O Kandɔɔ 27

Isaak dɔw Yakɔb duaa

1Mɛɛ Isaak yuuva taw, mí pundaa cal ndu o lahɔl, o ve lɛ cɔ le. Paale pilɛ, mó veelu Esau po ndɔ aa: «Esau.» Mí Esau cɛl aa: «Yòó!» 2Mó dimul ndu aa: «A ce nin mɛɛ ya yuuva yɛ. Nduyɛ, i sina paale piɔ́mndo co ya komal te. 3Lelan, cua ɲɛm nɔm ledooson: kpaasiaa a kɔɔn, mà kɔɛ doosulen yondoo nin, mà kɔ nuwvial-la ɲɛmahiloo. 4A hin pɛ a visin mun, a toosial-la mun mɛɛ ya yeema mun yɛ, a ke ya i de. I cii pɛ mun dio, i dɔw nɔm duaa telen pá ya vu.»

5Tuma Isaak va Esau po ndɔ sɔɛi ken dimullo-o, Rebeka va tueyɔɔ. Mɛɛ Esau faŋan dɔ́ɔ́ mó kɔa doosulen yondoo nin le fuɲa ndɔ ɲɛmahiloo cuuo, 6mí Rebeka dimul Yakɔb po ndɔ diinndɔɔ aa: «Yaŋ-ndɔ nilan Yakɔb. I tuei Isaak fuɲa niaa Esau bɛ nɔm dimullo aa: 7‹Kɔ hun a visi ledoosoo, mà hun toosial-la ɲɛmahilu yeelɛiyo, haliko mi de ndu, mì dɔw nɔm duaa Mɛlɛka o hɔl telen pá ya vu.› 8Lelan, nɔm Yakɔb, yaŋ nilan mà tuei, mà tosa ɲɛ ya co nɔm dimul-lo. 9Ɲaanun nɛɛ cɔlua naa co-a, mà kɔ bii cuinaa téndéa nda ŋiɔn, ma cuu ya nda, mì hun toosial fuɲa nɔm ɲɛdiaa yeelɛiyo a visin ndan mɛɛ o yeema yɛ. 10I cii pɛ toosiaa, a cua a yoo ndu mun, haliko mo de, mò dɔw nɔm duaa telen pá o vu.»

11Mí Yakɔb mulul kala ndɔ aa: «Esau bɛ ni nɔ yiinde lekɔɔ taw, ya yɛ i nɔ iyiin lekɔɔ le. 12Te i tosa pɛ lende, mì Pua pilan ya, o co sina maa dúmbóó ya yeema le ndu yiiyo ni. O kon, o dow lɛnin ya duaa le, kɛ ya pila tuisinnin dangaa coo ni.» 13Mí kala ndɔ dimul ndu aa: «Te sɔɛi danga ni, mɛɛ danga kon va ya pila coo. Nɔm tosa vɔ i ya dimul nɔm-nde tuŋ. Kɔ mà kɔ cuu ya cɔlua ya dimul nɔm-nda.»

14Mí Yakɔb kɔa, mó kɔ bii cuinaa téndéa nda ŋiɔn, mó cuu kala ndɔ nda. Mí kala ndɔ yaw ɲɛdiaa yeelɛiyo a ɲɛmahilu kon mɛɛ Isaak ndóò yeema yɛ. 15Mó cua volɔɔla cuɛinannda kɛndɛ-kɛndɛla Esau lan, po ndɔ tasoo pɛɛn, la va cɛinin-ndan, mó vow Yakɔb po ndɔ diinndɔɔ lan. 16Mó toosiaa yáwla cuinaa kan, mó bayiaa ndu lan o bala lɔɔlan a o labolo. 17Mɛɛ o cii, mó yɔngu ndu ɲɛmahilu o toosiaa kon-ndo a buloo le fuɲa ndɔ yoo. 18Mí Yakɔb luɛi o fuɲa ndɔ lo, mó yil ndu aa: «Pua isɛ.» Mí Isaak fuɲa ndɔ cɛl aa: «Mbaa. Nɔm nɛ̀ɛ́-nɛ̀?» 19Mí Yakɔb dimul fuɲa ndɔ aa: «Ya Esau po nɔm tasoo ni. I hin a ɲɛ n dimul-la le nɔm yɔngoo-o. Lelan, a ce ndu. Cɔn ma cal, ma de ɲɛmahilu yondo ya cuu nɔm-ndo, haliko ma dɔw ya duaa.» 20Mí Isaak ɲuna ndu aa: «Vɛɛ n looku yɛ dɔ́ɔ́ hau visio diyɔɔ nuaa cɔ́-cɔ́?» Mí Yakɔb muli aa: «Mɛlɛka, Hala nɔmndo soli ndu ya o hɔl nuaa ni.»

21Mí Isaak dimul Yakɔb aa: «Sɔɔnguu vɔ ya macɛlu po nuu, mì piilian nɔm le sinaa te Esau po ni n co lekɛ́ndɛi ni.» 22Mí Yakɔb sɔɔnguu ndu ikɛi, mí Isaak piilian ndu, mó dimi aa: «Diomndo ndu, diom Yakɔb-o o co ni. Kɛ balan ndan, bala Esau lan ni.» 23Le tùú yáwla cuinndan la va labayiaa o bala Yakɔb lan-ndo, mí la velan a bala Esau lan taw. Le hee, fuɲa ndɔ sina ndu le. Kɛ nduyɛ, telen pá mó dɔaw ndu duaa, 24mó cɔɔlu ndu ɲuna aa: «Lekɛ́ndɛi nɔm co Esau po ni ni?» Mí Yakɔb muli aa: «Oi.»

25Mí Isaak dimul ndu aa: «Mɛɛ ke ya ɲɛdiaa mì de ɲɛmahilu nɔm ledoosoo, haliko mi dɔw nɔm duaa.» Mí Yakɔb ke ndu ɲɛdiaa, mó dia. Mó ke ndu vɛlɛ mɔiyan, mó kol. 26Mí Isaak fuɲa ndɔ dimul ndu aa: «Sɔɔnguu nanu mà kɔman ya, po nuu.» 27Mí Yakɔb sɔɔnguu, mó kɔman ndu. Mɛɛ o kɔman ndu, mí Isaak tuɛi volɔɔla ndɔlan cun, mó dɔaw ndu duaa aa: «Po nuu co cunndo vana ca ko aa ciɛi Mɛlɛka dɔw duaa-e ni.

28‹Màá Hala tuisul nɔm kɛmndan fulaa coocoo!

Màá o tosa mì tɔlɔɔlan la naŋ o yondola nɔmndan nin!

Màá sɔla baloo a mɔiyan taw o tɔlɔɔla nɔmndan!

29Màá vanaa-mangalaa-isɔɔa tosal nɔm baalaa,

mì vannda tundun nɔm o labɛngunin!

Màá piɔlnun ladio puapilɛa nɔmnda coo,

mì ndepilɛa nɔmnda baŋ vulan nɔm o labɛngunin!

Vana-vana dɔw nɔm pɛ danga, dangaa co le ndu.

Vana-vana dɔw nɔm pɛ duaa, duaa co le ndu.›»

30Tuma Isaak cii Yakɔb duaa dɔvɔɔ-o, mí Yakɔb kɔannun. Mí Esau bɛ ndɔ fula doosulen yondoo nin. 31Mí ndu bɛɛ toosiaa ɲɛdiaa yeelɛiyo, mó cuu fuɲa ndɔ ndu. Mó dimul ndu aa: «Pua, má cè ɲɛdiaa a ɲɛmahilu ya toosial nɔm-ndo, cɔn mà de, haliko mi nɔm pila dɔw ya duaa.» 32Mí Isaak ɲuna ndu aa: «Nɔm nɛ̀ɛ́-nɛ̀?» Mó muli aa: «Ya Esau ni, po nɔm tasoo pɛɛn.»

33Mí kɔllo fula Isaak vúm, mó ɲiiya. Mó ɲunan aa: «Kɛ nɛ̀ɛ́ bii yɛ nin hoo visi ledoosoo mó toosial-la ndu, mó cuu ya? I cii nihau ɲɛmahiloo dio malan nɔm hun a o nɔmndo. I cii vana cuu ya ɲɛmahilu kon-ndo duaa dɔvɔɔ. Nduyɛ duaa kon feŋan ndɛnin ndu coo le.»

34Mɛɛ Esau tuei sɔɛi fuɲa ndɔ dimi ken-nde, mó koŋul a mɔnɛi. Mó tɛɛlun fuɲa ndɔ aa: «Éé Pua, ya bɛɛ dɔ́w ya duaa.» 35Mí Isaak mulul ndu aa: «Pɔmbɔ nɔm hin, mó hialu duaa nɔmndo a kɔlkalu vɔɔndo.» 36Mí Esau dimi aa: «Mò va maa le diola o nɔ aa Yakɔb lan o yii ya dúmbú bɛmbɛ lediin ni? O kandɔɔ tasoo, mó puu fonda ni ikaasonyaa. Nua vɔ vɛlɛ mɛɛ o hɛlu duaa nuu ya o ba yɛ.» Mó ɲuna fuɲa ndɔ aa: «Pua, duaa oo duaa lo lɛhau nɔm o ba le ya le?» 37Mí Isaak mulul ndu aa: «I cii ndu siinguu vana nɔm bɛndoo, mí siinguu vɛlɛ puapilɛa ndɔa kpow buɛyaa ndɔa. I dɔw ndu duaa le baloo a mɔiyan sɔlaa taw. Yɛɛ nɛ ya nɔla yɛ vɛlɛ mì tosa le nɔm Esau?» 38Mí Esau ɲuna ndu aa: «Pua, mɛɛ duaa pilɔɔ ho koni co nɔm o ba ni? A yandi, ya bɛɛ dɔw ya duaa.» Mó kandu dɔ́ɔ́ caŋndo coocoo kpélén. 39Mí Isaak fuɲa ndɔ dimul ndu aa:

«Yaŋ-ndɔ nilan. Fonda n vanin icali-o,

ɲɛ venin naŋɔɔ o lɛŋnde len coo le.

Mɔ́m venin fula o halataala mò kɛsi makɛm

le tɔlɔɔla nɔmndan nɛŋi le.

40Mɔɛi nɔmnde tosanin ni ma va yoomu#27.40Mɔɛi nɔmnde tosanin ni ma va yoomu: Vana nɔla mì vana hivi vɛlɛ fondaa ho aa: «A mɔɛi nɔmnde n dɔawnunin balo ni.».

A siŋnunnin buɛi pɔmbɔ nɔm-ndo.

Kɛ a venin icali o pumbu le.

A cuiŋinin volɔɔla lusula o handunin nɔm o lebol-tan,

mà soli bolle nɔmnden lebɛngu.»

Yakɔb ɲaanun mó kɔannun o Laban bom ndɔ lo

41Mí Esau cua nɛyɔn Yakɔb-o le duaa ndɔ o hɛlu fuɲa nda o ba-o. Mó dimi o kɔl ndɔɔ nin aa: «Piɔ́m fuɲa naa bendu lɛ le, te o vi dɔ́ɔ́ pɛ, i koma dii Yakɔb pɔmbɔ ni.» 42Mí vanndo dimul Rebeka maa Esau po ndɔ tase co kɔngɔlanndo le pɔmbɔ ndɔ diyɔɔ. Le hee, mí Rebeka veelu Yakɔb, po ndɔ diinndɔɔ, mó dimul ndu aa: «Esau bɛ nɔm co kɔngɔlanndo le nɔm diyɔɔ le màá ndɔɔ mingio. 43Lelan, yaŋ ya nilan mà tosa mɛɛ ya co nɔm dimul-lɛ. Faŋan nanu few-few, mà kɔɛnnun Haran o Laban bom nɔm ndo. 44Kɔ mà kɔ va pɔɔ lon háá mì bɛ nɔm ɲulul kɔl. 45Te o koma ɲulul pɛ kɔl, mò pɔɛɛnun a ɲɛ n tosal ndu-o, i vem vanndo nɔm kɔɔli, la kɔ hun. I yeema mì la hɛlun ya niaa ŋiɔn kpow o paale pilɛlen coo le.»

46Mí Rebeka kɔ dimul Isaak pɔnɔ ndɔ aa: «I co a mɔnɛi a dɛnɛ cuavaa Hitiia ha. Te Yakɔb bɛɛ yil pɛ lanɔɔ o lɛŋnden nden nin, mɛɛ piɔ́m nuu bendu lɛ le.»

Currently Selected:

O Kandɔɔ 27: BKG

Highlight

Copy