Nsaŋ 12

Mari suu Yeesu cuɛima cun kɛndɛan o n'pelu

(Matie 26.6-13, Marke 14.3-9)

1Ndóò lo palɛi ŋɔmpum le kafo-hiavaa-coo tiiyaa, mí Yeesu hun Betani, nɛɛ Lasar o mingi yoomu fulaa vanvílɛ́iya tɛɛn-ndo va-a. 2Má toosial ndu ɲɛdiaa isumiallo, Marte va ɲɛdiaa piɔwvo ni. Lasar va vana pilɛ o vanaa va ɲɛdiaa kon dioo nda Yeesu-a latulu-a tɛɛn. 3Mí Mari cua siani cuɛima báà kálà-kálàn mapum ma va nin-ndo, mó taaliaa man Yeesu o n'pelu. O kon kɔɔli, mó yiikpiaa ndu pelon a yiiŋii ndɔɛi. Mí cɛiyo pia cá a cun kɛndɛ cuɛima man. 4Mí kaandennɔɔ pilɛ, Yuda Iskariɔt, ó va hunɔɔ Yeesu malɔɔ vannda o ba-o ɲuna aa: 5«Le yɛɛ nda kɛɛ yɛ cuɛima cun kɛndɛan man pisi támálan kɛmɛ leyáá, mì vanáà piɔw vanaa bala fondoa volin mun?» 6Yiyan o sɔla kon-ndo, o co iɲíí le ndóò nɔ a vanaa bala fondoa le, kɛ le tùú o va vuiyo-o. O va ɲɛm nda va mandaa-on ciimbuuo, kani ndu óò manda bɔlɔ nda n'volio o ba ni. 7Kɛ mí Yeesu dimi aa: «Mal ndu. Le kumbɔɔ nuu o co man mandaa ni. 8La nɔnin vanaa bala fondoa iaa tɛɛn lɔ́ɔ́-lɔ́ɔ̀. Kɛ ya ya, la nɔnin ya niaa tɛɛn lɔ́ɔ́-lɔ́ɔ̀ le.»

A yii Lasar dúmbú

9Mí Yuifia sɛ́lɛ́ bɛndoo tuɛi maa Yeesu va Betani lon. Má hun le Lasar Yeesu mingi yoomu fulaa vanvílɛ́iya tɛɛn-ndo cɔu, o ve ko le Yeesu cɔu daama le. 10Mí bolii vanaa-solia-lasálàá dimi le Lasar bɛɛ diyɔɔ, 11kani Yuifia bɔɔ-bɔɔ a va nda faŋanndo ma va Yeesu laalanndo le dɛnɛ Lasar kon.

Yeesu luɛi Yerusalɛm ciee

(Matie 21.1-11, Marke 11.1-11, Luke 19.28-40)

12Diimandɔɔ, mɛɛ sɛ́lɛ́ bɛndu óò hin le kafo hiavaa coo-o tuei maa Yeesu co kɔlan Yerusalɛm, 13mí nda kpow a bii siɔ̀ɔ́la vawlan o laba, má kɔa ndu bɔŋaa a yoondiaalan aa: «Biiloo co le Hala! Biiloo co le vana co hunɔɔ o diola Mɛlɛka lan-ndo, masa Israɛlla pɛɛn!» 14Mí Yeesu sɔla sofɛlɛ téndóó, mó hel lecoo, maa mɛɛ i co isɛvaa o sɛbɛlan nin yɛ aa:

15«Siòòŋii bii niaa le, niaa vannda Siɔn,

la tofa vɔ masa niaa hunɔɔ,

o co icali o sofɛlɛ téndóó coo.»

16Kaandeŋaa ndɔa ndáà bii sɔɛi ken bila o foofo kon te. Kɛ mɛɛ Yeesu luɛi o biilu ndɔɔ nin, má loonun dɔ́ɔ́ maa le ndu sɔɔn mun mún sɛvan ni, nduyɛ mí n peelun lende.

17Mí vanaa va o hɔl-ndɔ lɔ́ɔ́ Yeesu veelu Lasar o sɛiyo nin, mó tindi ndu vanvílɛ́iya tɛɛn-nda tɛnda seilen a ɲɛ nda ce-o o kɔɔ. 18Lelan vannda taw ndáà fula le ndu kɔlan bɔŋaa ni, le tueyɔɔ ndáà tuei a dɛnɛ kɔndɔfili ndóò tosa kon-ndo o kɔɔ-o.

19O kon mí Faliisia dimulan aa: «Kámáá la ce le! La tiwnin ɲɛ-ɲɛ ba le. La tofa vɔ mɛɛ vannda kpow a del ndu kɔɔli yɛ.»

Krɛkia pum a co Yeesu nuwviaa

20Krɛkia pum va o vanaa ndáà kɔɛ kan Yerusalɛm le Hala biiloo o kafoo coo-a tɛɛn. 21Má sɔɔnguu Filipe fula Bɛtsaida o tàndá Kalile-o nin-ndo ikɛi, má dimul ndu aa: «Vana bɛndoo, n yeema le Yeesu cɔu.» 22Mí Filipe kɔa, mó kɔ dimul Andree, o kon mí Andree nda Filipe kɔ dimul Yeesu. 23Mí Yeesu mulul nda aa: «Telenndo tiiya, mì Po vanacieo sɔla biiloo. 24I co niaa toɲaa dimul, te kulii n'malle del lɛŋ mì i vi le, i lo ndi pilɛ. Kɛ te i vi pɛ, i kom kullon taw. 25Vana-vana kaola pɛ yoomu ndɔɔ, o hialunnin ndu. Kɛ vana-vana kɛɛ pɛ le yiinɔnndo a yoomu ndɔɔ o ceendo ho coo, ndu mandanin ndu le fɛɛn a fɛɛn. 26Vana-vana yeema pɛ le ya baalaa tosallo, mɛɛ mò del-la kɔɔli. Nɛɛ ya co pɛ, vana baala nuu bɛɛ bɛnda mò va lon. Fuɲa nuu biilunin vana ni baalaa.»

Yeesu soo a piɔ́m ndɔɔ o kɔɔ

27«Sisa, kɔllo laasian ya niŋ kpede, i sina bɛɛ ɲɛ ya dimi le! Vɛ̀ɛ̀ mì dimi aa Pua baŋa ya o telenndo ho? Ɛ-ɛ, kani le sangaa ho sɔlaa ya hin ni. 28Pua, cɔm vannda biilu diola nɔmndan.»

O kon, mí diomndo pum soaa o halataala aa: «I cii nihau biilu ndɔɔ cɔm, la sɔlanin vɛlɛ biiloo.» 29Mí sɛ́lɛ́ bɛndu va lon-ndo tuɛi, má dimi aa: «Taŋnden le piɔndi nuaa ni.» Mí a pum dimi aa: «Mɛlɛkanɔ Hala-o soo o ndu lo nuaa ni.»

30Mí Yeesu cua sɔɛi, mó dimi aa: «O co le ya le diomndo ho soo le, kɛ le niaa ni. 31Sunsun, yamɛi ceendo hin kiolɔn, mà soli vana co masalen tosaa o ceendo ho coo-o o bɛ́ɛ̀. 32Ya yɛ, telen ya sɔlanin heeloo faŋanndo o lɛŋnden coo-o, i tosanin mì vanndacieea kpow a muli hɔlla o ya lo.» 33Le piɔ́m súú o va hunɔɔ sɔla-o o va dimio lende ni. 34Mí sɛ́lɔ́ɔ́ mulul ndu aa: «O naa n saalun o sɛbɛ latɔŋndo nin-ndo co ni maa Krista vanin yoomu le fɛɛn a fɛɛn. Le yɛɛ n co yɛ niko naa dimullo aa: ‹Mɛɛ mì Po vanacieo sɔla heeloo? Nɛ̀ɛ́ co yɛ nin Po vanaciee kon?› » 35Mí Yeesu dimul nda aa: «Ɲɛ-tengaa co vɔ niaa tɛɛn le telen bingi. La balu pɔɔ telen niaa nɔ ɲɛ-tengaa-o, haliko ɲumndan ma voolu niaa le: kani vana co balɔɔ o ɲumndan nin-ndo sina nɛɛ o co kɔlan-nda le. 36Telen niaa nɔ vɔ ɲɛ-tengaa-o, la laalan ɲɛ-tengaa, haliko mi la siŋnun cuavaa ɲɛ-tengaa.»

Yuifia laalan Yeesu le

Yeesu ciiyo sɔɛi lende, mó kɔannun, mó kɔ viannun nda lándán. 37A kaamaala kaakuula o tosa lan nda o hɔl-tan kpede, ndáà laalan ndu le, 38haliko mi sɔɛi Esai vana-tɛɛngaa-diom Hala-o ndóò dimi-e ndíì peelun aa:

«Mɛlɛka, nɛ̀ɛ́ laalan yɛ sɔɛi naa n dimi-e?

Nɛ̀ɛ̀ Mɛlɛka cɔm yɛ kpaaya ndɔɔ?»

39Mí Esai pilɛ kon cɔm vɛlɛ le kɔlɔ nda kɛɛ laalanndo-o aa:

40«Hala suumiaa nda hɔltan,

mó kindi nda nilan,

haliko a ca le,

a bii bila le,

a mangalan o kon mì i singi nda le.»

41Ken Esai dimi telen o ce biilu Yeesu-o ni, mó soaa a ndu o kɔɔ.

42Kɛ nduyɛ, hali simlacia tɛɛn, mí vanaa bɔɔ-bɔɔ laalan ndu. Kɛ Faliisia soli laalan ndaa kpendekele le, yɔŋii ndáà kuuna nda le kɔlan o cɛila lekaanndan nin. 43Kani candɔɔla vanndacieea ndáà hiow yeema a Hala nda candɔɔ.

Yamɛi vanndacieea kialunnin a sɔɔn Yeesu dimi-on

44Mí Yeesu deŋi aa: «Vana laalan ya pɛ, o co ya le o laalan te, kɛ vana vem ya-o. 45Vana ce ya pɛ, mɛɛ vana vem ya-o o ce vɛlɛ lende ni. 46Ya ɲɛ-tengaa, i hin o ceendo coo, haliko vana-vana laalan ya pɛ, o va o maɲum nin te. 47Te vanndo tuei pɛ sɔɔn nun, mò bii mun te, o co ya le kialu ndu iyama le, kani i hin le ceendo yaala le, kɛ le ndu ciindiaa. 48Vana kɛɛ ya pɛ, mò bii sɔɔn nun te, ndu nɔ vana yaalanin ndu-o, sɔɔn ya pɛɛku vannda-on yaalanin vana kon o paale mɛɛlaalen ni. 49Kani o co ya pila o ba le sɔɔn nun co fulaa le. Kɛ Pua vem ya-o, ndu pila dimul-la sɔɔn ya bɛnda le dimio-on a mɛɛ ya bɛnda le mun dimio yɛ ni. 50Nduyɛ i sina maa sɔɔn ndɔn co cinda fɛɛn-fɛɛndo ni. Lelan sɔɔn ya co dimio-on, mɛɛ Pua vem ya mun dimio yɛ ya co mun dimio ni.»

Currently Selected:

Nsaŋ 12: BKG

Highlight

Copy