Malachi 3
3
1 Ataneq Artuqailnguq kiuguq, “Qanertekaqa ayagceciiqaqa tumkaqa uptesqelluku. Nutaan-llu Ataneq yuaqengarci alqunaq taiciquq Agayuvigpaminun. Qanerta-llu tangerrsuumiq'ngarci taiciquq qanrutekluku-llu akqutka.”
2Kia-kiq cavkenani tauna erneq aturyugnganiartau ellii taikan? Kina-llu nangerngayugngaciqa ellii alaiqan? Tuani ernermi taikuni ayuqeciquq miilatun tuknilriatun, kenertun carririlriatun assircarilriatun cavigmek. 3Ellii taiciquq cuqciyarturluni assircarilriatun avurrluirilriatun-llu qerrirlimek cavigmek. Cavignek calistetun assircarilauciatun qerrirlimek cavigmek suulutaamek-llu, tuaten Atanrem qanertiin menuiruciiqai agayulirtet, taitarkaurtelluki Atanermun elliitnek akurtuyunarqellrianek. 4Nutaan elliitet Judah-m Jerusalem-aam-llu yuin taitellrit Atanermun ilukegcinarqeciqut elliinun, ciungani pilallrucimegcetun.
5 Ataneq Artuqailnguq qanertuq, “Alairciqua akunlevcen̄un cuqcinalua, nallunairiciqua egmian tamakut inglulirluki angalkumirtaatulit, akusrarutekitulit, piciunrilngurmek-llu nallunairilalriit, teglegiyulriit-llu calistem̄eng akingutkaqsallritnek, arenqilitekluki-llu iqlutun pilartait aipainret elliraat allanret-llu, tamalkuita-llu tugerluki qigcikenritestenka.
Qulngurutet Elliitekumaarkat
6“Wiinga Atanruunga, cimiyuunii. Taumek elpeci, kinguvrini Jacob-aam, tamaqapigteksaituci. 7Elpeci, ciuliarpecicetun, avtellruuci alerquutemnek aturpek'naki-llu. Uterci wangnun, wiinga-llu uterrniartua elpecen̄un. Tau͡gaam elpeci aptuci, ‘Qaillun-mi piluta uterciiqseta elpenun?’ 8Wiinga aptamci, canrituq-qaa yuum teglegikuniu Agayun? Watqapik tuaten pingaituq, tau͡gken elpeci teglegiaqlua. Elpeci-llu qanertuci, ‘Qaillun teglegceta elpenek?’ Qulngurutevciuggun-wa elliitevciuggun-llu. 9Aniqlaamauci tamarpeci, tua-i-wa atanruviim yuin tamarmeng teglegiatnga. 10Qulngurutet ilakuivkenaki taiciki Agayuvigpagmun, neqkat nurnaitnaurtut enemni. Naspaacia pitassiarluku ikirusngailucirci qiliim egalrinek, kuvevikluci-llu uryulriamek atawaqautmek. 11Naucetaaci ciissiarnun piunrirtessngaitanka, wine-arkat-llu atsat naucetaaci nauluaqerciqut. 12Nutaan-llu atanruvilget tamarmeng yuita atawaqercecimalriaruniciqaiceci, tua-i-wa nunasi nunaksuuminarqelriaruciqngan.”
Agayutem Akqutii Naklekun
13 Ataneq qanertuq, “Qalartellruuci assiitellrianek wiinga pilua. Tau͡gken apluci, ‘Camek qalartellruceta elpet piluten?’ 14Elpeci waten qanellruuci, ‘Catngunrituq kevgiullra Agayutem. Cakanirciqseta qanellranek atuqumta wall'u wangkuta nasvakumteggu umyuarniullerput Atanermun Artuqailngurmun? 15Tangllemten̄i, ucuryagtellriit tau͡gaam yuut angnilartut. Assiitellriit yuut tukuurteqainarpek'nateng, tau͡gaam naspaalaraat-llu Agayutem pektayiilucia assiilngurnek calillermegteggun, tau͡gken qimagaqluku picurlallmeng nunuliutii.’”
16Tua-llu yuut Atanrem qigcikestai qanellgutkut, Ataneq-llu niicugniuq niilluku-llu qanellrat. Ciuqerrani, igaucimallruut kalikarnun qigcikestai takaqestai-llu Atanrem. 17Ataneq-llu Artuqailnguq qanerluni, “Taukut wiinga yuk'eciqanka. Tuani ernermi piarkaqa pikumku, nakmiillaqsaguciiqanka. Naklekciqanka-llu angayuqaulriim naklekilauciatun irniaminek kevgiurtem̄inek. 18Ataam yum'a tangenqigciiqaat niisngalriit ellualriakun-llu yuulriit ayuqenritellrat assiilngurmek calilriatun, kevgiulriit-llu wangnun ayuqenritellrat kevgiunrilngurtun.”
Currently Selected:
Malachi 3: YPK
Highlight
Share
Copy
Want to have your highlights saved across all your devices? Sign up or sign in
Yupik Bible © 2012 American Bible Society. All rights reserved.