Dɛnnda kiilaa 8

1Sol, o yiyan pilɛ kon va o kɔl o Etiɛn diyɔɔ-o bɛɛ va lon.

Sol tol vanaa Krista-a yɛlen

Paale len, mí vannda kandu vanaa Krista-aa Yerusalɛm yɛle bɛndulen tollo. Mí vanaa laalannda kpow a sɛŋin, má kɔa nɛɛ-nɛɛ ka o tàndá Yuda-o nin a o lɛŋnde Samari len nin. Fɔ kiilaa daama ndáà lo Yerusalɛm ciee ni. 2Mí vanaa vo Hala-a kumbu Etiɛn, má caŋ ndu taw.

3Kɛ Sol ndu, ndóò yeema mì ndóò puusiaa vanaa Krista-aa. Mó va keiyo cɛilan nin vanaa laalannda biwvo, vanpiaandua a vanlaandua, mó va nda malɔɔ o kaasoo.

Filipe tiiyal Samaria Yoongu kɛndɛ Hala-o

4Vanaa sɛŋin kan-nda va keiyo sɔɛi Hala-e dimio nɛɛ-nɛɛ ka. 5Mí Filipe kɔa o kobio pum, o lɛŋnde Samari len nin, mó tiiyal vannda sɔɔn Krista-on. 6Mɛɛ vannda kpow a ce dɛnnda kaamaalan a tɔɔmasela kɔndɔfilta Filipe va tosaa lan, má yaŋ ndu nilan ɲɛkɛndɛi. 7Nduyɛ, ɲinaa vɔɔnda va vanaa bɔɔ-bɔɔ fulaa nin a yeelan, mí vanaa falun vílɛ́iya a namtaa taw a sɔla siongɔɔ. 8O kon mí vannda dɔawnun ɲaale taw o kobi kon nin.

9Langbanɔ pilɛ va nin ndon diolan Simɔn, vana mangalaa o va ni. Samaria va kɔndɔfillo dɔwnɔnndo a ndu taw, kani ndu pila ndóò cii nin siingɔn vana tɔ́ɔ́ bɛndoo. 10Nduyɛ vannda kpow, kandɔɔ cuaambɔa pɔm-pɔmbɔa, kɔ bii a kaasonnda a va ndu bɛɛle bɛndu-bɛndu len keo. Má va dimio aa: «Kpaaya Hala-o langbanɔɔ ho co ni, o nda veelu aa: ‹Kpaayaa-Bɛndoo›-o pɛɛn.» 11Le tùú o va nda kɔndɔfillo dɔvɔɔ a mangaliala ndɔla lan kabi lɔ́ɔ́ levil-lo nda va ndu bɛɛle bɛndu-bɛndu le len keo ni. 12Kɛ ndáà laalanndo Yoongu Kɛndɛ Filipe tiiyal nda a Masale Hala len a á Yeesu Krista o kɔɔ-o, má sɔla yinɔɔ: vanpiaandua a vanlaandua. 13Mí Simɔn bɛɛ laalan, mó sɔla yinɔɔ. O faŋan ndɛ Filipe kɔɔli le. Mɛɛ o ce dɛnnda kaamaala bɛndulan a kɔndɔfilta va tosanndo lan, mó dɔawnun kɔndɔfili.

14Kiilaa va Yerusalɛm-nda tueyɔɔ maa Samaria a bii Sɔɛi Hala-e, má viam Piɛr nda Nsaŋ. 15Ndáà tiiyaa dɔ́ɔ́ Samari, má piɛi Hala le Samaria kalaa haliko mi ndáà sɔla Hala Kɔl-Diandaa. 16Nduyɛ, Hala Kɔl-Diandaa kon ndóò tul-lɔ vana-vana coo o nda tɛɛn te. Yinɔɔ daama ndáà sɔla vɔ o diola Maalii Yeesu lan ni. 17O kon mí Piɛr nda Nsaŋ handu nda balan coo, má sɔla Hala Kɔl-Diandaa.

18Simɔn cɔu maa vanaa laalannda sɔla Hala Kɔl-Diandaa telen kiilaa handu nda balan coo-o, mó ke kiilaa kan volion, 19mó dimul nda aa: «Ya bɛɛ, la ke ya kpaayaa ho, haliko mi vanaa ya co balan handɔɔ coo-a sɔla Hala Kɔl-Diandaa.» 20Kɛ mí Piɛr mulul ndu aa: «Màá volin nɔmndon tambu a nɔm pila latulu, kani a laalan maa a volion vana piandu ke Hala-o ni! 21A sɔlanin ɲɛ-ɲɛ, te kon te tɔnɔ oo tɔnɔ o sɔɛi he nin te, kani kɔl nɔmndo sendu Hala o hɔl te. 22Lelan, mal yiyan vɔɔn n nɔ hoo-o, mà piɛi Mɛlɛka, o kon te o nɔla pɛ tosan, mò mal nɔm haki le yiyan n sɔla ho o kɔl-lo. 23Kani i ce maa kɔl nɔmndo co o piaa a mɔnɛi mà va o yiyaa a yɔŋ vɔɔndo.» 24O kon, mí Simɔn mulul Piɛr nda Nsaŋ aa: «Niaa pila piɛi Mɛlɛka le ya, haliko ɲɛ-ɲɛ niaa dimi, o yɔŋnun ya le.»

25Piɛr nda Nsaŋ ciiyo vannda sɔɛi Mɛlɛka-e tiiyilallo, má muungu Yerusalɛm. Telen nda va kon muungoo-o, má kei vannda Yoongu Kɛndɛ Hala-o tiiyal o cieon taw o lɛŋnde Samari len nin.

Filipe nda Etiopiinɔɔ

26Mí mɛlɛkanɔ Hala-o dimul Filipe aa: «Cɔn ma kɔɛ a ba too, o nɛi cɛn Yerusalɛm o lɛŋnde veselɛilen nin, mó kɔa Kaasa-o.» 27Fɔ́ɔ́fɔ̀, mí Filipe can, mó bii nɛiyo. O lo kɔlan, mó komal Etiopiinɔɔ nda tɛnda bosio-o, vana bɛndoo langbanɔ kon va ni, ndu va ɲɛ-sɔlaa Kandase, masa laandu va o lɛŋnde Etiopii len nin-ndo mandaa ni. Langbanɔ kon ndóò kɔɛ Yerusalɛm le Hala biiloo, 28mó va muungoo o ndu lo. O va icali o ɲɛ ɲaanan soa nan-ndo nin, mó va sɛbɛ Esai vana-tɛɛngaa-diom Hala-o dimio. 29Mí Hala Kɔl-Diandaa dimul Filipe aa: «Kɔ háá o ɲɛ ɲaanan soa nan-ndo ho ikɛi.» 30Mí Filipe ɲaanun, mó sɔɔnguu, mó tuɛi Etiopiinɔɔ sɛbɛ Esai vana-tɛɛngaa-diom Hala-o dimio. Mó ɲuna ndu aa: «Vɛ̀ɛ̀ a co pá ɲɛ n co kon dimio-o bilaa biyɔɔ?» 31Mí langbanɔɔ muli aa: «Vɛ̀ɛ̀ ya bii yɛnin ndu bila? Te vana tɛɛsial-la ndu le!» O kon, mó dimul Filipe maa o hel o ɲɛ ɲaanan kalaa nin, mò cal ndu ikɛi. 32Fonda o va dimio o Sɛbɛ Hala-o nin-ndo co hoo ni aa:

«Mó yɔŋnun maa saa téndé nda co yɔɔ o fonda diyaa-o,

maa saa laandu bobonɔ vanaa co ndu yiinde kilio-a o hɔl,

kɛ bako bɛɛ o suu le.

33A tuisi ndu siɛmbulan, má kɔɔsal ndu.

A faŋa yoomu ndɔɔ o ceendo ho coo,

nɛ̀ɛ́-nɛ̀ buulan yɛnin a cuavaa ndɔa imamaa o kɔɔ?»

34Mí Etiopiinɔɔ ɲuna Filipe aa: «A yandi, dimul-la, a nɛ̀ɛ̀ o kɔɔ vana-tɛɛngaa-diom Hala-o ho co yɛ sɔɛi he nuaa? A ndu pila o kɔɔ ni baa a vana celen o kɔɔ?» 35O kon mí Filipe cua sɔɛi, mó kandu sɔɛi o fonda kon coo, mó tiiyal niko ndu Yoongu Kɛndɛ Yeesu-o. 36A lo kɔlan, má komal mɛnndan. Mí langbanɔ kon dimi aa: «Má cè mɛnndan! Yɛɛ kuuna yɛnin ya yinɔɔ sɔlaa?» 37Mí Filipe dimul ndu aa: «Taa laalan pɛ a kɔl nɔmndo kpow, mɛɛ a nɔla mà sɔla yinɔɔ.»

Mí langbanɔɔ muli aa: «I laalan maa Yeesu Krista co Po Hala-o ni.» 38Fɔ́ɔ́fɔ̀, mó dimi le ɲɛ ɲaanan soa nan-ndo simio. Má toal nda ŋiɔn kpow o peelo, mí Filipe yin ndu. 39Ndáà fulaa o peelo, mí Kɔl-Hala-o cua Filipe o lepilɔɔ kpé, langbanɔɔ ci lɛ ndu le. Kɛ mó hiaw laci, mó va kɔlan a kɔlkɛndɔɔ. 40Mí Filipe kɔ cannun Asdɔd, mó va keiyo vannda Yoongu Kɛndɔɔ tiiyallo o kobilan nin háá mó tiiya Sesaree.

Currently Selected:

Dɛnnda kiilaa 8: BKG

Highlight

Copy