Luke 8

Anirtullrin Arnat Kevgiuraat

1Tamatum kinguaraani nunarpiit nunarraat-llu ullagtaarai, qaneryariurluni Agayutem qaneryaraqegtaaraanek, malingqerrluni-llu imkunek qula malrugnek cipnelegnek, 2cali-llu arnanek anirtuumallernek anernerrluitnek, apquciitnek-llu: wani-wa Mary (at'lek Magdaleni), elliinek anernerrluut malrunelgen anellrulriit; 3Joanna-llu, Chuza-m, Herod-aam pistiin nulirra; Susanna-llu, allat-llu cali amlleret; tamakut aulukaat pimeggnek.

Nauceciiyurta

4Tua-i-llu yugugaat quyurrvikngatni nunanek-llu tamaitnek tekiqluteng elliinun, cuqyutkun qalaruciuq waten, 5“Nauceciiyurta nauceciiriyarturtuq, nauceciirillrani-llu ilait pekcaramun tut'ut, tutmaumaluteng-llu, yaqulget-llu nerait. 6Allat teggalqunun tut'ut, naugarqaarluteng-llu nalaut mecuilameng. 7Allat-llu naunerrluut akuliitnun tut'ut, naunerrluut-llu naullgutekngamegteki nauviirait. 8Allat-llu nunamun assilriamun tut'ut, naungameng mukaarkangut, atauciq yuinarnek tallimanek.” Makunek qanrumariami qayagauq, “Ciutengqellria niilli.”

9Elitnaurain-llu aptaat cuqyutem mat'um caucianek. 10Qanertuq-llu, “Elpeci cikiumauci cauciitnarqelrianek Agayutem angayuqauvian piinek, allat tau͡gken cuqyutkun pimaut tua-i tangvang'e'rmeng tangerrngailameng, niitelange'rmeng-llu taringengailameng. 11Wani-wa cuqyutem kangia: naucetaarkaq Agayutem qaneryaraqaa. 12Pekcaramelnguut niitellriaruut, tuunrangayiim-llu ullagluki teguilarai qaneryaramek ircaqruitnek, ukvernayukluki anirtuumallerkaatnun. 13Teggalqumelnguut maa-inguut, niitaqameng qaneryaraq angniutek'laraat, acilqurrilameng-llu carrarmi ukvelartut, naspaamaaqameng-llu kingupialartut. 14Naunerrlugnun-llu tut'ellriit maa-inguut niitellriit, tua-i-llu yuunginanermeggni unguvam nunamiutaam arenqiallugutain, tukuutain-llu, ayarinarqelriarin-llu nauviirait atsangluaqerciigatevkarluki. 15Nunakegtaarmun-llu tut'ellriit waniwaugut imkut ircaqumegteggun piciulriit, elluatuuluteng-llu, qaneryaraq niitaqamegteggu piksuumilaraat, atsangqerrlainarluteng-llu egmianun.

Kenurraq

16“Yuk-llu kenurraraqami camun palurusngaitaa, ingleret-llu aciatnun ellingaunaku; tau͡gaam kenurrarvigmun elliciqaa itellrianun tanqia tangrresqelluku. 17Iirumalriartailan alailngailngurmek, aassaqek'ngartailan-llu taringumaarkaunrilngurmek, alailngailngurmek-llu. 18Taumek niitellerci murilkiciu, piutellek cikiumaarkauguq, piilnguq-llu teguimaarkauguq piksukellrinek tuaten.”

Jesus-aam Aanii Anelgutai-llu

19Tua-i-llu aanii anelgutai-llu elliinun tekitut, tau͡gaam ullagciigataat yugyiin. 20Tua-i-llu qanrutaat, “Atam aanan anelguteten-llu kegga'antut yuarluten.” 21Tau͡gaam kiugai, “Agayutem qaneryaraanek niitellriit atulriit-llu, maa-i aananka, anelgutenka-llu.”

Anuqem Arulairtellra

22Tua-i-llu caqerluni erenret iliitni angyamun ek'uq ellii elitnaurani-llu, qanrutai-llu, “Agaavet qeralta nanvam akianun.” Ayagluteng-llu. 23Tau͡gaam tengalrainanermeggni ellii qavartuq. Tua-i-llu cayukartuq tuani nanvami, ekurluki-llu mer'em, uivagnaqluni-llu. 24Ullagluku-llu tupagtaat, qanerluteng, “Ataneq, Ataneq, akacakatartukut!” Tupiimi-llu anuqa qairet-llu inerqurai, arulairtut-llu, quunengluni-llu. 25Qanrutai-llu, “Nauwa ukverci?” Alingluteng irriut qanruyulluteng waten, “Kina una, anuqem mer'em-llu niisngaan'gu inerquatek?”

Anernerrlulgem Canrircecimallra

26Tua-i-llu Gadarenes-aarmiut nuniitnun tekituq, Galilee-am akianun. 27Nunamun-llu tagngan yuum tuaken nunanek anvikaa. Tauna anernerrlungqertuq ak'anek aturaunani enemeteksaunani-llu tau͡gaam qunguni. 28Jesus-aaq-llu tangrramiu qayagpagtuq, ciuqerranun-llu palurrluni qastuluni qanertuq, “Cakciqsia elpet Jesus-aaq, Agayutem Quyinrulriim Qetunraani? Kaigavikamken nangcesqevkenii.” 29Tua-i anernerrluk anesqellruani tuaken yugmek. Pulengtaq anernerrluum tekitelaraa, auluk'laryaaqaat-llu qilleqluku-llu kalivnernek; tamakut-llu kevkaqluki anernerrluum yuilqumun ayautelaraa. 30Jesus-aam-llu aptaa, “Kituusit?” Qanertuq-llu, “Legion-aaq,” tua-i anernerrluut amlleret itervikliniatgu. 31Kaigavikaat-llu ayagcesqevkenateng petmigmun. 32Tua-i-llu sitiinkaarugaat katngat tuani ingrimi uitaut nerluteng. Kaigavikaat-llu taukunun iteryugluteng. Pisqai-llu. 33Anernerrluut-llu tuaken yugmek anngameng sitiinkaanun itertut, taukut-llu katngat pen̄akun atraqertut nanvamun, qecuqilluteng-llu. 34Tua-i-llu sitiinkaat tarikestait tuaten pillrat tangrramegteggu, qimagtut, nunani-llu avatiitni-llu tamana qanrutkaat. 35Tua-i-llu yuut tuaken tekitut tamana tuaten pilleq tangerrsarturluku. Jesus-aamun-llu tekicameng yuut tauna anernerrlungqelleq tangrraat Jesus-aam ciuqerrani aqumgaluni, ellangqerrluni aturangqerrluni-llu; ellait-llu irrayugtut. 36Tangvagtellrin-llu qanemcitait qaillun anernerrlungqelleq canrillrucianek. 37Gadarenes-aarmiut-llu tamarmeng kaigavikaat avatmeggnek ayaasqelluku civuurangameng. Ellii-llu angyamun ekluni utertuq. 38Tau͡gaam taum anernerrlungqellrem maligcugyaaqaa, tau͡gaam elliin pisqenritaa qanerluni, 39“Uterten nunavnun, apervikualuki-llu qaillun pitalriamek Agayutmun pillrucirpenek.” Tua-i-llu ayagluni nunarpagmi tuani tamiini qalarutkaa qaillun pitalriamek Jesus-aamun pillrucini.

40Jesus-aaq-llu utercan yugugaat ciuniuraat nerinikngamegteggu.

Jairus-aam Pania Kaigaskiit

41Tangerrluku-llu yuk ullautuq Jairus-aamek at'lek, agayuvigmi atanrulria. Jesus-aam-llu ciuqerranun palurtuq, unayaqaa-llu eneminun taisqelluku, 42kiingan panini qulen malrugnek cipluku allrakungelria naulluungan au͡gtarnaqluni.

Tau͡gaam ayallrani, yugugaat qerrlerutaat.

Augmek Apqucilgem Canrircecimallra

43Arnaq-llu qulen malrugnek cipluki allrakuni aunralria, yungcaristen̄un-llu pini tamalkuita nangellruluki, assirisciiganani-llu, 44kingunrakun taiguq aturaan-llu akuakun agturaa; egmianun-llu aunrallra taq'uq. 45Jesus-aaq-llu qanertuq, “Kia agturtanga?” Tamarmeng meciriita, Peter ilani-llu qanertut, “Tang, yugugaat quugaruskiitgen, qerrlerulluten-llu.” 46Tau͡gaam Jesus-aaq qanertuq, “Iliita agturaanga, elpekngamku pinim anucia wangnek.” 47Tua-i-llu arnam nallunrilucini elpekngamiu ullautuq uuleggluni, ciuqerranun-llu palurrluni yuut tamalkuita niitelluki ca pitekluku agtullruciminek, egmianun-llu anirtuumaciminek qanrutaa. 48Qanrutaa-llu, “Paniik, ukverpet anirturaaten, ayii uitanqegcimaluten.”

Jairus-aam Panian Makcecimallra

49Cali qallasnginanrani, agayuviim atanran yuin iliit tekituq qanerluni, “Paniin tuquuq, uamtenrilgu Elitnaurista.” 50Jesus-aam niicamiu kiugaa, “Civuuravkenak, ukvera tau͡gaam, assiriciquq.” 51Tua-i-llu enemun tekicami, yuut itresqenritai Peter tau͡gaam John-aaq-llu, James-aaq-llu nasaurluum-llu angayuqak. 52Tamarmeng-llu qiagut neplirluteng pitekluku; tau͡gaam qanertuq, “Qianrici, tuqunrilan, tau͡gaam qavartuq.” 53Engelarautekaat-llu usviilkelluku, nallunrilamegteggu tuqucia. 54Tau͡gaam elliin unataikun teguluku, aterpaggluku qanrutaa, “Nasaurluuq, makten.” 55Ataam-llu anernenguq, nangerrluni-llu egmianun. Elliin-llu ellimertuutaa nerevkaasqelluku. 56Angayuqaak-llu alangaartuk; tau͡gaam elliin inerqurai kitumun qanrutkesqevkenaku tuaten pillni.

Currently Selected:

Luke 8: YPK

Highlight

Copy