Dɛnnda kiilaa 18

Pol tiiya Korɛnte

1O kon kɔɔli, mí Pol faŋan Atɛn, mó kɔa Korɛnte. 2Mó komal Yuifinɔ pilɛ lon diolan Akilas, fulaa Pɔn. Ndóò hin ko sɛnɛi fulaa Itali nda Prisil laa ndɔ, kani mí Klode dimul Yuifia kpow maa a faŋan Rɔm. Mí Pol kɔa nda yilɔɔ. 3Le tùú nda va baala pilɔɔ tosaa-o, cɛila-kolala-toandaalan ndáà toosiaa ni, mó kɔ luɛi o yiya o nda lo, má va baalaa latulu. 4Pol va sɔɛi lɔ́ɔ́-lɔ́ɔ̀ o palɛi pɛngiɛi coo o cɛi lekaando nin, o va vɛlɛ nɛilan nuwviaa le Yuifia a Krɛkia kɔltan pilanndo.

5Kɛ Silas nda Timote hunɔɔ fulaa Maseduan, mí Pol muungu vannda pɛɛkoo daama, mó va Yuifia dimio o hɔl maa Yeesu co Krista ni. 6Kɛ le mɛɛ Yuifia va ndu simullo ma va ndu yeowlan yɛ, mó koaŋ cundu va o doma ndɔɔ-o, mó dimul nda aa: «Te la sɔla lɛ cindaa le, mɛɛ a niaa pila ken fula ni, o co lɛ sɔɛi ni le co ken te. O hau kɔɔli, o vanaa co N'Yuifi le-a lo ya co lakɔ ni.» 7Mó faŋan ndon, mó kɔ luɛi o langbanɔ pilɛ lo cɛinin, diolan Titius Sustus, vana va Hala biiloo-o, o cɛi ndɔɔ ndóò holnun cɛi lekaando-o. 8Mí Krispis simlacinɔ cɛi lekaando nda yungu ndɔɔ kpow a laalan Maalii. Mí Korɛntea bɔɔ-bɔɔ a va Pol nilan yaŋɔɔ-a bɛɛ a laalan, má sɔla yinɔɔ.

9Icɔllo pum, mí Mɛlɛka dimul Pol o vundulen nin aa: «Siòòŋii bii nɔm te. Hiow laci a sɔɛi, mɛi le. 10Kani i co nɔm ikɛi. Vana-vana nɔlanin nɔm simullo mò yɔŋ nɔm ɲɛ le, bau i nɔ vannda taw o kobio ho nin.» 11Mí Pol cii vɔsio a paangon mún ŋɔmpum Korɛnte ciee, o va vannda sɔɛi Hala-e tiiyallo.

12Tuma Kaliɔn va masa-ibunga Rɔmnda Akaii ciee-o, mí Yuifia cɛlan, má simul Pol. Má kɔa a ndu nɛɛ kialaa n'yamaa. 13Má dimi aa: «Langbanɔɔ ho co vannda kɔltan mangalaa mà va Hala biiloo, kɛ o co mɛɛ tɔŋndo dimi yɛ le.» 14Pol ndóò yeema mì ndóò cua sɔɛi, kɛ mí Kaliɔn dimul Yuifia aa: «Éé niaa Yuifia ha! Te ndóò va pɛ aa dɛnɛ sendu loo, te kon te dɛnɛ vɔɔndo ni, i va biwnɔn mì yáà yaŋ niaa nilan. 15Kɛ le mɛɛ o co dɛnɛ lasɛɛngianndo o diomndan lapum coo, o diolan coo a o tɔŋ niaa pilaa coo yɛ, la toosiaa sɔɔn mun niaa pilaa tɛɛn, i kilu sɔɔn vaa nuaa iyama le.» 16O kon, mó soli nda nɛɛ kialaa n'yamaa. 17Mí nda kpow a del Sɔstɛne, simlacinɔ cɛi lekaanndo coo, má lɔaa ndu vanaa kialaa n'yamaa o hɔl, kɛ Kaliɔn vowlul nda sondo le.

Pol muungu Antiɔs

18Mí Pol tosa telen vilɛi Korɛnte ciee. O kon kɔɔli, mó faŋan vanaa laalannda, mó luɛi o dɛ̀ndɔ̀ɔ́ nin, mó kɔa Siri nda Priska a Akilas. Lɔ́ɔ́ pá mó kɔa, mó sendin, kani ciɛi ndóò cua ni. 19Má tiiya Efɛs, mí Pol faŋan Priska nda Akilas-a, mó kɔa o cɛi lekaando nin, mó kɔ cal suukanndo nda Yuifia. 20Má ɲuna ndu maa lo vɔ lon, kɛ o cɛl te. 21Tuma o va nda faŋanndo-o, mó dimul nda aa: «Te Hala cɛl pɛ, i muungunin nanu.» O kon kɔɔli, mó faŋan Efɛs, mó kɔa o dɛ̀ndɔ̀ɔ́ nin. 22Mó kɔ toal Sesaree. Mó kɔa fɔlɔn Yerusalɛm le vanaa Hala-a yilɔɔ. Faŋanndo lon, mó kɔa Antiɔs. 23Mó lo lon le telen pum. O kon kɔɔli, mó muungu, mó kei o fondala yɛ́-yɛ́la va Kalasii a Frisii lan, mó luei kaandennda kpow yoomuan.

Apolɔs tiiya Efɛs, mó kɔa vɛlɛ Korɛnte

24Mí Yuifinɔ pilɛ, diolan Apolɔs, fulaa Alɛksandrii tiiya Efɛs. Ndóò caa sɔɛi taw, ndóò sina vɛlɛ Sɛbɛ-Hala-o ɲɛkɛndɛi. 25Ndóò sɔla pɛɛkoo a nɛila Maalii lan o kɔɔ, nduyɛ o va vannda pɛɛkoo mó va nda Yoongu kɛndɔɔ tiiyallo a kɔlkɛndɔɔ a á ɲaaloo ɲɛkɛndɛi a Yeesu o kɔɔ, o ve biondɔɔ le. Kɛ yinɔɔ Nsaŋ ndóò yin vannda-o daama ndóò sɔla vɔ ni. 26Mó kandu sɔɛi vannda o hɔl a kɔlkɛsiaa o cɛi lekaanndo nin. Mɛɛ Priska nda Akilas tuei ndu diom, má kɔa a ndu o nda lo cɛinin, má cɔɔlu ndu nɛi Hala-o cɔm. 27Apolɔs ndóò yeema le kɔlan Akaii. Mí puapilɛa luei ndu yoomuan le kɔla lan. Má sɛval kaandeŋaa va lon-nda sɛbɔɔ haliko mi ndáà caa ndu biyɔɔ. Mɛɛ o tiiya, mó mala vanaa laalannda o kɛndɛi Hala-e bɛngu. 28Kani mó nɔla Yuifia a sondo vannda kpow o hɔl, mó cɔm vɛlɛ o Sɛbɛ Hala-o nin maa Yeesu co Krista ni.

Currently Selected:

Dɛnnda kiilaa 18: BKG

Highlight

Copy