O Kandɔɔ 49
49
Yakɔb dɔw poaa ndɔa tɔ́ a à ŋiɔnda duaa
1Mí Yakɔb veelu poaa ndɔa, mó dimul nda aa: «La cuungian nɛɛ pilɛ mì cɔm niaa ɲɛ yɔŋnunnin niaa siɔdii laci-o.
2Poaa Yakɔb-a, la diinun nɛɛ pilɛ
mì la yaŋ nilan ɲɛkɛndɛi.
La yaŋ nilan mì la tuei
ɲɛ Israɛl fuɲa niaa co dimi-o.
3Rubɛn, nɔm co po ni tasoo ni,
hɔ́ɔ́ tase ya velu telen yáà nɔ yoomuan-ndo-o,
telen kpaayaa va ya o n'dial taw-vo.
Nɔm hiow tɔ́ɔ́ a yoomuan ni.
4Kɛ ŋol bɛɛ mì hiiyo fula nɔm maa mamɛn,
fonda tasoo ve lɛnin le nɔm te.
Kani a nɔɔliaa kpele fuɲa nɔm-ndo,
a hel o ya lo kpele má tosa mààlan.
5Simeɔn nda Levii, pɔmbɔɔ a bɛndoo nda co ni.
Kɛ má cɛlan nda ŋiɔn le dɛnnda vɔɔnndan tosaa.
6Màá i sɔɔnguu nda bɛɛ ikɛi o dúmbú nda yii-o coo le!
Màá i yiyan bɛɛ a cuungian ndaa o kɔɔ le!
Kani a diw vanndacieea a kɔl nda tuwvo,
má kili navaa tovaa tɔndikɔɔlion a kɔl nda fulaa.
7Dangaa co o kɔl nda tuw nɔ iɲíí loo
a o kela nda kɔlvesɛi bɛndoo coo.
I co nda sɛŋi o lɛŋnde Yakɔb len nin,
mì saŋ nda o lɛŋnde Israɛl-ten nin fásàn.
8Nɔm Yuda yɛ, nɔm puapilɛa nɔmnda candunin ni.
A nangunin yaamɔaa nɔmnda mundulan a yoomuma nɔmndan.
Poaa fuɲa nɔm-nda baŋnin vulan nɔm o labɛngunin.
9A toɲa, Yuda, yàlà téndóó n co ni.
Po nuu, a fula pɛlɛlen má hun biɔmnun maa yàlà.
Vana ca nɔm ko o biamnanndo a yàlàá kpeekpei ni.
Nɛ̀ɛ́-nɛ̀ nɔla yɛ mò cua nɔm isisi lon?
10Tinda lemasaa feŋannin Yuda o ba le.
Tinda kon lonin o polale ndɔlen coo
háá mì vana nɔ tinda kon kpeekpei-yo hin.
Vana vanaa-mangalaa-isɔɔa kpow vanin bɛɛlen keo-vo pɛɛn.
11O baanin sofɛlɛ ndɔɔ o rɛsɛn tumndo,
mò baa sofɛlɛ cuaa o lɛwve ipilɛ.
O tɔaanin doma ndɔɔ o mɔiyan nin,
mò cɛkɛla doma ndɔ bɛndoo o mɛmma n'rɛsɛnndan nin.
12Hɔlta ndɔlan la hiow divɔɔ a mɔima siaŋan.
Ciŋun ndɔn hiow diondɔɔ a nɔnɔan.
13Calta Sabulɔn-ndan la vanin o mɛmma ihɛllan demullo,
o nɔnin fonda dɛ̀ndɛ̀lan la sim-ndo o kɔngɔ ndɔɔ coo.
Lɛŋnde ndɔlen le pɛngɛlannin háá Sidɔn.
14Isakar ndu, maa sofɛlɛ o co ni,
o nɔ dialun kalan taw.
O co maa sofɛlɛ co ihini o hèélan tan tiɔn tɛɛn-ndo.
15O canin maa pɛngio naŋ,
maa lɛŋnden le naŋ.
O siɛndinin congoo le volɔɔlan cuaa,
o cɛlnin vali lepɔtɔllo.
16Dan ndu, ndu vanin vana kialaa n'yamaa
o polale ndɔlen coo ni
maa polama tɔ̀an Israɛl.
17Màá Dan va maa kɛw o nɛi,
mɛɛ hɔ̀ɔ̀lɔ́ɔ̀ va o pemalen coo nuaa yɛ.
Mò lɔva sow pelei,
mì vana ɲaanan sow fula mò del macali!
18Éé Mɛlɛka! Nɔm ya tiindan ni.
Baŋa ya yandi.
19Kad ndu, vannda kunda bɛndoo a delnin ndu coo,
kɛ o mululunnin nda mo tow nda.
20Asɛr ndu nɔnin ɲɛdiaa kɛndɔɔ taw,
o yɔngunin ɲɛdiaa bɛnda le balo lemasaa-o.
21Nɛftali ndu vanin maa kial connun nila ɲulu-o,
o koam cuavaa kɛndɛ-kɛndɛa-o.
22Yosɛf ndu co maa tɛyii yɔm soli kɔmnden taw-vo,
tɛyii yɔm co o tɔalaa o peo kɔngɔ-o.
Lɛvun ndɔn hel pɛ sɔlɔbɔlɔɔ,
n piasa o kungaa coo.
23Vanaa vuaa n'kɔɔa tiŋ Yosɛf,
a nuwviaa ndu sɛɛngianndo lekɔɔ.
A co ndu vuuo a labɛɛla a kɔɔn ndan.
24Kɛ kɔɛi ndɔɛi biŋin te,
congúla ndɔlan la nɔ vɔ yoomuan,
la co vɔ leemu-leemu.
Kɛɛmasɔla Hala-Kpaaya Yakɔb-o le.
Ndu co vana mandaa n'cɔloo a pow kpova Israɛl tiindan-ndo ni.
25A toɲa, Hala fuɲa nɔm-ndo sɔɔnguunin nɔm ikɛi.
Vana-Kpaayaa-Kpow dɔawnin nɔm duaa.
Màá o tuisul nɔm piɔɔ fulaa coocoo,
mò ke nɔm mɛnndan fulaa lɛŋ!
Màá o ke nɔm cuawva a cɔlua taw-taw!
26Duaa fuɲa nɔm-ndo hiow naŋɔɔ a duaa pembun masindɔn.
Duaa kon hiow naŋɔɔ a ɲɛm vaan vana sɔla o pembun paandu-paandon coo-on.
Màá duaa kon va Yosɛf o lebol mò va ndu o itendu!
Ndu co vana bɛndu puapilɛa ndɔa ni.
27Bɛnyamɛn ndu, maa tun yondo iyola o co ni.
Idii púŋ o dia ɲɛ o bii-o ni.
Icɔl vɛlɛ, o piɔw ɲɛm o hɛlu o cɔwvo-on.»
28Haa kpow yɔŋnun vanaa lebolla o polama tɔ́ a mamiɔmma Israɛlla coo ni. Nuaa fuɲa nda soo o nda lo mó dɔaw nda duaa ni. Mí poaa ndɔa kpede, vana-vana sɔla duaa o ndɔɔ.
Piɔ́m Yakɔb-o
29O mɛɛlulan niko, mí Yakɔb sila nda aa: «I co vu mì dem fuɲaa niaa mamaa vi-a ciee-piɔ́m. I vi pɛ, la kɔ kumbu ya vanaa nia banaa ikɛi o buululan nin, o yondo Efrɔn Hitiinɔ-o nin. 30Buulula co lan Mak-pela lan pɛɛn, Mamre o hɔl-ndɔ, o lɛŋnde Kanaan-nden nin. Buulula Abraham pendu a yondo kon latulu Efrɔn Hitiinɔ o ba le vanvílɛ́iya kumbɔɔ lenin-ndan. 31Lon nda kumbu Abraham nda Sara laa ndɔ ni. Lon koni nda kumbu vɛlɛ Isaak nda Rebeka laa ndɔ ni. Lon ya kumbu vɛlɛ Lea laa ni ni. 32Piondɔɔ Abraham pendu yondo kon a buulula lan Hitiia o ba ni.» 33Mɛɛ Yakɔb cii poaa ndɔa silalan yɔngu kpede, mó mingi pelun ndɔn heelu o kpele, mó malnun kɔl, mó diam fuɲaa ndɔa vi-a.
Currently Selected:
O Kandɔɔ 49: BKG
Highlight
Share
Copy
Want to have your highlights saved across all your devices? Sign up or sign in
© Alliance Biblique en Guinée
