Dɛnnda kiilaa 7

Sɔɔn Etiɛn dimi-on

1Mí bolle vanaa-solia-lasálàá ɲuna Etiɛn aa: «Vɛ̀ɛ̀ toɲaa nda co dimio ho a nɔm o kɔɔ nuaa ni?»

2Mí Etiɛn muli aa: «Puapilɛa nia, fuɲaa nia, la yaŋ ya nilan! Tuma fuɲa naa mamaa Abraham va vɔ caltan Mesopotami, ndóò kue vɔ calle Haran too, mí Hala nɔ biiloo-o cɔmnun ndu, 3mó dimul ndu aa: ‹Faŋan lɛŋnde nɔmnden a yungu nɔmndo, mà kɔɛ o lɛŋnde ya cɔmnin nɔm-nden nin.› 4O kon mí Abraham faŋan Babilɔn, mó kɔ cal Haran. Fuɲa ndɔ vuo, mí Hala faŋa ndu lon, mó cuu ndu o lɛŋnde niaa co leen-nden nin. 5Hala ke ndu lɛŋnde len mì le va ɲɛ ndɔ le, hali nɛɛ kɛsiaa ipelu bɛɛ o ke ndu le. Kɛ mó dimul ndu maa o hun kenin ndu lɛŋnde len kɛ́ɔ, ndu a cuavaa ndɔa imamaa. Nduyɛ o telen kon, Abraham ndóò nɔ vɔ hɔ́ɔ́ le. 6Mí Hala dimul ndu aa: ‹Cuavaa nɔmaa imamaa kɔ calnin fɛɛn o sumialle o lɛŋnde pilalen nin. A siinguunin nda cɛa, mà saangiaa nda taw o vɔsilan kɛmɛ lehiɔɔlu bɛngu. 7Kɛ i kialunin vanaa-mangalaa-isɔɔa nda vanin o ba o cɛlen nin-nda iyama. O kon kɔɔli, a fulanin o lɛŋnde len nin, mà hun biilu ya o fondaa ho.› 8O kon kɔɔli, mí Hala yii kpemaa a Abraham, tɔɔmasele kpema kon co toomaa diyɔɔ ni. O kon mí Abraham vialu Isaak. Palɛi ŋɔmaa o kon kɔɔli, mó dii ndu tooma. Mí Isaak ndu vialu Yakɔb, mí ndu bɛɛ dii Yakɔb tooma. Mí Yakɔb ndu vialu fuɲaa naa mamaa tɔ́ a à ŋiɔnda, mó dii nda tooma.

9Puapilɛa Yosɛf-a a va ndu Yosɛf paŋalaa, má pisi ndu haliko mo va cɛɔ Esipte. Kɛ Hala va ndu ikɛi. 10Mí Hala soli ndu o sangalan kpow nin. Mó ke ndu kɔlkaloo, mí ɲɔɔ hɛnan masaa Esipte a ndu. Mí masa kon siinguu ndu masa ibungaa le lɛŋnde Esipte len kpow a le yungu ndɔɔ kpow. 11Kɛ nduyɛ, mí yima fofolan ma luɛi o lɛŋnde Esipte len nin a o lɛŋnde Kanaan-nden nin. Mí sanga bɛndoo toal fuɲaa naa mamaa coo, a ve lɛ balo sɔla le. 12Yakɔb tueyɔɔ maa maalon va Esipte, mó viam fuɲaa naa mamaa lon. Viomɔɔ tasoo yɔŋnun kon ni. 13Mɛɛ nda kɔɛ o diinndɔ, mí Yosɛf cɔɔmun puapilɛa ndɔa, o kon mí masa Esiptea sina yungu Yosɛf-o. 14O kon mí Yosɛf viam vannda le hunɔɔ a fuɲa ndɔ Yakɔb a á yungu ndɔɔ kpow, a va faw-faw vannda belaŋɔmmɛw a vanaa ŋuɛɛnu. 15O kon kɔɔli, mí Yakɔb muungu Esipte, mó kɔ vu lon, mí fuɲaa naa mamaa bɛɛ a vu. 16Má muungu a dialun ndan Sikɛm, má kɔ kumbu mun o sɛi Abraham ndóò pendu poaa Hamɔr-a o ba, Sikɛm lon-ndo nin.

17Mɛɛ telen Hala ndóò tuu le sɔɔn o dimi a Abraham-ndon peeloo-o sɔɔnguu, mí vanaa naa a kui taw-taw Esipte. 18O kon mí vana celen siŋnun masaa o lɛŋnde Esipte len nin. Ndóò sina ɲɛ-ɲɛ a Yosɛf o kɔɔ le. 19Mí masa kon pala fuɲaa naa mamaa, mó saangiaa nda saangiaa pila, mó baŋ nda le cɛlɛkpɛa ndaa viovɔɔ, haliko ma vi.

20O telen kon nda velu Moise ni, ó va salama kɛndɔɔ Hala o hɔl-lo. Paangon mún yáá, a va ndu mandaa o fuɲa ndɔ lo cɛinin. 21Ndáà vionɔɔ ndu, mí cua laandu masaa Esipte-o kɔ cua ndu, mó kɔa a ndu, mó kɔ suili ndu maa hɔ́ɔ́ ndɔ ndu pila. 22O kon mí Moise pɛɛku dɛnɛ sinaa Esiptea kpow, mó siŋnun vana kpaayaa o sɔɔn ndɔn a o dɛnnda ndɔlan nin. 23Mɛɛ Moise sɔla vɔsilan belehiɔɔlu, mó yiyan le kɔlan vanaa ndɔa yilɔɔ, Israɛlla pɛɛn. 24Ndóò cɔu Esiptenɔɔ vana pilɛ saangiaa o puapilɛa ndɔa tɛɛn, mó kɔ saala le ndu, mó mingi màá, mó dii Esiptenɔ kon. 25Moise va yiyanndo maa puapilɛa ndɔa va yiyan maa a ndu o kɔɔ Hala va nda baŋa fulaa o cɛlen nin ni, kɛ nda ve ken sina le. 26Diimandɔɔ, mí Moise komal puapilɛa ndɔa cɔlɔbaa. Mó kindin, mó toosiaa nda sɔɔngɔɔ tɛɛn, mó dimi aa: ‹Caaŋaa nia, puapilɛa niaa co ni. Le yɛɛ nɛ niaa co yɛ niaa pilaa mɔnɛi lueinanndo?›

27Kɛ mí o va caan ndɔ saangiaa-o ɲindu Moise, mó ɲuna ndu aa: ‹Nɛ̀ɛ́ siinguu yɛ nɔm simlacinɔɔ a vana kialaa n'yamaa le naa? 28A yeema mà dii ya mɛɛ n dii Esiptenɔɔ cɛi yɛ?›

29Moise tueyɔɔ sɔɔn mun, mó sɔndan, mó kɔannun o lɛŋnde Madian-nden nin. Mó kɔ vialu poaa nda ŋiɔn ndon.

30Vɔsilan belehiɔɔlu o kon kɔɔli, mí mɛlɛkanɔɔ cɔmnun Moise o yinnde biyaa len nin o bɔɔ nin, o lɛŋnde veselɛilen nin, o pembei Sinai ikɛi. 31Moise cɔu dɛnɛ kon, mó dɔawnun kɔndɔfili. Kɛ telen o va sɔɔnguuo macɛlu le tofaa-o, mó tuɛi diom Mɛlɛka-o ndu dimullo aa: 32‹Ya co Hala fuɲaa nɔmaa mamaa ni, Hala Abraham-ndo, Hala Isaak-o a Hala Yakɔb-o pɛɛn.› Mí Moise ɲiiya a siòònde, o tɔɔndan ndɛ le tofaa le. 33O kon mí Mɛlɛka dimul ndu aa: ‹Solin samtalan o n'pelu, kani fonda n sim hoo coo-o, fonda diandaa o co ya Mɛlɛka o hɔl ni! 34I ce sanga bɛndu co yungu nuu coo Esipte-o vakpa. I tuei cɛɛŋɔnnda ndalan, le nda baŋaa ya tol ni. Sunsun, kɔ, i yeema mì i vem nɔm Esipte.›

35Moise Israɛlla ndáà kɛɛ kon má dimi aa: ‹Nɛ̀ɛ́ siinguu yɛ nɔm simlacinɔɔ a vana kialaa n'yamaa naa coo-o?›, o ndu lo Hala vem mɛlɛkanɔɔ le ndu dimullo mo va simlacinɔ naa a vana baŋaa naa ni, ndu Moise mɛlɛkanɔɔ cɔɔmun kon o bɔɔ nin-ndo pɛɛn. 36Ndu soli nda o lɛŋnde Esipte len nin ni, mó tosa dɛnnda kaamaalan a dɛnnda kɔndɔfiltan o lɛŋnde len nin, o mɛmma ihɛlma makpɛ̀ndɛ̀an taŋɔɔ, a o vɔsila belehiɔɔlula nda cii o lɛŋnde veselɛilen nin-ndan bɛngu ni. 37Moise kon dimul vɛlɛ Israɛlla ni aa: ‹Hala vimnin niaa vana-tɛɛngaa-diom Hala-o, o co maa ya-o, fulaa o puapilɛa nia tɛɛn.› 38Telen vannda ndáà cuungian o lɛŋnde veselɛilen nin-ndo, ndu koni va vɛlɛ kiilalen mɛlɛkanɔ nda va suukanndo o pembei Sinai coo-o tɛɛn nda fuɲaa naa mamaa ni. Mí Moise sɔla sɔɔn yɔngu vana cindaa-on Hala o ba le naa mun tɛɛngullo. 39Kɛ fuɲaa naa mamaa ndáà yeema mì ndáà tuei ndu diom te. Má pɛɛsa ndu, má yiyan le muungɔnndo Esipte. 40Má dimul Aarɔn aa: ‹Cow naa piɔmndo, mì ndu va hala naa le naa kɔlan laci. Kani Moise soli hoo naa o lɛŋnde Esipte len nin-ndo, n sina ɲɛ yɔŋnun ndu-o le.› 41O kon má toosiaa naw téndóó, má solul piɔm kon sálàá, má dɔawnun ɲaale le ɲɛ nda pila cɔwnun kon a laba-o. 42Kɛ mí Hala mulul nda kɔɔ, mó mal nda ɲɛm co o halataala-on sooloo. Maa mɛɛ o co o sɛvaa o sɛbɛla vanaa-tɛɛngaa-diom Hala-a nin yɛ aa:

‹Niaa cuavaa Israɛlla sei,

mò va maa sálàla n'cɔlulan

a sálàla kpeyanndan niaa va ya solullo

o vɔsila belehiɔɔlula niaa cii nɛi-tɛɛn

o lɛŋnde veselɛilen nin-ndan bɛngu ni?

43Ɛ-ɛ, kɛ mí la cua cɛi-kola-toandaa hala nɔ diolan aa Molɛk-o,

a loei Refan, hala niaa,

piɔmaa niaa toosiaa

le nda vulan baŋɔɔ o labɛngunin-nda pɛɛn.

Lelan ya bɛɛ, i co niaa soli o lɛŋnde niaalen nin,

mì yɛɛ niaa Babilɔn lekɔɔli.›

44Fuɲaa naa mamaa ndáà nɔ cɛi-kola-toandaa-labɔɔŋianndo o lɛŋnde veselɛilen nin, o sɛbɛ kpemaa va nin-ndo. Má toosiaa ndu mɛɛ Hala ndóò cɔm Moise le ndu toosiaa yɛ kpafii. 45Ndáà sɔlaa cɛi-kola-toandaa-labɔɔŋian kon, má kɔa a ndu o lɛŋii Hala tuw nda vanaa-mangalaa-isɔɔa laci-e nin, telen Yosue va nda simndan laci-o. Mí cɛi kon lo lon háá o telen David-o. 46Mí Hala tosal David dɛnɛ kɛndɔɔ, mó ɲuna ndu Hala haliko mi ndóò tengul Hala Yakɔb-o fonda calaa. 47Kɛ nduyɛ, Salomɔn tengul ndu cɛi kalaa ni.

48Kɛ Hala-Hiow-Ɲɔɔn kpow-vo cel o cɛila vanndacieea cɔw lan nin te. Maa mɛɛ vanaa-tɛɛngaa-diom Hala-o dimi yɛ aa:

49‹Halataalaa co kpɛŋɛ ni lemasaa ni,

lɛŋnden le co ɲɛ ni kɛsiaa n'peloo ni.

Cɛi súú yɛɛ nɛ niaa nɔla yɛnin ya tengullo?

Fonda kuɛɛ va yɛnin fonda ni pɛngiaa kpeekpeiyo? 50Ɲɛm mun kpow, a ba ya cɔw mun ni.›

51Mí Etiɛn hiaw laci a sɔɛi, mó dimul nda aa: ‹Niaa vanaa bolii kalaa ha, niaa dii haa toma o kɔlta niaalan nin te-a, la kendu bɔɔ nilan! Fuɲaa niaa niaa vel ni. La co Hala Kɔl-Diandaa simullo lɔ́ɔ́-lɔ́ɔ̀! 52Fuɲaa niaa mamaa lekɛ́ndɛi niaa vel ni! Vana-tɛɛngaa-diom Hala kon co le, o fuɲaa niaa mamaa kɛɛ yɛlen tollo. A cii vanaa va sɔɛi a hunɔɔ vana sandaa ndu pilɛ kpé dimio-a diw. Sunsun yɛ niko, niaa bɛɛ cii ndu baa kei o mundu, mí la dii ndu. 53La sɔla tɔŋ Hala-o fulaa mɛlɛkaa o ba, kɛ la bii ndu le.›»

A vii Etiɛn a powtan háá mó vu

54Mɛɛ vanaa kialaa n'yamaa lelɛŋnda tuei diomndan ndan, mí ɲɔɔ pala nda taw, má va ciŋndon sɔmndo le ndu. 55Kɛ Etiɛn va o piaa a Hala Kɔl-Diandaa, mó tofa halataalaa, mó ca biilu Hala-o, Yeesu va isisi Hala o ba kɛndɔɔ coo. 56Mó yonda aa: «La tofa vɔ, i co halataalaa cɔu o kumbiaa, Po vanacieo co isisi Hala o ba kɛndɔɔ coo.» 57O kon mí vannda kinda nilan, má yonda kpélén. Mí nda kpede a toal ndu coo, 58má soli ndu o cieo kɔɔli, má kɔ del ndu viiyo a powtan le ndu diyɔɔ. Mí seiya a mɛi volɔɔla ndala cuɛinanndan langbanɔ felengoo pum o labɛngunin diolan Sol. 59Telen nda va ndu viiyo a powtan-ndo, mí Etiɛn piɛi Hala aa: «Maalii Yeesu, bii kɔl nuu.» 60O kon kɔɔli, mó del vula baŋaa, mó yonda coocoo aa: «Maalii, mal nda haki le haki ndaa ho!» Mɛɛ o cii kon dimi, mó malnun kɔl.

Currently Selected:

Dɛnnda kiilaa 7: BKG

Highlight

Copy