Daniɛl 7
7
Vundule tasele Daniɛl ce len: visia tɔɔmaa nda hiɔɔlu
1O vɔsi tase Baltasar va o masalen coo Babilɔn-ndo. Daniɛl va o kpele ndɔɔ coo, mó sɔl lɔan, mó ca vunduan o yiyan ndɔɔ nin. Mó sɛva lɔma ndɔma man, 2mó dimi aa:
«Icɔllo, mí ca vundulen-nden: Mɛɛ hoeiye hɔŋ fulaa o kpengun hiɔɔlun ceendo, mí i biiŋuu mɛmma ihɛllan. 3O kon, mí visia tɔɔmaa bɛndua fula nda hiɔɔlu o mɛnndan nin. O kɛ́-kɛ̀ va tengeen. 4Visi tasoo ndóò velan a yàlàá, kɛ ndóò nɔ kumbanndan maa kovɛ. I va ndu tofaa, mí kumbannda ndɔlan la suingin. Mó can, mó sim o pelun ndɔn miunndon kɔɔli coo maa vanaciee. Mí yiyan ivanacieeyaa luɛi ndu nin. 5Visi diinndɔ ya ce-o, ndóò velan a kɔ́lɔ́vúloo. O va maa ɲɛ kandu le cɔnɔn isisi. Kpɛndɔn va ndu o sondo mún yáá, n va o ciŋun ndɔn tɛɛn. Má dimul ndu aa: ‹Cɔn ma de vision taw!› 6O kon kɔɔli, mí ca vɛlɛ visi celen, velanndo a tambillo. Ndóò nɔ kumbanndan tan hiɔɔlu o kɔɔ maa yow, a bolle ndii hiɔɔlu. Mí kpaayaa yɔngun ndu le masalen tosaa. 7O kon kɔɔli, mí va hiovɔɔ laci a vundule len cɔu, mí ca vɛlɛ visi celen, o hiɔɔlundɔɔ. Visi vueinanndo a visi nɔ kpaaya kɔndɔfillo-o pɛɛn. Ciŋun iciliŋun bɛndon va ndu o sondo. O va dioo a cuiyo, mó va ɲɛ tɔ̀ va lou-vo nɛwvo a labɛngu. O va teengen a visia tasea fula ndu laci-a, ndóò nɔ leelan tɔ́. 8Tuma ya va leela ndɔlan mɛɛndianndo-o, mí lee celen fula o lan tɛɛn, o pɔmbɔ-pɔmbɔ o va ni. Mí leelan tan yáá la suingin o leela taselan tɛɛn, mí la mel lee mɛɛlaa kon fondaa. Hɔltan la va o lee kon maa hɔlta vanaciee, ndóò nɔ vɛlɛ sondo, sondo va sɔɔn yongan dimio-o.»
Kɔɔsɔ bɛndoo
9«I va tofaa tuŋ, mí ca kpɛŋɛla lemasalan lakɛsiaa, mí Bɛndu Yuu Masindɛ-Sindɔɔ hun cal. Volɔɔla va ndu lekɔɔ lan la va lahumbu maa kola fengbɔ. Yiiŋii va ndu o lebol-le va ihumbu maa yiiŋii saa humbu. Kpɛŋɛ lemasaa va o piaa a yelenyelen leyinndo. Bɛngula tiilannda kpɛŋɛ kon la va maa yinnde bɛndu. 10Pee bɛndu leyinndo va fulaa mó va hiovɔɔ ndu laci. Mí sɛ́lɛ́ bɛndu-bɛndoo va ndu baalaa tosallo. Mí sɛ́lɛ́ bɛndu cuu cɔm too va isisi ndu laci. Mí vanaa kialaa n'yamaa cal, mí sɛbɛlan la kumbin.
11I va tofaa tuŋ le sɔɔn yongan va fulaa lee pɔmbɔɔ o sondo-on. I lo tofaa, mí visi kon diinun, má tɛɛmbuu visin ndɔn, má viaw mun o yinnden nin. 12Mí masalen a kpaayaa puunun visia tɔ̀a o ba, kɛ má cɔɔlu nda yoomoo le telenndan lapum.
13I va vundule len cɔu tuŋ icɔl kon, mí ca vɛlɛ ɲɔɔ pum hunɔɔ o yumbuyumboo nin, velanndo a Po vanacieo. Mó sɔɔnguu háá nɛɛ Bɛndu Yuu Masindɛ-Sindɔɔ va icali-a. Má kɔa a ndu Bɛndu Yuu kon o hɔl. 14Mí vanabɛnduyɛi, masalen a bɛɛlen le yɔngun ndu. Mí vannda súúlan kpow, vanaa-mangalaa-isɔɔa a vanaa soaa sɔɔn mangalan yɛ́-yɛ́ɔn-nda a tosal ndu baalaa. Vanabɛnduyɛi ndɔɛi co le fɛɛn a fɛɛn, i cuu lɔ́ɔ́-lɔ́ɔ̀ le. Masale ndɔlen le tembunin fɛɛn a fɛɛn te.»
Kɔlɔ vundule tasele len
15«Ya Daniɛl, mí yiyan nuu laasian ya nin, mí hilul. 16O vanaa va isisi lon-nda tɛɛn, mí sɔɔnguu vana pilɛ ikɛi, mí ɲuna ndu le ya toɲaa dimullo a kɔlɔ vundule len o kɔɔ. Mó tɛɛsial-la kɔlɔ ndɔɔ aa: 17‹Visia tɔɔmaa bɛndua hiɔɔlua ha, nda co tɔɔmasele masɛi bɛnduei ndi hiɔɔlu o lɛŋnden coo ni. 18Kɛ vanaa diandaa Ó-Hiow-Ɲɔɔn-Kpow-vo-a sɔlanin masalen, mì le va le nda le fɛɛn a fɛɛn.›
19O kon kɔɔli, mí yeema le sɔɛi visi hiɔɔlundɔɔ sinaa, visi va kon teengen a visia tasea-o. Visi kon ndóò vueinun taw-taw, ciŋun ndɔn cilinnde n va ni, yɛmbɛn ndɔn daɲan n va ni. O va dioo a cuiyo, mó va ɲɛ tɔ̀ va lou-vo nɛwvo a labɛngu. 20Mí ɲuna ndu vɛlɛ le ya tɛɛsiallo a sɔɛi leela tɔ́la visi kon ndóò nɔ o lebol tan o kɔɔ. O kon kɔɔli, a sɔɛi lee pɔmbɔ fula kon, mí leela bɛndulan tan yáá la suingin-ndo. Lee kon ndóò nɔ hɔltan a sondo va sɔɔn yongan dimio-o. O va vɛlɛ lee kaamaa hiovɔɔ leela taselan coo. 21Mí ca lee kon cɔwvo tosaa a vanaa diandaa, mó va le nda nɔlaa, 22háá telen Bɛndu Yuu Masindɛ-Sindɔɔ hin le yamɛi kiolɔɔ-o, mó ke vanaa diandaa Ó-Hiow-Ɲɔɔn-Kpow-vo-a di. Mɛɛ telenndo tiiya, mí vanaa diandaa sɔla masalen.
23Mí Vana kon dimul-la vɛlɛ aa: ‹Visi hiɔɔlundɔɔ, ndu co tɔɔmasele masale hiɔɔlundɔle vanin o lɛŋnden coo len ni, le vanin teengen a masɛi súúlan kpow. Masale len le dianin lɛŋnden kpede, mì le nɛw len a labɛngu, mì le cui len. 24Leela tɔ́lan, lan la co tɔɔmasele masaa n'van tɔ́a fulanin o masale len nin-nda ni, mì o celen fula nda kɔɔli. O vanin teengen a masaa tasea. Masa mɛɛlaa kon faŋanin masaa nda yáá o a tasea tɛɛn. 25O diminin sɔɔn vɔɔnndon a Ó-Hiow-Ɲɔɔn-Kpow-vo, mò saangiaa vanaa diandaa Ó-Hiow-Ɲɔɔn-Kpow-vo-a. O tofanin le tɔŋndo a telenndan mangalaa, vanaa diandaa malnunnin ndu o ba le telenndan tan yáá a tálá. 26O kon kɔɔli, vanaa kialaa n'yamaa o halataala a cuungiannin mà cal o fonda kialaa n'yamaa, mì vanabɛnduyɛi puunun ndu o ba, mì i tambu háá mì siŋnun ɲɛ fondoo le lɔ́ɔ́-lɔ́ɔ̀. 27Masalen, vanabɛnduyɛi a bɔɔbɔɔyɛi lemasɛi o lɛŋnden kpow coo yɔngunnin kunda vanaa diandaa Ó-Hiow-Ɲɔɔn-Kpow-vo-a. Masale ndalen le co le fɛɛn a fɛɛn. Vanaa co masalen tosaa-a kpow a tosalnin nda baalaa, mà bii sɔɛi ndɛi.›
28Nanu sɔɛi he i mɛɛlu ni.
Ya Daniɛl, mí yiyan nuu laasian taw. Mí hɔlaa niaa mangalan, kɛ mí mandan sɔɔn mun o kɔl kpíŋ.»
Currently Selected:
Daniɛl 7: BKG
Highlight
Share
Copy
Want to have your highlights saved across all your devices? Sign up or sign in
© Alliance Biblique en Guinée
