Dɛnnda kiilaa 10

Kɔrnɛil veelu Piɛr o ndu lo

1Langbanɔ pilɛ va Sesaree diolan Kɔrnɛil, ndu va simlacinɔ kunda vanaa cɔvaa kɛmɛa rɔmnda ni, kunda ndáà veelu vɛlɛ aa: «Kunda fula o lɛŋnde Italii len nin-ndo» pɛɛn. 2Ndu a yungu ndɔɔ a va yɔŋ vɔɔndo vou. Ndáà nɔ vɛlɛ siòòŋii Hala-e. O va vannda ɲɔɔn keo taw, mó va Hala piɛiyo lɔ́ɔ́-lɔ́ɔ̀. 3Paale pilɛ, lɛɛlɛ yàándɔɔ vaa le tiiyaa a paale yɔngannden, mó ca mɛlɛkanɔ Hala-o luɛyɔɔ o ndu lo cɛinin o vundulen nin, mó dimul ndu aa: «Kɔrnɛil.» 4Mí Kɔrnɛil tofa ndu ciŋ a siòònde, mó ɲuna aa: «Yɛɛ nɛ Maalii?»

Mí mɛlɛkanɔɔ mulul ndu aa: «Mɛlɛka tuei piɛile nɔmnden, o naŋ kɔl a kɛndɛi n tosal vanaa bala fondoa-e. O pɔɛɛnun a nɔm te. 5Lelan viom vannda Yopé sunsun, mà kɔ hun nda Simɔn-a, o nda veelu aa Piɛr-o. 6O co o vana nda veelu aa Simɔn-ndo lo cɛinin, Simɔn tosa baala layáwvo-o pɛɛn, o cɛi ndɔɔ co o mɛmma ihɛllan kɔngɔ-o.» 7Mɛlɛkanɔ soo kon o ndu lo-o kɔnndan, mí Kɔrnɛil veelu buɛyaa ndɔa nda ŋiɔn a vana cɔw óò vo Hala mó va baalaa tosaa ndu o ba bɛngu-o. 8Mó cɔm nda dɛnnda tosan ndan kpow. O kon kɔɔli, mó viam nda Yopé.

9Diimandɔɔ, mɛɛ vanaa nda vem kan-nda tiiyaa Yopé ciee-lekɔɔ, mí Piɛr hel o sɛmtɛ a telen paalen le va nin le tiiyaa o pol-lo le Hala piɛiyo. 10Mí yiyan ma nɛi ndu, ndóò yeema mì ndóò de ɲɛdiaa. A lo ɲɛdiaa ndɔɔ bɛɛndiaa, mó ca ɲɔɔ pum fulaa o Hala, mó vow. 11Mó ca halataalaa o kumbiaa: mí ɲɔɔ pum fula maa kola bɛndu, o va tolɔɔ mɛɛ vanndo bii ɲɔɔ o kpeŋun hiɔɔlon, mó va tuisio lɛŋ yɛ. 12Visia súú-súù ka a va lenin: visia pelun n'hiɔɔlu-a, a sasun lɛŋ-nda a yowva. 13Mí diomndo pum dimul ndu aa: «Piɛr, cɔn, dii mà de.» 14Mí Piɛr muli aa: «Ɛ-ɛ Maalii, kani kabi bɛɛ i di vɔ visi tanaa, te kon te ɲɛ dindu Mɛlɛka o hɔl too le.»

15Mí diom kon dimul ndu vɛlɛ o diinndɔɔ aa: «Ca ɲɛ Hala cii dindi-o o nɔɔlɛi le.» 16Mí kon tosan leyáá. Fɔ́ɔ́fɔ̀, mí ɲɛ kon helnun o halataala.

17Piɛr lo kɔllo keeliaa o kɔlɔ vundule o ce len-nden coo, mí vanaa Kɔrnɛil vem-nda va vannda ɲuuniaa le sinaa nɛɛ cɛi Simɔn-ndo va-a, má hun sim o bɛɔ sondoo. 18Má veelu, má ɲuna aa: «Vɛ̀ɛ̀ nanu Simɔn, o nda veelu aa Piɛr-o co o yiya ni?» 19Piɛr va vɔ kɔllo keeliaa o vundule len coo tuŋ, mí Hala Kɔl-Dianda dimul ndu aa: «Tofa vɔ, vannda co nɔm nuwviaa nda yáá. 20Cɔn ma tol, mì la kɔɛ niaa ndaa. Siòòŋii bii nɔm te, kani ya vem nda ni.»

21Mí Piɛr toal, mó ɲuna nda aa: «Ya co vana niaa co nuwviaa-o ni. La vɛ hunɔɔ nanu?»

22Má mulul ndu aa: «Kɔrnɛil co simlacinɔ vanaa cɔvaa kɛmɛa-o vem naa ni. Vana sandaa o co ni, o vo Hala-o, Yuifia kpow a co diola ndɔla kɛndɛlan dimio. Mɛlɛkanɔ diandaa Hala-o dimul ndu ni maa nɔm kɔ o ndu lo cɛinin, mò tuei ɲɛ n kɔ va ndu dimul-lo.» 23O kon mí Piɛr luei nda o yiya.

Diimandɔɔ, mó kɔa nda ndaa. Mí vannda a tiŋ a liila ndu fulaa Yopé. 24Diimandɔɔ pilɔɔ, mó tiiya Sesaree ciee. Kɔrnɛil va nin nda cumndo. Ndóò cii nin vanayan ndɔn a caaŋaa ndɔa ndóò yeema taw-va veelu. 25Telen Piɛr va luɛyɔɔ-o, mí Kɔrnɛil bɔŋa ndu, mó tundun, mó baŋ vulan ndu o labɛngunin. 26Kɛ mí Piɛr simi ndu, mó dimul ndu aa: «Cɔn! Ya bɛɛ, vanacieo ya co ni.» 27A lo baltan dɔvɔɔ nda Kɔrnɛil, mó luɛi cɛinin, mó komal vannda sɛ́lɔ́ɔ́ taw. 28Mó dimul nda aa: «La sinà maa Yuifinɔɔ bɛnda mò sɔɔnguu vana co Yuifinɔ loo ikɛi, te kon te mò luɛi o ndu lo le. Kɛ, Hala cɔm ya maa i bɛnda mì ce vana-vana o nɔɔlɛi, te kon te o dindu ndu Mɛlɛka o hɔl too le. 29Lelan, lɔ́ɔ́ niaa vem ya vannda veeloo-o, mí hun, i sɛɛngiaa le. Nduyɛ, i yeema mì sina kɔlɔ niaa veelu ya-o.» 30Mí Kɔrnɛil muli aa: «O co nihau palɛi ihiɔɔlu, i va Hala piɛiyo o ya lo cɛinin o telen pilɔɔ hoo, o lɛɛlɛ yàándɔɔ a paale yɔngannden. Mí vanndo pum cɔmnun ya a volɔɔla ŋɛlɛngi-ŋɛlɛngi lan lekɔɔ o lepilɔɔ, mó dimul-la aa: 31‹Kɔrnɛil, Hala tuei piɛile nɔmnden. O loonun a ɲɛm n ke vanaa bala fondoa-on o kɔɔ. 32Lelan, viom vannda Yopé o Simɔn-ndo, o nda veelu aa Piɛr-o. O co o yiya o Simɔn tosa baala layáwvo-o lo cɛinin o mɛmma ihɛllan kɔngɔ.› 33Fɔ́ɔ́fɔ̀, mí viam vannda nɔm kɔɔli. Nduyɛ, a bɛɛndiaa hunɔɔ. Má cè niko naa kpow Hala o hɔl, haliko mi n tuei a ɲɛ-ɲɛ Mɛlɛka vem nɔm dimi o kɔɔ!»

Sɔɔn Piɛr dimi o Kɔrnɛil lo-on

34O kon mí Piɛr cua sɔɛi, mó dimi aa: «I sina nihau lekɛ́ndɛi maa Hala hiyan vanndacieea le, 35kɛ o vannda súúlan kpow nin, o vo ndu Hala mò va dɛnɛ sandaa tosaa-o, ndu hɛnan ndu ni. 36O cuu Israɛlla sɔɛi ndɔɛi, sɔɛi ken i co Yoongu Kɛndɛ vana sɔla kɔlɲuloo a Yeesu Krista o kɔɔ-e ni, Yeesu co Maalii le vannda kpow-vo pɛɛn. 37La sinà ɲɛ yɔŋnun cɔnɔnndo Kalile, kɔ bii niko háá o tàndá Yuda-o nin kpow-vo, ɲɛ yɔŋnun telen Nsaŋ cii yinɔɔ o va vannda sɔɛi ndɔɛi dimullo-o-o. 38La sinà mɛɛ Hala pɔla Yeesu fula Nasarɛt-o a kpaaya Kɔl-Diandaa yɛ, a mɛɛ ndu Yeesu kei vannda dɛnɛ kɛndɔɔ tosal nɛɛ-nɛɛ ka yɛ. O va vanaa va o biyɔɔ nin ɲina vɔɔndo o ba-a kpow singio, kani Hala va ndu ikɛi. 39Naa n co seiya le dɛnnda o tosa o lɛŋnde Yuifia nin a Yerusalɛm ciee lan kpow ni. Má baŋ ndu o yɔm singafilaa coo, má dii ndu. 40Kɛ o paale yàándɔlen, mí Hala mingi ndu yoomu, mó cɔmnun vannda, 41o ve vannda kpow le, kɛ seyaa Hala ndóò cii nin hɛli-a pɛɛn. Naa naa, o tendul o tendul fulaa vanvílɛ́iya tɛɛn-ndo kɔɔli, mí n dia, mí n kol naa ndaa latulu. 42Yeesu dimul naa le vannda Yoongu Kɛndɔɔ ho tiiyallo, mì n tɛndal nda vɛlɛ seilen maa: ndu Yeesu Hala hɛli le yamɛi kiolɔɔ vanaa co yoomu-a a vanvílɛ́iya tɛɛn ni. 43Vanaa-tɛɛngaa-diom Hala-a kpow a tɛnda seilen a ndu o kɔɔ maa vana-vana laalan ndu pɛ, hakila vana kon la malnun haki o diola ndɔlan.»

Vanaa co N'Yuifi le-a sɔla Hala Kɔl-Diandaa

44Piɛr lo sɔɔn mun dimio, mí Hala Kɔl-Diandaa toal vanaa va ndu nilan yaŋɔɔ-a kpow coo. 45Mí vanaa laalaŋaa fula Yuifia tɛɛn, má liila ndu-a dɔawnun kɔndɔfili taw le cɔ nda ce mí Hala Kɔl-Diandaa toal vanaa ve N'Yuifi le-a coo-o. 46Kani a va nda tueyɔɔ sɔɛi o sɔɔn celen nin, má va bɔɔbɔɔyɛi Hala-e candɔɔ. 47O kon, mí Piɛr ɲuna aa: «Vɛ̀ɛ̀ o bɛnda pá mi vana kɛɛ nihau vanaa sɔla haa Hala Kɔl-Diandaa maa naa-a yinɔɔ o mɛnndan nin?» 48O kon mó dimul vannda, má sɔla yinɔɔ o diola Yeesu Krista lan. O kon kɔɔli, má tɛɛlun ndu aa o lo nda ndaa le palɛi pum.

Currently Selected:

Dɛnnda kiilaa 10: BKG

Highlight

Copy