Fulaa 1
1
MƐLƐKA SOLI ISRAƐLLA ESIPTE
(1—15)
Hala soli Israɛlla Esipte
1Diola poaa Yakɔb-a la co lan ni, a kɔɛ nda fuɲa nda-aa latulu o lɛŋnde Esipte len nin-nda. Tuma nda va kɔlan-ndo, mí vana-vana kɔa a yungu ndɔɔ:
2Rubɛn, Simeɔn, Levii, Yuda, 3Isakar, Sabulɔn, Bɛnyamɛn, 4Dan, Nɛftali, Kad a Asɛr. 5Kpow-kpow, a va vannda belaŋɔmmɛw, Yosɛf ndu va nin o lɛŋnde Esipte len nin. 6Mɛɛ nda viow tei, mí Yosɛf vu, mí bɛndaa ndɔa cuu vu, mí kunda tase kon bɛɛ cuu vu kpow. 7O kon kɔɔli, mí vanaa tɔ̀a lo lon-nda koma kui taw-taw, má sɔla kpaayaa. A lo kuiyo tei, má tiw o lɛŋnde len nin sɔ́.
8Kɛ telenndo pum tiiyaa, mí vana celen sul masaa o lɛŋnde Esipte len nin. Masa kon ndóò síná Yosɛf le. 9Mó dimul vanaa ndɔa aa: «La tofa vɔ dɛnɛ! Vannda ha co kuiyo dɛ! Israɛlla pɛɛn. Nduyɛ a hiow naa kpaayaa. 10Lelan, n nuwvian taasio a dɛnɛ ndaa o kɔɔ, yɔŋii nda lo kui bɛndoo ho. Kani vannda bɛɛ hinul naa a cɔwvo ni, à nɔla mà del yaamɔaa naa kan kɔɔli le naa cɔlɔbaa, o kon à faŋan o lɛŋnde naalen nin.»
11O kon mí Esiptea handu Israɛlla mɛlɛsoŋnda coo le nda tundɔɔ o baala lepɔtɔllo nin. O baala kon tosaa, má tangul kobilan tan tiɔn: Pitɔm a Ramsɛs, leFaraɔnnɔɔ vaa baloo mandaa lenin. 12Kɛ nduyɛ, mɛɛ ndáà saangiaa nda faw, lende koni ndáà hiaw laci a kuiyo a á lɛŋnden hiɔlɔɔ. Mí siòònde bii Esiptea a sɔɛi he#1.12 Mí siòònde bii Esiptea a sɔɛi he: Sɛbɛlan lapum la hivi fondaa ho aa «Má cua nɛyɔn Israɛlla».. 13Má saangiaa Israɛlla a kɔlvesɛiyo taw. 14Má bɛpɛla nda bɛpɛlaa pila a valta kálà-kálàlan tosaa: puuloo lindaa, kpilikion lɔu a valta yondolan. Mbɔ̀ a bɛpɛla bɔɔ cuavaa Israɛlla o baalala lepɔtɔlta súú-súù ka nin.
Faraɔnnɔɔ tol Israɛlla yɛlen
15O Hebreea lo, vanlaandua sokoa-vialaa pum va lon nda ŋiɔn: o pilɛ diolan Sifra, o pilɔɔ Púa. Mí masaa Esipte dimul nda aa: 16«Te vanalanɔ Hebreenɔɔ va nin pɛ violɔɔ, la mɛɛndan hɔ́ɔ́ o co kon violɔɔ-o, te cɛlɛkpɛ piaandoo ni, la dii ndu. Kɛ te o laandoo o co violɔɔ ni, la mɛi ndu yoomu.» 17Kɛ le mɛɛ sokoa-vialaa kan ndáà nɔ siòòŋii Hala-e yɛ, a ve tosa mɛɛ masaa Esipte ndóò dimul nda yɛ le, a ve cɛlɛkpɛa piaandua diyɔɔ le. 18Le hee, mí masaa Esipte veelu nda, mó ɲuna nda aa: «Le yɛɛ niaa co yɛ tosaa lende? Le yɛɛ mì la va cɛlɛkpɛa piaandua mɛiyo yoomu?» 19Mí sokoa-vialaa kan mulul ndu aa: «Vanlaandua Hebreea co maa vanlaandua Esiptea le, dialun kalan pila nda nɔ ni. Pulei biŋin nda pɛ, telen pá mì sokonɔ-vialaa tiiya, o komal nin a cii violɔɔ.»
20Mí Israɛlla cɔɔlu kui taw, má sɔla kpaayaa. O kon mí Hala tosal sokoa-vialaa kan dɛnɛ kɛndɔɔ taw-taw. 21Le tùú sokoa-vialaa kan ndáà vo Hala-o, mí Hala ke nda cuawva. 22O kon mí Faraɔnnɔɔ yii tɔŋndo o lɛŋnde ndɔlen nin kpow aa: «Te vanalanɔ Hebreenɔɔ velu nin pɛ hɔ́ɔ̀, o va pɛ o piaandoo, la kɔ viow ndu o pee bɛndoo Nil, kɛ te o va pɛ cɛlɛkpɛ laandoo o velu ni, la mɛi ndu yoomu.»
Currently Selected:
Fulaa 1: BKG
Highlight
Share
Copy
Want to have your highlights saved across all your devices? Sign up or sign in
© Alliance Biblique en Guinée
