Luke 7

Anguyagtem Pistiin Canrircecimallra

1Tua-i-llu qaneryararkani qaqicamiki yuut niitelluki, Capernaum-aamun itertuq. 2Anguyagtet-llu atanerruarita iliita pistii kenkek'ngaa naulluuqapigtuq au͡gtarnaqluni. 3Taum-llu Jesus-aaq niicamiu, Jews-aat ciulirnerit ayagcetai unayaqesqelluku tailuku pisten̄i anirtuusqelluku. 4Taukut-llu Jesus-aamun tekicameng unayaqeqapigtaat, qanerluteng, “Tauna elpet ikayuayunarqan, 5kenekngakut wangkuta Jews-aarulriani, ellminek-llu agayuvilillruakut.” 6Jesus-aam-llu maligtai; tua-i-llu enemun tekitniararluku, atanerruam yugnikekni ayagcetai qanrucesqelluku, “Ataneq, uamcuumiitamken, tunriukucama taillerkarpenek enemnun, 7wangnek-llu ullanritamken ancurtuama. Tau͡gaam qanllerpegun pisteka canrircecugngaan. 8Wiinga-llu pisten͞guunga atanerni, anguyagtet ataniumaluki; una ayaasqekumni ayagarkauguq, una-llu taisqekumni taigarkauluni, pisteka-llu qaillun pisqekumni tuaten piciquq.” 9Jesus-aam-llu makut niicamiki irr'ikaa, malini-llu cauluki qanrutai, “Waten pitalriamek ukvermek nataquteksaitua, Israel-aani tuaten.” 10Ayagcecimallret-llu taukut enemun utercameng tangrraat pista assirillinilria.

Aipainrem Qetunraanek Makcecillra

11Tamatum-llu kinguaraani nunamun Nain-amek at'legmun ayallruuq, elitnaurain-llu yugugaat-llu maligtaat. 12Tua-i-llu nunam amiiganun tekitniararluteng, tangerrluku tuqumalria akigarluku anuskiit, wani-wa arnam kiingan yua, aipainruluni-llu tauna; yugugaat-llu maliggluku tuaken nunanek. 13Atanrem-llu tangrramiu takumcukaa, qanrulluku-llu, “Qiavkenak.” 14Elliin-llu ullagai akigautiit-llu agturaa, akigartai-llu arulairtut. Elliin-llu qanrutaa, “Yun'erraaq, qanrutamken makten.” 15Tuqulleq-llu maktuq qallalluni-llu. Aaniinun-llu tunaa. 16Tamarmeng-llu irrayugtut, Agayun-llu nanraraat qanerluteng, “Prophet-aapiaq wangkutni alairtuq! Agayutem-llu yun'i paqtai.” 17Tamana-llu picia niitaat Judea-mi tamiini avatiini-llu tamiini.

John-aam Angllurcecistem Kangiituutii Jesus-aamun

18John-aaq-llu elitnaurain makunek qanrutaat. 19John-aam-llu elitnauragni ellminun taisqak ayagtellukek-llu Atanermun, aptesqelluku “Taunguuten-qaa tekitarkaq, wall'u-qaa ayualta?” 20Yuuk-llu taukuk tekicamegnegu qanertuk, “John-aam-wa Angllurcecistem taivkaraakuk elpenun aptesqelluten, ‘Taunguuten-qaa tekitarkaq, wall'u-qaa allamek yualta?’” 21Tuani-llu nalliigni amlleret canrircetai naulluulriit apqucilget-llu, anernerrlulget-llu, cikmiumalriit-llu amlleret tangerrsaurcetai. 22Kiugak-llu, “Kitaki John-aaq qanrucarturtegu tangllerpetegnek niitellerpetegnek-llu. Tang, cikmiumalriit tangerrsaurtut, tussitellriit-llu tussitenrirluteng, mamyuilngulget-llu carriumaut, niicuilnguut-llu niicaurtut, tuqumalriit-llu unguirluteng, naklegnarqelriit-llu qarutaarumaut qaneryaraqegtaarmek. 23Atawauguq-llu kina imna wangni cangayuutailnguq.”

24John-aam-llu nallunairturistek ayiignek, yugugaat qanrutai John-aaq pitekluku, “Camek tangerrnayukluci yuilqumun ayallruceci, naunrarmek-qaa anuqem arulaskiinek? 25Tau͡gaam camek tangerrnaluci ayallruceci? Yugmek-qaa aturaqegcilriamek? Tangerciki tamakut aturaqegcilriit cayuuminrilnguut-llu atanret enaitni uitalartut. 26Camek-mi tangerrnaluci ayallruceci? Prophet-aamek-qaa? Ilumun, qanrutamci, prophet-aam piunranek. 27Taunguuq pitekluku igausngalleq waten: ‘Tangerrluku nallunairturisteka ciunerpegun ayagcetaqa, tumkan upcesqelluku ciuvni.’ 28Qanrutamci, arnatgun yuurtellerni John-aami angenrulriartaituq. Tau͡gaam kina imna Agayutem angayuqauviani mik'ngermi elliini angenruuq.” 29Yuut-llu tamarmeng akiliqurautnek-llu quyurcistet niicameng Agayun ellualriaruniat, John-aam angllurceciyaraakun anglluumiimeng. 30Tau͡gaam Pharisee-aat, kalikanek-llu elisngalriit Agayutem picirkiutii cakaaraat elliikun anglluryullrunrilameng.

31Ataneq-llu qanertuq. “Catun makut yuulgutkelriit ayuqekuciiqsia, catun-llu ayuqniciqsia? 32Imkucetun mikelngurcetun tuneniarvigmi aqumgalriatun ayuqut. Tamakut atunem qanpagatelartut waten, ‘Aturcetaarutengramceci yuranrituci, qalervallrungramta qianrituci.’ 33Tua-i John-aaq tekitellruuq kelipamek nereksaunani, wine-amek-llu meqsaunani, tau͡gken qanlartuci, ‘Anernerrlungqertuq.’ 34Yuum-llu Qetunraa tekituq ner'aqluni mer'aqluni-llu, elpeci-llu qanlartuci, ‘Tangerrluku, neryunqeggli taangaryunqeggluni-llu, akiliqurautnek quyurcistet assiilngurtulriit-llu yugnikestiit!’ 35Tau͡gaam umyuartuneq umyuartulriatgun nallunaitelartuq.”

Jesus-aam Minguumallra Simon-aam Eniini

36Pharisee-aat-llu iliita neryartuusqaa ellmini. Ellii-llu Pharisee-aam eniinun itertuq nerellguciulluni-llu. 37Tangerrluku-llu taumi nunami, arnartanqellruuq assiilngurtulriamek, tauna Pharisee-aam eniini nerucianek niicami tepkegcautmek ullautuq, 38it'gain-llu caniatni teruani nangengqaluni qiaguq, it'gai-llu mecungtai aluviminek, nuyaminek-llu perrirluki, melugarluki-llu it'gai, tepkegcautmek-llu mingugluki.

39Tua-i-llu Pharisee-aam, kelegtiin man'a tangrramiu umyugaa qannguq, “Una yuk prophet-aarukuni arnam uum agturastem̄i kituucia assiilngurtucia-llu elpeksaraa.” 40Jesus-aam kiugaa waten, “Simon, camek qanrucugyaaqamken.” Tauna kiuguq, “Elitnauristaa, kitaki qanra.” 41“Yugtangqellruuq akinek navrarcecilriamek. Tauna navrarcecillruuq yuugnun malrugnun. Aipaa akiilngungluni yuinarnek qulnek yuinarmek cipluki, aipaa-llu yuinaagnek malrugnek qulnek ciplukek. 42Tua-i-llu cimiritkailagnek, tamarkenka akiilnguirucetak. Tua-llu naliagnek taukuk tauna kenkenruciqau?” 43Simon kiuguq, “Taum-wa akiilngulinrulriim pinruciqlikii.” Qanrutaa-llu, “Cuqteluaqeran.” 44Arnaq tuiggvikluku Simon qanrutaa, “Murilkan-qaa una arnaq? Enevnun it'nge'rma it'gama eruutekaatnek cikinritarpenga, tau͡gaam uum it'ganka mecungtai aluviminek, nuyaminek-llu perrirluki. 45Elpet meluganritarpenga, tau͡gaam uum itraanemnek it'ganka melugarai. 46Qamiquqa-llu elpet mingullrunritan, tau͡gaam uum it'ganka mingullrui tepkegcautmek. 47Taumek qanrutamken, assiilngui amlleng'e'rmeng au͡gaumaut kenkitacimitun. Kenkimyalria ayuqiinek assiilnguirumamyalartuq.” 48Qanrutaa-llu, “Assiilnguirumauten.” 49Nerellgutain-llu umyugait paqnayungartut, “Kina una, assiilnguiriluni tuaten?” 50Arnaq-llu qanrutaa, “Ukverpet anirturaaten, ayii tuaten uitanqegcimelkina.”

Currently Selected:

Luke 7: YPK

Highlight

Copy