Malachi 1
1
1Waniwa una qaneryaraq Atanrem cikiutekellra Malachi-amun qanrutkesqelluku Israel-aam yuinun.
Atanrem Kenkii Israel-aanun
2 Ataneq qanertuq yum'inun, “Kesianek kenkerrlainaramci.”
Tau͡gaam ellait kiugut, “Qaillun nasvallrusiu wankutnun kenken?”
Ataneq-llu kiuguq, “Esau-nkuk Jacob-aaq-llu anelgutkellruuk, Jacob-aaq tau͡gaam kenkellruaqa kinguvri-llu, 3eq'ukellruaqa-llu Esau kinguvri-llu; nunakarniirutellruaqa qemililria nunautii cakaarluku-llu yuilqurmiutarnun qimugten̄un jackal-aanun uitavikevkarluku.”
4Esau-m kinguvri Edomite-at, qanqata, “Nunarraput piunriumallruut, tau͡gaam ataam nauciiqaput,” Ataneq kiuciquq, “Ataam-wa nauskilitki—cali wiinga navgurciqanka. Yuut ap'larciqait ‘Assiilnguum nunii’ waten-llu ‘Angayuqauvik Atanrem qenruskii iquilngurmek.’”
5Israel-aam yuin man'a iimegteggun tangerciqaat, qanerciqut-llu, “Ataneq artuqaituq, Israel-aam-llu nuniin elatekengraaku tuaten ayuquq!”
Atanrem Nunurai Agayulirtet
6 Ataneq Artuqailnguq qanertuq agayulirten̄un. “Qetunraulriim takaqelaraa atani, pistem-llu takaqluku ataneni. Wiinga atakarpecia, ciin-mi tua-i takaqenricecia? Ataneqerpecia, ciin-mi qigcikenricecia? Elpeci caunrilkarpecia, tau͡gken apluci, ‘Qaillun piluta caunrilkillruceta elpenek?’ 7Waten pillerpeciuggun—elliiluci cakarniilngurnek neqkanek ekuavimnun. Tua-i-llu aptuci, ‘Qaillun piluta takaqiksaiceta elpenek?’ Qanrutnaamci—caunrilkellerpeciuggun ekuavika. 8Taiciaqavci cikmiumalrianek wall'u naulluutelegnek wall'u tussitellrianek ungungssiarnek ekuagarkanek, umyuartequci-qaa tuatnallerci canricukluku? Tuaten atam ayuqellriamek ungungssiarmek cikiqerciu nunam atanra! Ilukegcitekciqaci-qaa wall'u-qaa ikayungcallerci niilluku ikayurciqaaci?”
9Kitaki watua, elpeci agayulirten̄i, kaigaqerci Agayutmun naklekluta pisqelluta. Tuaten ayuqellrianek cikirluku pikuvci, elliin-qaa niiciiqaa kaigatsi? 10Ataneq Artuqailnguq qanertuq, “Ilavci-tuq tua-i Agayuviim amiigi palulliki, kenermek catngunrilngurmek kumarcisciigatevkarluci ekuavimni. Ilukegcitkenritamci; ciuniurngaitanka elliitet taitelci wangnun. 11Akertem pit'ellranek yaavet tevillranun ellam yuin tamarmeng takaqaatnga. Nani tamiini ekuagilartut tepkegcilrianek wangnun elliiluteng-llu akurtuyunarqelrianek. Tua-i-wa atqa angtatailan atanruvigni tamaitni. 12Tau͡gaam elpeci atqa caarrluurtelararci qanraqavci wii ekuavika catngunritniluku qainganun-llu elliigaqavci neqkanek umyualngukekevcen̄ek. 13Qanraqluci-llu, ‘Taqsuqutarput man'a wangkuta!’ ciukanirluci-llu ciuqamni. Wangnun-llu elliilartuci teglegamek ungungssiarmek wall'u tussitellriamek wall'u naulluutelegmek. Umyuartequci-qaa ciuniurinayuklua tuaten ayuqellriamek elliitevcen̄ek? 14Aniqlaamali piciunrilnguq ekuagilria cakarniilngurmek ungungssiarmek wangnun, katngautmini assilriamek ungungssiarautengqeng'e'rmi akqutkellerminek cikiutekciqniluku wangnun! Tua-i wii angelriarulua atanruama, yuita-llu tamarmeng atanruvilget qigcikaatnga.”
Currently Selected:
Malachi 1: YPK
Highlight
Share
Copy
Want to have your highlights saved across all your devices? Sign up or sign in
Yupik Bible © 2012 American Bible Society. All rights reserved.
