O Kandɔɔ 50

Kumbɔɔ a biisi Yakɔb-o

1Mí Yosɛf del fuɲa ndɔ coo, mó kɔman ndu, mó koŋul kpélén. 2O kon, mó dimul dɔtɔlɔa va o ba ndɔɔ bɛngu-a le ndu kɔɔfiaa a le ndu ɲɛla veesiaa vana vílɛ́iyo lan dɔvɔɔ coo. Mí dɔtɔlɔa kan toosiaa Israɛl fuɲa ndɔ lende. 3Palɛi belehiɔɔlu, a va ndu veesiaa. Kani lende vanaa tosa palɛi le vana vílɛ́iyo veesiaa ni. Mí Esiptea caŋ ndu palɛi belaŋɔmmɛw.

4Mɛɛ palɛi biisiei cuu, mí Yosɛf dimul vanaa bɛndua va vallo o Faraɔnnɔɔ lo cɛinin-nda aa: «A yandi, la soli ya o bahavɛiyo ho nin, la kɔ dimul-la Faraɔnnɔɔ maa 5fuɲa nuu vem ya mɛnanndo, mó dimul-la aa: ‹Má cè ya hunɔɔ vuo! I cii nin sɛiyo tovɔɔ o lɛŋnde Kanaan-nden nin, lon n bɛnda le ya kɔlan kumbɔɔ ni.› Lelan, a yandi, o cɛl, mì heelu Kanaan, mì kɔ kumbu fuɲa nuu. Te i cii pɛ ndu kumbɔɔ, i muungu nanu.» 6Mí Faraɔnnɔɔ mulul Yosɛf aa: «Kɔ ma kɔ kumbu fuɲa nɔm mɛɛ o vem nɔm mɛnanndo má cua kpemaa yɛ.»

7O kon mí Yosɛf kɔa le fuɲa ndɔ kumbɔɔ, mí vanaa kùndàá, vanaa tɔ́ɔ́a a vanaa bɛndua Esipte kpow a liila ndu a biisio. 8Mó kɔa a yungu ndɔɔ, a puapilɛa ndɔa a á yungu fuɲa ndɔ-o kpede. Fɔ cuaambɔa pɔmbɔa, saa, cuinnda a nawva nda mɛi nɛɛ nda va icali Kosɛn-nda ni. 9O kɔla lan, mí Yosɛf heelu a ɲɛla ɲaanannda soa nan-ndan, a vanaa ɲaanun lan-nda. Kunda bɛndoo pila ndáà heelu Kanaan ni. 10Mɛɛ nda tiiya o kpele lɔaa n'mallo Atad nin, ó co o peo Yurdɛn leeloo-o, má tosa dɛnɛ biisio lon, mí tɔ́ɔ́ tiw sɔ́. Mí Yosɛf va o mɔnɛi biisi fuɲa ndɔɛi nin ndon o palɛi ndii ŋɔmmɛw bɛngu. 11Kanaŋaa va o tàndà kon nin-nda cɔu mɛɛ nda tosa dɛnɛ biisi kon o kpele lɔaa n'mallo Atad nin yɛ, má dimi aa: «Biisi bɛndu-bɛndu imɔnɔɔ komal hoo Esiptea ni.» Lelan nda ke fonda kon Yurdɛn leeloo diolan ni aa Abɛl-Misrayim (kon co dimio ni aa «Biisi Esiptea»). 12Mí poaa Yakɔb-a tosa mɛɛ fuɲa nda dimul nda yɛ. 13Má kɔa a ndu o lɛŋnde Kanaan-nden nin, má kɔ kumbu ndu o buululan nin Mak-pela, buulula Abraham muulian piondɔɔ a lɛŋnden latulu Efrɔn Hitiinɔ o ba le vanvílɛ́iya kumbɔɔ lan pɛɛn, la va Mamre o hɔl-ndɔ lan. 14Mɛɛ Yosɛf cii fuɲa ndɔ kumbɔɔ, mó muungu Esipte nda puapilɛa ndɔa a vanaa liila ndu a biisio-a kpow.

Ɲɛ tosan o piɔ́m Yakɔb-o kɔɔli-o

15Mɛɛ fuɲa nda vi, mí bɛndaa Yosɛf-a dimulan aa: «Bɔɔle Yosɛf co naa mululɔn, mó mingul naa màá le dɛnɛ naa n tosal ndu sindɛ-o.» 16Le hee, má vim ndu kiilanɔɔ le ndu kɔlan dimullo aa: «Tuma pá mí fuɲa naa vu, mó mel naa lediom, mó congun naa aa 17naa n ɲuna nɔm mì nɔm mal naa haki le kɔlvesɛi naa n tosal nɔm-ndo a haki naa n cua a nɔm-ndo. Lelan, n tɛɛlun nɔm yandi, mal niko vanaa baalaa Hala fuɲa nɔm-nda haki, naa pɛɛn.» Yosɛf tueyɔɔ sɔɛi ken, mó koŋul. 18Mí bɛndaa ndɔa pila hun niko, má baŋ vulan ndu o labɛngunin, má dimi aa: «Má cè naa! Cɛa nɔmnda naa n co ni.» 19Kɛ mí Yosɛf dimul nda aa: «Siòòŋii bii niaa le. Mò va maa o fonda Hala-o ya co ni? 20Niaa, niáà tuu le ya dɛnɛ vɔɔndo tosallo. Kɛ o dɛnɛ niaa tosa-o nin, mí Hala ndu tuu le ya dɛnɛ kɛndɔɔ mingullo le ɲɛ co hoo hau tosanndo-o peeloo, haliko mi yoomu vanaa bɔɔ-bɔɔ sɔla baŋaa. 21Lelan, siòòŋii bii niaa le, i co bala havɛila niaalan a bala havɛila cuavaa niaa toosiaa kpede.» Lende o kɛsi nda kɔltan ni, mó soaa o nda lo a canyɛi.

Piɔ́m Yosɛf-o o lɛŋnde Esipte len nin

22Mí Yosɛf lo icali o lɛŋnde Esipte len nin a yungu fuɲa ndɔ-o. Mó cii vɔsilan kɛmɛ a tɔ́. 23Mó ca cuavaa-imamaa Efraim-nda háá o lambi yàándɔɔ. Mó bii vɛlɛ cuavaa Makir po Manase-o-a o bɛngu telen nda velun-ndo. 24Mɛɛ piɔ́m ndɔɔ va le tiiyaa, mó dimul yungu ndɔɔ aa: «I co hunɔɔ vu, kɛ Hala melnin niaa le. O co niaa hunɔɔ soli o lɛŋnden nden nin, mò yɛɛ niaa o lɛŋnde o yiilu sindɛ Abraham, Isaak a Yakɔb kpemaa le nda yɔngoo len nin.» 25O kon, mí Yosɛf mɛnalan Israɛlla, mó dimul nda aa: «Te Hala sɔɔnguu niaa pɛ ikɛi, mò soli niaa nanu, la va pɛ kɔlan, la kɔɛ a paala nilan o ba.»

26Yosɛf ndóò nɔ vɔsilan kɛmɛ a tɔ́, mó vu. Má veesiaa ndu, má kɛsi dialun ndɔn o kesu nda toosiaa a powtan-ndo nin, o lɛŋnde Esipte len nin.

Currently Selected:

O Kandɔɔ 50: BKG

Highlight

Copy