Lukə 4
4
Jesus ŋąąhɛɠi mɛ̨nį
(Matie 4.1-11; Markə 1.12-13)
1Jesus kulaa kɛa Ɉurdɛn hu, Kili-Mąąhəɠɛɛ ə naahvɛɛ. Kili ə ɉəɠə ə li la nɔi pun ɉu. 2Nąnį ə ɲąąhɛŋin hvóló pow nąąn ɲee mun. Voló pu-nąąn tii kuu mu, hvo hɛn nɔpee ta mį́į́, ə lɛɛ, pulú ə ɉon kɛa. 3Nąąlɔwai nąnį ə mo mą yɛ mą: «Akɛ Yálá Lon mąą a yɛ, gwɛniɠaa ŋɛ̨i ta mąą pənə a kɔ̨nɔ̨n.»
4Jesus ə nwoo pulu pənə yɛ mą: «Bɛɛi Yálá laawoo hɛɓɛ́ hu yɛ: ‹Nu hva yɛnɛ̨ɛ̨ kɛ lɔ a laa mį́į́ hɛn yaa tɔ̨nɔ̨.›»
5Nąnį ə ɉəɠə ə li la yee kwɛa ta tonna ə yɛnɛ̨ɛ̨ tɔɔlaaɠaa kəlee lɛ mą kpɔlɔ ŋąąɓa. 6Yɛ Jesus ɓa: «Ŋą́ pɛli ŋą dɔɔlaaɠaa ŋɛ̨i kəlee di wɔ huwalawala da ɉu hɛn gɔw tɛɛ ə́ pɔ, gəlee kaa a ɲą́ą́ nwɔ́, nui ŋą kɛ bɔ, ya ɓə ŋą dɛɛ bɔ. 7Akɛ ya kwɛli hvilɛn mą́ą́, ŋą gəlee tɛɛ ə́ pɔ.»
8Jesus ə nwoo pulu pənə yɛ mą: «Bɛɛn Yálá laawoo hɛɓɛ́ hu yɛ mą: ‹Kwɛli hvilɛn Ną́mu Yálá yaa tɔ̨nɔ̨ ma. Ə́ tiɓo kɛ mą.›»
9Yili pulu, ɓilihi ə ɉəɠə ə li la Ɉerusalɛmə, Ɉuifəɠaa di wɔ Yálá hee pɛ́lɛ́i tonna, yɛ mą: «Akɛ Yálá Lon ɉulɔnu ɓaa a yɛ́, teen, ə́ hvilɛn nɔi ɓa; 10mąąhɔlɔɓo, bɛɛi Yálá laawoo hɛɓɛ́ hu yɛ mą: ‹Yálá a mo nwɔ malakaɠaai diɛ, di pa di di yee hee ə́ mu. 11Ə gɛ, hvo pa ə́ kɔ́wɔ tuwɔ kwɛni ɓa.›»
12Jesus ə nwoo pulu pənə yɛ mą: «Bɛɛi Yálá laawoo hɛɓɛ́ hu yɛ mą: ‹Ho Ną́mu Yálá hu kɔ́ɔn.›»
13Yii kɛa nąnį ə Jesus ŋąąhɛŋin a kpaalə huwu kəlee, ɲee hvo pɛli mą, ə nɛɛ laa, yɛ lɔwai takpɛli mąąkpɔn.
Jesus ə nwɔ kolói kɔ́wɔ tɔɔ Galile lɔi hu
(Matie 4.12-17; Markə 1.14-15)
14Jesus ə pənə ə li Galile lɔi hu, Kili-Mąąhəɠɛɛ nwɔ huwalawala yɛ ɓo ɉu. Jesus mąą tin ə too nɔi nąą kəlee. 15Ə kɛi lɛa nuą mąąkwɛli di wɔ Yálá hvɛli pɛlɛ́ɠaa mu; nu kəlee di kɛi mąątɛ̨nɛ̨.
Nazarɛtə nuą di lənə Jesus ɓa
(Matie 13.53-58; Markə 6.1-6)
16Jesus ə li Nazarɛtə daai ɓɛi ə nokolo laa kɛ laa. Hvįįtɔɔ yələ ta ə lɔ di wɔ Yálá hvɛli pɛlɛ́ mu, di Yálá laawoo hɛɓɛ́ həɠə di dɛɛ bɔ, ə muhəɠə ə tɔɔ, ɉɛɓɛ́ ɓo mɛ̨nį ɓa. 17Ɓɛi tii ə kɛi nąą kalan ə kɛ a Yálá kwəi mɛ̨nį hukulɔ mun Esai nwɔ hɛɓɛ́ yili nąą ta; ə ɉɛɓɛ́ hu hvólóon bɛ̨ɛ̨ ɉu yɛ kɛ mą:
18«Ną́mu nwɔ Kilii laai mɛ̨́i,
aa ɉə́ɠə́ ɉu, əgɛ, ŋą wɛlɛɛ lɛlɛɛ laa həli mąąwɛli nuą diɛ.
Ə dɔ́ɔ́, əgɛ, ŋą gaho nąmįną di wɔ nwun mąąɓo mɛ̨nį laa həli diɛ,
əgɛ, ŋą ɲɛ̨ipu nuą ɲɛ̨i hvólón,
əgɛ, nuąi di laanɔ̨nwɔ̨ ɓoɔ ŋą di nwun mąąɓo,
19əgɛ, ŋą Yálá nwɔ mɛ̨inɛ̨ɛ̨ kɛ kwɛlan mąą mɛ̨nį laa həli nuą diɛ.»
20Yili pulu, Jesus ə ɉɛɓɛ́ kpinįn gɛ, ə dɛɛ ɉɛɓɛ́ laaikɛ mun bɔ, ə li ə hee. Nuąi kpɔ kɛ laa Yálá hvɛli pɛlɛ́i tii mu, gəlee di di ɲɛ̨i hee Jesus ɓa. 21Nąąlɔwai, ə mo kɛa diɛ, yɛ diɛ: «Ɉɛɓɛ́ hu woo ŋɛ̨i ka mɛ̨n, nąą aa hvɛɛ kpɔlɔ háákələi yɛ pələi ka mɛ̨n na.»
22Nu kəlee di kɛi mąąwiɛi kaa, ə lɛɛ, mɛ̨nį lɛlɛɛɠaa ŋɛ̨i kɛi kulɔ na yɛ mo, ə nuą kəlee kwəi pili diɛ. Di kɛi di kee mąąni kɛ, diɛ kɛ mą: «Akɛti, Ɉosɛfə lon vəi mɔ̨ɔ̨?»
23Jesus ə mo diɛ, yɛ diɛ: «A tɛ̨ą, ka káá pai ɉanwon ŋɛ̨i hɔɔi mą́ą́ mɛ̨nį hu, kaa kɛ mą: ‹Yɔwɔtɔlɔ, ə́ kpɔɔ hali kɛ yɛ́ kpinįi.› Ka káá nwɔ̨nɔ̨ pai kɛi mą́ą́: ‹mɛ̨niɠaai ə́ gɛ Kafarnaumə daai, kwaa yiliɠaai kəlee bələ mɛ̨n, yili ɲɔ̨nwɔ̨mąn gɛ tii ə́ kpɔ-kpɔɔ taa ŋɛ̨i hu ɓɛ.›»
24Yili pulu, ə mo nwɔ̨nɔ̨ diɛ, yɛ diɛ: «Gáá tɛ̨ą ɓoi kaa, Yálá kwəi mɛ̨nį hukulɔ mun lɔpee ta mąą hvo wiɛ li bɔ taai. 25Gáá moi kaa, Eli nwɔ lɔwai hu, galanən nɛ̨ą tamąąi kpɔ kɛ Israɛlə lɔi hu, ɓɛlɔwai hvóló laa ə tee la a kwɛlan ɉaaɓa ɲąnįn mɛ̨ida, tulɔ hvo kɛi bu; pulu kɛnɛ̨ ə too nɔi nąą kəlee. 26Kɛlaa yaamun, Yálá hvo kɛ Eli tɔɔ li galanən nɛ̨ą tii tɔ̨nɔ̨ kpɛli pɔɔli, hvo kɛli lɔ galanən nɛ̨ɛ̨nu tɔ̨nɔ̨ gbən ŋɛ̨i kɛ Sarɛpta daai Sidɔn lɔi hu. 27Elise nwɔ lɔwai tii hu lɔ nwɔ̨nɔ̨, hvólóɲɔ̨n gɛ nuą tamąą di kɛ Israɛlə lɔi hu, kɛlaa yaamun, hvo dɔ̨nɔ̨ kpɛli kɔ́lɔi pono, hvo kɛli Siri mun ŋɛ̨i di kɛi kɛ nąą ɓa: Naaman; yaa ŋɛ̨i həɠə lɔi takpɛli hu, yaa lɔ ɓə Elise ə gɔlɔi pono.»
28Nuą kpɔ kɛ Yálá hvɛli pɛlɛ́i tii mu, gəlee líí ə holi Jesus pɔ ɓɛlɔwai di nwooɠaa tii mɛ̨n na. 29Nuą tii gəlee di di muhəɠə, di wolo Jesus ɓa, di ɉon də li la daa pulu ɓoloon gɛnɛ̨ ta la, diɛ kɛ di bili moloon ɉu. 30Kɛlaa, ə tɛɛ lɔ di lɔwai ɲąą, ə li.
Jesus ə ɲį́nɛ̨n gbɛ hulɔnu ta pulu
(Markə 1.21-28)
31Jesus ə li Kafarnaumə daai Galile lɔi hu, yɛ nuą kalan a vįitɔɔ yələ. 32Jesus nwɔ kalan gɛ pələ ə nuą kəlee kwəi pili diɛ. Mąąhɔlɔɓo, ə kɛi galan gɛ kpɔ a huwalawala. 33Yálá hvɛli pɛlɛ́i tii di kɛ mu, hulɔnu ta ə kɛ laa, ɲį́nɛ̨n yɛ ɓo bulu, yɛ tómą kpɔ a nwoo kɛnɛ̨. 34Yɛ kɛ mą: «Ee! Jesus Nazarɛtə mun, lə ɓə yɛ ə́ gɛ a kuɔ? Akɛti, ə́ pa kɛa ku nwun na pili mɛ̨nį ɓa li? Ŋą́ ə́ kɔ́lɔn ə́ kaa a Yálá nwɔ tímun.»
35Jesus ə haŋą kpɔ ɲį́nɛ̨n tii ɓa a nwanąąi, yɛ mą: «Ə́ laa pilɛ, ə́ həɠə nui ŋɛ̨i pulu!»
Ɲinɛ̨n tii ə ɉulɔnui tii hu kpɛlin, ə doo nu kəlee ɲɛ̨i ɓa, kɛlaa, hvo nąą ta kɛ mą; ə həɠə bulu. 36Nuą tii kɛ laa di kəlee di kwəi ə pili diɛ, di ɲɔw, diɛ kɛ di kee ɓa: «Akɛti, woo huwu lə kɛɛɠaa ɓə ŋɛ̨i gaa moi? Ɉulɔnui ŋɛ̨i a haŋą ɲį́nɛ̨nŋaa diɛ, a nwɔ huwalawala, yɛ a kɛ a di nwun nąmu, ə lɛɛ, diɛ həɠə nuą pulu.»
37Nuą kəlee di kɛi Jesus mąą mɛ̨nį ɓo Kafarnaumə nɔi nąą kəlee.
Jesus ə ɲɔ̨n gɛ nuą tamąą kɔ́lɔi pono
(Matie 8.14-17; Markə 1.29-34)
38Jesus həɠɛɛ Yálá hvɛli pɛlɛ́ mu, ə li Simɔn yəi bɛlɛ́n, ə Simɔn ɲolaa kaa laa ni gɔlɔ kələn ŋąą ma. Di mo Jesus ɓa, diɛ mą: pa ə́ gɔlɔi pono. 39Jesus ə lɛɠɛ mą, ə nwun ɉɛlɛn mɛ̨i, ə haŋą gɔlɔ kələn mąą tii ɓa, nɛ̨ɛ̨nui tii kɔ́lɔi ə pono. Ə muhəɠə yɛ di kɔ̨nɔ̨n gɛ.
40Hvóló kɔ́w toɔ pulu, nuąi kpɔ ɲɔ̨n gɛ nuą di kɛ di yəi, di kɛi pa a diɛ Jesus pɔ, Jesus ə kɛi ɲee laa di mɛ̨i, di kɔ́lɔi yɛ pono. 41Ɲįnɛ̨nŋaa di kɛi həɠə ɲɔ̨n gɛ nuą tii taɠaa pulu, diɛ tómą, diɛ kɛ mą: «Ə́ kaa a Yálá Lon!» Kɛlaa, Jesus Kristə ə kɛi haŋą diɛ, yɛ kɛ diɛ: «Ka hvo hvaa!»
Mąąhɔlɔɓo, di kɛ gɔlɔn diɛ: Jesus kaa a Nwun mąąɓomun Yálá ə naakwɛlanmo.
Jesus ə Yálá laawoo laa həli Ɉude lɔi hu
(Markə 1.35-39)
42Yələ ɓoi lɔwai, Jesus ə kulɔ daai, yɛ li dɔ̨nɔ̨ kɛɛnąą; nu kpulu kɛnɛ̨ ə hvilɛn bulu diɛ gwɛli. Yii kɛa di gaa, di kɛ bɔ di kanąn ma, əgɛ, hvo həɠə laa. 43Kɛlaa, Jesus ə mo diɛ, yɛ diɛ: «Mąąnɛ̨ɛ̨ ŋą Yálá-taa tɔɔlaa mąą wɛlɛɛ lɛlɛɛ laa həli daa yiiɠaa tii hu. Mąąhɔlɔɓo, yili mɛ̨nį ɓə Yálá ə dɔ́ɔ́ la.»
44Yili pulu, Jesus ə li Ɉude lɔi hu Yálá hvɛli pɛlɛ́ɠaa mu, yɛ wɛlɛɛ lɛlɛɛ laa həli nuą diɛ.
Currently Selected:
Lukə 4: BKPDCG
Highlight
Share
Copy
Want to have your highlights saved across all your devices? Sign up or sign in
