Luke 6

Mukaarkanek Qecuutellrat Agayunermi

1Cat iliitni Sabbath-aami, mukaarkat tumkai, elitnaurai-llu kangritnek qecuulluteng uluggaarluki ner'ut. 2Tau͡gaam Pharisee-aat ilait qanertut, “Ciin tuaten piceci pisqutngunrilngurmek Sabbath-aami?” 3Jesus-aam-llu kiugai, “Naaqiksaituci-qaa David-aam picillranek kaillermini, ilani-llu, 4qaillun Agayutem eniinun itellra, kelipanek-llu tangrresqutnek tegulluni nerellra, ilani-llu cikirluki; waniwa cailkanun neresqumanrilnguut, agayulirten̄un tau͡gaam?” 5Cali qanrutai, “Yuum Qetunraa agayunermun tuaten atanruuq.”

Nalamalrianek Unatellgem Canrircecimallra

6Tuamta-llu Sabbath-aami cali, agayuvigmun itellruuq elicungcariluni-llu. Yuk-llu tuantuq tallirpilirneret unatai nalamaluteng. 7Igatulit Pharisee-aat-llu kellutekaat Sabbath-aami canrircecinayukluku, waniwa ayagnerkarcuameng. 8Tau͡gaam elliin umyugait nalluvkenaki, unatelek nalamalrianek qanrutaa, “Tailuten nangerten wavet.” Tauna-llu nangertuq tailuni-llu. 9Nutaan Jesus-aam qanrutai, “Apetnaamci, naliak elluanrua Sabbath-aami atawamek piluni, wall'u atawaunrilngurmek, unguvavkariluni wall'u tuquvkariluni?” 10Kassutmun kiarqaarluki imna qanrutaa, “Unateten yageski.” Tuaten-llu piuq. Unatai-llu canrirtut. 11Tau͡gaam ellait eq'uqertut, qaillukuartut-llu qaillun pillerkameggnek Jesus-aamun.

12Tamatum-llu nalliini ingrimun ayagtuq piicagyarturluni, unugpak-llu taqeksaunani piicagtuq Agayutmun.

Qula Malrugnek Cipnelget Nakmikumallrat

13Ercan-llu elitnaurani taisqai, taukunek-llu nakmikiuq qula malrugnek cipluku, taukut-llu acirai apostle-aanek. 14Wani-wa Simon, Peter-aamek aciraa, Andrew-llu anelgutii, James-aaq-llu, John-aaq-llu, Philip-aaq-llu, Bartholomew-llu, 15Matthew-llu, Thomas-aaq-llu, James-aaq-llu Alphaeus-aam qetunraa, Simon-aaq-llu cumignerulria, 16Judas-aaq-llu James-aam qetunraa, Judas-aaq-llu Iscariot-aaq, tunestekaa.

Marami Qalarucillra

17Malikluki-llu atrartuq manilriamun. Elitnaurarugaat-llu yugugaat-llu, Judea-mek tamiinek, Jerusalem-aamek-llu, imarpiim cen̄iinek-llu Tyre-amek, Sidon-amek-llu, 18tailriit niicugluku, anirtuusqumalriit-llu apqucimeggnek. Anernerrlulget-llu anernerrluirumallruut. 19Yugugaat-llu agturyuumiryaaqaat, pinia elpegnaqngan, anirturai-llu tamalkuita.

20Tua-i-llu elitnaurani tangerrluki qanrutai,

“Atawaqertuci elpeci naklegnarqelriani,

Agayutem angayuqauvia pikngavciu.

21Atawaqertuci elpeci kailriani watua maa-i,

camirciiqngavci.

Atawaqertuci elpeci iluteqcaralriani watua maa-i,

nunaniryugciqngavci.

22“Atawaqertuci yuut uumikekaceci, nallunguarluci-llu, qumlikluci-llu; picilirluci-llu Yuum Qetunraa pitekluku. 23Tuani angniqici, qecgaurluci-llu angnim ugaani, akiliutsi angengan qilagmi, tuaten-llu ciuliarita prophet-aat pillruitki.

24“Tau͡gaam nakleng elpeci tukuulriani!

Akiliumariavci ak'a.

25Nakleng elpeci kainrilngurni watua maa-i,

kaigciqngavci;

Nakleng elpeci angnirrlainalriani watua maa-i,

qiaciqngavci neplialuci-llu.

26“Nakleng elpeci, yuut tamarmeng assikekaceci, tua-i tuaten cali ciuliarita prophet-aat piciunrilnguut pillruit.

27“Tau͡gaam niicugnistem̄aa qanrutamci: Kenkiciki inglukesteci, atawakiciki uumikesteci. 28Atawaqaasqiciki aniqlaasteci, piicauciki qumlikesteci. 29Yuum qacareskaten ulluvavgun, inglua-llu manikiu; yuum-llu qasperen tegukaku, paltuugen cali qunuksaqunaku. 30Elpenun-llu cikiisqellria cikirru. Pivnek-llu tegutelleq tungcariyaqunaku. 31Qaillun-llu pisqumaaqavci yugnun, tuaten-llu pilarmikiciki.

32“Kenkesceci kenkekuvciki nallaitgun, nau͡gg'un ilukegcinarqeciqseci? Tua-i assiilngilriarung'e'rmeng kenkesteteng kenkelaamegteki. 33Pinqegciucesceci nallaitgun pinqegciutelaquvciki nau͡gg'un ilukegcinarqeciqseci? Tua-i assiilngilriarung'e'rmeng tuaten pilartut. 34Navriskengkuvci-llu cimirarkanek, nau͡gg'un ilukegcinarqeciqseci? Tua-i assiilngilriarung'e'rmeng navriskenglaameng ilameggnun cimirarkaitnek. 35Tau͡gaam inglukesteci kenkiciki, elluarrluki-llu piluki, navriskenglarnaurtuci-llu cimirarkaunrilengraata, tuaten akiliutengqerciquci qetunraugarkauluci Quyinrulriamun, tua-i ellii naklegtaungami quyatuilngurnun qunuyulrianun-llu. 36Takumcutarci, Atavci Takumcukilauciatun.

37“Cuqciyaqunaci ilavcen̄ek, cuqcimanritnaurtuci; picirkiriyaqunaci, picirkiumanritnaurtuci; au͡g'aricici au͡g'aricimanaurtuci. 38Cikiqengici, cikiumanaurtuci, muirtepialriamek angalalluni, negtaarumalriamek, uryulriamek-llu kenirpecen̄un. Cuqyutevciuggun cuqcimaarkauguci.”

39Cuqyutmek-llu qalarutai, “Cikmiumalriim-qaa cikmiumallgutni pekyuciiqaa? Tamarmek-qaa iggngaituk ilutulriamun? 40Elitnauraq angenrunrituq elitnauristem̄ini, tau͡gaam kina imna eliskuniki elitnauristem̄itun ayuqarkauguq. 41Ciin-llu verun mikengraan tangvagciu ilavet iingani, tau͡gken veruten angelria iigpeni elpekumavkenaku? 42Wall'u qaillun qaneryugngasit ilavnun, ‘Veruten au͡g'arnaurqa iivnek,’ amta-llu elpet veruten elpekumavkenaku? Usuuq malrugnek umyualegmi, ciumek veruten anterraarru iivnek, nutaan mecingqerrluten ilavet verutii iinganek anetnauran.

43“Tua-i napa assilria atsangengaituq assiilngurnek, tuaten-llu napa assiitellria atsangengaunani assilrianek, 44napat tamalkurmeng nallunaitelaameng atsamegteggun. Tua-i atsat fig-at iqvaumaksaitut naunerrlugnek, wine-at-llu atsat iqvaumaksaunateng cukilananek. 45Yuk assilria ircaqumini elluamek qemangqaallerminek nasvagilartuq, tau͡gaam elluanrilnguq ircaqumini elluanrilngurnek qemangqaallerminek nasvagilartuq. Tua-i-wa ircaqum qemangqaiciatun qanraqami qanlartuq.

46“Ciin-llu tuqluraralarcecia, ‘Ataneq, Ataneq,’ amta-llu pisqutenka aturyugpek'naki? 47Kina imna wangnun tailria, qaneryaramnek-llu niitellria aturluki-llu, taum ayuqucia qanruteknaurqa. 48Tauna enelilriatun ayuquq, tua-i elagtuq aciqvanun, inguqiriluni-llu qiurmun; tua-i-llu ulngan carvanrem ciuneqaa 'laavkaaq tauna, tau͡gaam angalacesciigataa, tua-i elluarrluni taqumiimi. 49Tua-i-llu niitellria tau͡gaam aturyugpek'naki, tauna enelilriatun inguqiciriyunrilngurtun ayuquq. Carvanrem-llu ciuneqngaku, ussutaa egmianun, piunriqapiggluku-llu.”

Currently Selected:

Luke 6: YPK

Highlight

Copy