O Kandɔɔ 48

Yakɔb dɔw poaa Yosɛf-a duaa

1Dɛnnda lan hiovɔɔ, má kɔ dimul Yosɛf maa Yakɔb fuɲa ndɔ co a nàá. Mí Yosɛf cua poaa ndɔa ŋiɔnda, Manase nda Efraim, mó kɔa lon a nda. 2Má kɔ dimul Yakɔb maa Yosɛf po ndɔ hin ndu yilɔɔ. Mí Yakɔb kindikindin, mó can, mó cal o kpele ndɔɔ coo. 3Mó dimul Yosɛf aa: «Paale pilɛ, mí Hala Vana-Kpaayaa-Kpow cɔmnun ya nɛɛ ya va Lus o lɛŋnde Kanaan-nden nin-nda, mó dɔaw ya duaa. 4Mó dimul-la aa: ‹I co nɔm cuawva yɔngu mì polale nɔmnden le kui taw. I solinin vanaa-mangalaa-isɔɔa taw nɔm o ipulu. Nduyɛ, i co hunɔɔ cuavaa nɔmaa imamaa lɛŋnden nden yɔngu le fɛɛn a fɛɛn.› 5Sunsun yɛ, i cua poaa nɔmaa ŋiɔŋaa n velu haa Esipte nanu telen yáà hin-ndɔ loo-a maa poaa nia ya solin o ipulu-a, Efraim nda Manase pɛɛn. Poaa nia nda co ni maa Rubɛn nda Simeɔn. 6Cuavaa n vialunin o nda kɔɔli-a, nɔm pila nɔnin kan ni. O diola bɛndaa cuu nda o kɔɔ-a bɛngu nda sɔlanin kɛ́ɔ ni. 7Yáà cɔnɔnndo Padan-Aram, mí Rasɛl kei vu o lɛŋnde Kanaan-nden nin, Efrata ciee-lekɔɔ. O nɛi Efrata nɔ vɛlɛ diolan aa Bɛtlɛhɛm-ndo coo lon ya kumbu ndu ni.»

8Mí Israɛl tofa poaa Yosɛf-a, mó ɲuna aa: «Nɛ̀ɛ̀aa co yɛ haa?» 9Mí Yosɛf muli aa: «Poaa Hala ke ya o lɛŋnden nden nin-nda n ca nuaa ni.» Mí Israɛl dimi aa: «Sɔɔnguu nda ya ikɛi mì dɔw nda duaa.» 10Le tùú Israɛl ndóò yuuva-o, mí pundaa cal ndu o hɔl, ndóò ci lɛ taw le. Mí Yosɛf sɔɔnguu nda ndu ikɛi, mó kɔman nda. 11Mó dimul Yosɛf aa: «I ve lɛ kɔl maa yáà canin nɔm te, kɛ Hala cɔm ya vɛlɛ cuavaa nɔmnda.» 12Mí Yosɛf cua poaa ndɔa ŋiɔnda fuɲa ndɔ o vulan tɛɛn, mó baŋ vulan ndu o labɛngunin. 13O kon kɔɔli, mó cua nda nda ŋiɔn kpow, mó kɛsin Efraim o ba ndɔ kɛndɔɔ coo, o ba mɛl Yakɔb fuɲa ndɔ-o coo va kon ni. Mó kɛsin Manase o ba ndɔ mɛllo coo, o ba kɛndɛ fuɲa ndɔ-o coo va kon ni. Mó sɔɔnguu fuɲa ndɔ ikɛi a nda. 14Kɛ mí Israɛl fuɲa ndɔ siɛndi ba kɛndɔɔ, mó handu ndu Efraim o lebol, nduyɛ ndu va cuaambɔɔ ni. Mó siɛndi ba mɛllo, mó handu ndu Manase o lebol. A va Manase va kon kaasonɔɔ-o kpow, mí Yakɔb singafila balan lende. 15Mó dɔaw Yosɛf duaa aa:

«Hala Abraham fuɲa ni mama a Isaak fuɲa ni a tosal vallo-o,

Hala landu ya hɔlla coo kabi ya co yoomu háá hau-vo,

16mɛlɛkanɔ kanda ya a dɛnnda vɔɔnndan kpow-vo,

i piɛi nɔm mà dɔw poambɔa ha duaa.

Mì diola nilan,

diola Abraham fuɲa ni mama lan,

a diola Isaak fuɲa ni lan

la lo ceen nda coo.

Mà koma kui, mà velu cuawva taw o lɛŋnden nden nin.»

17Mɛɛ Yosɛf ce maa fuɲa ndɔ handu ba kɛndɔɔ Efraim o lebol, mí sɔɛi pala ndu. Mó bii fuɲaa baa le ndu faŋaa Efraim o lebol mì ndóò hivi Manase o lebol. 18Mó dimul fuɲa ndɔ aa: «Tosa lende le Pua, kani Manase co kaasonɔɔ ni. Lelan handu ndu ba nɔm kɛndɔɔ o lebol.» 19Kɛ mí fuɲa ndɔ kɛɛ, mó dimi aa: «Po nuu, i sina. I sina válán. Polale Manase len bɛɛ le vanin sɛ́lɛ́ taw, ndu bɛɛ vanin vana tɔ́ɔ́ bɛndoo. Kɛ pɔmbɔ ndɔ hiawnin va vana tɔ́ɔ́ bɛndoo a ndu, vanaa-mangalaa-isɔɔa taw-taw a fulanin o polale pɔmbɔ ndɔlen coo ni.» 20Paale len, mó dɔaw nda duaa nda ŋiɔn kpow, mó dimi aa: «Fɛɛn-fɛɛn, te Israɛlla a va pɛ duaa dɔvɔɔ, a vanin niaa diolan piɔlɔɔ, mà va dimio aa: ‹Màá Hala siinguu nɔm maa Efraim nda Manase!›» Lende o handu Efraim Manase tase ni. 21O kon kɔɔli, mí Israɛl dimul Yosɛf aa: «Piɔ́m nuu bendu lɛ le. Kɛ Hala co va niaa ikɛi, mò mingi niaa o lɛŋnde fuɲaa niaa mamaa nin. 22Ya yɛ, i yɔngu nɔm kunda kɛ́ɔ o pilɛ hiovɔɔ puapilɛa nɔmnda coo: i yɔngu nɔm tàndàá Sikɛm, o ya puu Amoriia o ba a kpaaya mɔɛi nii cɔwve a kpaasiaa nuu-o pɛɛn.»

Currently Selected:

O Kandɔɔ 48: BKG

Highlight

Copy