Dɛnnda kiilaa 1

Luke cɔm sɛbɛ ndɔɔ

1Teofil kɛndɔ sei#1.1 Teofil kɛndɔ sei: Tuu vɔ fondaa ho aa Dɛnnda kiilaa 1.1!

I sɛva dɛnnda Yeesu kandu tosaa lan a pɛɛkula o kandu yɔngoo lan kpow o sɛbɛ tasoo#1.1 sɛbɛ tasoo: Yoongu kɛndɛ Luke sɛva-o ndu Luke veelu nanu ni aa «sɛbɛ tasoo». nin, 2kɔlan háá paale o hel o halataala len. Lɔ́ɔ́ o hun hel o halataala, mó yɔngu kiilaa ndɔa o hɛli-a silalan o kpaaya Hala Kɔl-Diandaa bɛngu. 3O piɔ́m ndu Yeesu sɔla-o kɔɔli, mó cɔmnun nda, mó cɔm nda vɛlɛ tɔɔmaselelan taw maa o muungu yoomu. Palɛi belehiɔɔlu o cɔmnun nda ni, mó dimul nda sɔɔn a Masale Hala len o kɔɔ. 4Paale pilɛ, o va ɲɛdiaa dioo nda ndaa, mó dimul nda aa: «La fáŋàn Yerusalɛm te, la cum ɲɛ Fuɲa nuu dimi le niaa yɔngoo-o. Ɲɛ yáà dimul niaa sɔɛi ndɔɛi-yo pɛɛn. 5Kani o mɛnndan nin Nsaŋ yin vannda ni, kɛ niaa niaa, palɛi bendu lɛ le, mì la sɔla yinɔɔ Hala Kɔl-Diandaa.»

Yeesu hel o halataala

6Kiilaa va a cuungiannda nɛɛ pilɛ, má ɲuna Yeesu aa: «Maalii, vɛ̀ɛ̀ sisa n co masale Israɛlla mingi o fonda ndɔɔ ni?»

7Mó mulul nda aa: «O co niaa le bɛnda mì la sina telenndan a palɛi Fuɲa nuu pila kɛsi a kpaaya ndɔɔ-e le. 8Kɛ la sɔlanin kpaayaa lɔ́ɔ́ Kɔl-Diandaa toalnin niaa coo-o. O kon, la siŋnunnin seyaa nia Yerusalɛm ciee, o tàndá Yuda-o nin a o lɛŋnde Samari len nin kpow, kɔlan tiiyaa háá o lɛŋnden mɛɛlulan.»

9Mɛɛ Yeesu cii sɔɔn mun dimi, mó hel o halataala, kiilaa ndɔa va ndu tofaa. O kon kɔɔli, mí yumbuyumboo kumbu ndu, a ci lɛ ndu le. 10A lo tofaa o halataalaa nin nɛɛ Yeesu va helnɔnndo-a, mí langbaa nda ŋiɔn a fula nda ikɛi o lepilɔɔ a volɔɔla humbulan lekɔɔ, 11má dimul nda aa: «Niaa Kalilea ha, le yɛɛ nɛ niaa co yɛ tofaa o halataala? Yeesu faŋan hoo niaa ikɛi, mó hel o halataala-o hunnin vɛlɛ mɛɛ niaa ce ndu kɔlan o halataala nuaa yɛ.»

12O kon, má faŋan o pembii nda veelu aa Pembii Oliv-e, má muungu Yerusalɛm. Pembii ken i co kobio levil te, i co le kɔla kilo pilɛ a tala. 13Ndáà muungoo Yerusalɛm, má kɔ luɛi o cɛi-lenin va o cɛi coocoo pum nin-ndo nin, nɛɛ ndáà bɔɔŋian lɔ́ɔ́-lɔ́ɔ̀-a. Nda yɔŋnun haa ni: Piɛr, Nsaŋ, Nsaki, Andre, Filipe, Tomas, Bartelemi, Matie, Nsaki po Alfee-o, Simɔn vana cɔlɔba le lɛŋnde ndɔlen baŋaa-o a Yude po Nsaki-o. 14Nda kpow, a va Hala piɛiyo o diom pilɔɔ nin nda vanlaandua, a Mari kalaa Yeesu a pɔmbɔa Yeesu-a.

A hɛli Matias le muungoo o fonda Yuda-o

15Paale pilɛ, mí vanaa laalannda cuungian, a va le vannda kɛmɛ bidiin. Mí Piɛr can nda tɛɛn, mó dimi aa: 16«Puapilɛa nia, mɛɛ mì ɲɛ Hala Kɔl-Diandaa ndóò dimi o Sɛbɛ-Hala-o nin-ndo ndóò peelun. Ɲɛ ndóò dimi a sondo David-o le Yuda-o pɛɛn. Yuda sim kon vannda laci le Yeesu biyɔɔ-o. 17O va vana pilɛ naa tɛɛn, mí n va baalaa ho tosaa naa ndaa. 18Mó piandu lɛŋnden a volin o sɔla a dɛnɛ vɔɔndo-on, mó del a ikɛsu, mí demboo sɛɛsa, mí ɲɛm va ndu nin-ndon kpow n sɛŋin. 19Mí vannda Yerusalɛm kpow a tuɛi dɛnɛ kon, má ke yondo kon diolan o sɔɛi ndɛi nin aa: ‹Hakɛldama›, kon co dimio ni aa: ‹Lɛŋnde makòó len›. 20Nduyɛ, o co o sɛvaa o Sɛbɛ condii lisɛi nin aa:

‹Màá calta ndɔlan la lo fondo!

Màá vana-vana cal lɛ lon te!›

O co vɛlɛ o sɛvaa aa:

‹Màá vana celen muungu o fonda ndɔɔ!›

21Nduyɛ, telen Yeesu va kɔlan a naa mo va muungoo a naa-o kpow, vannda va naa kɔlan kɔɔli, 22kandɔɔ telen Nsaŋ va vannda yinɔɔ-o, kɔlan háá paale Yeesu faŋan naa tɛɛn, mó hel o halataala len. Lelan, mɛɛ mì vana pilɛ o vanaa kan tɛɛn siŋnun seiyo maa naa a tendul Yeesu-o o kɔɔ.»

23O kon má tuu vanaa ŋiɔn: Yosɛf, o ndáà veelu vɛlɛ aa Barsabas, te kon te aa Yustus-o, a Matias. 24O kon kɔɔli, má piɛi Hala aa: «Maalii, a sínà yiyannda vannda kpow, cɔm vana n hɛli o vanaa ŋiɔnda ha tɛɛn 25le baala lekiilaa ho tosaa-o, baala Yuda mal ho, mó kɔa o fonda ndóò bɛnda le kɔlan-ndo pɛɛn.»

26Ndáà malɔɔ siondei, mí sionnden le bii Matias, o kon má handu ndu o kunda kiilaa tɔ́ a ò pilɛa coo.

Currently Selected:

Dɛnnda kiilaa 1: BKG

Highlight

Copy