Psalm 109
109
Qanemyuugautii Yuum Picurlaumalriim
1Nanraq'ngamni elpet, Agayun!
uitavkenak piicauteka niisgu!
2Assiitellriit iqlungalriit-llu curugaatnga.
Piciunrilngurnek picilirturaatnga
3eq'ukutnek-llu qalarrluteng tungemnun,
caulineqlua camek pitkaileng'e'rmeng.
4Ingluliuraatnga kenkengramteng
piicautelangramteng-llu.
5Assilriatgun pingramteng assiitellriakun akinauraqlua;
kenkengramteng eq'ukaqlua.
6Cucuklia piciunrilngurmek cuqcistem̄ek apqaurtekaanek inglukestem̄a,
picetaarutelluku elliin inglukestiinun.
7Qanercetaarumakan pinarqellriarunikilitgu;
piicagyaaqekan-llu assiilngirniluku!
8Tamaa-llu tuqukili;
allam-llu tukuutai piksagulluki!
9Irniari-llu elliraureskilit
nulirra-llu aipainrurrluni!
10Irniari calliggluteng cikircetaatuliureskilit;
ataki-llu ancimaluteng imumalrianek enenek uitavimeggnek!
11Akiilngirvik'lallran uayaaqiliu,
allanret-llu piksagulluki caliamikun unangkengallri.
12Kia watqapik takumcukenrilkiliu
wall'u irniari elli'iraurtellret aulukluki.
13Kinguvri tamarmeng tuqukilit,
elliin-llu atra neq'akumanriqili kinguliarin ciuqliitni.
14 Atanrem-llu neq'akekiliu ciuliarin assiiluciat,
aanii-llu au͡g'aritevkenaku assiilnguinek.
15 Atanrem nalluyagutenrilkiliki assiilnguit,
ellait tau͡gaam yuut nalluyagutqapiggluki pikilitki!
16Tuaten takumcukiyuunani yuullruuq;
tau͡gaam nangcilriaruluni tuqucilriaruluni-llu
arrsaulrianek, casciigalngurnek, enuqitellrianek-llu.
17Aniqlaagiyunqeggucimitun ellii-llu aniqlaamakili!
Atawaqaasqillerkani-llu eq'ukellrua taumek ellii-llu atawaqaasqumanrilkili!
18Aniqlaagillni atullrua aturaqellriatun;
ataki aniqlaagiyullra temiinun meciuskili mertun,
uqutun-llu cali enrinun meciulluni!
19Aniqlaatet aturatun patumakilitgu,
tamakunek naqungqauralriatun ayuqluni!
20 Ataneq, waten ayuqellrianek akiliqiki inglukestenka—
assiitellrianek qalarculriit tungemnun!
21Tau͡gaam, elpet Agayun Atanema, ikayuqia akqellrucirpetun,
aviullua kenkevgun assilriakun.
22Wiingau͡rluq arrsaugua enuqillua;
umyuamkun cakneq akngiringalua.
23Atakumi talinertairut'lauciatun catairutqatartua;
evcuusngalua ciissitun.
24Nereksaitellma ciisqugka piniarutak;
kemgiutqapiarlua tuaten.
25Yuut tangrraqamegten͞ga temcik'laraatnga;
qamiquteng tuaten ungaulugtaqluki qumliklua.
26Ikayurnga, Ataneq Agayutmaa!
kenken nangyuilan anirturnga!
27Inglukestemnun nallunritevkarru
elpenun tau͡gaam anirtuuciqa.
28Aniqlaayaaqeciqaatnga, tau͡gaam elpet atawaqerceciiqerpenga.
Ataki nangtestenka cirliqkilit,
wiinga-llu pistevni angnirlua.
29Kiaresngiacaram patumakiliki inglukestenka;
kasnguyullerteng aturluku aturatun qallirtun.
30Neptulua quyaciqua Atanermun;
Nanrarciqaqa yugugaat quyungqalriit takuatni,
31arrsaulriit anangnaqutelaaki,
anirturaqluki pinarqucirluki tuqucimallerkaatnek.
Currently Selected:
Psalm 109: YPK
Highlight
Share
Copy
Want to have your highlights saved across all your devices? Sign up or sign in
Yupik Bible © 2012 American Bible Society. All rights reserved.
