Malachi 2
2
1 Ataneq Artuqailnguq qanertuq agayulirten̄un, “Alerquun una elpecen̄un alerquutnguuq: 2Caliarpeciuggun atqa ucurnarivkarciu. Niicugniarkaunrilkuvciu qanelqa, aniqlaaciqamci. Atawaqauteci-llu aniqlaatngurciiqanka. Ilumun, ak'a aniqlaatngurtellruanka, tua-i-wa agayulirten͞guluci caliarci arcaqakenrilavciu. 3Anucimirqecetaarciqanka irniaci minguulluki-llu kegginaci anaitnun ungungssit ekuakengarpeci, ayagceciiqamci-llu ciuqamnek. 4Tuani nallunrirciqerci wangnun cikillrucirci mat'umek alerquutmek, tua-i-wa akqutka agayulirten̄un, kinguvrinun Levi-am, piuguraasqelluku.
5“Akqutemni akqellruanka unguvamek uitanqegcillerkaatnek-llu, mat'umek-llu cikillruanka, ellaitnun takaqesqellua. Tamakuni-llu ernerni takaqellruatnga qigciklua-llu. 6Elitnaurilallruut piciulrianek, piciunrilngurnek pivkenateng. Yuullruut-llu maligtaqulluteng wangnun; ellait-llu kiimeng piciulria aturluku pivkenateng, tau͡gaam amlleret ikayullruit assiilngurmek calinrirtelluki. 7Agayulirtet caliarkaqaat elitnaurutkarkauluku yugnun piciulria nallunritlerkaa Agayutem. Yuut ellaitnun ullaulluteng elicungcarnarqaat pisqutka, tua-i-wa qanertekngaki Atanrem Artuqailnguum.
8“Tau͡gaam maa-i elpeci agayulirten̄i avtuci piciulriamek tumyaramek. Elitnaurutevci amlleret alarcet'larait. Navgarci akqun pillgutekluci taqelqa. 9Taumek wiinga, caunrilkevkarciqamci Israel-aam yuinun tua-i-wa elpeci pisqutka atunrilavciu, elitnauraqavciki-llu yuunka, tamalkuita ayuqluki piksailavciki.”
Yuut Piciunritellrat Agayutmun
10Tamamta-qaa ataucimek atangqenritukut? Tamamta-llu-qaa ataucim Agayutem piliaqellrunritaakut? Ciin-mi tua-i ilamten̄un akqutelput atuqsaitelarceta, ciin-llu caunrilkeceta akqun ciuliaput pillgutekluki Agayutem taqellra? 11Judah-m yuin navellruat akqutseng Agayutmun taqulluteng-llu cakneq assiitellriamek Jerusalem-aami nunami-llu tamiini. Menuurtellruat Agayuvigpak Atanrem kenkekii. Angutet nulirtulartut arnanek agayutulinek agayutnun tangnerranarqellrianun. 12Kitaki Atanrem au͡g'arliki yuut Israel-aami waten pilriit, watqapik-llu ilagaucetenqigtevkenaki elliilrianun Atanermun Artuqailngurmun maani nunarpamten̄i.
13Wani-wa-llu cali alla pilallerci. Patulararci Atanrem ekuavia aluvivcen̄ek, aluviliurluci neplirluci tua-i-wa ciuniurnanriaki elliitet taitelci elliinun. 14Aptuci ciin ciuniurinanriucianek tamakunek. Tuaten piuq nallunrilamiu atunrilavgu akqutkellren nuliarpenun kassuutellerpetegni ayagyuarlutek. Aipaq'ngerpegu, akquten elliinun navellruan, akqillrung'e'rpet ciuqerrani Agayutem piciuluten piciqniluten elliinun. 15Agayutem-qaa atauciurcetellrunritaatek kemegkun anernerkun-llu? Ca-mi pitekluku tuaten pillrua? Tua-i tuaten pillruuq irniangesqellutek piciuluteng Agayutem yugkainek. Taumek pinritevkenaku ilavci navenrilkiliu akqutkellni nuliaminun. 16Ataneq Agayutii Israel-aam qanertuq, “Avvucaraq uumikaqa. Eq'urtelartua ilasi akngirnarqellriamek piaqan nuliaminun. Pinritevkenak navegyaqunaku akqillren piciugarkauniluten nuliarpenun.”
Erneq Qanercetaarillerkaq Canimelliuq
17Taqsuqevkararci Ataneq qalartellerpeciuggun. Tau͡gken elpeci aptuci, “Qaillun piluta taqsuqevkarceta?” Waten qanllerpeciuggun, “Ataneq Artuqailnguq umyuartequq assiilnguum caliaqestai assiryukluki; tua-i-llu-wa elliin tamakut assikekai.” Wall'u aptellerpeciuggun, “Nauwa tauna Agayun ellualria?”
Currently Selected:
Malachi 2: YPK
Highlight
Share
Copy
Want to have your highlights saved across all your devices? Sign up or sign in
Yupik Bible © 2012 American Bible Society. All rights reserved.