Lukə 5

Jesus ə nwɔ kalan nɛa tɔlɔɔɠaa təli

(Matie 4.18-22; Markə 1.16-20)

1Yələ ta, Jesus ə kɛ Gɛnesarɛtə bowaya#5.1 Gɛnesarɛtə bowa: Bowayai ŋɛ̨i kɛ Galile nąą ta ɓaa kɛ a Gɛnesarɛtə bowa. kwɛlɛ, nu kpulu kɛnɛ̨ ə pa bɔ diɛ di kee hvana, əgɛ, di Yálá laawoo mɛ̨n. 2Jesus ə kələn veelɛ kaa tɔɔni ɲá kwɛlɛ, nąmįną diɛ di wɔ diŋɛ̨nŋąa mąą waa. 3Jesus ə tɛ gələnŋąa tii dɔ̨nɔ̨ hu, yai kɛ a Simɔn nwɔ. Ə mo Simɔn ɓa, yɛ mą: gələn mąą tɛ ɲá hąmąi pələ. Jesus ə hee kɛa gələn ɉu yɛ nuą kalan.

4Yii kɛa ə kpɛɛ a galan gɛɛ, ə mo Simɔn ɓa, yɛ mą: «Gələn mąą tɛ ɓɛi tii ɲá kpon ɉu kwɛa laa, yɛ́ ka ə́ ɓɛlaa ka ka wɔ diŋɛ̨nŋąai pili, ka hɔ̨nwɔ̨lee kpɛ.»

5Simɔn ə nwoo pulu pənə yɛ mą: «Kalamɔ̨ɔ̨, ku háá yii kpɔ ku ɲɛ̨i ɓa, kuɔ hɔ̨nwɔ̨lee kpɛ; kɛlaa, ku hvo hɛn nɔpee ta hɔlɔɓo. Kɛlaa, ə́ woo tii mąą mɛ̨nį ɓa, gáá diŋɛ̨n bilii.»

6Simɔn da mɛlaani di diŋɛ̨n bili, di hɔ̨nwɔ̨lee kpulu kɛnɛ̨ kələ, ɉɔwɔlee tamą pələ mąą mɛ̨nį ɓa, diŋɛ̨n ɲɛli taɠaa diɛ tee ɉu. 7Di ɓɛlaa ya-tulun nuą tii kɛ nąą kwɛlɛ, di di təli, əgɛ, di pa di kpɔnmąą tɛɛ di pɔ. Yiliɠaai di pa, di gələn veelɛi tii laahvɛɛ a hɔ̨nwɔ̨lee, gələnŋąa diɛ kɛ di lɔ ɲá mu. 8Ɓɛlɔwai Simɔn Piɛrə ə yili kaa la tii, ə pu gbəlin na Jesus kɔ́wɔ mu, yɛ mą: «Ną́mu, ə́ mąą kwɛa mą́ą́, mąąhɔlɔɓo, gáá a nɛ̨ŋɛ̨n ɉəɠəmun.»

9Simɔn ə ɲɔw kpɔ kɛnɛ̨, ə mą kɛ da mɛlaani; ɉɔwɔlee kpului kɛnɛ̨i tii di gələ mąą mɛ̨nį ɓa. 10Pələ lɔ ɓə ə kɛ la a Zebede lon ɉinąą hveelɛi: Ɉakə da nəɠə Ɉaan, diɛi kɛ a Simɔn mɛlaani. Kɛlaa, Jesus ə mo Simɔn ɓa, yɛ mą: «Hvo ɲɔw, ə həɠə háákələi ɓa, ə́ kaa pai kɛi a nu kwɛli mun.»

11Di gələnŋąa lɛɛ ɲá kwɛlɛ, di ɉɛnŋąa kəlee lɛɛ laa, di hvilɛn Jesus pulu.

Jesus ə hvólóɲɔ̨n gɛ mun da kɔ́lɔi pono

(Matie 8.1-4; Markə 1.40-45)

12Jesus ə kɛ taa ta hu, hulɔnu ta yɛ ɓo laa, hvólóɲɔ̨n gulaa ma nąą kəlee. Ɓɛlɔwai ə Jesus kaa la, ə pɛlɛ gɔwɔ mu, ə nɛ̨ɛ̨mąą hvə mą, yɛ mą: «Nwɔ́ mɛ̨nį nąmu! Akɛ ya hvaa mą, ya pɛli ə́ gɔ́lɔ́i pono, ə́ mą́ą́həɠə.»

13Jesus ə ɲee pɛlɛ mą, yɛ mą: «Váái ma gɛ́ ə́ kɔ́lɔi ə pono», ə́ mąą ə həɠə. Ɲąąɓa, volóɲɔ̨n tii ə kpɛɛ kpɔlɔ tii ɉulɔnui tii ɓa. 14Jesus ə mo mą, yɛ mą: «Hvo mɛ̨nįi ŋɛ̨i hukulɔ nui lɔpee ta ɓa, pələi ŋɛ̨i yaa kɛ la, li ə́ ə́ kpɔɔ lɛ ɉala laa həli mun gɛnɛ̨ ɓa, yili pulu, ɉaláá yii Moisə ə vaaɓo, yɛ hvólóɲɔ̨n gɛ mun gɔlɔi a pono ə gulɔ, ə́ yili kulɔ, əgɛ, nuą di gɔlɔn diɛ ə́ kɔ́lɔi aa pono.»

15Nąąlɔwai, Jesus mąą tin ə too kpɔ nwɔ̨nɔ̨ kɛnɛ̨, nuą diɛ pa, əgɛ, di di wəli tɔɔ nwoo ɓa; nuąi ɲɔ̨n ə kɛ diɛ, yɛ di kɔ́lɔi pono. 16Yili pulu, Jesus ə li dɔ̨nɔ̨ kɛɛnąą yɛ Yálá hvɛli.

Jesus ə kpɛlɛɠɛlɛn ɲɔ̨n gɛ mun da kɔ́lɔi pono

(Matie 9.1-8; Markə 2.1-12)

17Yələ ta, Jesus ə kɛi nuą kalan, Farisiɛ̨ɠaa da tɔ́n galamɔ̨ɔ̨ɠaa di həɠə Ɉude lɔi taa taɠaa hu, da Galile lɔi taa taɠaa, ə mą kɛ Ɉerusalɛmə; di pa di hee Jesus kwɛlɛ, Ną́mu Yálá nwɔ huwalawala ə kɛ Jesus mɛ̨i, yɛ ɲɔ̨n gɛ nuą kɔ́lɔi pono. 18Kpɛlɛɠɛlɛn ɲɔ̨n gɛ mun da ə kɛ laani lii hu, yɛ ɓo laani nu nąąn galanŋą, di kɛ bɔ di lɔ la bɛlɛ́n di nąą Jesus lííla. 19Nu kpulu mąą mɛ̨nį ɓa, di hvo pələ hɔlɔɓo di hvo tɛɛ la bɛlɛ́ laaləi pələ, di tɛ bɛlɛ kɔ́ma, di dooli taɠaa kulɔ ɓɛi lɔ da pɛli kɛ ɲɔ̨n gɛ mun tii tɛɛi laa, da nąą hɛn, di nąą Jesus lííla nu kpulu lɔwai. 20Yii kɛa Jesus ə ɲɔ̨n gɛ mun tii kpəŋə nuą di wɔ laa na laa kaa tii, ə mo ɲɔ̨n gɛ mun tii ɓa, yɛ mą: «Náwəi, ə́ kɛ nɛ̨ŋɛ̨nŋąa kəlee mąąhvaa aa lɛɛ.»

21Tɔ́n galamɔ̨ɔ̨ɠaa da Farisiɛ̨ɠaa tii kɛ laa, di mo di kee lɔwai, diɛ kɛ mą: «Nu nɛlɛ ɓəi, yaai gaa Yálá lalan ɉi? Yálá yaa tɔ̨nɔ̨ gbən lɔ ɓə a pɛli nɛ̨ŋɛ̨n mąąhvaalɛɛi.»

22Jesus ə di wɔ kiliŋąhiɛi tii kaa, ə mo diɛ yɛ diɛ: «Lə mɛ̨nį ɓa ka wɔ kiliŋąhiɛ kɛ pələ kaa tii? 23Akɛti, nwoo hveelɛi ŋɛ̨i nɛlɛ ɓə mo la nɛɛ, nu ə kɛ nu ɓa: ‹Ə́ kɛ nɛ̨ŋɛ̨nŋąa mąąhvaa aa lɛɛ›, a wala kɛ tii yɛ mą: ‹Ə́ mu həɠə ə́ hiɛ?› 24Kɛlaa, gáá bɔ ka gɔlɔn kaa Nu Lon ɓə huwalawala kaa ɲei lɔi mɛ̨i ɓɛ ə nɛ̨ŋɛ̨n mąąhvaalɛɛ.»

Yili pulu Jesus ə mo gbɛlɛɠɛlɛ ɲɔ̨n gɛ mun tii ɓa, yɛ mą: «Gáá moi yɛ gɛ́ ə́ ə́ muhəɠə, ə́ ə́ laa hɛn ɉəɠə, ə́ li ə́ yəi bɛlɛ́ laaləi.»

25Ɲąąɓa, ɉulɔnui tii ə muhəɠə ə tɔɔ nu kəlee ɲɛ̨i ɓa, nii tii kɛ nąą ɉu diɛ paa la, ə ɉəɠə yɛ Yálá hɛɠɛɛɓo kpɔ kɛnɛ̨, yɛ kɛa li. 26Nuą tii kəlee kwəi ə pili diɛ, di ɲɔw, diɛ Yálá mąątɛ̨nɛ̨. Yili pulu, diɛ mą: «Mɛ̨nįi hvo ta kɛli kwaa kələi gaa aa kɛ.»

Jesus ə Levi təli

(Matie 9.9-13; Markə 2.13-17)

27Yili pulu, Jesus həɠɛɛ laa, ə nįįhɔ̨nwɔ̨ kulɔ mun da kaa diɛ kɛ nąą ɓa: Levi, ɉiɛ nįįhɔ̨nwɔ̨ kulɔ taɓali pulu; Jesus yɛ mą: «Pa ə́ hvilɛn búlú.»

28Ɲąąɓa, Levi ə muhəɠə kpɔlɔ tii, ə mɛ̨nį kəlee lɛɛ laa, ə hvilɛn Jesus pulu.

29Yili pulu, Levi ə Jesus təli ɲəi bɛlɛ́n, ə nwea laa kɛ. Nįįhɔ̨nwɔ̨ kulɔ nuą tamąą, ə mą kɛ da nu takpɛliɠaa, da Jesus ni diɛ kɔ̨nɔ̨n mį́į́ kɛɛnąą tɔ̨nɔ̨ ɓa. 30Farisiɛ̨ɠaa da tɔ́n galamɔ̨ɔ̨ɠaa, di piliɛ kɛ di kee mɛ̨i kɛɛnąą tɔ̨nɔ̨ ɓa. Jesus kaa tii di mo da nuą tii di heɛɛ kɛɛnąą tɔ̨nɔ̨, yili hvo nɛɛ diɛ. Di mo Jesus nwɔ kalan nɛai diɛ, diɛ diɛ: «Lə mɛ̨nį ɓa ka ka kalamɔ̨ɔ̨ ni, ka káá kɔ̨nɔ̨n mįi kɛɛnąą tɔ̨nɔ̨ ka nįįhɔ̨nwɔ̨ kulɔ nuą, ə mą kɛ túwɔ́ pələ ɲɔ̨n gɛ nuą?»

31Jesus ə di woo pulu pənə yɛ diɛ: «Nui gɔlɔi ponoɔ̨, mąą kpaan və yɔwɔtɔlɔ ɓa; hvo kɛ li nui ɲɔ̨n gaa mą, ya ɓə mąą kpaan gaa mą.»

32Jesus yɛ diɛ: «Yálá hvo kɛ dɔ́ɔ́ li nu haŋąaɠaa mąą mɛ̨nį ɓa, kɛlaa, ə dɔ́ɔ́, əgɛ, ŋą nu túwɔ́ pələ ɲɔ̨nwɔ̨ɔ̨ɠaa kwɛli di di wɔ túwɔ́ pələ ɲɔ̨nŋąa mąąhvalin.»

Di Jesus mąąni kɛ hin nɔ mɛ̨nį ɓa

(Matie 9.14-17; Markə 2.18-22)

33Nuą di mo Jesus ɓa diɛ mą: «Ɉaan nwɔ kalan nɛai da hin nɔ a hvóló kəlee diɛ Yálá hvɛli, ə mą kɛ Farisiɛ̨ɠaa di wɔ kalan nɛa kpɛli mąn da gɛ lɔ tii. Kɛlaa, ə́ wɛiɠaa di wɛi da di laa mį́į́ lɔ a hvóló kəlee diɛ di kpələ.»

34Jesus ə di woo pulu pənə yɛ diɛ: «Gaa ka wɔ kwəi ɓɛlɔwai nɛ̨ɛ̨gbɛla ɉilɛ a mɛlaa təli la nwɔ húlú lɔ kɔ̨nɔ̨n ma, nąąlɔwai ɓə da hin nɔ la? Nwɛ́i, gɛ́ diɛ: Kpaa! 35Kɛlaa, ɓɛlɔwai di kaa pai nɛ̨ɛ̨gbɛla ɉilɛ həɠəi la mɛlaa pɔ, volóɠaa tii hu ɓə da pɛli di hin nɔ la.»

36Yili pulu, Jesus ə ɉanwon ŋɛ̨i hɔɔ diɛ, yɛ diɛ: «Nu hva pɛli həɠə ɓɛla nįnɛ̨ ta teei ma hvo həɠə pɔlɔ woloi hɔlɔn na; a kɛ tii, ɉəɠə ɓɛla nįnɛ̨i tii hu a kala lɔ kpɛli-kpɛli, ə lɛɛ, di hva di kee mąąhon. 37Nu hva lɔɔ nįnɛ̨ pu hvólówo pɔlɔ-pɔlɔ hu, a kɛ tii nɔɔ a pu, di hvɛɠɛ a gəlee hveelɛi. 38Kɛlaa, mąąnɛ̨ɛ̨, nu ə lɔɔ nįnɛ̨ pu hvólówo nįnɛ̨ hu. 39Nu a gbɛa pilɛ lɔɔ pɔlɔ hu, di ma pa a nįnɛ̨ a kɛ diɛ: ‹Bɔlɔ hviɛlaɓoɔi nįnɛ̨ ɓa.›»

Currently Selected:

Lukə 5: BKPDCG

Highlight

Copy