Daniɛl 6
6
1Mí Darius Mɛdenɔ cua fonda lemasaa. Ndóò nɔ vɔsilan belaŋɔmpum a latiɔn o telen kon.
Yaamɔaa Daniɛl-la hendul ndu Daniɛl yaŋɔɔlen
2Mí Darius kialu le masaa n'bungaa kɛmɛ a bidiin kɛsio o masale ndɔlen kpow coo. 3Mó kɛsi vanaa lebolla nda yáá, a masaa n'bungaa kan ndáà bɛnda le konaa downɔnndo-a, yɔŋii ndáà yii masa bɛndoo dúmbú. Daniɛl va vana pilɛ o vanaa lebolaa yáá-aa kan tɛɛn. 4Mí Daniɛl kon hiaw vanaa lebolaa kan a masaa n'bungaa kan kpow dɛnɛ sinaa a sɔɔn taw, kani kɔl kaamaa va ndu nin. Lelan, mí masaa tuu le ndu kɛsio vana bɛndoo o masale ndɔlen kpow coo. 5Mí vanaa lebolaa tɔ̀a a masaa n'bungaa kandu nɛilan nuwviaa le Daniɛl lɔlɔɔ o masaa lo a sɔɔn lemasan o kɔɔ. Kɛ a ci tɛɛmbuu ndɔ le, kani o va sakpo. A ci biondɔn kɛ́-kɛ̀ le. 6Mí langbaa kan dimulan aa: «N seelunnin nɛi oo nɛi le ndu lɔlɔɔ le, fɔ mì n saalun dɔ́ɔ́ o pilɛ o tɔŋnda Hala ndɔɔ nin dɛ!»
7Mí vanaa lebolla a masaa n'bungaa cɛlan, má kɔa o masaa Darius lo, má dimul ndu aa: «Òó masaa Darius, màá viow yoomu fɔ́! 8Vanaa lebolaa bɛndua, vanaa kialaa n'yamaa, vanaa silaa masaa a masaa n'bungaa cii cɛlan o tɔŋndo pum coo. Lelan, mì nɔm pila handu ba lecoo. Tɔŋ kon co hoo ni: o palɛi beleyaa bɛngu, vana-vana piɛi pɛ hala celen, te kon te vanaciee celen o nɔm Darius kɔɔli, o viawnunnin o soon yàlàá nin. 9Lelan masaa, cɛl tɔŋndo ho, mà handu baa, mà kuuna aa ɲɛ-ɲɛ bɛnda mò mangalan te, mɛɛ tɔŋ Mɛdia a Pɛrsea, ó mangalan lɔ́ɔ́-lɔ́ɔ̀ loo co yɛ.» 10O kon, mí masaa Darius handu baa o tɔŋ yiinun kon-ndo coo.
A mal Daniɛl o soon yàlàá nin
11Mɛɛ Daniɛl sina maa masaa handu baa o tɔŋ kon coo, mí ndu Daniɛl hel o ndu lo cɛinin, mó kumbi diola pɔmbɔla va kpengii Yerusalɛm-nde lan. Lepalaa-lepala, o va vulan baŋɔɔ bɛmbɛ leyáá le Hala piɛiyo a le ndu candɔɔ mɛɛ ndóò tosa paandu yɛ. 12Mí yaamɔaa ndɔa kan a keleŋa lakɔ o ndu Daniɛl lo, má komal ndu, o va Hala tɛɛlɔnndo a ndu piɛiyo. 13Má muungu o masaa lo. Má yiyalan ndu tɔŋndo ho aa: «Masaa, o co nɔm pila le handu baa o tɔŋndo ho coo aa o palɛi beleyaa bɛngu, vana-vana piɛi pɛ hala celen, te kon te vanaciee celen o nɔm Darius kɔɔli, vana kon bɛnda mò viownun o soon yàlàá nin te?»
Mí masaa muli aa: «Lende kpeekpei sɔɛi kelun ni, mɛɛ tɔŋ Mɛdia a Pɛrsea, ó mangalan lɔ́ɔ́-lɔ́ɔ̀ loo co yɛ.» 14O kon, má dimul masaa aa: «Kɛ Daniɛl, vana hin ho o biyɔɔ nin fulaa Yuda-o, o nɔ lebɛɛ a nɔm te. O nɔ vɛlɛ kpeku a tɔŋ n yii-o le. Kani bɛmbɛ leyáá o piɛi Hala ndɔɔ o paalen nin ni.»
15Mɛɛ masaa tuei sɔɛi ken, mó sanga o kɔl ndɔɔ nin taw. Mó nuwviaa nɛiyo le Daniɛl baŋaa. Mó kindin taw le ndu ciindiaa háá icɔllo. 16Kɛ mí langbaa kan muungu o masaa lo, má dimul ndu aa: «Masaa, sina maa o tɔŋ Mɛdia a Pɛrsea nin, sɔɛi masaa handu baa coo-e mángàlan te.» 17O kon, mí masaa yɔngu diomndo, má hun a Daniɛl, má viaw ndu o soon yàlàá nin. Mó dimul Daniɛl aa: «Màá Hala nɔm n co baalaa tosallo lɔ́ɔ́-lɔ́ɔ̀-o ciindiaa nɔm!»
18O kon, má handu pow bɛndoo o sóóndó sondoo. Mí masaa handu vɛlɛ tɔɔmasele kelɛi ndɔɛi a tɔɔmasele kelɛi vanaa bɛndua, haliko ɲɛ-ɲɛ mangalan o dɛnɛ Daniɛl-lo nin te. 19Mí masaa muungu o cɛi ndɔ lemasaa nin. Mó lɔl lahɔl pii, o di ɲɛ-ɲɛ le, o sɔɔnguu vanalanɔ ikɛi icɔl kon te.
Daniɛl fula yoomu o soon yàlàá nin
20Idiiyo púŋ, mí masaa can a kiltan, mó kɔa o soon yàlàá sondoo. 21Mɛɛ o va sɔɔnguuo o soon kon ikɛi, mó veelu Daniɛl coocoo a mɔnɛi. Mó ɲuna ndu aa: «Daniɛl! Vana baala Hala yoomaa, vɛ̀ɛ̀ Hala nɔm n co baalaa tosallo lɔ́ɔ́-lɔ́ɔ̀-o tiw pá ba nɔm baŋaa yàlàá o ba?»
22Mí Daniɛl mulul ndu aa: «Òó masaa! Màá viow yoomu fɔ́! 23Hala nuu vem mɛlɛkanɔ ndɔɔ, mó hun kinda yàlàá sondolan. A tosal-la ɲɛ-ɲɛ vɔɔn te, kani i sandu Hala nuu o hɔl. Hali nɔm masaa o hɔl, i tosa dɛnɛ vɔɔn te.»
24O kon, mí masaa naŋ kɔl taw. Mó dimi le Daniɛl solio o soon yàlàá nin. Mɛɛ nda soli ndu, má mɛɛndian ndu, kɛ hali ɲasɔɔ a ci ndu lekɔɔ le, kani ndóò handu Hala ndɔɔ laalanndo coo.
25Mí masaa yɔngu diomndo le vanaa lɔlu Daniɛl-la biyɔɔ a le nda viovɔɔ o soon yàlàá nin, nda pila, laandaa ndaa a cuavaa ndaa. Mɛɛ nda viow nda, a tiiya bɛɛ o soondo tumndo le, mí yàlàà kan kpuwviaa nda, má sɛɛsiaa nda.
26O kon kɔɔli, mí masaa Darius sɛval vannda súúlan kpow a vanaa-mangalaa-isɔaa yɛ́-yɛ́a va icali o lɛŋnden kpow coo-a aa:
«Màá kɔlɲulu bɛndoo yɔngun niaa!
27«Tɔŋ ya yii-yo co hoo ni:
O masale nilen kpow nin,
vannda bɛnda mà nɔ bɛɛlen
a siòònde le Hala Daniɛl-lo,
kani ndu co Hala yoomaa ni.
Ndu co yoomu le fɛɛn a fɛɛn ni.
Masale ndɔlen le tembunin te.
Vanabɛnduyɛi ndɔɛi i nɔ lamɛɛlu le.
28Hala ciindiaa vana ni, ndu baŋa vana ni.
Ndu tosa dɛnnda bɛndulan
a sɔɔn kɔndɔfillon o halataala
a o lɛŋnden coo ni.
Ndu ciindiaa Daniɛl o kpaaya yàlàá bɛngu ni.»
29O kon kɔɔli, mí Daniɛl pilɛ kon sɔla dɛnɛ kɛndɔɔ o masale Darius len a o masale Siris len bɛngu.
Currently Selected:
Daniɛl 6: BKG
Highlight
Share
Copy
Want to have your highlights saved across all your devices? Sign up or sign in
© Alliance Biblique en Guinée
