Nsaŋ 14

Yeesu co nɛiyo ni le kɔlan o Pua lo

1Mí Yeesu dimul kaandeŋaa ndɔa aa: «Kɔlta niaalan la sanga le, la laalan Hala mì la laalan ya vɛlɛ. 2Fondalan la co taw o Fuɲa nuu lo cɛinin, te ndóò ve toɲa le, i va niaa dimul. Kɛ fondaa ya co lakɔ niaa toosial ni. 3Lelan, te i kɔɛ pɛ mì kɔ bɛɛndial niaa fondaa, i muungunin, mì hun kɔ a niaa, haliko mi niaa bɛɛ la kɔ va nɛɛ ya co-a. 4La sinà nɛiyo le kɔlan nɛɛ ya co kɔlan-nda.» 5Mí Tomas dimul ndu aa: «Maalii, n sinà nɛɛ n co kɔlan-nda le, vɛ̀ɛ̀ naa n sina yɛnin nɛiyo le kɔlan ndon?» 6Mí Yeesu dimul ndu aa: «Ya co nɛiyo, toɲaa a cindaa ni. Vana-vana kue o Pua lo le, te o co mò kei a ya le. 7Te la sina ya pɛ, mɛɛ la sinanin vɛlɛ Fuɲa nuu. Nduyɛ sunsun, la sinà ndu, la ce ndu.»

8Mí Filipe dimul ndu aa: «Maalii, cɔm naa Fuɲa nɔm mì n hini kɔl.» 9Mí Yeesu dimul ndu aa: «O co lɛhau le naa n co latulu naa niaa le Filipe, yee a kon kpede a sina vɔ ya le? Vana ce ya pɛ, mɛɛ Pua o ce lende ni. Le yɛɛ n co yɛ vɛlɛ dimio aa: ‹Cɔm naa Pua›? 10A laalan maa i co Pua nin, mì Pua va ya nin te? Sɔɔn ya co niaa dimullo-on, o co a ba ni le. Pua co ya nin-ndo co dɛnnda ndɔlan tosaa ni. 11La làálán ya le tùú ya co dimio maa i co Pua nin, mì Pua va ya nin-ndo. Te kon te, la làálán le dɛnnda ya tosa lan. 12I co niaa toɲaa dimul kpendekele, vana laalan ya pɛ, ndu bɛɛ tosanin dɛnnda ya co tosaa lan. O tosanin bɛɛ la hiow lan-ndan, kani ya, i co kɔnndan o Pua lo. 13Ɲɛ-ɲɛ niaa ɲunanin o diola nilan, i tosanin kon, haliko mi Pua sɔla biiloo o Poo nin. 14Te la ɲuna pɛ ɲɛ o diola nilan, i tosanin ndu.»

Yeesu dimi le Hala Kɔl-Diandaa yɔŋndo

15«Te la kaola ya pɛ, mɛɛ la biinin sɔɔn ya co niaa dimullo-on, 16o kon, i piɛinin Pua, mò ke niaa vana ɲɔɔlaa celen, o vanin niaa ikɛi le lɔ́ɔ́-lɔ́ɔ̀-o: 17ndu co Kɔl toɲaa ni, o ceendo nɔlà sɔla loo, kani o co ndu cɔ le, o sina ndu le. Kɛ niaa la sina ndu, kani o co niaa ikɛi, o vanin niaa nin. 18I mɛinin niaa n'víí le, i co niaa muungu o ibuŋ. 19O lo ɲɛ-pɔmbɔ, ceendo ci lɛnin ya le, kɛ niaa, la canin ya, kani i co yoomu, niaa bɛɛ la vanin yoomu. 20Paale len, la sinanin maa ya, i co Fuɲa nuu nin, mì niaa va ya nin, mì ya va niaa nin.

21Vana co tɔŋnda nilan mandanndo o kɔl mò va kelaa lecoo-o, ndu kaola ya ni. Vana kaola ya pɛ, Fuɲa nuu kaolanin ndu, ya bɛɛ i kaolanin ndu mì cɔmnun ndu.»

22Mí Yuda (o co Iskariɔt le) ɲuna ndu aa: «Maalii, le yɛɛ n co yɛ mɛi ceendo cɔmnɔnndo mà cɔmnun naa?» 23Mí Yeesu mulul ndu aa: «Te vanndo kaola ya pɛ, o biinin sɔɛi nii, mì Fuɲa nuu kaola ndu. N hunnin o vana kon-ndo, mì n kila calta naalan o ndu lo. 24Vana kaola ya le, ndu bii sɔɔn nun te. O co o ya pila nin te sɔɛi niaa co hee ya tueyɔɔ dimio-e co fulaa le, kɛ Pua vem ya-o o ba i co fulaa ni. 25Le mɛɛ ya co vɔ niaa ikɛi yɛ ya co niaa hee dimullo ni. 26Kɛ vana ɲɔɔlaa, Hala Kɔl-Diandaa Pua yɔŋnin o diola nilan-ndo, ndu pɛɛkunin niaa dɛnndan kpow, mò yiyalan niaa sɔɔn ya dimul niaa-on kpow.

27I co niaa kɔlɲuloo mel, i co niaa kɔl ni ɲuloo ke. Ya, i kenin niaa ndu mɛɛ ceendo yɔngu yɛ le. Kɔlta niaalan la lààsian mì la buulan te. 28La tuei, mí dimul niaa maa i co lakɔnnɔn mì muungu niaa o ibuŋ. Te la kaola ya pɛ, mɛɛ la dɔawnunnin ɲaale le kɔla ya co o Pua lo lan, kani Pua hiow ya vaa o bɔɔ ni. 29I dimul niaa pɔɔ sɔɔn mun lɔ́ɔ́ pá n tiiya, haliko mi la laalan telen n tosannin-ndo. 30I suu lɛnin sɔɔn bɔɔ o niaa lo le, kani vana co masalen tosaa o ceendo ho coo-o co hunɔɔ. O nɔ kpaaya ya coo le. 31Kɛ haliko mi ceendo sina maa i kaola Pua, maa mɛɛ Pua dimul-la yɛ ya co dɛnndan tosaa ni. La cɔn mì n faŋan nanu!»

Currently Selected:

Nsaŋ 14: BKG

Highlight

Copy