Psalm 60
60
Piicaun Anirtuusqelluni
1Agayun, cakaallruarpekut cirlakluta-llu;
qenrutellruarpekut, tau͡gaam watua ataam pikliuskut.
2Nuna pekcetellruan qupurluku-llu ikirtelluku;
maa-i kitugeski qulinri, navguqatartuq.
3Yut'en nangteqevkallruaten arcaqalriamek;
ayaluagukut taangiqellriatun.
4Aarcirtullruaten qigcikesteten,
piunriumallerkaatnek avitesqelluki.
5Piicallerput niilluku pinirpegun anirturkut,
yuut kenkek'ngaten aviucimaniartut.
6Uitaviminek Agayun qanellruuq,
“Nunaniryuglua avegciqaqa Shechem-aaq,
avegluku-llu yumnun kuignayua Succoth-aam.
7Gilead-aaq Manasseh-llu pikagka;
Ephraim-aaq nacaqaqa akngircailkutekluku
Judah-wa tegumiaqa atanirturilua.
8Moab-aq ermigcuutekaqa,
egglukek-llu aluilitagka Edom-aamun,
nallunairluku wangnun pikucia;
Philistia-m tungiinun qayagpagtua cirlakngamku.”
9Kia-mi, Agayun, ayauciiqanga casgulegmun nunarpagmun?
Kia ciuliqagciiqanga Edom-aamun?
10Ilumun-qaa cakaararpekut?
Anguyagteput-qaa maliggluki anguyagyartuqatanrituten?
11Inglukestemten̄ek pillemten̄i ikayurkut;
yuunginam ikayuutii catngunrituq.
12Agayun ilikekumteggu cirlakiciqukut;
elliin cirlakarkaungamiki inglukesteput.
Currently Selected:
Psalm 60: YPK
Highlight
Share
Copy
Want to have your highlights saved across all your devices? Sign up or sign in
Yupik Bible © 2012 American Bible Society. All rights reserved.
