Dɛnnda kiilaa 3

Langbanɔ namtanɔɔ sɔla siongɔɔ

1Paale pilɛ, Piɛr nda Nsaŋ va kɔlan o Cɛi-Hala-o a paale yɔngannden, o lɛɛlɛ yàándɔɔ, telen ndáà piɛi Hala-o. 2Langbanɔ va namtanɔɔ kabi o violɔn ndɔɔ-o va o dio luɛyaa Cɛi-Hala-o ikɛi, dio ndáà veelu aa: «Naŋɔɔ»-o. Lon ndáà hun a ndu lɔ́ɔ́-lɔ́ɔ̀ ni, le vanaa va hunɔɔ o Cɛi-Hala kon nin-nda ɲɔɔn piɛiyo. 3Ndóò cɔu Nsaŋ nda Piɛr luɛyɔɔ, mó piɛi nda volion. 4Má muli hɔlla a kpengii o va-e, mí Piɛr dimul ndu aa: «Tofa vɔ naa!» 5Mó tofa nda ɲɛkɛndɛi, kani o va yiyanndo maa o va ɲɛ pum sɔla nda o ba. 6Mí Piɛr dimul ndu aa: «I nɔ ivoli le, i nɔ vɛlɛ isiani le, kɛ o ya nɔ-o ya co nɔm yɔngu ni: o diola Yeesu Krista fula Nasarɛt-o lan, cɔn mà kɔɛ!» 7O kon kɔɔli, mí Piɛr bii ndu ba kɛndɔɔ le ndu malaa cɔnɔnndo. Fɔ́ɔ́fɔ̀, mí pelun ndɔn a kpelenkpelennda ndɔlan la simulu. 8Mó huulu, mó kandu kɔlan. Mó luɛi nda kiilaa kan o Cɛi-Hala-o nin, mó va kɔlan a huuloo a á Hala candɔɔ. 9Mí vannda kpow a ca ndu kɔlan a Hala candɔɔ. 10Mɛɛ nda sina maa langbanɔ va icali vannda ɲɔɔn piɛiyo o dio luɛyaa nda veelu aa «Naŋɔɔ-o» ni, mí kaamaa bɛndoo bii nda, má dɔawnun kɔndɔfili le ɲɛ yɔŋnun ndu kon-ndo.

Sɔɔn Piɛr dimi o Cɛi-Hala-o nin-ndon

11Le tùú langbanɔɔ ve lɛ Piɛr nda Nsaŋ faŋan kɔɔli loo, mí vannda kpow a dɔawnun kɔndɔfili, má hun a kiltan nɛɛ nda va o falii Cɛi-Hala-o nin, o tongo Salomɔn-ndo bɛngu-a. 12Piɛr cɔu dɛnnda lan, mó ɲuna nda aa: «Niaa Israɛlla ha, le yɛɛ nɛ niaa co yɛ kɔndɔfillo dɔwnɔnndo le siongɔɔ langbanɔɔ ho? Le yɛɛ nɛ niaa co yɛ naa tofaa mì la va yiyanndo maa a kpaaya naa pilaa, te kon te maa ɲíí nɛi i tosa ni mó kɔa? 13Hala Abraham-ndo, Hala Isaak-o a Hala Yakɔb-o, a yɔŋnun fuɲaa naa mamaa-a cɔm kpaaya ndɔɔ o diola vana ndɔ baalaa Yeesu lan ni. Yeesu niaa pila mal masalen o ba, mí la kɛɛ ndu Pilate o hɔl-lo pɛɛn. Nduyɛ, mí Pilate ndóò dimi le ndu malɔɔ. 14Niaa yɛ, mí la kɛɛ vana Diandaa, o co vana Sandaa Mɛlɛka o hɔl-lo pɛɛn. Mí la ɲuna le vana diyaa n'vanndo malɔɔ. 15Mí la tosa, má dii vana nɔ yoomoo o ba-o, kɛ mí Hala mingi ndu yoomu fulaa vanvílɛ́iya tɛɛn. Naa n co seiya ni. 16A laalanndo a o diola Yeesu lan langbanɔ niaa co hoo cɔu, mì la sina ndu-o simul nuaa ni. Le laalan o laalan o diola Yeesu lan-ndo o sɔla siongɔɔ niaa kpow o hɔl nuaa ni.

17Nduyɛ, puapilɛa nia, i sínà maa niaa a simlacia niaa, la bii ɲɛ niaa tosa kon a ndu-o bila le. 18Kɛ ɲɛ Hala ndóò dimi paandu a sondola vanaa-tɛɛngaa-diom Mɛlɛka-a kpow-vo peelun lende ni, maa mɛɛ mì Krista ndóò sanga. 19Lelan, la mangalan, mì la mal yɔŋ vɔɔndo, mì la mulul Hala hɔlla, haliko mo ɲumi hakila niaalan. 20O kon, Mɛlɛka yɔngunin niaa telenndan le pɛngio, mò cuu niaa Krista, vana o hɛli kabi paandu le niaa-o, Yeesu pɛɛn. 21Sunsun, mɛɛ mò lo vɔ o halataala háá mì paale Hala minginin dɛnndan kpow o polalen nden le tiiya, maa mɛɛ o dimi lɔ́ɔ́ kon sɔɛi ken a sondola vanaa-tɛɛngaa-diom Hala-a diandaa yɛ. 22Kani mí Moise dimi aa: ‹Mɛlɛka, o co Hala niaa-o cuunin niaa vana-tɛɛngaa-diom Hala-o maa ya, fulaa o puapilɛa nia tɛɛn. La tuei ndu diom mì la bii ɲɛ-ɲɛ o hun dimulnin niaa. 23Vana-vana kɛɛ pɛ le sɔɔn vana-tɛɛngaa-diom Hala kon biyɔɔ, Hala solinin ndu vanaa ndu Hala-a tɛɛn, mò sɔla piɔ́mndo.› 24Nduyɛ, vanaa-tɛɛngaa-diom Hala-a kɛ́-kɛ̀ kei, kandɔɔ Samiɛl, a vanaa hin ndu kɔɔli-a kpede a soo a dɛnnda co yɔŋnɔnndo o palɛi he bɛngu lan o kɔɔ. 25Niaa co cuavaa vanaa-tɛɛngaa-diom Hala-a kan ni, a Hala yii kan kpemaa a fuɲaa naa mamaa, mó dimul Abraham aa: ‹Vanaa-mangalaa-isɔɔa o ceendo coo kpow a sɔlanin duaa cuavaa nɔmnda o ba bɛngu.› 26Le niaa Hala cuu vana ndɔ baalaa ni. O cuu ndu haliko mi vana-vana mal kela ndɔ vɔɔndo, mì la sɔla duaa.»

Currently Selected:

Dɛnnda kiilaa 3: BKG

Highlight

Copy