Dɛnnda kiilaa 2

Hunɔɔ Hala Kɔl-Diandaa

1Paale kafo koavaa#2.1 kafo koavaa: A veelu vɛlɛ kafoo ho aa «kafo lalɔ́ɔ́». Yuifia ndáà cii pɛ ɲɛm ndáà vaa-on luei cɛilan nin, ndáà hɛli n kɛndɛ kɛndɔn a cɔlua kɛndɛa a pum, ndáà kɔɛ le sálàlan solio. Palɛi beleŋuɛɛnu ndíì hiow pɛ o kafo-hiavaa-coo kɔɔli ndáà tosa kafo koavaa ni. lee tiiyaa, mí vanaa laalannda kpow a cuungian nɛɛ pilɛ. 2Mí diomndo pum fula o lepilɔɔ o halataala maa diom hoeyii bɛndu, mó pia nɛɛ nda va icali cɛinin-nda. 3O kon má ca ɲɔɔ pum maa diɛɛmui leyin. Mí diɛɛmui ken i piɔvan, mí i cal vana-vana coo. 4Mí Hala Kɔl-Diandaa pia nda nin kpow, má kandu sɔɛi o sɔɔn celen nin mɛɛ Kɔl-Hala-o va nda cɔmndo le sɔɛi yɛ.

5Nduyɛ, Yuifia ndáà vo Hala-a pum a va Yerusalɛm, fulaa o lɛŋii co o ceendo coo-e kpow nin. 6Mɛɛ nda tuei diom kon, má cuungian sɛ́lɔ́ɔ́. Má dɔawnun kɔndɔfili taw, kani vana-vana va ɲɛ kaandennda va dimio-o tueyɔɔ o sɔɛi ndɔɛi nin. 7Mí kɔndɔfil bɛndoo bii nda, má ɲuna aa: «Vɛ̀ɛ̀ o co Kalilea le a co sɔɛi he nuaa le? 8Yɛɛ co yɛ niko tosaa mì vana-vana va ɲɛ nda co dimio-o tueyɔɔ o sɔɛi ndɔɛi o velun-nde nin? 9Nduyɛ, Partea, Mɛdea a Elamnda a co naa tɛɛn. Vanaa pum a fula Mesopotami, Yuda, Kapadɔse, Pɔn, a o lɛŋnde Asii len nin, 10Frisii a Pamfilii, a pum a fula Esipte a o tàndá Libii-o nin, o co Sirɛne ikɛi-yo. Vanaa pum a fula Rɔm, 11Krɛte a Arabii, má hun nanu. Yuifia a pum co ni, a pum yɛ, má luɛi o kaannde Yuifia. Kɛ nduyɛ, n co ɲɛ nda co dimio-o tueyɔɔ o sɔɔn naan mangalan yɛ́-yɛ́-on nin, o nda co dimio a dɛnnda kaamaala Hala tosa lan o kɔɔ-o pɛɛn!» 12Má dɔawnun kɔndɔfili taw, ndáà nɔ mɛɛ dimia le. Má muungu ɲuunianndo vellaa-velle aa: «Dɛnɛ súú yɛɛ co yɛ hoo?» 13Kɛ vanaa pum va kaandennda mamɔɔ, ma va dimio aa: «Mɔiyan nda pim nuaa ni!»

Sɔɔn Piɛr dimi-on

14O kon mí Piɛr can kiilaa tɔ́ a ò pilɛa tɛɛn, mó heelu diomndo, mó dimul sɛ́lɔ́ɔ́ aa: «Niaa Yuifia a niaa vanaa co Yerusalɛm-nda, la yaŋ nilan ɲɛkɛndɛi o sɔɔn nun, mì la bii dɛnndan ndan bila. 15O co mamɔi le co vannda ha o lahɔl mɛɛ niaa co yiyanndo yɛ le. Kani lɛɛlɛ ŋɔmahiɔɔlundɔɔ kínɛí co vɔ diilɛn nuaa ni. 16Kɛ sɔɔn Yɔɛl vana-tɛɛngaa-diom Hala-o dimi-on co peelɔnndo ho ni aa:

17‹Hala dimi aa:

O palɛi mɛɛlɛi, i saŋnin Kɔl nuu vanndacieea kpow coo.

Poaa niaa a cuavaa niaa laandua siŋnunnin vanaa-tɛɛngaa-diom Hala-a.

Langbaa felengia niaa canin vunduan,

bɛndua yuuvɛiya sɔlnin lɔan.

18A toɲa, o palɛi ken,

i saŋnin Kɔl nuu vanaa baalaa nia coo, a piaandua a à laandua pɛɛn,

a siŋnunnin vanaa-tɛɛngaa-diom Hala-a.

19I tosanin dɛnnda kɔndɔfiltan coocoo o halataalaa nin,

mì tosa tɔɔmaselelan o lɛŋnden coo nanu:

koovan, yinnden a tindile ikumnden le vanin.

20Paalen le siŋnunnin ɲumndan,

mì paangei siŋnun koovan,

lɔ́ɔ́ pá mì paale Mɛlɛka le len le tiiya,

paale bɛndule len, paale tɔ́ɔ́le len pɛɛn.

21O kon, vana-vana pɛinin Mɛlɛka-o, ndu sɔlanin cindaa.›

22Niaa Israɛlla, puapilɛa nia, la yaŋ nilan o sɔɔn mun! Yeesu fula Nasarɛt-o, langbanɔ kon Hala cɛl ndu niaa tɛɛn o dɛnnda kaamaalan nin, o dɛnnda kɔndɔfiltan nin a o tɔɔmaselela o va tosaa niaa tɛɛn-ndan nin, maa mɛɛ niaa sina kon válán yɛ. 23Má mal ndu niaa o ba mɛɛ Hala ndóò tuu yɛ. Niaa dii ndu ni. Mɛɛ niaa mal ndu vanaa sina Hala le-a o ba, má baŋ ndu o yɔm singafilaa coo. 24Kɛ mí Hala mingi ndu yoomu, mó soli ndu piɔ́mndo o ba, kani ndóò bɛnda mì ndóò lo o kpaaya piɔ́m kon bɛngu le. 25Nduyɛ, David ndóò cii nin dimi a ndu o kɔɔ aa:

‹I co Mɛlɛka cɔnnɔnndo o hɔl tuŋ,

kani o co ya o ba kɛndɔɔ coo, i delnin te.

26Lelan, kɔl nuu co a ɲaaloo taw, kɔlkɛndɔɔ co ya,

dialun nun bɛɛ n vanin o kɔlkɛsiaa nin.

27Kani nɔm Mɛlɛka melnin ya kɔlan ciee-piɔ́m te,

a cɛlnin mì ya vana baala nɔm n kɛsi landɔ-o tol o sɛiyo nin te.

28A cɔm ya nɛila ke vana cindaa lan,

ɲaaloo vanin ya o kɔl taw nɔm o hɔl.›»

29Mí Piɛr hiaw laci a sɔɛi aa: «Puapilɛa nia, i co niaa toɲa kpeekpeiyo dimul: David fuɲa naa mama vuo, má kumbu ndu, sɛi ndɔɔ co vɔ o naa lo háá hau. 30Kɛ vana-tɛɛngaa-diom Hala-o o yɔŋnun ni, ndóò sínà maa Hala óò cii nin ndu kpemaa yiilul maa vana pilɛ o polale ndɔlen nin va koma siŋnɔn masaa o fonda ndɔɔ. 31Tendul Krista-o fulaa vanvílɛ́iya tɛɛn ndóò ce pɔ́ lende ni, mó dimi aa:

‹O lo ciee-piɔ́m te,

dialun ndɔn si o sɛiyo nin te.›

32Nduyɛ, mí Hala mingi Yeesu ya co hoo sɔɛi ndɔɛi dimio-o yoomu, naa kpow n co lesei. 33Mí Hala heelun ndu ikɛi, mó kɔ kɛsin ndu o ba kɛndɔɔ coo, mó sɔla Hala Kɔl-Diandaa, o Hala ndóò yii kpemaa-o pɛɛn. Mí ndu Yeesu sɛŋi naa ndu coo. Ndu niaa co cɔu mì la va tueyɔɔ sunsun nuaa ni. 34Nduyɛ, David hel o halataala le, kɛ mó dimi aa:

‹Mɛlɛka dimul Maalii nuu aa:

Hun mà cal-la o ba kɛndɔɔ coo,

35i yeema mì mal yaamɔaa nɔmnda

nɔm o ba bɛngu.›

36Lelan, mɛɛ mì Israɛlla kpow a sínà toɲaa maa Yeesu niaa baŋ kon o yɔm singafilaa coo-o, ndu Hala siinguu Maalii a Krista ni!»

37Mɛɛ vannda tuei sɔɔn mun, mí n pilan nda kɔltan ɲɛkɛndɛi. Má ɲuna Piɛr a kiilaa tɔ̀a aa: «Puapilɛa naa, yɛɛ naa n tosa yɛ?» 38Mí Piɛr mulul nda aa: «La mangalan, mì vana-vana o niaa tɛɛn sɔla yinɔɔ o diola Yeesu lan, haliko mi hakila niaalan la malnun haki. O kon mì la sɔla ke Kɔl-Diandaa. 39Kani ciɛi Hala cua-e co le niaa a le cuavaa niaa, i co vɛlɛ le vanaa co levil-la kpow a le vanaa-vanaa sɔlanin veeloo Hala naa o ba.»

40Mí Piɛr dimul nda vɛlɛ sɔɔn celen taw, n pilan nda kɔltan mí n luei nda yoomuan-ndon. Mó sila nda aa: «La hiɔlun vanaa laasiannda ha!» 41Mí vanaa cɛl sɔɛi Piɛr dimi-e-a sɔla yinɔɔ. Paale len, vanaa handun vanaa laalannda coo-a va le vàálan tan yáá.

Ceen vanaa laalaŋaa tasea

42A va kelaa o pɛɛkula kiilaa va nda yɔngoo lan coo, a va vɛlɛ diom pilɛ. A va dioo nɛɛ pilɛ má va Hala piɛiyo latulu. 43Sióónde i va vana-vana, kani kiilaa kan a va dɛnnda kaamaalan a dɛnnda kɔndɔfiltan tosaa o diola Hala lan. 44Vanaa laalannda kpow a va diom pilɛ, a va ɲɛm ndan kpow kɛsio nɛɛ pilɛ. 45A va ɲɛ nda sɔlaa a ɲɛm ndáà nɔ-on pisio, má va volin mun piɔvianndo mɛɛ mako vana-vana va yɛ. 46Lepalaa-lepala, a va biuvɔnndo cuungianndo o Cɛi-Hala-o nin. A va ɲɛdiaa dioo cɛilan nin a kɔlkɛndɔɔ a o tuisinndo nin. 47A va Hala biiloo, mí ɲɔɔ va vannda kpow hɛnanndo a nda. Ɛ̀ɛ̀ nduyɛ, lepalaa-lepala Maalii va vanaa va ciindaa sɔlaa-a handɔɔ o kunda ndaa coo.

Currently Selected:

Dɛnnda kiilaa 2: BKG

Highlight

Copy