesu o yɔm singafilaa coo

(Matie 27.32-44, Marke 15.21-32, Luke 23.26-43)

O kon, má kɔa a Yeesu. 17Mí Yeesu pila cua yɔm singafilaa ndɔɔ cɔnɔnndo o kobio nin le kɔlan o fonda nda veelu aa: «Kɔlkota-o» (kon co dimio ni aa: «Fonda Lakpokpoo»). 18Lon nda baŋ Yeesu o yɔm singafilaa coo ni. Má baŋ vɛlɛ langbaa pum nda ŋiɔn Yeesu o kpengun miunndon coo, mí ndu va nda tɛɛn. 19Mí Pilate dimi maa a sɛva o pɛngɛi pɔmbɔɛi pum coo aa: «Yeesu fula Nasarɛt-o, masa Yuifia.» 20Mí Yuifia bɔɔ-bɔɔ dimi sɛva kon, kani nɛɛ ndáà baŋ Yeesu o yɔm singafilaa coo-a ve levil a kobio le. O hebrei nin, o latɛnnde nin a o krɛkiei nin ndáà sɛva sɛva kon ni. 21Mí bolii vanaa-solia-lasálàá Yuifia dimul Pilate aa: «Sɛva aa masa Yuifia le, kɛ sɛva aa o dimi aa ndu co masa Yuifia ni.» 22Mí Pilate mulul nda aa: «I cii nin ɲɛ ya sɛva-o sɛva.»

23Vanaa cɔwva ciiyo Yeesu baŋɔɔ o yɔm singafilaa coo, má cua volɔɔla ndɔla cuɛinanndan, má piɔw lan kundalan tan hiɔɔlu, vana cɔw kɛ́-kɛ̀ kundaa pilɛ. Má cua vɛlɛ doma ndɔ lebɛngoo, ndóò nɔ sɔndɔɔ le, kandɔɔ lebɛngu háá lecoo, ɲɛ pilɔɔ kpé o va ni. Má dimulan aa: 24«N sɛɛsian ndu le, n malnun siondei, le sinaa vana nɔnin ndu-o.» Ken tosan, haliko mi o dimin o Sɛbɛ Hala-o nin-ndo ndóò peelun aa:

«A co volɔɔla nilan piɔvanndo nda pila tɛɛn,

a co siondei malɔɔ le doma ni lebɛngoo.»

Lende vanaa cɔwva tosa ni.

25Kalaa Yeesu, pɔmbɔɔ kalaa Yeesu, a Mari lanɔɔ Kulopas a Mari fula Makadala-o va isisi o yɔm singafilaa Yeesu-o ikɛi. 26Yeesu cɔu kala ndɔ, mó ca kaandennɔ ndóò kaola-o isisi ndu ikɛi, mó dimul kala ndɔ aa: «Vuɛɛndo, má cè po nɔmndo.» 27O kon kɔɔli, mó dimul kaandennɔ kon aa: «Má cè kala nɔm!» Kandɔɔ nin a telen kon, mí kaandennɔ kalaa kɔa a ndu o ndu lo.

Piɔ́m Yeesu-o

(Matie 27.45-56, Marke 15.33-41, Luke 23.44-49)

28O kon kɔɔli, mɛɛ Yeesu sina maa o cii baala ndɔɔ kpow, mó dimi aa: «Kolɔɔ bii ya.» Haliko mi ɲɛ Sɛbɛ Hala-o dimi-o peelun. 29Kpángàá pum va lon o piaa cá a mɔima vaalɛiyan, má sɔaa ɲɛ fuɛn-fuɛɛndo pum o sionnde hisɔp, má yin o mɔima man nin, má yulu Yeesu o sondo. 30Yeesu sɔsaa mɔima man, mó dimi aa: «Ɲɛ-ɲɛ cuu peelɔn!» O kon mó landu bollen, mó malnun kɔl.

Vana cɔwvo buli Yeesu lungbuei

31Paale pɛngiaalen le va diimandɔɔ ni. Nduyɛ Yuifia ndáà yeema mì vanaa vílɛ́yaa kan ndáà lo lende o yɔmii singafilɛi coo o paale pɛngiaalen coo le, kani paale sɔvɛlen pila paale len le va ni. Má kɔ ɲuna Pilate le nda pelon yimiyimio le nda faŋaa lon. 32O kon mí vanaa cɔwva hun yimi vana tasoo pelon, vanaa nda baŋ Yeesu tɛɛn-nda pɛɛn, má yimi vɛlɛ o pilɔɔ pelon. 33Kɛ ndáà tiiyaa o Yeesu lo, má ca maa o vinnun nin, a yimi lɛ ndu n'pelu le, 34kɛ a kon kpow, mí vana cɔwvo pilɛ cuku ndu lungbuei a bállo, mí mɛnndan ma fula ma bingulanndan a koovan. 35Mí langbanɔ ce man-ndo timbi seilen, seile ndɔlen le co toɲa. Ndu sina maa toɲaa o co dimio ni, o co ndi dimio haliko mi niaa bɛɛ laalan. 36Ken yɔŋnun, haliko mi sɔɛi co o Sɛbɛ Hala-o nin-nde peelun aa: «Paa ndɔɔ pilɛ bɛɛ yomnin te.» 37O co vɛlɛ o sɛvaa o Sɛbɛ Hala-o nin aa: «Vannda heelunin hɔlla mà tofa vana nda cuku-o.»

A vow Yeesu o sɛiyo nin

(Matie 27.57-61, Marke 15.42-47, Luke 23.50-56)

38O kon kɔɔli, mí Yosɛf fula Arimatee-o kɔ ɲuna Pilate maa o cɛl mò tuisi dialun Yeesu-on. Mí Pilate cɛl, mó kɔ faŋa dialun Yeesu-on. Yosɛf kon bɛɛ kaandennɔ Yeesu-o o va ni, kɛ o vionnɔnndo nin, kani siòònde va ndu a Yuifia. 39Mí Nikodɛm ndóò kɔɛ o Yeesu lo icɔllo-o bɛɛ kɔa a ɲɛm cun kɛndɔn le kilolan beleyaa, mirt a aloɛs pɛɛn. 40Má cua dialun Yeesu-on, má simbul mun o kolala n'pɛngɛlan nin a ɲɛm cun kɛndɛn mun latulu, maa mɛɛ naamu Yuifia va le vanvílɛ́iya kumbɔɔ yɛ. 41Nduyɛ nakɔɔ pum va nɛɛ ndáà baŋ ndu-a, sɛi sɛnɛi ndáà kumbu vɔ vana lenin too va o nakɔ kon nin. 42Sɛi kalaa ve levil te, nduyɛ paale bɛɛndiannden le va ɲinkon le Yuifia le paale pɛngiaalen ni, le hee má kɔ kɛsi Yeesu lon.

Currently Selected:

Nsaŋ 19: BKG

Highlight

Copy