O Kandɔɔ 25

Cuavaa Ketura vilul Abraham-nda

(1Dɛnnda lemasalan 1.32-33)

1Mí Abraham ndóò yil vɛlɛ lanɔ celen diolan aa Ketura. 2Mó vilul ndu poaa, nda yɔŋnun haa ni: Simran, Yɔksan, Medan, Madian, Yisbak a Sua. 3Yɔksan yɔŋnun fuɲaa Saba nda Dedan ni. Dedan kon yɔŋnun fuɲa-mama Asuriia, Letusiia a Leumiia ni. 4Madian yɔŋnun fuɲaa Efa, Efɛr, Henɔk, Abida a Ɛldaa ni. Nda kpow, Ketura ndóò velu nda ni.

5Mí Abraham yɔngu Isaak ɲɛm ndɔn kpow. 6Mó yɔngu vɛlɛ poaa ndɔa o velu a laandua celennda-a ɲɛm ndɔn n'pum. Kɛ telen o va yoomu-o, mó faŋa nda Isaak po ndɔ ikɛi few-few. Mó yaa nda o lɛŋnde celen nin a ba paalen le can-ndo.

Piɔ́m Abraham-ndo

7Mɛɛ Abraham cii vɔsilan kɛmɛ a belaŋɔmmɛw a laŋuɛɛnu, 8mó vu. Ndóò yuuva fɔlɔn kudɛɛ-kudɛɛ o kɔlɲuloo nin, malan o diam vanaa ndɔa ciee-piɔ́m. 9Mí poaa ndɔa, Isaak nda Ismaɛl a kumbu ndu o buululan nin Mak-pela, o lɛŋnde Efrɔn-nden, po Sohar Hitiinɔ-o pɛɛn. Lɛŋnde va len Mamre ikɛi len. 10Abraham ndóò cii nin lɛŋnde len piondɔɔ Hitiia o ba. Lon nda kumbu Abraham kon Sara laa ndɔ ikɛi ni. 11Mɛɛ Abraham vi, mí Hala koma dɔaw Isaak po ndɔ duaa taw-taw. Mí Isaak kɔ kila calta ndɔlan o soon kólaa Lakai-Royi ikɛi.

Polale Ismaɛl-ten

(1Dɛnnda lemasalan 1.29-31)

12Diola cuavaa-imamaa Ismaɛl-la la co lan ni, po Abraham velu nda Akar-o, buɛi laandu Esiptenɔ va Sara o ba-o pɛɛn. 13Diola poaa ndɔa o polale vialaalen la co lan ni: Nebayɔt, Kedar, Adbeɛl, Mibsam, 14Misma, Duma, Masa, 15Hadad, Tema, Yetur, Nafis a Kɛdma. 16Diola poaa tɔ́ a à ŋiɔŋaa Ismaɛl-la la co lan ni. Má siŋnun bolii lapangɛi o yungula ndalan coo. Má yɔngu cieon a sɔndɔkɔlta nda va calle nin-ndan diola nda pila lan. 17Ismaɛl ciiyo vɔsilan kɛmɛ a beleyaa a laŋɔmmɛw, mó vu, mó diam vanaa ndɔa ciee-piɔ́m. 18Mí cuavaa ndɔa a cuavaa ndɔa imamaa cal o lɛŋnde cɛn Havila le kɔlan Sur len nin, o lɛŋnde Esipte len ikɛi, le kɔlan a ba Asiri-o. Lende nda cal polama cuavaa tɔ̀a Abraham-nda levil ni.

DƐNƐ YAKƆB-O

(25—36)

Violɔn Esau nda Yakɔb-o

19Polale Isaak len le yɔŋnun nden ni. Abraham velu Isaak kon ni. 20Isaak ndóò nɔ vɔsilan belehiɔɔlu, mó yil Rebeka o nɔ̀u. Cua Betuɛl Aramiinɔ fula Padan-Aram-ndo a yemaa Laban Aramiinɔ Rebeka kon va ni. 21Mí Isaak piɛi Mɛlɛka le Rebeka laa ndɔ pulei timbio, kani Rebeka ve vana vialaa le. Mí Mɛlɛka muli piɛile ndɔlen, mí Rebeka laa ndɔ cua folio. 22Mɛɛ pɛndua va kuindianndo ndu o dembe, mó koŋul aa: «Kpòkóó! Te nuaa i co ni, le yɛɛ niko mí cua folio?» Mó kɔ ɲuna Mɛlɛka. 23Mí Mɛlɛka dimul ndu aa:

«Vannda súúlan tan tiɔn

a co nɔm o dembe ni.

Vanaa-mangalaa-isɔɔa súúlan tan tiɔn

n co violɔɔ ni.

O pilɛ hiawnin o pilɔɔ kpaayaa.

Po tasoo calnin pɔmbɔ ndɔ o labɛngunin#25.23 Tofa vɔ Rɔmnda 9.12..»

24Telen ndɔ vialaa tiiyaa, mó vialu pɛndua. 25O tase o velu-o, kɔɔlen le va ndu lediuvaa, yiinde va ndu lekɔɔ maa yiiŋii yáw visi. Lelan nda ke ndu diolan ni aa Esau (kon co dimio ni aa «Vana nɔ yiinde lekɔɔ-o#25.25 Lɛŋnde Esau len nda veelu vɛlɛ ni aa lɛŋnde Edɔm-nden (tofa vɔ ni 30 ndɔɔ). A veelu len vɛlɛ aa Seir (tofa vɔ 32.4). Diom nda hivi diola mɛɛlaala lan-ndo yɔngu vana yiyanndo a diom hivin aa «vana nɔ yiinde lekɔɔ-o».»). 26Mɛɛ ndu velun, mí pɔmbɔ ndɔ fula vɛlɛ, ba ndɔɔ va o kafalanndo o bɛngu tííndíí Esau-vo. Má ke ndu diolan aa Yakɔb (kon co dimio ni aa «Bɛngu tííndííyo»). Isaak ndóò nɔ vɔsilan belaŋɔmpum, mó vialu pɛndua kan.

Esau pisi fonda ndɔ ikaasonyaa Yakɔb pɔmbɔ ndɔ o ba

27Mɛɛ poambɔa pɛndua kan sul, mí Esau siŋnun doosunɔ-málà bɛndoo, yondo tuŋ o vannun ni. Yakɔb ndu yɛngɛlɛn o va ni. O cɛila-kolala-toandaalan nin tuŋ o vannun ni. 28Esau Isaak ndóò hiow kaola, kani ɲɛmahilu ledoosoo Isaak ndóò yeema ni. Kɛ Yakɔb Rebeka ndóò hiow kaola.

29Paale pilɛ, Yakɔb lo kpɔɔndɔɔ#25.29 kpɔɔndɔɔ: Te vana yaw pɛ ɲɛdiaa mà pesipesi ndu o mɛmma n yaw ndu-an nin, mò siŋnun lɔngɔlɔngɔ, ndu co kpɔɔndɔɔ ni. Vanaa pum veelu ndu aa «kpɔndɔnyiio», a pum aa «kpɔndɔmɔiyo», a pum yɛ aa «tulubaa». yawvo, mí Esau bɛ ndɔ fula doosulen yondoo nin, mó hun. O va o sangaa yɔkɔɔ. 30Mó dimul Yakɔb aa: «Poo ke ya kpɔɔndɔ nɔm siaŋaa ho mì de, kani i sanga nihau bɔɔ a yiaan.» Lelan nda ke Esau diolan ni aa Edɔm (kon co dimio ni aa «Kpɔɔndɔ siaŋaa»). 31Kɛ mí Yakɔb mulul ndu aa: «Taa yeema pɛ mì ke nɔm ndu, mɛɛ singa ya ndu o ba a fonda nɔm ikaasonyaa.» 32Mí Esau muli aa: «Yiaan ma co ya diyɔɔ nuaa ni. Kpeku yɛɛ fonda ikaasonyaa ho solul-lɛnin ya?» 33Mí Yakɔb dimul ndu aa: «Mɛɛ yii kpemaa mà mɛnan sunsun.» Mí Esau yii dɔ́ɔ́ kpemaa, mó mɛnan po. Mó vɔngul fonda ndɔ ikaasonyaa Yakɔb pɔmbɔ ndɔ o ba. 34O kon mí Yakɔb ke ndu buloo a kpɔɔndɔ n'cabueendo. Mó cal, mó dia, mó kol. Mó can mó kɔannun. Nuaa Esau pɛɛsa fonda ndɔ ikaasonyaa ni.

Currently Selected:

O Kandɔɔ 25: BKG

Highlight

Copy