Dɛnnda kiilaa 17

Pol nda Silas tiiya Tesalonike

1Mí Pol nda Silas kei Anfipolis a Apoloni, má tiiya Tesalonike nɛɛ Yuifia ndáà nɔ cɛi lekaando-a. 2Mí Pol komal nda lon mɛɛ o dema tosa yɛ. Palɛi pɛngiɛi iyaa, à va sɔɛi o Sɛbɛ Hala-o coo, 3o va nda tɛɛsiallo a nda cɔmndo maa mɛɛ mì Krista ndóò sanga, mì ndóò tendu fulaa vanvílɛ́iya tɛɛn. Mó dimul nda vɛlɛ aa: «Yeesu ya co hoo niaa sɔɛi ndɔɛi dimullo-o, ndu co Krista ni.» 4Mɛɛ sɔɔn mun pilan Yuifia pum kɔltan, má del Pol nda Silas kɔɔli, mí Krɛkia bɔɔ-bɔɔ, áà nɔ siòòŋii Hala-e-a, a vanlaandua lebɛɛa pum a del vɛlɛ ndu kɔɔli.

5Kɛ mí paŋalaa can Yuifia tɛɛn. Le hee, má kei vanaa kelannda nuwviaa o nɛilan coo, má luɛi nda nin, o kon mí vɔkɔ-vɔkɔɔ can o kobi kon nin. Má kɔa o Yasɔn ndo cɛinin le Pol nda Silas nuwviaa, ndáà yeema mì ndáà kɔɛ a nda sɛ́lɔ́ɔ́ o hɔl. 6Kɛ a komal nda lon te. O kon má kɔa a Yasɔn nda vanaa laalannda a pum vanaa kialaa n'yamaa kobia o hɔl, má yonda aa: «Langbaa ha co keiyo vannda palaa o lɛŋnden coo kpow, má cè nda nihau nanu. 7Yasɔn yiya nda o ndu lo ni. Nda kpow co sɔɔn masa Rɔm simullo má va dimio maa masa celen co diolan Yeesu.» 8Mɛɛ sɛ́lɔ́ɔ́ a simlacia kan a tuei sɔɔn mun, má buulan. 9O kon, má baŋ Yasɔn a vanaa laalaŋaa tɔ̀a maa a soli vilion taw, o kon mà mal nda.

Pol nda Silas tiiya Beeree

10Ɲumndan tolɔɔ dɔ́ɔ́, mí vanaa laalannda liila Pol nda Silas Beeree. Mɛɛ nda tiiyaa lon, má kɔ luɛi o cɛi lekaan Yuifia nin. 11Mí Yuifia va Beeree-a bii nda ɲɛkɛndɛi hiovɔɔ biyɔɔ haa Tesalonike a bii nda-o coo. Má cɛl sɔɛi Hala-e a kɔlta ndalan kpede. Lepalaa-lepala, a va Sɛbɛ Hala-o yaasiaa le sinaa te toɲaa sɔɔn Pol va dimi-on co ni. 12Mí vanaa bɔɔ-bɔɔ nda tɛɛn laalan, o kon mí vanlaandua lebɛɛ-a a vanpiaandua taw a laalan vɛlɛ o Krɛkia tɛɛn. 13Kɛ Yuifia va Tesalonike-a tueyɔɔ maa Pol va sɔɛi Hala-e dimio Beeree, má kɔa, má kɔ dɔaw vannda sɔɔn nin, mí vɔkɔ-vɔkɔɔ can sɛ́lɔ́ɔ́ tɛɛn. 14Fɔ́ɔ́fɔ̀, mí vanaa laalannda liila Pol a kpengii mɛmma ihɛl-le. Kɛ mí Silas nda Timote lonnun Beeree. 15Mí vanaa va Pol liilaa-a a kɔa háá Atɛn. O kon kɔɔli, má muungu, má hun dimul Silas nda Timote maa a keleŋa ndu Pol komal.

Sɔɔn Pol dimi Atɛn-ndon

16Telen Pol va Silas nda Timote cumndo Atɛn-ndo, mó tambu kɔl taw le sooluula o va cɔu lapiaa o kobi kon nin-ndan. 17A va sɛɛngianndo nda Yuifia a á vanáà nɔ siòòŋii Hala-e-a o cɛi lekaanndo nin, má va vɛlɛ sɛɛngianndo lepalaa-lepala nda vanaa o va bɔŋanndo-a. 18Vanaa kɔlkalua del Epikuri nda Stoise kɔɔli-a a pum a va ndu sɛɛngiaa. Mí a pum a va ɲunaa aa: «Yɛɛ vana tombolaa ho yeema yɛ dimio?» Mí a pum nda dimi aa: «Bɔɔle a halaa mialla o kɔɔ o co sɔɛi nuaa ni.» Le tùú nda tuei Pol sɔɛi a Yoongu Kɛndɛ Yeesu-o o kɔɔ a á tendul ndɔɔ fulaa vanvílɛ́iya tɛɛn-ndo o kɔɔ-o nda va dimio lende ni. 19O kon má bii ndu, má kɔa a ndu o vanaa kialaa n'yamaa kobia lo, má ɲuna ndu aa: «Vɛ̀ɛ̀ a nɔla mà cɔm naa pɛɛku sɛnɛi n co hoo sɔɛi ndɔɛi-yo? 20Kani sɔɔn naa n dema tueyɔɔ loon n co naa dimullo ni. N yeema mì n sina mun kɔlɔlan.» 21Nduyɛ, sɔɔn sɛnɛiyon kínɛí vanaa va Atɛn-nda kpow a mialaa va lon-nda ndáà kei dimio ni, te kon te yaŋnɔnndo. 22O kon mí Pol can, mó sim vanaa kialaa n'yamaa kobi-a tɛɛn, mó dimi aa: «Niaa Atɛnnda, i dɔw taasi maa o nɛi oo nɛi coo, vanaa dinaa niaa co ni. 23Kani telen ya va balɔɔ o kobi niaa nin-ndo, mí tofa sooluula niaalan. Mí komal bɛɛ fonda-loamaa-lasálàá pum a sɛvaa ho lecoo aa: ‹Le hala vana sina loo›. Ɛ̀ɛ̀ nduyɛ, o niaa co kon piɛiyo la sina ndu loo, sɔɛi ndɔɛi ya co niaa tiiyilallo ho nuaa ni. 24Hala cɔw lɛŋnden a ɲɛm co lenin-ndon kpow-vo, ndu co Vana bɛndoo o halataalaa a o lɛŋnden coo ni, o cel o cɛila-halala vanndacieea cɔw lan nin te. 25O nɔ mako mì vana yɔngu ndu ɲɛ-ɲɛ le, kani ndu ke vana yoomoo, kɔllo a ɲɛm tɔ̀un kpow ni. 26O soli vanaa-mangalaa-isɔɔa kpow vana pilɛ o ipulu, haliko ma tiw o lɛŋnden kpow coo. Mó kialu telenndan, mó hendul nda vɛlɛ pɛɛngula fondala ndáà bɛnda le calle lan. 27Hala tosa kon haliko mi vannda nuwviaa ndu. Bɔɔle taa keeliaa pɛ balan ndu kɔɔli, a komalnin ndu. Nduyɛ, o co vana-vana levil naa tɛɛn te. 28Kani:

‹O ndu nin naa nɔ yoomoo, kpaaya biiŋuanndo a co naa n co-o ni.›

Maa mɛɛ vanaa sɛvaa niaa pum a dimi yɛ aa:

‹Cuavaa ndɔa naa bɛɛ n co ni.›

29Le mɛɛ naa n co cuavaa Hala-a yɛ, n yiyan te maa Hala celen co, o velan a piɔm n'sianio, o n'volio, te kon te o lapowvo-o, o vanacieo yiyan mó cɔaw-vo. 30Hala co lɛhau telen vannda ve ndu kon sina loo tofa le, kɛ sunsun o co nda veeloo, nɛɛ-nɛɛ nda co, haliko ma mangala kelala ndalan. 31Kani o cii paalen kiolɔɔ, paale o kialunin vannda kpow iyama o sandei nin-nden, vana o hɛli-o tosanin kon ni. O cɔm vannda kpow tɔɔmasele kon a tindi o tindi ndu fulaa vanvílɛ́iya tɛɛn-ndo.»

32Ndáà tueyɔɔ Pol sɔɛi a tendul vanvílɛ́iya o kɔɔ, mí vanaa pum can ndu mamɔɔ, mí a pum nda dimi aa: «Lɔ́ɔ́ celen a dimul naa.» 33O kon mí Pol faŋan nda kɔɔli. 34Kɛ mí vanaa pum o nda tɛɛn a del ndu kɔɔli, má laalan ndu, nda yɔŋnun haa ni: Denis, ó va o kunda vanaa kialaa n'yamaa kobia nin-ndo, a cuaa pum diolan aa Damaris, handɔɔ vanaa celen lecoo.

Currently Selected:

Dɛnnda kiilaa 17: BKG

Highlight

Copy