Dɛnnda kiilaa 16

Timote liila Pol nda Silas

1Pol tiiyaa Dɛrbe, mó hiaw Listre. Mó kɔ komal kaandennɔɔ pilɛ lon diolan Timote. Yuifinɔɔ kalaa Timote yɔŋnun ni, ndóò laalan Hala. Fuɲa ndɔ ndu, Krɛkenɔɔ o va ni. 2Vanaa laalaŋaa va Listre-a a haa Ikoniɔum a va sɔɔn kɛndɔn dimio taw a Timote o kɔɔ. 3Mí Pol yiyan le kɔlan nda ndu. Le tùú Yuifia va o lɛŋnde len nin-ndo, mó dii ndu tooma, kani ndáà sínà maa Krɛkinɔɔ fuɲa ndɔ yɔŋnun ni. 4Telen Pol nda Silas a va keiyo o kobilan nin-ndo, má va vanaa laalannda sɔɔn kiilaa a simlacia Yerusalɛm dimi-on tɛɛngullo, a va vɛlɛ nda dimullo le sɔɔn kalan biyɔɔ. 5Vanaa Hala-a va hiovɔɔ laci a yoomuan sɔlaa, mí vanaa laalannda va kuiyo lepalaa-lepala.

Pol ce vanndo o vundulen nin Troas

6Telen nda va keiyo Frisii a o lɛŋnde Kalasii len nin-ndo, mí Hala Kɔl-Diandaa kuuna nda sɔɛi Hala-e dimio. 7Ndáà tiiyaa Misii ikɛi, má kindin le keiyo Bitinii, kɛ mí Kɔl Yeesu-o kuuna nda. 8O kon má kei Misii, má toal Troas. 9Icɔllo pum, mí Pol ca vundulen: mí Maseduannɔɔ pum sim ndu o hɔl, mó tɛɛlun ndu aa: «Hun Maseduan mà mala naa.» 10Pol ciiyo vundule len cɔu, mí n bɛɛndian fɔ́ɔ́fɔ̀, le kɔlan Maseduan ndon, kani mí n sina lekɛ́ndɛi maa Hala ndóò veelu naa le kɔlan vanaa va o kobi kon nin-nda Yoongu Kɛndɔɔ tiiyallo ni.

Lidi laalan Maalii o lɛŋnde Filipii len nin

11Mí n luɛi o dɛ̀ndɔ̀ɔ́ nin, mí n can Troas, mí n kɔa Samotrase sanaa. Diimandɔɔ, mí n tiiya Neapolis. 12Faŋanndo lon, mí n kɔa háá Filipii, kobi lebol va o lɛŋnde Maseduan nden nin-ndo, kobi rɔmnda va icali nin taw-vo pɛɛn. Mí n hivi palɛi bɔɔ-bɔɔ o kobi kon nin.

13O paale pɛngiaalen coo, mí n can ciee, mí n kɔa o peo kɔngɔ. N va yiyanndo maa n va fondaa pum komal, nɛɛ Yuifia piɛi Hala-a. Mí n cal, mí n soaa vanlaandua va a cuungiannda o fonda kon-nda o lani. 14Vanalanɔ pilɛ va nda tɛɛn diolan Lidi, fulaa o kobio Tiatir. Kolala siaŋala volototola báà kalalan ndóò pisi ni, o va Hala piɛiyo. O va naa nilan yaŋɔɔ, mí Mɛlɛka kumbi ndu kɔllo le ɲɛ Pol va dimio-o tueyɔɔ ɲɛkɛndɛi. 15Mɛɛ o sɔla yinɔɔ nda yungu ndɔɔ kpede, mó veelu naa aa: «Te la laalan pɛ maa vana laalan Mɛlɛka-o ya co ni, mɛɛ la hun mì la va o yiya o ya lo cɛinin.» Mó baŋ naa, mí n cɛl kangalan.

A mal Pol nda Silas o kaasoo Filipii ciee

16Paale pilɛ, n va kɔlan nɛɛ nda piɛi Hala-a, mí cɛ laandoo pum hun le naa bɔŋaa. Ɲina vɔɔndo pum va ndu nin, ɲina kon va tosaa ni mó va sɔɔn siɔdii laci-on dimio. Nduyɛ, vanaa ndɔa bɛndua va volion sɔlaa taw a sɔɔn siɔdii laci o va mun dimio-on. 17Mó del naa kɔlan kɔɔli naa Pol-aa, mó va yondaa aa: «Vannda ha co vanaa baalaa Hala-Hiow-Ɲɔɔn-Kpow-vo-a ni, nɛi yɔngu vana cindaa sɔlaa-o nda co niaa tiiyallo ho nuaa ni!» 18O lo ɲɛ kon tosaa lende háá, mí palɛi bɔɔ-bɔɔ i hiaw. O mɛɛlulan, mí ɲɔɔ pala Pol, mó mulin, mó dimul ɲina kon aa: «O diola Yeesu lan, fula cuaambɔɔ ho nin!» Fɔ́ɔ́fɔ̀, mí ɲina kalaa fula. 19Vanaa ndɔa bɛndua cɔu maa a sɔla lɛnin n'voli cuaambɔɔ kon kɔɔli le, má bii Pol nda Silas, má kɔa a nda o simlacia lelɛŋnda lo o fonda fɛkɛi va o kobi kon nin-ndo. 20Má kɔa a nda o vanaa kialaa n'yamaa rɔmnda lo, má dimi aa: «Vannda ha co naa palaa o kobio ho nin ni. Yuifia nda co ni, 21naamula naa Rɔmnda bɛnda mì n cɛl, mì n kela vɛlɛ coo le lan nda co vannda pɛɛkoo ni.»

22O kon mí sɛ́lɔ́ɔ́ bɛɛ simul nda. Mí simlacia lelɛŋnda a dimul vannda le nda domalan solio lekɔɔ, má viam nda, má lɔaa nda a siondei. 23Mɛɛ nda soŋ nda tei, má kɔ mal nda o kaasoo. Má dimul vana cumulaa cɛi kaasoo kpéŋ-kpéŋ maa o nɔ nda hɔlten coo. 24Mɛɛ o tuei sɔɔn mun, mí ndu bɛɛ kɔ kinda nda o cɛile pɔmbɔle lenin-nde va o cɛi kaaso kon nin-nden nin di, mó luei nda pelon o kpɛɛɔ. 25Di-tɛɛndo kandɔɔ tiiyaa, mí Pol nda Silas a va Hala piɛiyo, má va ndu condon solullo. Vanaa kaasoa tɔ̀a va nda nilan yaŋɔɔ. 26Fɔ́ɔ́fɔ̀, mí lɛŋnden le ɲiiya taw, mí cɛi kaaso kon hiilun háá nɛɛ nda kandu ndu cɔvɔɔ lɛŋ-nda. Mí diolan kpow la kumbin o lepilɔɔ, mí yɔlɔn ndáà yiw vanaa kaasoa-on kpow n tiimbun. 27Mí kpalilnɔ kon tiandu. Mɛɛ o ce diola lan lakumbiaa, mó cua mɔɛi ndɔɛi cɔwve le diinɔnndo, kani o va yiyanndo maa vanaa kaasoa ɲaanun. 28Kɛ mí Pol yonda aa: «Tosalan dɛnɛ vɔɔn te! N co nanu kpow.» 29O kon mí kpalilnɔɔ ɲuna ɲɛ-tengaa, mó luɛi a kiltan o cɛi kaasoo nin a ɲiiyaa, mó kɔ del Pol nda Silas o labɛngunin. 30O kon kɔɔli, mó soli nda, mó ɲuna nda aa: «Pua sei, yɛɛ ya tosa yɛ mì sɔla cindaa?» 31Má mulul ndu aa: «Laalan Maalii Yeesu, mà sɔla cindaa niaa yungu nɔmndo.» 32O kon má tiiyal ndu niko sɔɛi Hala-e nda vanaa va o ndu lo cɛinin-nda. 33O lɛɛlɛ pilɛ kon bɛngu, mí kpalilnɔ kalaa kɔa a nda o ɲumma bɛnduma man nin le nda boolɔnndan pulɔɔ. O kon kɔɔli, o cum ndɛ cum celen te, mó sɔla yinɔɔ nda yungu ndɔɔ kpede. 34Mó kɔa a Pol nda Silas o ndu lo cɛinin, mó kɔ ke nda ɲɛdiaa, mí ndu a yungu ndɔɔ kpede a naŋ kɔl le laalan nda laalan Hala-o.

35Ɲɔɔ tengaa, mí simlacia lelɛŋaa rɔmnda viam vannda le kɔlan kpalilnɔɔ dimullo maa o mal vanaa kan. 36Mí kpalilnɔ kon kɔ dimul Pol sɔɛi ken aa: «Simlacia lelɛŋnda vem vannda o ya lo maa ya mal niaa. Lelan, la tiwba mi la kɔɛnnun. La kɔ va kɛndɛ!» 37Kɛ mí Pol dimul vanaa nda vem kan-nda aa: «A lɔɔ naa vannda kpow o hɔl, a kilu naa iyama le, naa yɛ rɔmnda naa n co ni, má mal naa o kaasoo. A yeema niko mà mal naa o vionɔnndo nin? N cɛl ndi le! Mɛɛ mì nda pila hin mà hun soli naa!» 38Mí vanaa ndáà vem kan-nda muungu, má kɔ dimul simlacia lelɛŋnda sɔɔn mun. Ndáà tueyɔɔ maa rɔmnda Pol nda Silas va ni, mí siòònde bii nda. 39Má kɔ ɲɔɔlu nda, má soli nda o kaasoo. Má tɛɛlun nda le faŋanndo o kobi ndaa nin. 40Pol nda Silas fulaa o kaasoo, má kɔa o Lidi lo, má kɔ komal puapilɛa ndaa lon. Ndáà ciiyo nda yoomuan lueiyo, má kɔannun.

Currently Selected:

Dɛnnda kiilaa 16: BKG

Highlight

Copy