Psalm 59
59
Piicaun Aarnarqelriamek Uqisngayugluni
1Aviusnga inglukestemnek, Agayutmaa;
tuqutengnaqestemnun pivkaryaqunii!
2Aviullua assiilnguum caliaqestainek;
anirturnga tuqutarayulinek.
3Atam nayulriit tuqutnalua;
alingnarqelriit quyurrluteng inglulirnalua.
Assiilnguq atulqa pitekluku pinritaatnga, Ataneq.
4Pinarqutaileng'e'rma-llu
cukangnaqluteng ayalartut nayurvigkameggnun.
5 Ataneq Agayun Artuqailnguq,
Israel-aat Agayutkaatgen.
Tupagluten anucimirqecetaarki atanruvilget;
ilakuivkenaki assiilngurmek picirkiulriit.
6Atakuaqan ataam tailartut,
uirraniluteng qimugtetun tarralluteng nunarpagni.
7Niicugniki arivtellratni akeqnerrlugciluteng-llu.
Alungutait nuussirpagtun ayuqluteng,
tau͡gken umyuarteqluteng kitumun niiteksaicukluteng.
8Tau͡gaam elpet, Ataneq, engelarautekaten;
qacungakaten tamalkuita agayumanrilnguut.
9Pinin nalirrukenritaqa, Agayun,
wiinga qimagvikamken.
10Agayutma kenekngamia ullagciqaanga;
elliin tangerceciiqai inglukestenka cirlakumavkarluki.
11Tuqucaqunaki tau͡gaam, yum'a nalluyagucuaraat qaillun pillrat.
Pinilriaruuten cekavvluki piunrirki,
Ataneq, cayailkuciumastemta.
12Qanraqameng assiilngilartut, assiitellriarrlainarnek qalarcuameng;
napeskilit ellaita ucuryagutmeggnun.
Aniqlaayulriaruata iqlungarluteng-llu,
13eq'uqerrluten piunrirki;
piunrirki caunriqapiggluki.
Nutaan yuut nallunrirniaraat Agayutem atanirturicia Israel-aam yuinek,
nunam-llu yuinek tamalkuitnek.
14Inglukestenka tailartut atakuaqan,
uirraniluteng qimugtetun tarralluteng nunarpagni,
15tuar qimugtet neqkaiturluteng tarritellriit,
uirraniaqluteng camirtesciigataqameng.
16Wiinga tau͡gaam aturciqua pinin yuarutekluku;
unuakut tamalkuita aturpalarciqua kenkevnek.
Cayailkutekngamken wiinga,
qimagvikaqluten nanikuagaqama.
17Nanrautnek aturciqua elpenun.
Elpet, Agayun, uqisvikamken,
Agayun kenkutminek cakaniyuilngurmek nasvagilria wangnun.
Currently Selected:
Psalm 59: YPK
Highlight
Share
Copy
Want to have your highlights saved across all your devices? Sign up or sign in
Yupik Bible © 2012 American Bible Society. All rights reserved.
