Nsaŋ 13

Yeesu pulu kaandeŋaa ndɔa pelon

1Lɔ́ɔ́ pá mí Kafo-hiava-coo tiiya, Yeesu ndóò sina nin maa telen ndɔɔ tiiya le faŋanndo o ceendo coo le kɔlan o Fuɲa ndɔ lo. Ndóò kaola kaandeŋaa ndɔa va o ceendo coo-a taw, nduyɛ mó lo nda kaolaa háá o mɛɛlulan. 2Telen Yeesu nda kaandeŋaa ndɔa va ɲɛdiaa icɔl-lo dioo-o, mí ɲina vɔɔndo yɔngu Yuda po Simɔn Iskariɔt-o yiyanndo le Yeesu malɔɔ vannda o ba. 3Yeesu pila ndóò sina nin maa o Hala lo ndóò fula ni, o Hala lo o va muungoo ni, ndóò sina vɛlɛ maa Fuɲa ndɔ ndóò cii ndu ɲɔɔn kpow downɔn. 4Mó can o ɲɛdiaa coo, mó solin doma ndɔ lecoo-o lekɔɔ, mó cua kolaa pum, mó yiinun o caŋ. 5O kon kɔɔli, mó vow mɛnndan o kpángàá nin, mó tundun kaandeŋaa ndɔa pelon pulɔɔ, mó vɔɔsuu nda mun a kola va ndu kon o caŋ-ndo. 6Mɛɛ o tiiyaa o Simɔn Piɛr lo, mí ndu dimul ndu aa: «Nɔm Maalii, mà pulu ya pelon?» 7Mí Yeesu mulul ndu aa: «A sinanin ɲɛ ya co hoo tosaa-o pɛɛngu sunsun te, kɛ a hun biinin ndu bila paale pum.» 8Mí Piɛr dimul ndu aa: «Kɛì-kɛì bɛɛ, a bɛnda ma pulu ya pelon lɔ́ɔ́-lɔ́ɔ̀ le!» Mí Yeesu mulul ndu aa: «Te i pulu nɔm pelon te, mɛɛ a co o ni le.» 9Mí Simɔn Piɛr dimul ndu aa: «Maalii, mɛɛ o mɛɛlu ko pelon kínɛí le, kɛ pulu ya balan a bollen!» 10Mí Yeesu dimul ndu aa: «Vana cii nin pulɔnndo-o nɔ lɛ mako pulan te, fɔ le pelon daama pulɔɔ, kani o co nin o diandaa few. Niaa, la co a diandaa, kɛ o co niaa kpede le.» 11Yeesu ndóò sina vana va ndu malɔɔ vannda o ba-o, lelan o dimi ni maa a ve a diandaa kpede le.

12Ciiyo nda pelon pulɔɔ, mí Yeesu mingin volɔɔla ndɔlan lekɔɔ, mó muungu, mó kɔ cal o fonda ndɔɔ, mó ɲuna nda aa: «La bii pá ɲɛ ya tosal niaa hoo-o bila? 13La co ya veeloo aa: ‹Vana bɛndoo›, ‹Maalii›, la nɔ dí mì la veelu ya lende, kani ndu ya co ni. 14Te ya co vana bɛndoo a Maalii-o pulu pɛ niaa pelon, mɛɛ niaa bɛɛ, o bɛnda mì la puuluan pelon vellaa-velle. 15Tɔɔmaseloo ya cɔm niaa ni, haliko mi la tosa mɛɛ ya tosal niaa yɛ. 16Mì dimul niaa toɲaa, vana baalaa ve fisa a vana ndɔ bɛndoo le, vana nda vem-ndo ve fisa a vana vem ndu-o le. 17Mɛɛ niaa cii sina nuaa yɛ, te la kela pɛ lende, mɛɛ la vanin vanaa dɛnɛ kɛndɛa. 18O co le niaa kpow le ya co sɔɛi he dimio le, i sínà vanaa ya hɛli-a. Kɛ fɔ mì Sɔɛi sɛvan-nde peelun aa: ‹Vana naa n va ɲɛdiaa dioo latulu-o heelu bɛngoo le ya nɛiyo ni.› 19I co niaa ndi pɔɔ dimul lɔ́ɔ́ pá mì dɛnɛ kon hun tosan, o kon o hun tosan pɛ, la laalan maa Ya co I co ni. 20I co niaa toɲaa dimul, vana cɛl pɛ vana ya vem-ndo, mɛɛ ya o cɛl lende ni. Vana cɛl-lɛ ya pɛ, mɛɛ vana vem ya-o o cɛl lende ni.»

Yeesu dimi maa Yuda yii ndu dúmbú

(Matie 26.20-25, Marke 14.17-21, Luke 22.21-23)

21Yeesu ciiyo sɔɔn mún dimio, mí kɔllo sanga ndu taw, mó yondal nda aa: «I co niaa toɲaa dimul, vana pilɛ o niaa tɛɛn malnin ya vannda o ba.» 22Mí kaandennda va toofianndo vellaa-velle, a sina vana o va dimio-o le. 23Kaandennɔ pilɛ, o Yeesu ndóò kaola taw-vo va ndu Yeesu icali ikɛi, 24mí Simɔn Piɛr tuulial kaandennɔ kon a laba, mó dimul ndu le Yeesu ɲunaa haliko mi ndóò cɔm nda vana o va kon sɔɛi ndɔɛi dimio-o. 25Mí kaandennɔ kon nangun Yeesu o ibuŋ, mó ɲuna ndu aa: «Ɔ́ɔ̀ vana kon nɛ Maalii?» 26Mí Yeesu mulul ndu aa: «I co bulu bingio pɔɔla o taalaa nin, vana ya yɔngunin ndu-o, mɛɛ ndu ni.» O kon, mí Yeesu cua bulu bingio, mó pɔɔla ndu, mó yɔngu Yuda, po Simɔn Iskariɔt-o. 27Yuda biyɔɔ dɔ́ɔ́ bulu kon, mí Setana luɛi ndu nin. Mí Yeesu dimul ndu aa: «Tosa ɲɛ n nɔ le tosa-o cɔ́-cɔ́!» 28Kɛ kaandeŋaa tɔ̀a nda va dioo latulu-a kpede a sínà kɔlɔ Yeesu va ndu sɔɔn mun dimullo-o le. 29Le tùú bɔlɔ n'volio va Yuda o ba-o, mí vannda pum a yiyan maa vomɔɔ Yeesu va ndu ɲɛm kafon nda nɔ makoo-on kɔlan piondɔɔ ni, te kon te vanaa bala fondoa ɲɔɔn kɔlan keu. 30Mí Yuda cua bulu bingi kon, mó keleŋa fulan. Nduyɛ, ɲumndan maa tol nin.

Sila sɛnɛiyo

31Yuda fulaa, mí Yeesu dimi aa: «Nihau, biilu Po vanacieo cɔmnun, mì biilu Hala-o va cɔmnɔnndo o ndu nin. 32Ɛ̀ɛ̀ nduyɛ, te biilu Hala-o cɔmnun pɛ o ndu nin, mɛɛ Hala cɔmnin biilu Poo o ndu pila nin, mò cɔm biilu ndɔɔ fɔ́ɔ́fɔ̀,. 33Cuavaa nia sei! I co vɔ niaa tɛɛn le telen bingi. La nuwviaanin ya, kɛ mɛɛ ya dimul Yuifia yɛ ya co niaa dimul ni maa la nɔlanin kɔlan nɛɛ ya co lakɔ-a le. 34I co niaa sila sɛnɛiyo yɔngu: la kaolian vellaa-velle. Maa mɛɛ ya kaola niaa yɛ, niaa bɛɛ la kaolian lende. 35O kon, te la kaolian pɛ vellaa-velle, vannda kpow a sina maa kaandeŋaa nia niaa co ni.»

Yeesu dimi maa Piɛr vuununnin maa o sina ndu le

(Matie 26.31-35, Marke 14.27-31, Luke 22.31-34)

36Mí Simɔn Piɛr ɲuna Yeesu aa: «Maalii, kuɛɛ nɛ n co yɛ kɔlan?» Mí Yeesu mulul ndu aa: «A tiw-vɔ ba kɔlan ya kɔɔli sunsun te, kɛ o kon kɔɔli a hun kɔanin.» 37Mí Piɛr ɲuna ndu aa: «Le kɔlɔ yɛɛ ya kɛɛ yɛnin tiwba nɔm kɔlan kɔɔli sunsun? Te vuo ni, i vi le nɔm.» 38Mí Yeesu muli aa: «Toɲaa ni, a vunin lekɛ́ndɛi le ya. Kɛ nduyɛ kongillo koovanin te, mà viinun leyáá maa a sina ya le.»

Currently Selected:

Nsaŋ 13: BKG

Highlight

Copy