Daniɛl 8

Vundule diinndɔle Daniɛl ce len: saa kóndóó a cuin toovio

1«O vɔsi yàándɔɔ nin o masale Baltasar len bɛngu, ya Daniɛl, mí ca vundulen lepum o letasele ya ce len kɔɔli. 2Vanáà ca kaa aa Suse ya va ni, kobi nda kunga a kpakio-o pɛɛn, kobi lebollo o tàndá Elam-ndo nin. Mí cannun isisi o kɔngɔ pee bɛndoo Ulai. 3Mí heelu hɔlla le cɔu lapi. Mí ca saa kóndóó o peo ikɛi. Ndóò nɔ leelan tan tiɔn, leela tiɔnnda lan láà bandu taw-taw, kɛ lee diinndɔ mɛɛlu vulɔɔ-o ndóò hiow o pilɔɔ bandei ni. 4Mí ca saa kóndóó, o va kundɔɔ a ba paalen le del-lo, a ba too a á ba luaŋ-ndo a leela ndɔlan. Visi oo visi óò nɔla ndu simullo le. Vana-vana óò nɔla ɲɛ-ɲɛ hiɔlɔɔ ndu o ba le, ɲɛ hɛnan ndu-o o va tosaa ni. Mó sɔla kpaayaa taw.

5I va yiyanndo le vundule len bilaa biyɔɔ, mí ca vɛlɛ cuin toovio. O va fulaa nɛɛ paalen le del-la. Toovi kon ndóò cii nin ceendo balɔɔ sɔ́, kɛ o pilan lɛŋ te. Ndóò nɔ lee kaamaa pum o hɔlta ndɔlan tɛɛn. 6Mó sɔɔnguu saa kóndóó ya ce kon isisi o kɔngɔ pee bɛndoo a leelan tan tiɔn-ndo ikɛi. Mó hinul ndu a yoomuma ndɔan kpow. 7Mí ca ndu saa kóndóó hinullo a kɔltuwvo. Mó kundu ndu kpoku! Mó yimi ndu leela tiɔnndan. Hali ɲɛ-pɔmbɔ saa kóndóó nɔla ndu simullo le. Mó yɔl ndu lɛŋ, mó nɛw ndu a labɛngu. Vana-vana nɔla ndu saa kóndóó puu o ba le. 8Mí cuin toovi kon sɔla kpaayaa taw-taw. Kɛ mɛɛ o kindun a bɛmɛi véŋ-véŋ, mí lee ndɔ bɛndoo yom, mí leela kaamaalan tan hiɔɔlu la vul dɔ́ɔ́ o fonda kon, mí la sim o kpengun hiɔɔlun ceendo.

9Mí lee pɔmbɔɔ vul o leela lan o pilɛ, mó sɔla kpaayaa a ba too, a ba paalen le can-ndo a á ba lɛŋnde hiow naŋɔɔ len. 10Mó bandu háá mó sulan a kunda mɛlɛkaa cɔwva o halataala, mó viaw a pum lɛŋ a loeon latulu. Mó nɛw nda a labɛngu. 11Mó simul bolle kunda mɛlɛkaa cɔwva, mó faŋa sálàla solin lepalaa-lepala lan. Mó nɔɔliaa cɛi-kola-toandaa diandaa. 12Mí mɛlɛkaa cɔwva a sálà solin lepalaa-lepala-o malnun ndu o ba o hakio nin. Mí lee kon cuiŋi toɲaa lɛŋ. Mó tiwba le sɔɔn o va tosaa-on kpede tosaa.

13Mí tuɛi vana diandaa sɔɛi, mí vana diandaa celen ɲuna o va sɔɛi-yo aa: «Vɛ̀ɛ̀ kpɛ́ dɛnnda cɔmnun-ndan o vundulen nin-ndan la viaw yɛnin? Háá telen kuɛɛ sálà solin lepalaa-lepala-o lo yɛnin faŋanndo? Háá lɔ́ɔ́ kuɛɛ dɛnɛ vɔɔn bɛndu kon lo yɛnin tosanndo o cɛi-kola-toandaa diandaa nin, mì kunda mɛlɛkaa cɔwva lo nɛwnɔnndo a labɛngu?» 14Mó mulul-la aa: «Fɔ mì telenndan, icɔl a idii, vàálan tan tiɔn kɛmɛ leyáá la cuu. O kon kɔɔli, cɛi-kola-toandaa diandaa Mɛlɛka-o muungu vɛlɛ o diandaa Mɛlɛka o hɔl.»

Mɛlɛkanɔɔ Kabriɛl tɛɛsiaa vundulen

15«Telen ya Daniɛl va vundulen-nden cɔu, mí yeema le len kɔlɔɔ sinaa-o, mí ca ɲɛ yoomaa pum isisi ya laci, o va maa vanaciee. 16Mí tuɛi diom vanacieo deŋio o pee bɛndoo Ulai coo aa: ‹Kabriɛl, tɛɛsial ndu kɔlɔ vundulen-nden!› 17Mó va sɔɔnguuo ya ikɛi, mí siòònde bii ya taw, mí del o kuumbuan o kɔl coo. Kɛ mó dimul-la aa: ‹Po vanacieo sei! Sina pɛngu maa vundule n ce len-nden le co tɔɔmasele palɛi mɛɛlɛi ni.› 18Tuma o va sɔɛi-yo, i va o kuumbuan o kɔl coo, mí siŋnun maa vana vovɛi. Mó pilan ya, mó cua ya, mó simi ya nɛɛ ya va-a. 19Mó dimul-la aa: ‹I co nɔm cɔm ɲɛ yɔŋnunnin o mɛɛlula kɔltuwvo-o, kani telenndo kelun le mɛɛlulan. 20Saa kóndó n ce-o, leela ndɔla tiɔnndan, tɔɔmasele masaa o lɛŋnde Medii len nin a masaa o lɛŋnde Pɛrse len nin co kon ni. 21Cuin toovi yiiŋii bɛndoo, ndu co tɔɔmasele masaa Yavan ni. Lee bɛndu co ndu o hɔltan tɛɛn-ndo, masa tasoo co kon ni. 22Lee yom-ndo, a leela hiɔɔlula vil o fonda ndɔɔ lan, kon cɔm masɛi hiɔɔlui fulanin o vanaa-mangalaa-isɔaa kan tɛɛn-nde ni. Kɛ ken ndi nɔnin kpaayaa maa masale taselen te. 23O masale ndalen mɛɛlulan, telen vanaa lahakia kuinin taw-taw-vo, masa celen sulnin, ó nɔnin yongaa a kɔlvesɛiyo le vannda palaa-o. 24O hiawnin laci a kpaayaa sɔlaa taw, o tosanin dɛnnda vɔɔnnda vana tui-yɔ bɛɛ le lan. Kɛ nduyɛ, o venin a kpaaya ndɔ kpeekpei le. Dɛnndan kpow la bɛndanin ndu o ba. O tɛɛmbuunin vanaa kpaayaa a yungu vanaa diandaa. 25O palanin vannda a kɔlkalu ndɔ vɔɔndo, mó saangiaa nda. O kuundiannin o kɔl ndɔɔ nin, o voolunin vanaa co yiyanndo maa a co o kɔlɲuloo nin-nda, mó diw nda taw-taw. O simulnin bolle simlacia, kɛ vana pilannin ndu le, mó yomiyomi, mó cuinun. 26Vundule n ce o telenndan, icɔl a idii, coo len, toɲaa le co ni. Kɛ nɔm, vion vundule len kpíŋ o kɔl nɔmndo nin, dimul vana-vana le. Kani telen ndɔɔ bandu vɔ taw.›

27O kon, ya Daniɛl, mí del a nàá o palɛi taw bɛngu, mí ɲaw sɛ́ɛ́n. O kon kɔɔli, mí siangu, mí muungu baala nuu tosaa o masaa lo. Mí kɔndɔfillo bii ya a vundule len, mí buulan taw, i bii ɲɛ-ɲɛ bila le.»

Currently Selected:

Daniɛl 8: BKG

Highlight

Copy