O Kandɔɔ 26

Isaak kɔɛ kelaa o Abimelɛk lo

1Tuma kon vɛlɛ, mí yima fofolan ma luɛi o lɛŋnde len nin, yima man maa hiow yima fofolama luɛi o paale Abraham-nden ndan. Le hee, mí Isaak kɔa Kerar o masaa Abimelɛk lo, masa Filistia pɛɛn. 2Mí Mɛlɛka cɔmnun ndu, mó dimul ndu aa: «Kɔa o lɛŋnde Esipte len nin te. A saa pɛ a cal o lɛŋnde ya co nɔm cɔm-nden nin. 3Cal o lɛŋnde len nin. I vanin nɔm ikɛi mì dɔw nɔm duaa. Kani nɔm a cuavaa nɔmaa imamaa ya yɔngunin tàndàlan ndan kpow ni. Lende ya peelunin kpema ya cuel Abraham fuɲa nɔm-ndo ni. 4I co cuavaa nɔmaa imamaa kui maa loeon o halataala, mì yɔngu nda lɛŋnden nden kpow. Nduyɛ, vanaa-mangalaa-isɔɔa o ceendo coo kpow a sɔlanin duaa cuavaa nɔmaa imamaa o ba bɛngu. 5Kani Abraham fuɲa nɔm bii sɔɛi nii, silala nilan a tɔŋnda nilan, mó kela o nɛila nilan a o hɛnan nuu coo.»

6Lelan, mí Isaak cal Kerar lon. 7Mɛɛ pilacieea Kerar a ɲuna ndu a dɛnɛ laa ndɔ-o o kɔɔ, mó mulul nda aa: «Yema nuu o co ni.» O cɛl le dimio maa laa ndɔ le Rebeka va le. Kani siòònde va ndu ni, yɔŋii vanaa kan ndáà dii ndu o laa ndɔ coo, bau Rebeka laa ndɔ ndóò naŋ taw.

8Mó viaw o lɛŋnde len nin taw. Paale pilɛ, mɛɛ Abimelɛk masa Filistia tofa o dio-pɔmbɔɔ, mó ca Isaak pisulta tiamaalan nda Rebeka laa ndɔ. 9O kon mó viam kiilaa Isaak veeloo. Mɛɛ o hin, mí masaa ɲuna ndu aa: «Le yɛɛ nɛ n dimi yɛ aa yema nɔm cuaa ho co ni, nduyɛ laa nɔm o co ni?» Mí Isaak mulul ndu aa: «Siòònde va ya ni, yɔŋii ndáà dii ya le laa nuu. Lelan ya dimi ni aa yema nuu o co ni.» 10Mí Abimelɛk ɲuna ndu vɛlɛ aa: «Dɛnɛ yɛɛ nɛ n tosal-lɛ naa hoo? Ndóò lo cobe mì vana pilɛ o lɛŋnde nilen nin ndóò tɛɛmbuu dɛnɛ a laa nɔm. Ndíì tosan yɛ pɛ lende, mɛɛ dɛnɔɔ le nɔm óò kondu naa nuaa le?»

11O kon mí masaa Abimelɛk yɔngu yondaa maa vana-vana yɔŋ pɛ Isaak, te kon te laa ndɔ ɲɛ, vana kon co piɔ́mndo sɔla.

12Vɔsi kon, mí Isaak váà ciɛi o lɛŋnde len nin, mó koaw ɲɛ o saŋ-ndo háá bɛmbɔɔ kɛmɛ. Kani Mɛlɛka va ndu duaa dɔvɔɔ. 13O lo lon, mí ɲɛm ndɔn sɔlan kui taw, háá mó siŋnun vana bolofaa bɛndu-bɛndu. 14Cɔlua va ndu o ba: saa, cuinnda a nawva. Buɛiya va vɛlɛ ndu o ba taw. Le hee, mí Filistia kandu ndu paŋalaa. 15Má mingi puuloo o soonnda kólaala buɛyaa Abraham fuɲa ndɔ-a ndáà tow telen ndu Abraham kon va yoomu-o lan kpow nin. 16Mí masaa Abimelɛk dimul Isaak aa: «Faŋan o lɛŋnde naalen nin mà kɔɛ, kani a sɔla bolofaa nanu, má pia, má hiaw naa.»

17Mí Isaak faŋan, mó kɔ kila dɔ́ɔ́ngɔ́ ndɔɔ o dɛɛlala balu Kerar lan nin, mó cal lon. 18Mó soli puuloo o soonnda kólaala ndáà tuw fuɲa ndɔ lan nin. Fuɲaa va vɔ yoomu mí soonnda kólaala lan la toawnun. Kɛ mɛɛ o vi, mí Filistia koma baŋul tan. Mí Isaak ke soonnda kólaala lan diolan mɛɛ Abraham fuɲa ndɔ ndóò ke lan diolan yɛ.

19Tuma buɛyaa Isaak-a va soonnda lan tovɔɔ o dɛɛlaa nin-ndo, má saalun soon mɛmma vulùn-vùlanndan ma va nin-ndo. 20Le mɛmma man, mí vanaa mandaa n'cɔlua Kerar a tisa vanaa mandaa n'cɔlua Isaak-a kɔɔli a sɛɛngianndo. Má dimi maa nda nɔ mɛmma kɛndɛma man ni. Le hee, mí Isaak ke soon kólaa kon diolan aa Esɛk (kon co dimio ni aa «Sɛɛngianndo»), kani sɛɛngianndo va nda tɛɛn le soon kólaa kon. 21Mí buɛyaa ndɔa toaw soon kólaa celen, má sɛɛngian vɛlɛ o kon coo. Mí Isaak ke vɛlɛ kon diolan aa Sitna (kon co dimio ni aa «Simullo»). 22O kon kɔɔli, mó faŋan ndon, má tuw ndu soon kólaa celen. A nuwviaa lɛ ndu sɔngɔ o n'dial o kon coo le. Mó ke ndu diolan aa: Rehobɔt (kon co dimio ni aa «Fonda fɛkɛiyo»). Kani mó dimi aa: «Mɛlɛka yɔngu naa falle fɛkɛi, n co bolofaa sɔla o lɛŋnden nden nin kpeekpei.»

23Cɔnɔnndo lon, mó heelu Bɛɛr-Seba. 24Paale o tiiya lon-nden, mí Mɛlɛka cɔmnun ndu icɔllo, mó dimul ndu aa: «Ya co Hala Abraham fuɲa nɔm-ndo ni. Buulan te, kani i co nɔm ikɛi. I co nɔm duaa dɔvɔɔ mì kuilul nɔm polale nɔmnden taw, le vana baala nuu Abraham.» 25Mí Isaak cɔaw fonda-loamaa-lasálàá o fonda kon, mó biilu Mɛlɛka lon, mó toandu cɛi-kola-toandaa ndɔɔ lon. Mí buɛyaa ndɔa toaw vɛlɛ soon kólaa celen.

26Mí masaa Abimelɛk cua Ahusat vana ndɔ silaa a Pikɔl, ó va bolle vanaa ndɔa cɔwva-o, má kɔa o Isaak lo fulaa Kerar. 27Mɛɛ nda tiiya lon, mí Isaak ɲuna nda aa: «Le yɛɛ niaa hin yɛ o ya lo? O co niaa le tol-la yɛlen mí la toaw ya mí faŋan o niaa lo le?» 28Má mulul ndu aa: «N ce maa Mɛlɛka co nɔm ikɛi, lelan naa n dimi ni aa n bɛnda mì n yii kpemaa naa niaa. N yeema, nɔm a naa, mì vana-vana cua kpemaa mò mɛnan le kpema kon yiiyo. 29Lelan, mɛnan o Mɛlɛka lo, taa tosalnin naa dɛnɛ vɔɔndo le. Bau naa bɛɛ n tosal nɔm dɛnɛ vɔɔn te. Dɛnɛ kɛndɔɔ naa n tosal nɔm ni. A faŋan o naa lo a isɔɔ kɔɔli le. Sunsun yɛ, Mɛlɛka co nɔm duaa dɔvɔɔ.» 30Mí Isaak toosial nda ɲɛdiaa lemasa kɛndɛ-kɛndɔɔ, má dia, má kol. 31Diimandɔɔ idiiyo púŋ, má pena kpemaa yii vellaa-velle, mí vana-vana mɛnan. Mɛɛ nda cii, mí Isaak mal nda n'pelu, má congan o kɔlɲuloo nin.

32Paale pilɛle len, mí buɛyaa Isaak-a hun dimul Isaak aa a komal mɛnndan o soon kólaa nda va tovɔɔ-o nin. 33Mí Isaak ke dɔ́ɔ́ soon kólaa kon diolan aa Sibea (kon co dimio ni aa «Mɛnanndo»). Lelan nda ke kobi kon diolan ni aa Bɛɛr-Seba (kon co dimio ni aa «Soon kólaa mɛnanndo»). Háá paalen nden hau, lende soon kon nɔ diolan ni.

Laandaa Esau yil-la

34Mɛɛ Esau cii vɔsilan belehiɔɔlu, mó yil laandua nda ŋiɔn: Yudit, cua Beeri Hitiinɔ-o a Basmat, cua Elɔn Hitiinɔ-o. 35Laandaa ndɔa ŋiɔŋaa kan kpow, má luei Isaak nda Rebeka mɔnɛi lueiyo pila.

Currently Selected:

O Kandɔɔ 26: BKG

Highlight

Copy