Nsaŋ 18

A bii Yeesu

(Matie 26.47-56, Marke 14.43-50, Luke 22.47-53)

1Yeesu ciiyo sɔɛi lende, mó fula latulu nda kaandeŋaa ndɔa le kɔlan o bóllo Sedrɔn leeloo, nɛɛ nakɔɔ pum va-a. Má kɔ luɛi lenin nda ndaa.

2Yuda va ndu malɔɔ vannda o ba-o ndóò sina fonda kon, kani Yeesu ndóò kɔa lon cuɛi-cuɛi nda kaandeŋaa ndɔa. 3O kon, mí Yuda sim vanaa cɔwva a kpalilaa cumulaa bolii vanaa-solia-lasálàá nda Faliisia vem ndua laci, má kɔa lon a tɛngɛlan, a fitinalan a á ɲɛm cɔwvon o laba.

4Yeesu ndóò sina nin dɛnnda va ndu hunɔɔ yɔŋnɔn ndan kpow. Lelan, mó sɔɔnguu, mó ɲuna nda aa: «Nɛ̀ɛ́-nɛ̀ niaa co yɛ nuwviaa?» 5Má mulul ndu aa: «Yeesu Nasarɛt.» Mó dimul nda aa: «Ya ni!» Yuda va ndu malɔɔ vannda o ba-o va isisi nda ndaa. 6Yeesu dimullo nda lende aa ya ni, má muungu a makɔɔ, má deli lɛŋ.

7Mó ɲuna nda vɛlɛ aa: «Nɛ̀ɛ́-nɛ̀ niaa co yɛ nuwviaa?» Má mulul ndu aa: «Yeesu Nasarɛt.» 8Mí Yeesu mulul nda aa: «I cii niaa nihau dimul maa ya ni. Te ya niaa co yɛ nuwviaa ni, mɛɛ la mal vanaa tɔ̀a kɔnndan.»

9Hee yɔŋnun haliko mi sɔɛi ndóò dimi-e peelun aa: «Vanaa n ke ya va kpow, o pilɛ bɛɛ i mel te.»

10Simɔn Piɛr ndóò nɔ mɔɛi cɔwve o ba, mó nan ndi, mó kialu buɛi bolle vanaa-solia-lasálàá nile ba kɛndɛlen. Buɛi kalaa diolan Malkis. 11Mí Yeesu dimul Piɛr aa: «Mingi mɔɛi nɔmii cɔwve o boo ndɔɔ nin. Vɛ̀ɛ̀ ya kɛɛ yɛnin kolɔɔ o taala kólaa imɔnɔ Fuɲa nuu ke ya le kolɔɔ lenin-ndo nin?»

A kɔɛ a Yeesu o Anɛɛ lo

12Mí kunda vanaa cɔwva, vana va nda bollen-ndo a vanaa kándà masaa-a o Yuifia tɛɛn a bii Yeesu, má yii ndu. 13Má kɔa fɔlɔn a ndu o Anɛɛ lo. Kani Anɛɛ kon va lefoo Kaif va vɔsi kon bolle vanaa-solia-lasálàá-o ni. 14Kaif kon yɛ, ndóò dimul simlacia Yuifia ni aa: «O co fisa mì vana pilɛ vi le lɛŋnden kpow.»

Piɛr viinun aa o sina Yeesu le

(Matie 26.69-70, Marke 14.66-68, Luke 22.55-57)

15Mí Simɔn Piɛr nda kaandennɔ celen va kɔlan Yeesu kɔɔli. Bolle vanaa-solia-lasálàá ndóò sina kaandennɔ kalaa taw. Mí kaandennɔ kon kɔa Yeesu kɔɔli o bolle vanaa-solia-lasálàá lo bɛɛ. 16Kɛ mí Piɛr lo o bɛ́ɛ̀ o dioo ikɛi. Mí kaandennɔ bolle vanaa-solia-lasálàá ndóò sina kon-ndo fula, mó dimul buɛi laandu va dioo cumullo-o le Piɛr lueiyo. 17O kon, mí buɛi laandu va kon dioo cumullo-o ɲuna Piɛr aa: «Vɛ̀ɛ̀ nɔm bɛɛ co vana pilɛ o kaandeŋaa ndɔa tɛɛn te?» Mí Piɛr vuunun aa: «Ɛ-ɛ, o co ya le!»

18Mí buɛiya a kpalilla mɛndul yinnden, má va hangɔɔ le hoeyii va-e. Mí Piɛr bɛɛ sim hangɔɔ nda tɛɛn.

Bolle vanaa-solia-lasálàá ɲuuniaa Yeesu

(Matie 26.59-66, Marke 14.55-64, Luke 22.66-71)

19Mí bolle vanaa-solia-lasálàá va Yeesu ɲuuniaa le kaandeŋaa ndɔa a le pɛɛkuula o va yɔngoo lan. 20Mí Yeesu mulul ndu aa: «Kpendekele ya va sɔɛi o vannda kpow lo ni. Lɔ́ɔ́-lɔ́ɔ̀, i va vannda pɛɛkoo o cɛila lekaanndan a o Cɛi-Hala-o nin nɛɛ Yuifia kpow bɔɔŋian-nda. I dímí ɲɛ-ɲɛ o vionnɔn nin te. 21Le sabu yɛɛ nɛ n co yɛ nin ya ɲunaa ho? Ɲuna vanaa tuei diomnda ya dimi lan-nda. Nda sina ɲɛ ya dimi-o.» 22Mɛɛ Yeesu dimi lende, mí vana pilɛ o kpalilaa cumulaa va lon-nda tɛɛn soli baa, mó lɔaa ndu kpaŋnde, mó dimul ndu aa: «Nuaa n mulul bolle vanaa-solia-lasálàá ni?» 23Mí Yeesu dimul ndu aa: «Te diom vɔɔndo ya dimi ni, mɛɛ cɔm ndɔ diom vɔɔn kon. Kɛ te i caa yɛ pɛ sɔɛi, mɛɛ le kɔlɔ yɛɛ n lɔɔ yɛ niko ya?» 24Yeesu lo o yiyaa lende, mí Anɛɛ hivi ndu o Kaif bolle vanaa-solia-lasálàá lo.

Piɛr viinun vɛlɛ aa o sina Yeesu le

(Matie 26.71-75, Marke 14.69-72, Luke 22.58-62)

25Simɔn Piɛr lo isisi hangɔɔ, má ɲuna ndu aa: «Nɔm bɛɛ kaandennɔ ndɔɔ pilɛ le n co le?» Mó muli aa: «O co ya le.» 26Mí buɛi bolle vanaa-solia-lasálàá pum, o Piɛr kelu vanayɛi ndɔɛi nilen-ndo ɲuna ndu aa: «O co nɔm te ya ce o nakɔɔ nin niaa ndaa le?» 27Kɛ mí Piɛr vuunun vɛlɛ. Fɔ́ɔ́fɔ̀, mí sɔɔ koova.

A kɔɛ a Yeesu o Pilate lo

(Matie 27.1-2,11-14, Marke 15.1-5, Luke 23.1-5)

28Idiiyo púŋ, má can a Yeesu o Kaif lo, má hiaw a ndu o cɛi lemasa masa ibunga Rɔmnda. Kɛ Yuifia pila luei o cɛi lemasaa nin te. Haliko a nɔɔlian te, o kon mi ndáà de ɲɛdiaa kafo-hiavaa-coo. 29Mí Pilate fula o dio, mó ɲuna nda aa: «Sɔɛi yɛɛ nɛ langbanɔɔ ho tɛɛmbuu yɛ mì la hun a ndu?» 30Má mulul ndu aa: «Te ndóò tɛɛmbuu isɔɔ le, n ve hunɔɔ a ndu o nɔm ndo le.» 31O kon mí Pilate dimul nda aa: «Mɛɛ niaa pila kɔ a ndu mì la kelu ndu iyama mɛɛ tɔŋ niaa co yɛ.» Mí Yuifia mulul ndu aa: «Di co naa o kennan mì n kelu iyama le vanaciee diyɔɔ le.»

32Ken yɔŋnun haliko mi sɔɛi Yeesu ndóò dimi a piɔ́m ndɔɔ o kɔɔ-e ndíì peelun. 33Mí Pilate muungu o cɛi lemasaa nin, mó veelu Yeesu, mó ɲuna ndu aa: «Vɛ̀ɛ̀ nɔm co masa Yuifia ni?» 34Mí Yeesu muli aa: «Mò va maa nɔm pila yiyan lende ni baa, vannda dimul nɔm lende a ya o kɔɔ ni?» 35Mí Pilate mulul ndu aa: «Mò va maa Yuifinɔɔ ya co ni? Vanaa nɔmnda a bolii vanaa-solia-lasálàá hin a nɔm o ya lo ni. Yɛɛ n tosa yɛ?» 36Mí Yeesu muli aa: «Masale nilen le co o ceendo coo nanu le. Te masale nilen léè va pɛ o ceendo ho coo, buɛyaa niaa va isisi le ya. Ndáà cɛlnin mì ndáà hin a ya o simlacia Yuifia lo le, kɛ sunsun masale nilen le co ɲɛ vaa ceen nanu le.» 37O kon mí Pilate ɲuna ndu aa: «Mɛɛ masaa n co lekɛ́ndɛi ni?» Mí Yeesu muli aa: «Nɔm pila cii dimi, masaa ya co ni. Lelan ya velun ni mí hun o ceendo coo, haliko mi tɛnda seile toɲalen. Vana-vana yeema pɛ toɲaa, ndu bii sɔɛi nii ni.» 38Mí Pilate ɲuna ndu aa: «Yɛɛ co yɛ toɲaa?»

A kilul Yeesu yamɛi le piɔ́mndo sɔlaa

(Matie 27.15-31, Marke 15.6-20, Luke 23.13-25)

Pilate ciiyo dimio lende, mó fula vɛlɛ o dio, mó komal Yuifia hin a Yeesu-a, mó dimul nda aa: «Ya i ci tɛɛmbuu oo tɛɛmbuu vana yaala langbanɔɔ ho le. 39Kɛ naamu niaa co ni, mì solul niaa vana kaasoo pilɛ, mì mal ndu o kafo-hiavaa-coo coo. Vɛ̀ɛ̀ la yeema mì i mel niaa masa Yuifia?» 40Má yonda aa: «Kaali, o co ndu le! Mel naa Barabas!» Nduyɛ, vana del vannda coo-o Barabas kon va ni.

Currently Selected:

Nsaŋ 18: BKG

Highlight

Copy