Luke 5

Cangliqellrat

1Tua-i-llu cat iliitni nanvam Gennesaret-am cen̄iini nangerngallrani yugugaat quyurrvikngatni cumigtem pitaciatun, Agayutem qaneryaraa niitnaluku. 2Ellii angyagnek tangertuq nanvam cen̄iini, tau͡gaam neqsurtet yuumaluteng kuvyateng eruryarturluki. 3Ellii-llu tamakuk aipaagnun ek'uq, wani-wa Simon-aam pianun, taumun-llu ketvaqaniisqaa. Aqumluni-llu yugugaat elicungcarai tuaken angyamek. 4Qallatellerminek taqngami, Simon-aaq qanrutaa, “Et'ulriamun ayagluten kuvyan civesgu.” 5Simon-aam-llu kiugaa, “Ataneq, unugpak errvianun cakviullruyaaqukut catevkenata-llu! Tau͡gaam pisqen͞gavnga civciiqua.” 6Tuaten-llu piameng, cangliqut neq'rugarnek, kuvyait-llu allgurluteng. 7Tua-i-llu ilateng angyam aipaani uitalriit nulurarait ikayuusqelluteng. Taukut-llu taigut; angyak-llu muiragket kic'ukaarlutek-llu. 8Tua-i-llu Simon-aam Peter-aam man'a tangrramiu, Jesus-aam ciuqerranun ciisqumigtuq qanerluni, “Unisnga, tua-i assiilngurtuama, Ataneqa!” 9Tua-i irriami, ilani-llu neq'liqucimeggnek tuani. 10James-aaq John-aaq-llu Zebedee-am qetunrak, Simon-aam angyamtellgutek, cali tuaten piuk. Jesus-aam-llu Simon-aaq qanrutaa, “Alingevkenak, wak'nirnek yugnek cangciquten.” 11Tagngameng-llu, angyateng unitait maliggluku-llu.

Mamyuilngurmek Canrircecillra

12Tuamta-llu nunat iliitni uitallrani, yuum ullagaa mamyuilngurmek apqucilgem. Jesus-aaq-llu tangrramiu ciuqerranun put'uq, kaigavikluku-llu qanerluni, “Ataneq, piyukuvet, carriyunarqerpenga.” 13Unatni-llu yagtai, agturluku-llu qanertuq, “Piyugtua, carriuten.” Egmianun-llu apquciirutuq tamatumek. 14Inerquraa-llu, “Kitumun qaneryaqunak, tau͡gaam ayii agayulirtem̄un-llu nasvagyarturluten, carriucin-llu pitekluku Moses-aam alerquutekellra ellikiu, tamakut nallunriutekaatnek.” 15Tau͡gaam ilangcivkenaku niitnaullra sekavvngiinartuq, yugugaat-llu quyurrvikaat niitnaluteng anirtuusqumaluteng-llu apqucimeggnek. 16Tau͡gaam ellii yuilqumun ayagtuq piicagyarturluni.

Pekcesciigalngurmek Canrircecillra

17Tuamta-llu tamatum nalliini, ernermi elicungcariuq Pharisee-aat-llu Kalikanek-llu elisngalriit tuantut, taillruluteng Galilee-am nunatainek, Judea-m-llu nunatainek, Jerusalem-aamek-llu, anirturiyunarivkaraa-llu Atanrem pinian. 18Tangerrluku-llu angutet pekcesciigalnguq akigarluku ullautaat. Itervigkaiturtut-llu ellinaluku ciuqerranun. 19Itlerkangenrilameng-llu yugyagpakaan enem qainganun mayurtut, enem-llu qiliin ilii callarqaarluku aqevlertaat, inangqavigtuumaan Jesus-aam ciuqerranun. 20Ukvertaciat-llu tangrramiu qanertuq taumun yugmun, “Assiilnguirumauten.” 21Igatulit Pharisee-aat-llu ayagnerkarcurtut qanerluteng, “Kina una piciliutekiluni qallata? Kina Agayutngunrilnguq assiilnguiriyugngaa?” 22Tau͡gaam Jesus-aaq elpengami ayagnerkarcuuciatnek kiugai, “Ciin umyuangcarceci ayagnerkarpecen̄ek? 23Ukuk naliak qacignarqenrua, qallatellerkaq, ‘Assiilnguirumauten,’ wall'u waten qanerluni, ‘Nangerrluten piyuagi?’ 24Tau͡gaam nallunricesqelluci Yuum Qetunraan nunam qaingani assiilngurmek au͡g'ariyunarqucianek.” Nutaan pekcesciigalnguq pia, “Qanrutamken, nangerrluten, inarcessuuten teguluku enevnun ayii.” 25Egmianun-llu nangertuq takuatni, inarcessuutni-llu teguluku eneminun ayagtuq, Agayun tuaten nanrarluku. 26Tamarmeng-llu irr'iqapigtut, Agayun-llu nanraraat alingniurluteng-llu qanraqluteng, “Ernerpak wangkuta tangnerranarqelriamek tangellruukut!”

Levi-am Kelgumallra

27Tamatum kinguani ayagtuq, akiliqurautnek-llu quyurcista, Levi-amek at'lek, tangrraa akiliqu'urvigmi aqumgaluni, qanrutaa-llu, “Maligesnga.” 28Taum-llu cat tamalkuita pegtai, nangerrluni-llu maligtaa. 29Tauna-llu Levi enemini nerevkariuq angelriamek, yugyagluteng-llu akiliqurautnek quyurcisten̄ek allanek-llu, nerellgutekluki. 30Tua-i-llu Pharisee-aat igartaita-llu elitnaurai qanemyuugautekait qanerluteng, “Ciin akiliqurautnek quyurcistet assiilngiumalriit-llu nerellgutek'larciki, mellgutekluki-llu?” 31Jesus-aam kiugai, “Caciilnguut yungcaristem̄ek pinarqenritut, apqucilget tau͡gaam. 32Tainritua ellualrianun, tau͡gaam assiilngilrianun umyualinqigcesqelluki.”

Yagyaraq

33Tua-i-llu qanrutaat, “John-aam elitnaurai yaalartut kaigcirluteng, piicagaqluteng-llu, tuaten-llu cali Pharisee-aat elitnaurait pilarmiut, tau͡gken elpet piten nerlartut merluteng-llu.” 34Jesus-aam-llu qanrutai, “Uikautem-qaa uitallgutai yagceciiqaci uikaun ellaitnelluku? 35Tau͡gaam cam iliiniku uikaun ellaitnek tegumakan tuani yagciqut.” 36Cuqyutmek cali qanrutai, “Yuk-wa ilaariksaitelartuq nutaramek ak'allarmun, nutaraq caunrirciqngaku, ak'allaam-llu nutaraq ayuqevkenaku. 37Tuaten-llu yuum wine-aq nutaraq imiuteksaitelaraa caqunun ak'allarnun, caqut qagerciiqngaki, wine-aq-llu maqluni, caqut-llu caunrirluteng. 38Tau͡gaam wine-aq nutaraq caqunun nutaranun imiutnarquq. 39Yuk-llu wine-amek ak'allarmek merraarluni, nutaraq cucukngaitaa. Qanerciquq-llu, ‘Ak'allaq assinruuq.’”

Currently Selected:

Luke 5: YPK

Highlight

Copy