Fulaa 2

Violɔn Moise-o a cuaambɔyɛi ndɔɛi

1Langbanɔ pilɛ va, fulaa o polale Levii len nin, mó yil lanɔɔ o polale pilɛle len nin. 2Mí laa ndɔ kon cua folio, mó vialu hɔ́ɔ́ piaandoo. Mó ca maa cɛlɛkpɛ piaandu kalaa naŋ hɔlla, mó lo ndu vionɔɔ háá paangon mún yáá. 3Mɛɛ o sina maa o nɔla lɛ vionnɔnndo a ndu le, mó lɔa kambɛiyo a taan#2.3 taan: Ɲɔɔ pum talen le co ni maa lepuundu. O bundɛla bɛndulan nin, o kpaanndan nin a o yondola kàlá-kálàlan nin ma vul ni. Maa cellan taan ma co ni, kɛ man ma hiow mɛsɛlaa a cellan. A man nda toosiaa kambɛilan a sekalan ni., mó yikpa ndu a dukpaa, mó holiholi sɛ̀llo. Mɛɛ o cii toosiaa lende, mó yambu cɛlɛkpɛ kalaa o kambɛi kon nin, mó kɔ kɛsi ndu o cɔ́ɔ́cɔ́ɔ̀an nin o pee bɛndoo Nil kɔngɔ. 4Mí yemaa cɛlɛkpɛ kalaa kɔ sim lándán le sinaa ɲɛ óò yɔŋnunin yema ndɔ-o.

5Paale pum, mí cua Faraɔnnɔɔ toal o pee bɛndu kon le pulɔnndo, mí buɛyaa ndɔa laandua nda va kelaa o peo kɔngɔ. Mí cua masa kon ca kambɛiyo o cɔ́ɔ́cɔ́ɔ̀an nin, mó viam buɛi ndɔ laandoo pum le kɔlan kambɛi kalaa cuaa. 6Mɛɛ o kumbi ndu, mó ca cɛlɛkpɛ piaandoo lenin, o va caŋndo. Mí ɲííye bii ndu, mó dimi aa: «Cɛlɛkpɔɔ ho, violɔɔ Hebreenɔɔ o co ni.» 7Mí yemaa cɛlɛkpɛ kalaa ɲuna cua Faraɔnnɔ kon aa: «A yeema mì kɔ nuwviaa komsaa pum o vanlaandua Hebreea tɛɛn, mì veelu ndu, mò hun vɔɛsil nɔm hɔ́ɔ́ ho?» 8Mí cua Faraɔnnɔɔ mulul ndu aa: «Oi, kɔ.» Mí cuaambɔɔ kɔ veelu kalaa cɛlɛkpɛ kon kpeekpei. 9Mí cua Faraɔnnɔɔ dimul cua kon aa: «Kɔ a cɛlɛkpɔɔ ho, mà kɔ vɔɛsil-la ndu. I co nɔm va salaa lelan.» Mí cua kalaa kɔa dɔ́ɔ́ a cɛlɛkpɔɔ, mó kɔ va ndu vɔɛsio.

10Mɛɛ poombɔɔ sul, mí kala ndɔ yoo cua Faraɔnnɔɔ ndu. Mí cua masa kon bii ndu maa hɔ́ɔ́ ndɔ o solin o ipulu-o. Mó ke poombɔ kalaa diolan aa Moise, mó dimi aa: «Kani o mɛnndan nin ya soli ndu ni.»

Moise faŋan Esipte mó ɲaanun o leŋnde Madian-nden nin

11Mɛɛ Moise sul kaasonɔɔ, mó kɔa paale pum o puapilɛa#2.11 puapilɛa: Nanu kɔlɔ diom hivin aa puapilɛa-o co ni maa vanaa co vanaa-mangalaa-isɔaa pilɛa a Moise-a, Hebreea pɛɛn. Puapilɛa Moise-a nda co ni, le tùú nda fula fuɲaa-mamaa pilɛa o ipulu-o, Abraham, Isaak a Yakɔb pɛɛn. ndɔa lo, mó ca baala lepɔtɔl nda va tosaa-o. Mó ca langbanɔ Esiptenɔɔ pum Hebreenɔɔ pum lɔɔ. 12Mí Moise mɛɛndian sɔ́, o ci vana-vana celen te. Mó bii langbanɔ Esiptenɔ kon, mó dii ndu, mó kumbu ndu o sióónndon nin. 13Diimandɔɔ pilɔɔ vɛlɛ, mó muungu o fonda kon, mó komal Hebreea nda ŋiɔn cɔlɔbaa. Mó ɲuna vana nɔ dí loo aa: «Le yɛɛ n co yɛ puapilɛ#2.13 puapilɛ nɔmndo: Diom hivin nanu aa «puapilɔɔ»-o co diom pilɛ o hebrei nin a diom hivin o 2.11 aa «puapilɛa»-o le. Nanu, o nɔla vɛlɛ mò hivin aa «caan nɔm». nɔmndo lɔɔ?» 14Mí langbanɔ kon mulul ndu aa: «Nɛ̀ɛ́-nɛ̀ siinguu yɛ nɔm simlacinɔɔ a yamanɔɔ naa coo? Bàà a yeema ma dii ya mɛɛ n dii ciɛi Esiptenɔɔ yɛ?» Mɛɛ Moise ce maa vannda sina sɔɛi ken, mí siòònde bii ndu. 15Mí Faraɔnnɔɔ pila bɛɛ tuɛi sɔɛi ken, mó can Moise nuwviaa le ndu diyɔɔ. Le hee, mí Moise sɔndan, mó kɔ viannun o lɛŋnde Madian-nden nin. Mɛɛ o tiiya lon, mó kɔ cal o soon kólaa pum ikɛi.

16Vana-solia-lasálàá pum va o lɛŋnde Madian-nden nin, ndóò nɔ cuavaa laandua nda ŋɔmmɛw. Mí cuavaa ndɔa kan hun mɛnndan kɔndɔɔ lon le ɲɛla cɔlua kol nin-ndan peiyo le cɔlua fuɲa nda-a koesio. 17Kɛ mí vanaa mandaa n'cɔlua pum tiiya lon, má toaw vanlaandua kan. O kon, mí Moise lɔaanun ibuŋ le nda, mó koesi cɔlua fuɲa nda-a kan. 18Mɛɛ nda muungu o Reuɛl#2.18 Reuɛl: Yetro, ó va lefoo Moise-o ndóò nɔ vɛlɛ diolan ni aa Reuɛl. fuɲa nda lo, mó ɲuna nda aa: «La vɛ dɔ́ɔ́ hau keleŋaa hunɔɔ nuaa cɔ́-cɔ́?» 19Má mulul ndu aa: «Langbanɔ pilɛ fula Esipte ni, ndu lɔɔnun hau ibuŋ le naa ni, mó baŋa naa vanaa mandaa n'cɔlua o ba. Mó kondul naa bɛɛ mɛnndan, mó koesi cɔlua naa.» 20Mí fuɲa nda ɲuna nda aa: «Kuɛɛ nɛ o co yɛ? Le yɛɛ niaa mɛi yɛ ndu lon? La kɔ veelu ndu mò hun dio ɲɛdiaa.»

21Mí Moise cɛl le lou o langbanɔ kon ndo le calle nda ndu. Mí langbanɔ kon yɔngu Moise lanɔɔ, cua ndɔ óò nɔ diolan aa Sefora-o pɛɛn. 22Mí Sefora kon vialu hɔ́ɔ́ piaandoo, mí Moise ke ndu diolan aa Kɛrsɔm (kon co dimio ni aa «Miallo»). Kani mó dimi aa: «Vana viannanndo ya co o lɛŋnde isumialten nin ni.»

Mɛlɛka hɛli Moise le Israɛlla baŋaa

23Mɛɛ ɲɔɔ viow tei, mí masa va kon Esipte-o vu. Israɛlla va o cɛle len nin tuŋ, a va kuŋndan a koŋullo. Mí Hala tuɛi somisomin ndaa. 24Mɛɛ o tuei nda cɛɛŋɔnndo, mó loonun a kpema o yiilu Abraham, Isaak a Yakɔb-o. 25Hala tofaa nda, mó sina mɔnɛi nda va nin-nde.

Currently Selected:

Fulaa 2: BKG

Highlight

Copy