Dɛnnda kiilaa 9

Sol siŋnun vana Krista-o

(Dɛnnda kiilaa 22.6-16, 26.12-18)

1O telen kon, Sol va hiovɔɔ laci a kaandeŋaa Yeesu-a kɔngɔlanndo le nda diwvo. Mó kɔa o bolle vanaa-solia-lasálàá lo, 2mó ɲuna ndu sɛbɛla di lan le kɔlan o cɛila lekaanda va Damas lan nin. O kon te ndóò komal pɛ vanpiaandua, te kon te vanlaandua, mì ndáà va kelaa o nɛi kon coo, ndóò bii nda, ndóò yiw nda, ndóò hin a nda Yerusalɛm.

3Mɛɛ o kandu tiiya Damas ikɛi, mí ɲɛ-tengaa pum fula o halataala o lepilɔɔ, mó balu ndu. 4Mí Sol del lɛŋ, mó tuɛi diomndo pum ndu dimullo aa: «Sol, Sol, le yɛɛ nɛ n co yɛ ya yɛlen tol-lo?» 5Mí Sol ɲuna aa: «Nɔm nɛ̀ɛ́-nɛ̀, Maalii?»

Mí diomndo muli aa: «Ya ni, Yeesu n co yɛlen tollo-o. 6Kɛ cɔn mà kɔɛ ciee. A kɔ dimulnin nɔm ɲɛ n bɛnda ma tosa-o.» 7Mí vanaa va kɔlan Sol kɔɔli-a sim, a nɔla sɔɛi le. A va diomndo tueyɔɔ, kɛ a ve vana cɔ le. 8Mí Sol can lɛŋ. Mó tofa, kɛ o tiwba ɲɛ-ɲɛ cɔu le. Má bii ndu baa, má kɔa a ndu Damas ciee. 9Mó cii palɛi ndii yáá o sumɛiyo, o di le, o kol te.

10Kaandennɔ pilɛ va Damas diolan Ananias. Mí Mɛlɛka cɔmnun ndu o vundulen nin, mó veelu ndu aa: «Ananias», mó muli aa: «Má cè ya, Mɛlɛka!»

11Mí Mɛlɛka dimul ndu aa: «Cɔn ma kɔɛ o nɛi nda veelu aa Nɛi-Sandaa-o, mà kɔ luɛi o Yuda lo cɛinin, mà ɲuna. Langbanɔ pilɛ fula Tarse diolan Sol, o co Hala piɛiyo lon, 12o langa cɔ vanndo o vundulen nin diolan Ananias, vana kon luɛi, mó handu ndu balan coo, haliko mo ce vɛlɛ.» 13Kɛ mí Ananias muli aa: «Mɛlɛka, vanaa bɔɔ-bɔɔ a dimul-la sɔɔn a langbanɔ kon o kɔɔ, má dimul-la vɛlɛ dɛnnda vɔɔnnda o tosal vanaa nɔmnda Yerusalɛm-ndan. 14Handɔɔ o kon coo, o hin nanu a di o sɔla fulaa bolii vanaa-solia-lasálàá o ba-o le vanaa-vanaa co diola nɔmndan biiloo yiwvo.» 15Kɛ mí Mɛlɛka dimul Ananias aa: «Kɔ! I cii langbanɔ kon hɛli, i keinin a ndu o kɔɔ, mì cɔm vanaa-mangalaa-isɔɔa a masaa ndaa diola nilan, kɔ bii niko vanaa nia, Israɛlla pɛɛn. 16Ya pila cɔmnin ndu sanga kɛ́-kɛ̀ o co hunɔɔ sɔla o diola nilan.» 17O kon, mí Ananias kɔa, mó kɔ luɛi cɛinin, mó handu Sol balan coo, mó dimul ndu aa: «Puapilɛ nuu Sol, Maalii Yeesu vem ya ni, o cɔmnun nɔm o nɛi lɔ́ɔ́ n va hunɔɔ-o, haliko mi hɔlta nɔmndan la kumbin vɛlɛ, mà pɛ a Hala Kɔl-Diandaa.» 18Fɔ́ɔ́fɔ̀, mí ɲɛlan lapum la fula Sol o hɔl maa lakɛl, mí la deli. Mí hɔltan la kumbin ndu. O kon mó can, mó sɔla yinɔɔ. 19O kon kɔɔli, mó dia ɲɛdiaa, mó sɔla yoomuan.

Sol dimul vannda sɔɛi Hala-e Damas

Mí Sol tosa palɛi taw nda kaandeŋaa va Damas-a. 20Fɔ́ɔ́fɔ̀, mó kandu vannda pɛɛkoo o cɛila lekaanndan nin maa Yeesu co Po Hala-o ni. 21Mí vanaa va ndu diomndo tueyɔɔ-a kpow a dɔawnun kɔndɔfili, má va dimio aa: «Vɛ̀ɛ̀ o co langbanɔɔ ho le va vanaa va Hala piɛiyo o diola Yeesu lan-nda saangiaa Yerusalɛm te? Vɛ̀ɛ̀ o co le nda yiwvo mò kɔɛ a nda o bolii vanaa-solia-lasálàá lo le o hin nanu nuaa le?» 22Lepalaa-lepala Sol va hiovɔɔ laci a nda kɔltan pilanndo o sɔɔn o va nda dimullo-on nin. Yuifia va Damas-a a nɔla lɛ ndu ɲɛ-ɲɛ dimul te, kani o va nda cɔmndo maa Yeesu co Krista ni.

23Palɛi bɔɔ-bɔɔ o kon kɔɔli, mí Yuifia yii Sol dúmbú le ndu diyɔɔ, 24kɛ mí Sol tuɛi a dúmbú nda kalaa o kɔɔ. Lepalaa-lepala, icɔl oo icɔl, a va mɛngɛlaa o diola luɛyaala kobio le ndu diyɔɔ. 25Kɛ icɔllo pum, mí kaandennda cua ndu, má tuisi ndu o kambɛiyo nin o kpakio kɔɔli.

Sol kɔɛ Yerusalɛm

26Sol tiiyaa Yerusalɛm, mó kindin le sɔɔnguuo kaandennda ikɛi. Kɛ mí nda kpow a vo ndu, kani a ve laalan te maa o siŋnun kaandennɔ kpeekpeiyo. 27Mí Barnabas can nda ndu, mó kɔa a ndu o kaandennda lo. Mó kɔ cɔm nda mɛɛ Mɛlɛka cɔmnun ndu Sol nɛi-tɛɛn yɛ, mɛɛ o dimul ndu sɔɔn yɛ, a mɛɛ o tosa kaannden vannda o hɔl kpendekele Damas ciee o diola Yeesu lan yɛ. 28Cɔn nin ɲinkon, mí Sol va nda kaandennda Yerusalɛm ciee. O va heeloo a tuusoo nda ndaa latulu, mó va vannda sɔɛi Mɛlɛka-e tiiyallo kpendekele o diola Maalii lan. 29Mó suukan nda Yuifia dimi krɛkiei-ya, má hiŋan diomndan. O kon mí kan a can nɛilan nuwviaa le ndu diyɔɔ. 30Vanaa laalannda tueyɔɔ sɔɛi ken, má kɔa a Sol Sesaree, faŋanndo lon, má kɔa a ndu Tarse.

31O kon mí vanaa Krista-aa va Yuda, Kalile a Samari-a kpow sɔla kɔlɲuloo. Mí Hala Kɔl-Diandaa tosa má sɔla yoomuan, má hindu, a va kelaa o nɛila Mɛlɛka lan coo.

Enee sɔla siongɔɔ

32Mí Piɛr kei o lɛŋnde len nin kpow, mó kɔa vanaa laalaŋaa va Lida-a yilɔɔ. 33Mó komal langbanɔ pilɛ lon diolan Enee, vɔsilan laŋɔmaa o va ihini, kani vana bɛvɛiyo o va ni. 34Mí Piɛr dimul ndu aa: «Enee, Yeesu Krista singi nɔm! Cɔn ma cua vala nɔmndo.»

Fɔ́ɔ́fɔ̀, mí Enee can. 35Mí vanaa va Lida-a kpow a haa Saron a ca ndu, má laalan Mɛlɛka.

Tabita muungu yoomu

36Kaandennɔ laandu pilɛ va Yopé diolan Tabita, o krɛkiei nin aa «Dɔrkas». O va vannda dɛnɛ kɛndɔɔ tosallo lɔ́ɔ́-lɔ́ɔ̀, mó va vɛlɛ vanaa bala fondoa malaa. 37O telen kon, mó del a nàá, mó vu. Ndáà ciiyo ndu pulɔɔ, má kɔ kɛsi ndu cɛinin o cɛi coocoo nin. 38Nduyɛ, Lida ve Yopé levil te. Kaandennda Yopé tueyɔɔ Piɛr tɔ́ɔ́ Lida, má vim ndu kiilaa nda ŋiɔn, má kɔ dimul ndu aa: «A yandi, yangaa le, hun cɔ́-cɔ́.» 39Fɔ́ɔ́fɔ̀, mí Piɛr kɔa nda ndaa. Ndóò tiiyaa, má kɔa a ndu cɛinin o cɛi coocoo nin. Mí vanlaandua piaandaa ndaa vi-a kpow a kɔ balu ndu a caŋndo. Má cɔm ndu domalan a ɲɛ-ɲɛ celen Dɔrkas toosiaa lɔ́ɔ́ o va yoomu-o. 40Mí Piɛr soli nda kpow o dio, mó baŋ vulan, mó piɛi Hala. O kon kɔɔli, mó muli hɔlla nɛɛ vana vílɛ́i kon va-a, mó dimi aa: «Tabita, cɔn.»

Mí Tabita kumbi hɔltan. Ndóò cɔu Piɛr, mó can, mó cal. 41Mí Piɛr bii ndu baa, mó simi ndu. O kon kɔɔli, mó veelu niko vanaa laalannda a vanlaandua piaandaa ndaa vi-a, mó cɔm nda ndu. 42Mí dɛnɛ kon tiw Yopé sɔ́, mí vanaa bɔɔ-bɔɔ laalan Mɛlɛka. 43Mí Piɛr viaw Yopé ciee, o Simɔn tosa baala layáwvo-o lo.

Currently Selected:

Dɛnnda kiilaa 9: BKG

Highlight

Copy